ང་ཚྭ་བཙོང་མཁན་དང་སྲིད་སྐྱོང་འོས་མི་གཞན་ཚོ་སྒོག་པ་བཙོང་མཁན་རེད།

ཨ་ཚོགས་ཀླུ་མཁར་བྱམས་ལགས་སུ་སྲིད་སྐྱོང་འོས་མིའི་ཆེད་དམིགས་བཅར་འདྲི་བྱེད་སྐབས། ཁོང་ལ་སྲིད་སྐྱོང་རྒྱལ་ཁ་འཐོབ་པ་ཡིན་ན། དབུ་མའི་ལམ་གྱི་གཞི་རིམ་མི་མང་གི་བསམ་བློར་འགྱུར་བ་བཏང་ཚར་བ་ཡིན་སྟབས། ཁྲིམས་དང་སྒྲིག་གཞིའི་ཡིག་ཆར་འགྱུར་བ་གཏོང་རྒྱུ་ལས་སླ་ཤོས་ཡིན་སྐོར་བརྗོད་བྱུང་།

དྲི་བ། ཐོག་མར་ཁྱེད་༢༠༡༦ ལོའི་སྲིད་སྐྱོང་འོས་མིར་དང་བླང་ཐོག་ནས་ལངས་པ་དེ་རྐུབ་བཀྱག་གི་ཆེད་དུ་མིན་པར་རང་བཙན་གྱི་ཆེད་དུ་ཡིན་སྐོར་བརྗོད་ཀྱི་ཡོད་པ་ལྟར། དེའི་དམིགས་ཡུལ་དང་རྒྱབ་ལྗོངས་ག་རེ་ཡིན་ནམ།

ལན། ད་ལྟ་དབུས་བོད་མིའི་སྒྲིག་འཛུགས་ཀྱི་རྐུབ་བཀྱག་འདི། ལོ་རྒྱུས་ཤིག་གི་ཐོག་ནས་བཤད་ན། ཆབ་སྲིད་ཀྱི་སྡིངས་ཆ་དང་ཆབ་སྲིད་པའི་རྐུབ་བཀྱག་ཅིག་རེད། ངས་འདི་ངོ་བོ་ཐོག་ནས་བཤད་ན་འདི་དབང་ཆའི་རྐུབ་བཀྱག་ཅིག་མིན་པར་འཐབ་རྩོད་བྱེད་སའི་སྡིངས་ཆ་ཞིག་ལ་ངོས་འཛིན་བྱེད་ཀྱི་ཡོད། འདི་དཔོན་པོ་འཁྲབ་ས་ཞིག་མ་རེད། ང་ཚོའི་འཐབ་རྩོད་ཀྱི་ཆབ་སྲིད་ལས་འགུལ་སྤེལ་སའི་སྡིངས་ཆ་ཞིག་ལ་ངོས་འཛིན་བྱེད་བཞིན་ཡོད་སྟབས། རྩ་བའི་ཆ་ནས་རྐུབ་བཀྱག་གི་ཆེད་དུ་མིན་ཞུ་རྒྱུ་མ་ཟད། མ་གཞི་ནས་ངས་རྐུབ་བཀྱག་ཅིག་ལ་ངོས་འཛིན་བྱེད་ཀྱི་མེད་པ་མ་ཟད། དམིགས་ཡུལ་དང་རྒྱབ་ལྗོངས་ཀྱི་ཐོག་ནས་བཤད་ན། ང་ཡིན་ན་རང་བཙན་གྱི་དམིགས་ཡུལ་འཁྱེར་ནས་རྐུབ་བཀྱག་འདིའི་ཐོག་ལ་ལང་གི་ཡོད་པ་རེད། རྒྱབ་ལྗོངས་ཀྱི་སྒང་ནས་བཤད་ན་ང་ཚོ་བོད་རང་དབང་རང་བཙན་ཡིན་པའི་རྒྱལ་ཁབ་ཅིག་ཡིན་པ་མ་ཟད། དེའི་ཆེད་དུ་རྒྱལ་གཅེས་དཔའ་བོ་དཔའ་མོ་མང་པོ་ཞིག་གིས་ཚེ་སྲོག་བློས་བཏང་ཡོད་སྟབས། ང་ཚོས་བོད་རང་བཙན་ལེན་དགོས་པ་ནི་ལོ་རྒྱུས་ཀྱི་འོས་འགན་ཆགས་ཡོད་པ་རེད།

