གནའ་བོའི་སྐུ་བརྙན་རྙེད་སོན།

ཉེ་ལམ་རྒྱ་གར་ཨུ་དྷར་པར་དྷེ་ཤི་མངའ་སྡེའི་གྲོང་གསེབ་ཞིག་ནས་དུས་རབས་དང་པོའི་སྐབས་ཀྱི་སངས་རྒྱས་བཅོམ་ལྡན་འདས་ཀྱི་སྐུ་བརྙན་ཞིག་དང་སྐུ་འདྲ་གཞན་ཁག་གཅིག་རྙེད་འདུག

དེ་རིང་རྒྱ་གར་དུས་བབ་ཐོག་གནས་ཚུལ་སྤེལ་བ་ལྟར་ན། རྒྱ་གར་ཨུ་དྷར་པར་དྷེ་ཤི་མངའ་སྡེའི་མིན་པུ་རེ་རྫོང་གྷ་ཝལ་ཌོ་ལི་ (Gwaltoli) གྲོང་ཚོའི་གྲོང་མི་མཱ་ཎོ་ཇེ་ཡ་དྷེབ་ཟེར་བ་ཞིག་གིས་ས་དོང་འབྲུ་སྐབས། དུས་རབས་དང་པོའི་རྒྱ་གར་རྒྱལ་རྒྱུད་ཀཱ་ཎེ་ཤཱ་ཀཱ་ (Kanishka) སྐབས་ཀྱི་སངས་རྒྱས་བཅོམ་ལྡན་འདས་ཀྱི་རྡོ་རྐོས་སྐུ་བརྙན་ལྗིད་ཚད་ལ་ཀི་ལོ་གྷ་རམ་ ༡༠༠ ཙམ་ཡོད་པ་ཞིག་དང་སྐུ་འདྲ་གཞན་ཁག་གཅིག་རྙེད་ཡོད་འདུག

ཡུལ་དངོས་ཀྱི་གནའ་རྫས་རིག་པ་བ་ཞིག་གིས་གསར་འགྱུར་བརྒྱུད་ལམ་དུ། ཐེངས་འདིར་རྡོ་རིགས་སེར་སྨུག་ཐོག་རྡོ་རྐོས་བརྒྱབ་པའི་སངས་རྒྱས་བཅོམ་ལྡན་འདས་ཀྱི་རྩ་ཆེན་སྐུ་བརྙན་ལྗིད་ཚད་ལ་ཀི་ལོ་གྷ་རམ་ ༡༠༠ ཙམ་ཞིག་དང་། ནང་པའི་སྐུ་འདྲ་ཆུང་བ་ ༡༡ དང་ཆེ་བ་གཅིག་བཅས་རྙེད་ཡོད་སྟབས། ང་ཚོས་ས་ཁུལ་གྱི་མཐོ་རིམ་ལས་བྱེད་ལ་འབྲེལ་བ་ཞུས་ཏེ། རྒྱ་གར་གྱི་གནའ་རྫས་ཞིབ་འཇུག་ཁང་ལ་སྙན་སེང་ཞུ་དགོས་པའི་རེ་འདུན་བཏོན་པ་ཡིན། ཞེས་བརྗོད་འདུག

དེ་རིང་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་ཨུ་དྷར་པར་དྷེ་ཤི་མངའ་སྡེའི་ཨི་ཌ་ཝ་གྲོང་རྡལ་ནང་རྟེན་གཞི་བྱས་པའི་ཅའོ་ཌ་རེ་ཅ་རན་སིང་གཙུག་ལག་རབ་འབྱམས་མཐོ་སློབ་ (Chaudhary Charan Singh Post-Graduate Degree College) ཀྱི་དགེ་རྒན་ཆེན་མོ་པར་དྷེབ་སིང་ (R P Singh) གིས། ཉེ་ལམ་གསར་རྙེད་བྱུང་བའི་སངས་རྒྱས་བཅོམ་ལྡན་འདས་ཀྱི་སྐུ་བརྙན་དང་ནང་པའི་སྐུ་འདྲ་དེ་དག་ནི། དུས་རབས་དང་པོ་དང་གཉིས་པའི་དུས་ཀྱི་རྒྱ་གར་རྒྱལ་རྒྱུད་ཀཱ་ཎེ་ཤཱ་ཀཱ་སྐབས་ཀྱི་ཡིན་པ་མ་ཟད། འདས་ལོའི་ཟླ་ ༡༠ པའི་ནང་གྷ་ཝལ་ཌོ་ལི་གྲོང་ཚོའི་ཉེ་འཁྲིས་གྲོང་ཚོ་ཨ་སེ་ཡུ་ལི་ (Asyoli) ནས་ལྷ་དབང་ཕྱུག་གི་གནའ་བོའི་སྐུ་འདྲ་ཞིག་ཀྱང་རྙེད་ཡོད་པ་རེད། ཅེས་བརྗོད་འདུག

ད་ལྟ་གྲོང་མི་ཚོས་གསར་རྙེད་བྱུང་བའི་སངས་རྒྱས་བཅོམ་ལྡན་འདས་ཀྱི་སྐུ་བརྙན་དེ་ཤིང་སྡོང་ཞིག་གི་འོག་ཏུ་བཞག་ནས་ཕྱག་དང་མཆོད་འབུལ་བྱེད་བཞིན་ཡོད་ཀྱང་། སྐུ་བརྙན་འདི་དང་མཉམ་དུ་ལག་སོན་བྱུང་བའི་སྐུ་འདྲ་ཆུང་བ་ཁག་གཅིག་གྲོང་མིས་འཁྱེར་ནས་གར་སོང་ཆ་མེད་དུ་གྱུར་འདུག

གསར་འགོད་པ། དོན་གྲུབ།