ཁ་སང་ར་ཛ་སྤུར་གྱི་ས་སྐྱའི་ཆོས་སྒར་དུ་༧གོང་མ་བདག་ཁྲི་རིན་པོ་ཆེ་མཆོག་དགུང་གྲངས་ ༧༠ ཕེབས་པའི་སྐུའི་འཁྲུངས་སྐར་སྲུང་གཙི་ཞུས་ཡོད་འདུག
ཐུབ་བསྟན་རྒྱལ་མཚན་ལགས་ཀྱིས་འདི་གར་གནས་ཚུལ་མཁོ་གཏོང་གནང་བ་ལྟར་ན། ཁ་སང་སྔ་དྲོའི་ཆུ་ཚོད་ ༩ ཐོག་ར་ཛ་སྤུར་དུ་ཡོད་པའི་ས་སྐྱའི་ཆོས་སྒར་དུ། དཔལ་ས་སྐྱའི་ཁྲི་འཛིན་ཞེ་གཅིག་པ་༧གོང་མ་བདག་ཁྲི་རིན་པོ་ཆེ་མཆོག་དགུང་གྲངས་ ༧༠ ཕེབས་པའི་སྐུའི་འཁྲུངས་སྐར་སྲུང་གཙི་ཞུས་ཡོད་པ་དང་། འཁྲུངས་སྐར་གྱི་མཛད་སྒོའི་ཐོག་ས་སྐྱའི་ཕོ་བྲང་རྣམ་གཉིས་ཀྱི་སྐུའི་གདུང་སྲས་རྣམས་པའི་དབུས་འབྲེལ་ཡོད་དགོན་སྡེ་ཁག་གི་བླ་སྤྲུལ་མཁན་ཟུར་རྣམ་པ་དང་གྲྭ་བཙུན། དེ་བཞིན་དྷེ་ར་དྷོན་ས་གནས་འགོ་འཛིན་ལས་ཁུངས་སོགས་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་སྐུ་ཚབ་དང་དད་ལྡན་མི་མང་བཅས་ཁྱོན་མི་གྲངས་ ༡༠༠༠ ལྷག་འཛོམས་ཡོད་འདུག
མཛད་སྒོའི་ཐོག་མར་༧གོང་མ་རིན་པོ་ཆེ་མཆོག་གཟིམས་ཆུང་ནས་སྤུས་སྣེས་གདན་དྲངས་ཏེ་བཞུགས་ཁྲིར་འཁོད་མཚམས་འཆི་མེད་ཚེ་ལྷ་རྣམ་གསུམ་གྱི་ཆོ་ག་སོགས་གསུང་འདོན་གནང་ཡོད་པ་དང་། དེའི་རྗེས་བླ་བྲང་དང་དགོན་སྡེ་ཁག ས་གནས་འགོ་འཛིན་ལས་ཁུངས། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་བཅས་ནས་མནྜལ་རྟེན་གསུམ་འདེགས་འབུལ་ཞུས་པ་དང་སྦྲགས། སེར་སྐྱ་མི་མང་ཡོངས་ལ་མཇལ་ཁ་གནང་ཡོད་འདུག གཞན་ཡང་། མཛད་སྒོའི་ཐོག་འདི་ལོར་ཕུར་སྒྲུབ་ཆེན་མོ་འདོན་པའི་རྒྱུགས་འགྲན་དང་འབྲེལ་ཡོད་དགོན་སྡེ་ཁག་གི་སློབ་ཕྲུག་ཁ་ཅིག་ལ་ལོ་འཁོར་ཡིག་རྒྱུགས་ནང་ཨང་རིམ་རྩེར་སོན་ལ་བྱ་དགའ་དང་། ས་སྐྱའི་ཆོས་སྒར་དུ་གསང་སྔགས་རྒྱུད་སྡེ་ཁག་ནས་སློབ་མཐར་ཕྱིན་པའི་སློབ་ཕྲུག་ཚོར་མཐར་ཕྱིན་ལག་འཁྱེར་བཅས་གནང་ཡོད་པ་དང་། ཉིན་རྒྱབ་ས་གནས་ཚོགས་སྐྱིད་ཁག་ནས་རིག་གཞུང་འཁྲབ་སྟོན་སོགས་གཞས་སྣ་གཟིགས་འབུལ་ཞུས་ཡོད་འདུག