དྲི་བ། ཁྱེད་ལ་སྲིད་སྐྱོང་གི་འོས་མི་གཞན་ལས་ལྷག་པའི་ནུས་པ་དང་འཇོན་ཐང་ག་རེ་ཡོད།

ལན། ང་ལ་སྲིད་སྐྱོང་གི་འོས་མི་གཞན་ལས་ལྷག་པའི་འཇོན་ཐང་དང་ནུས་པ་ག་རེ་ཡོད་མེད་ངས་གསལ་པོ་ཞིག་བཤད་ཐུབ་ཀྱི་མི་འདུག ང་ལ་སྲིད་སྐྱོང་གི་འོས་མི་གཞན་ལས་མ་འདྲ་བའི་ལངས་ཕྱོགས་དང་ལྟ་བ་གསར་པ་ཞིག་ཡོད་པ་དེ་ངས་གལ་ཆེན་པོ་རེད་བསམ་གྱི་ཡོད། ངས་བརྒྱུད་ལམ་ཁག་ལ་འདི་ལྟར་བཤད་ཀྱི་ཡོད། སྲིད་སྐྱོང་གི་འོས་མི་གཞན་པ་ཆ་ཚང་དབུ་མའི་ལམ་ལ་ཤར་སྐྱོད་བྱེད་མཁན་གྱི་སྒོག་པ་བཙོང་མཁན་ཞིག་དང་། ང་ནི་ཚྭ་བཙོང་མཁན་ལྟ་བུ་ཞིག་ཡིན་སྟབས། འདི་གཉིས་ངོ་བོའི་ཆ་ནས་མ་འདྲ་བ་རེད། ང་ཚོས་གལ་ཆེ་ཤོས་དེ་འཇོན་ཐང་གི་ཆ་ནས་བཤད་ན། ཁྱབ་ཁོངས་སོ་སོར་མི་རང་ཉིད་ལ་དཔག་པའི་ནུས་པ་དང་འཇོན་ཐང་དེ་འདྲ་ཡོད་སྲིད་པ་ཞིག་ཡིན་ཡང་། ད་ལྟ་རྒྱ་ཆེའི་མི་མང་གིས་ཧ་གོ་དགོས་པ་ཞིག་ལ་ང་ཚོའི་ངོ་བོ་དང་ལངས་ཕྱོགས་འདྲ་ཡི་མེད་པ་འདི། ངས་འཇོན་ཐང་ལ་བརྩི་གི་མེད་ཀྱང་། ང་རང་ལ་ཆ་བཞག་ན་འདི་ངའི་ཁྱད་ཆོས་ཟེར་ནའང་མ་འགྲིག་པ་གང་ཡང་མེད།

དྲི་བ། ཁྱེད་ཀྱིས་བཀའ་ཤག་སྐབས་ ༡༤ པའི་རིང་འཐུས་ཤོར་དང་སྲིད་བྱུས་འཛིན་སྟངས་ཐད་ནོར་འཁྲུལ་ག་རེ་ཤོར་ཡོད་པར་ངོས་འཛིན་བྱེད་ཀྱི་ཡོད།

