དེ་རིང་བོད་ནང་གི་ཉིན་གུང་ཙམ་ལ་རྔ་པ་ཀིརྟི་དགོན་གྱི་གྲྭ་འཇམ་དཔལ་རྒྱ་མཚོ་ལགས་ཀྱིས་ཞི་རྒོལ་ཁྲོམ་སྐོར་བྱས་ཏེ་ཉེན་རྟོག་པས་བཙན་ཁྲིད་བྱས་ཡོད་འདུག
དེ་རིང་བོད་ནང་གི་ཉིན་གུང་ཆུ་ཚོད་ ༡༢ ཙམ་ལ་རྔ་པ་ཀིརྟི་དགོན་པའི་རང་ལོ་ ༢༡ ཡིན་པའི་གྲྭ་འཇམ་དཔལ་རྒྱ་མཚོ་ལགས་ཀྱིས། ༸གོང་ས་མཆོག་གི་སྐུ་པར་ཆེན་པོ་ཞིག་མཐོན་པོར་བསྒྲེངས་ནས་བོད་ལ་རང་དབང་དགོས་པའི་ངོ་རྒོལ་སྐད་འབོད་གནང་བཞིན་རྔ་པ་རྫོང་མཁར་གྱི་གཞུང་ལམ་དུ་གོམ་བགྲོད་བྱས་ཡོད་ཀྱང་། སྐབས་ཐོག་དེར་ཉེན་རྟོག་པ་ཡོང་ནས་ཁོང་བཙན་ཁྲིད་བྱས་ཡོད་པ་དང་། དེ་ནས་བཟུང་ཁོང་གི་སྐོར་ནས་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།
གྲྭ་བློ་བཟང་འཇམ་དཔལ་རྒྱ་མཚོ་ལགས་ནི་རྔ་བ་རྫོང་རྨེ་རུ་མ་ཡུལ་ཚོའི་རུ་ཆེན་གསུམ་པའི་ཕ་སུར་ཡ་དང་། མ་ཏཱ་རེ་སྐྱིད་གཉིས་ལ་བུ་གཉིས་དང་བུ་མོ་གཅིག་ཡོད་པའི་ནང་གི་ཆུང་ཤོས་དེ་ཡིན་ཞིང་། ཆུང་ཆུང་སྐབས་ནས་རྔ་པ་ཀིརྟི་དགོན་པར་ཆོས་ཞུགས་བྱས་ཏེ་དེང་སྐབས་བློ་རིག་འཛིན་གྲྭ་ཡིན་འདུག
གནས་ཚུལ་མཁོ་གཏོང་བ་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས།
དཔའ་བོ་ལགས། ད་ལྟ་རྒྱའི་བཙན་གནོན་འོག་ལ་ཁྱེད་ཀྱི་ལུས་པོ་ལ་བདེ་བའི་སྐབས་མེད་ནའང་། ཁྱོད་ཀྱི་བློས་གཏོང་དང་གཟི་བརྗིད་ཀྱིས་བདག་ཅག་སྤུན་ཟླ་ཚོར་རྟོགས་སད་དང་རེ་བ་གསར་བ་ཞིག་བསྐྲུན་བྱུང་། ཐུགས་རྗེ་བླ་མེད་དུ་ཆེ། དཔའ་བོ་ནམ་ཡང་ངེད་ཚོའི་སེམས་ནས་འཇའ་ཚོན་བཞིན་མི་གྱུར་རོ།