དེ་ཡང་མཛད་སྒོའི་ཐོག་༧གོང་མ་རིན་པོ་ཆེ་མཆོག་ནས་ཁོང་གི་འཁྲུངས་སྐར་དང་འབྲེལ་བའི་གསུང་བཤད་གནང་སྐབས། སྤྱིར་བཏང་སྐྱེས་སྐར་ཟེར་བ་དེ་ཕྱི་རྒྱལ་བའི་བརྩི་སྟངས་དང་ལྟ་སྟངས་ཤིག་ཡིན་སྟབས། ཁོང་སྐུ་སྒེར་གྱི་ངོས་ནས་འཁྲུངས་སྐར་སྲུང་གཙི་གནང་རྒྱུར་ཐུགས་དགྱེས་བོ་མེད་པ་དང་། ས་སྐྱ་བར་འཁྲུངས་སྟོན་ཞུ་བ་ཞིག་གཏོང་སྲོལ་ཡོད་ཀྱང་དེའི་དགོས་དམིགས་སོགས་ཕྱི་རྒྱལ་གྱི་སྐྱེས་སྐར་གཏོང་སྲོལ་དང་ཁ་ཁ་ཡིན་ལ། སྔོན་ཆད་ས་སྐྱ་བར་གདུང་སྲས་འཁྲུངས་དཀོན་པོ་ཆགས་སྐབས་སྲས་དང་པོ་འཁྲུངས་བ་དེར་འཁྲུངས་སྟོན་གཏོང་བ་དང་། དེའི་རྗེས་ཀྱི་སྲས་རྣམས་ལ་འཁྲུངས་སྟོན་གཏོང་སྲོལ་མེད་སྐོར་དང་། ཡང་ཁོང་གིས་དགོན་སྡེ་གྲྭ་ཚང་ཁག་གི་གྲྭ་བ་རྣམས་ཀུན་སྤྱོད་གང་ལེགས་ཐོག་བཞུགས་དགོས་པ་མ་ཟད། སློབ་སྦྱོང་ཡོད་པ་དང་སྤུས་དག་གི་ཐོག་ནས་རིག་གྲོལ་ཡོན་ཏན་གྱི་བརྒྱན་བྱས་ཏེ་བཞུགས་དགོས་པ་གལ་ཆེན་པོ་ཡིན་སྐོར་སོགས་ཀྱི་བཀའ་སློབ་ལམ་སྟོན་གནང་འདུག
དེ་རིང་ནས་བཟུང་༧གོང་མ་རིན་པོ་ཆེ་མཆོག་ཀ་རྡོར་སྒང་གསུམ་དུ་ཆེད་ཕེབས་ཀྱིས་ཆོས་ཕྱོགས་ཀྱི་མཛད་འཕྲིན་ཁག་ཅིག་སྐྱོང་བཞིན་ཡོད་པ་དང་། ཟླ་འདིའི་ཕྱི་ཚེས་ ༡༤ ཉིན་ཀ་ལོན་སྦུག་ཏུ་གསར་བཞེངས་གནང་བའི་ས་དགོན་བརྩེ་ཆེན་འཕྲིན་ལས་དར་རྒྱས་གླིང་དབུ་འབྱེད་མཛད་སྒོའི་ཚོགས་མགོན་དུ་ཕེབས་རྒྱུ་ཡིན་འདུག
གསར་འགོད་པ། པདྨ་རྒྱལ།
སྐྱབས་མཆོག་༧གོང་མ་བདག་ཁྲི་རིན་པོ་ཆེ་ཁྱེད་སྐུ་ཚེ་བརྟན་ཞིང་མཛད་འཕྲིན་རྒྱས་པའི་སྨོན་འདུན་ཞུ།