ལན། བཀའ་ཤག་སྐབས་ ༡༤ པས་སྤྱིར་བཏང་གྲུབ་འབྲས་གང་ལ་གང་འཚམ་ཐོན་ཡོད་ཀྱང་། ནོར་འཁྲུལ་ཆེ་ཤོས་ག་རེ་ཤོར་ཡོད་རེད་ཟེར་ན། ཁོ་ཚོས་ནོར་འཁྲུལ་ཤོར་བར་ཁས་ལེན་བྱེད་རྒྱུའི་སྤོབས་པ་དང་ངོས་ལེན་བྱེད་རྒྱུའི་བློ་ཁོག་མེད་པ། སྔོན་མ་ནས་མ་དག་རྒྱུན་འབྱམས་ཀྱི་ལམ་ཁ་ཞིག་ཐོག་འགྲོ་བསྡད་ཡོད་པ་དེར། ལེགས་བཅོས་བྱེད་རྒྱུའི་ནུས་པ་དང་བློ་སྟོབས་མེད་པ་མ་ཟད། སོ་སོས་ནོར་འཁྲུལ་བྱུང་བར་ངོས་འཛིན་བྱེད་མ་ཐུབ་པ་དེ་ནོར་འཁྲུལ་ཆེ་ཤོས་རེད་བསམ་གྱི་འདུག སྲིད་སྐྱོང་བློ་བཟང་སེང་གེ་ཡར་བསླེབས་པ་ནས་བཟུང་སྟེ། ཁོང་གིས་གསར་གཏོད་དང་རང་ཁ་རང་གསོ། རྡོག་རྩ་ཆིག་སྒྲིལ་བྱེད་ཀྱི་ཡིན། ༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་གི་ཡིན་ཟེར་བ་ལ་སོགས་པའི་བསྒྲགས་གཏམ་མང་པོ་ཞིག་སྤེལ་བ་དག་བསྒྲུབ་ཐུབ་ཀྱི་མེད་པ་དེ།  མང་ཚོགས་ལ་ཕྱི་གསལ་ནང་གསལ་ཐོག་ནས་འགྲེལ་བཤད་རྒྱག་རྒྱུ་གལ་ཆེ་ཤོས་རེད་བསམ་གྱི་ཡོད་ཀྱང་། དེ་མ་བྱས་པར་སོ་སོའི་ནོར་འཁྲུལ་འགེབ་ཆེད་ནོར་འཁྲུལ་ཤོར་བ་དག་ལ་མུ་མཐུད་བསྐྱར་དུ་འགྲེལ་བཤད་བརྒྱབ་ཏེ། ཡག་པོ་བཟོ་གི་ཡོད་པའི་བཟོ་འདྲ་པོ་བྱེད་བཞིན་ཡོད་པ་དེ་འགྲིག་གི་ཡོད་མ་རེད་བསམ་གྱི་འདུག  སྤྱིར་བཏང་བཙན་བྱོལ་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་བྱེ་བྲག་སྒང་ནས་འཐུས་ཤོར་མང་པོ་ཞིག་འགྲོ་བསྡད་ཡོད་པ་རེད། དེ་སྔོན་མང་ཚོགས་རྩིས་ཁྲ་ཚོགས་ཆུང་གིས་བཙན་བྱོལ་ནང་གི་རྩིས་རྙོག་མང་པོ་ཞིག་བཏོན་པ་དེ་ཚོར། ཁ་ཡོད་ལག་ཡོད་ཀྱིས་ཐག་གཅོད་བྱེད་མ་ཐུབ་པ་དང་། སྔོན་མ་གནད་དོན་མང་པོ་ལྷགས་བསྡད་ཡོད་པ་དག་ལ་གསལ་ཁ་བཏོན་མ་ཐུབ་པ་མ་ཟད། སོ་སོར་གྲུབ་འབྲས་ཕྲན་བུ་བྱུང་བ་དེ་རྒྱ་ཆེའི་མི་མང་ལ་ཧ་ཅང་གིས་དྲིལ་བསྒྲགས་ཆེན་པོ་བྱས་དང་བྱེད་བཞིན་ཡོད་པ་སོགས་ནི་ནོར་འཁྲུལ་རེད་བསམ་གྱི་ཡོད། ད་ལྟ་ནོར་འཁྲུལ་ཆེ་ཤོས་ག་རེ་མཐོང་གི་འདུག་ལབ་ན། སྲིད་སྐྱོང་བློ་བཟང་སེང་གེས་ཁོ་རང་གི་ཁྱད་ཆོས་དང་ངོ་བོ་མཚུངས་པའི་ཕྱག་ལས་ཤིག་གནང་ཐུབ་པ་ཡིན་ན། རྒྱ་ཆེའི་མི་མང་གིས་ཏན་ཏན་གྱིས་དང་ལེན་བྱེད་སྲིད་མོས་ཀྱང་། ཁོ་རང་གིས་དེ་མ་བྱས་པར་སྔོན་མ་ག་རེ་ཡིན་པ་དེའི་ངོ་བོར་ཁོ་རང་ཕར་འགྱུར་སོང་བ་མ་ཟད། སོ་སོས་འབུར་དུ་ཐོན་པའི་ལས་ཀ་བྱེད་མ་ཐུབ་པ་དེ་ནོར་འཁྲུལ་ཆེ་ཤོས་རེད་བསམ་གྱི་ཡོད།

དྲི་བ། བོད་རྒྱ་འབྲེལ་མཐུད་བྱེད་མ་ཐུབ་པར་ལོ་ཤས་སོང་ཡོད་སྟབས། གལ་སྲིད་ཁྱེད་རང་ལ་སྲིད་སྐྱོང་གི་རྒྱལ་ཁ་འཐོབ་པ་ཡིན་ན། འབྲེལ་མོལ་བསྐྱར་མཐུད་ཡོང་བར་ཐབས་ཤེས་གང་ཡོད།

ལན། ངས་བོད་རྒྱ་འབྲེལ་མོལ་ཟེར་བ་དེ་ཡོང་ཐུབ་པར་ངོས་འཛིན་བྱེད་ཀྱི་མེད་པ་མ་ཟད། ད་ལྟ་བོད་རྒྱ་འབྲེལ་མོལ་གྱི་རྨང་གཞི་ཁོ་རང་སྒང་ནས་བཤད་པ་ཡིན་ཡང་། འདི་རྒྱ་ནག་གི་འགན་ཁུར་ཆགས་ཡོད་པ་པ་མ་ཟད། ང་ཚོས་རྒྱ་ནག་གི་ཁྲིམས་དང་སྒྲིག་གཞིའི་འོག་ལ་འགྲོ་གི་ཡིན། མི་རིགས་ས་གནས་རང་སྐྱོང་ཡར་རྒྱས་འགྲོ་དགོས་ཀྱི་ཡོད་ཟེར་བའི་ལམ་ཁ་དེ་ཚོའི་གྲས་འདི། ངས་ལམ་ཁ་ཡག་པོ་ཞིག་མིན་པ་མ་ཟད་ཉེན་ཁ་ཚ་པོ་ཞིག་ཡིན་པ་མཐོང་གི་ཡོད་སྟབས། གལ་སྲིད་ང་སྲིད་སྐྱོང་ཆགས་པ་ཡིན་ན། ད་ལྟ་ང་ཚོས་རྩོད་བཞིན་པའི་མི་རིགས་ས་གནས་རང་སྐྱོང་གི་རྩ་ཁྲིམས་ཀྱི་ཁྲིམས་སྒྲིག་གཞིར་བཟུང་སྟེ། བོད་རྒྱ་འབྲེལ་མོལ་བསྐྱར་མཐུད་ཡོང་གི་མེད་པ་དང་། རྒྱལ་སྤྱིའི་སྟེང་རྒྱ་ནག་ང་ཚོས་གནོན་ཤུགས་སྤྲད་དགོས་ས་ཞིག་དང་ཁ་གཏད་གཅོག་ས་ཞིག་རེད་མ་གཏོགས། ཆེས་ངན་ལམ་ཤོར་དེའི་འོག་འགྲོ་བསྡད་པ་ཡིན་ན། རྩ་བ་ཉིད་ནས་འགྲིག་གི་མེད་པ་རྒྱ་ཆེའི་མི་མང་ལ་གསལ་བཤད་བྱེད་ཐུབ་ཀྱི་རེད་བསམ་གྱི་འདུག

དྲི་བ། ད་ལྟའི་བོད་མིའི་སྒྲིག་འཛུགས་ཀྱི་སྲིད་ཇུས་དང་སྒྲིག་གཞིར་བསྒྱུར་བཅོས་གཏང་དགོས་པ་གང་དག་མཐོང་གི་ཡོད།

ལན། ངས་བོད་མིའི་སྒྲིག་འཛུགས་ཀྱི་སྲིད་ཇུས་དང་སྒྲིག་གཞི་ཙམ་མིན་པར། ལས་དོན་བྱེད་ཕྱོགས་ཀྱི་ངོ་བོར་ཏན་ཏན་བསྒྱུར་བ་གཏོང་དགོས་པ་རེད་བསམ་གྱི་འདུག དཔེར་ན། གྲོས་ཚོགས་ལ་ཆ་བཞག་ན་གྲོས་ཚོགས་ལམ་ལུགས་འདི་ཆབ་སྲིད་ཀྱི་ཚོགས་པ་ཡོད་པ་ཞིག་ཏུ་འགྱུར་ཐུབ་མིན་སོགས་ལ་བསམ་བློ་གཏོང་དགོས་པ་ཆགས་ཡོད། ང་ཚོའི་འགྱུར་བ་ཆེ་ཤོས་དེ་ག་རེ་རེད་ཟེར་ན། དབུས་བོད་མིའི་སྒྲིག་འཛུགས་འདིས་རྒྱལ་ཁབ་ལ་འཛིན་པའི་ཕྱི་འབྲེལ་སྲིད་བྱུས་ཐོག་ནས་བཤད་ན། ང་ཚོས་ཕྱོགས་ཡོངས་ནས་ལམ་ཁ་ལ་བསྐྱར་ཞིབ་བྱས་ནས་བདག་དབང་བསྐྱར་གསོའི་ལམ་བུར་བསྐྱོད་དགོས་རེད་མ་གཏོགས། འགྲོ་བ་མིའི་རིགས་ཀྱི་ཐོབ་ཐང་རྩོད་མཁན་གྱི་སྡེ་ཚན་འདྲ་པོ་བྱས་ནས་ཕྱིན་པ་ཡིན་ན་དེ་རྩ་བ་ཉིད་ནས་འགྲིག་གི་ཡོད་མ་རེད། ང་ཚོའི་འཐབ་རྩོད་འདི་འགྲོ་བ་མིའི་རིགས་ཀྱི་ཐོབ་ཐང་ལས་ལྷག་པའི་འཐབ་རྩོད་ཅིག་ཡིན་སྟབས། བཙན་བྱོལ་བོད་མིའི་ཁྲིམས་སྒྲིག་ཙམ་མིན་པར་ཁྲིམས་སྒྲིག་གི་རྒྱབ་ལྗོངས་ལ་འགྱུར་བ་བཏང་སྟེ། ང་ཚོས་ལས་ཀ་བྱེད་དགོས་པ་དེ་ཧ་ཅང་གིས་གལ་ཆེན་པོ་རེད་བསམ་གྱི་འདུག ཁྲིམས་སྒྲིག་གཞི་ལ་ཆ་བཞག་ན་ཞིབ་ཕྲའི་ཐོག་ནས་བསྒྱུར་བཅོས་གཏོང་དགོས་པ་མང་པོ་ཞིག་ཡོད་སྟབས། ང་ཚོས་སྐབས་དང་བསྟུན་ནས་བྱེད་དགོས་པ་རེད་བསམ་གྱི་འདུག སྲིད་བྱུས་ཐོག་ནས་འགྱུར་བ་གཏོང་དགོས་པ་དེ་དབུ་མའི་ལམ་ལ་བསྐྱར་ཞིབ་བྱས་ནས་རང་བཙན་ཕྱོགས་སུ་འགྱུར་དགོས་པ་ལ་སོགས་པའི་ལས་ཀ་མང་པོ་ཞིག་ཡོད་ཀྱང་། དེ་ཚོ་སྐབས་དང་དུས་སུ་གྲོས་ཚོགས་ཚོགས་ཏེ་རིམ་པ་བྱས་ནས་བཤད་དགོས་རེད་མ་གཏོགས། རྒྱ་ཆེའི་མི་མང་གིས་མང་ཚོགས་རང་བཞིན་གྱི་བརྒྱུད་ལམ་གཅིག་གི་ཐོག་ནས་འདིར་ཐག་གཅོད་བྱེད་ཐུབ་ཐབས་མེད་སྟབས། ཁྲིམས་འཆར་གྱི་ངོ་བོ་ཐོག་ནས་འགྱུར་བ་གཏོང་དགོས་པ་རེད། ངས་གོང་དུ་ཞུས་པ་ལྟར་ད་ལྟའི་ལས་ཀ་བྱེད་སྟངས་འདི་མིན་པ་ཞིག་བྱེད་དགོས་པ་དེ་ཧ་ཅང་གིས་གལ་ཆེན་པོ་ཆགས་ཡོད་པ་མ་ཟད། ང་སྲིད་སྐྱོང་ཆགས་པའི་ཉིན་ནས་བཟུང་སྟེ་ཁྲིམས་དང་སྒྲིག་གཞི་ལ་ཏན་ཏན་གྱི་འགྱུར་བ་འགྲོ་གི་རེད།

དྲི་བ། ད་ལྟ་བཙན་བྱོལ་བོད་མིའི་སྒྲིག་འཛུགས་ཀྱི་བཞེངས་ཕྱོགས་དབུ་མའི་ལམ་རེད། མ་འོངས་པར་ཁྱེད་རང་སྲིད་སྐྱོང་ཆགས་པ་ཡིན་ན་བཞེངས་ཕྱོགས་དེར་འགྱུར་བ་གཏོང་རྒྱུ་ཡིན་ནམ། ཡང་ན་མུ་མཐུད་དབུ་མའི་ལམ་གྱི་ཐོག་འགྲོ་རྒྱུ་ཡིན།

ལན། ང་རང་བཙན་གྱི་ལྟ་བ་འཁྱེར་ནས་ལངས་ཀྱི་ཡོད་སྟབས། དབུ་མའི་ལམ་ལ་ཏན་ཏན་འགྱུར་བ་གཏང་དགོས་ཀྱི་རེད། དབུ་མའི་ལམ་ལ་འགྱུར་བ་གཏོང་སྐབས་ལས་དོན་བྱེད་ཕྱོགས་ཀྱི་ཆ་ནས་གདོང་ལེན་བྱེད་དགོས་པ་སྣ་ཚོགས་ཡོད་པ་རེད། ང་འདྲ་པོ་ཞིག་སྲིད་སྐྱོང་ལ་མང་མོས་ཐོག་ནས་འཐོབ་པ་ཡིན་ན། དེས་དབུ་མའི་ལམ་གྱི་གཞི་རིམ་མི་མང་གི་བསམ་བློར་འགྱུར་བ་བཏང་ཚར་བ་རེད། དེ་ལས་ལྷག་པ་ཁྲིམས་དང་སྒྲིག་གཞིའི་ཡིག་ཆ་ཡིན་སྟབས། དེའི་འགྱུར་བ་དེ་ལས་སླ་ཤོས་རེད་བསམ་གྱི་འདུག ངས་ད་ལྟའི་སྐབས་ལ་འགྱུར་བ་གང་ཞིག་གཏང་དགོས་པ་རེད་ཟེར་ན། ང་ཡར་ལངས་ནས་མི་མང་གི་བསམ་བློར་འགྱུར་བ་གཏོང་ཐུབ་པ་བྱ་རྒྱུ་གལ་ཆེན་པོ་རེད། འགྱུར་བ་དེ་ཐེབས་ན་དབུ་མའི་ལམ་གྱི་སྲིད་བྱུས་ལ་མུ་མཐུད་ནས་འགྲོ་དགོས་པའི་རྒྱུ་མཚན་ཡོད་མ་རེད། ང་ཚོས་དབུ་མའི་ལམ་གྱི་སྲིད་བྱུས་མུ་མཐུད་རྒྱུན་འཁྱོངས་བྱེད་མིན་ནི། བོད་པ་རང་ལ་རག་ལུས་མེད་པ་མ་ཟད། རྒྱ་ནག་གཞུང་གིས་དབུ་མའི་ལམ་གྱི་སྲིད་བྱུས་ལ་ཡ་ལན་བྱེད་ཀྱི་མེད་པ་སོགས་ཀྱིས་ཏན་ཏན་འགྱུར་བ་གཏོང་དགོས་པ་ཆགས་ཀྱི་རེད། ང་ཡར་ཐོབ་པ་དེ་རྒྱ་ཆེའི་མི་མང་གིས་མང་མོས་བྱས་ནས་ཐོབ་ཡོད་སྟབས། བཙན་བྱོལ་བོད་མིའི་བཅའ་ཁྲིམས་དང་སྲིད་བྱུས་གང་ལ་འགྱུར་བ་གཏོང་དགོས་ཀྱི་ཡོད་ཀྱང་། མི་མང་གིས་མངོན་འདོད་ལྟར་གྲོས་ཚོགས་འཐུས་མི་ཚོའི་མདུན་ཅོག་སྒང་ལ་བཞག་ཡོད་སྟབས། ངས་འགྱུར་བ་གཏོང་དགོས་ཡོད་པ་མ་ཟད། འགྱུར་བ་གཏོང་རྒྱུ་སྟབས་བདེ་པོ་ཡོད་རེད་བསམ་གྱི་འདུག

དྲི་བ། ཁྱེད་ཀྱིས་མི་སྒེར་ཞིག་གི་ངོས་ནས་བཤད་ན་དད་པ་ཟེར་བ་དེ་ཧ་ཅང་གལ་ཆེན་ཡིན་ཡང་། རྒྱལ་ཁབ་ཅིག་ལ་མཚོན་ན་དད་པ་ལས་ཀྱང་གལ་ཆེ་བ་ནི་དམངས་གཙོ་རེད་ཅེས་དང་། དེ་བཞིན་དད་པ་ལོག་སྤྱོད་ལ་ངོ་རྒོལ་ཞེས་པ་དེ་ཚོར་དཔེ་མཚོན་གྱི་ཐོག་ནས་འགྲེལ་བཤད་ཅིག་རྒྱོབས་དང་།

ལན། ངས་དད་པ་ཟེར་བ་དེ་གང་ཟག་སྒེར་གྱི་བྱ་སྤྱོད་ཞིག་ཡིན་པ་ཡང་ཡང་ལབ་ཀྱི་ཡོད། གང་ཟག་སྒེར་པ་ཞིག་གིས་ཆོས་ལུགས་ག་རེ་ལ་དད་པ་བྱེད་མིན་དེ། མཉམ་སྦྲེལ་རྒྱལ་ཚོགས་ཀྱི་བསྒྲགས་གཏམ་རིམ་པ་དང་བཙན་བྱོལ་བོད་མིའི་བཅའ་ཁྲིམས་ནང་ལའང་འཁོད་ཡོད་ཀྱང་། ང་ཚོའི་དཀའ་ངལ་ཆེ་ཤོས་དེ་དད་པ་བེད་སྤྱོད་ལོག་པ་བཏང་སྟེ། སྤྱི་ཚོགས་ནང་ལ་སོ་སོའི་ལྟ་ཕྱོགས་མི་མཐུན་པའི་ཁྱབ་ཁོངས་ནང་ལ་དཀའ་ངལ་བཟོ་གི་ཡོད་པ་རེད། ད་ལྟ་ངས་དད་པ་ལོག་སྤྱོད་ཀྱི་དཔེ་མཚོན་མང་པོ་ཞིག་བགྲང་པ་ཡིན་ན། ང་ཚོས་ཁ་ཡར་བསྒྲགས་མར་བསྒྲགས་ག་རེ་བྱས་ཀྱང་༧སྐྱབས་མགོན་རིན་པོ་ཆེའི་མཚན་བེད་སྤྱོད་བཏང་སྟེ། སྲིད་དོན་པ་ཚོས་སོ་སོའི་ཁེ་བཟང་བསྒྲུབ་པ་འདི་དད་པ་ལོག་སྤྱོད་ཀྱི་དཔེ་མཚོན་ཆེ་ཤོས་ཆགས་ཀྱི་ཡོད་པ་རེད། དད་པ་ནི་བག་ཆགས་ཀྱི་གནད་དོན་ཞིག་ཡིན་སྟབས། མི་མང་གིས་བག་ཆགས་གཏིང་ཟབ་པོ་ཡོད་པའི་རྒྱུ་མཚན་དེ་རིགས་བེད་སྤྱོད་བཏང་སྟེ། ང་ཚོས་ལྷ་དང་འདྲེ་ཡི་ཁྱབ་ཁོངས་ལ་འདྲ་མི་འདྲ་བཤད་བསྡད་པ་དེ་ཚོའི་རིགས་ཏེ། ངས་བལྟས་པ་ཡིན་ན་ཏན་ཏན་དད་པ་ལོག་སྤྱོད་ཀྱི་ཁོངས་རེད་བསམ་གྱི་འདུག དད་པ་ལག་སྤྱོད་ཟེར་བ་འདི་འགྲོ་བ་མིའི་རིགས་ཀྱི་དད་མིན་གྱི་ཁྱབ་ཁོངས་ལ་ཞིབ་འཇུག་བྱས་ནས་དེ་ལ་ངོ་རྒོལ་བགྱིས་ལབ་ཀྱི་ཡོད་པ་མ་རེད། དད་པ་བེད་སྤྱོད་བཏང་ནས་སྤྱི་ཚོགས་དཀྲུགས་བསྡད་པའི་རིགས་ལ་དད་པ་ལོག་སྤྱོད་ལབ་དགོས་པ་རེད།

དྲི་བ། དེ་སྔོན་ཁྱེད་ཀྱིས་སྲིད་སྐྱོང་གི་རྒྱལ་ཁ་འཐོབ་པ་ཡིན་ན། ལས་ཀ་དང་པོ་དབུས་བོད་མིའི་སྒྲིག་འཛུགས་དེ་བཙན་བྱོལ་བོད་གཞུང་ལ་ཕྱིར་འགྱུར་རྒྱུའི་འབད་བརྩོན་བྱེད་ཀྱི་ཡིན་ཞེས་བརྗོད་ཡོད་སྟབས། མ་འོངས་པར་འགྱུར་བ་གཏང་བ་ཡིན་ན་རྒྱ་གར་གཞུང་གིས་གཙོས་བོད་རྒྱ་ཆེའི་མི་མང་གི་ངོས་ནས་དང་ལེན་བྱེད་སྲིད་དམ།

ལན། ངས་རྒྱ་གར་གཞུང་གིས་འདི་ལ་གནོན་ཤུགས་ཤིག་སྤྲད་ཀྱི་རེད་བསམ་གྱི་མི་འདུག རྒྱ་གར་གཞུང་གིས་བོད་གཞུང་ངོས་ལེན་གང་ཡང་བྱས་ཡོད་པ་མ་རེད། རྒྱ་གར་གཞུང་ལ་ཁྲིམས་ཐོག་ནས་དེབ་སྐྱེལ་བྱས་ཡོད་པ་དེ་དབུས་བོད་མིའི་སྒྲིག་འཛུགས་ (Central Tibetan Administration) ཟེར་བ་འདི་རེད། རྒྱ་གར་གཞུང་གིས་ཁྲིམས་ཐོག་ནས་བཙན་བྱོལ་བོད་གཞུང་ཟེར་བ་ངོས་འཛིན་བྱས་མེད་སྟབས། འདི་ལ་མིང་ག་རེ་འདོགས་མིན་རྒྱ་གར་གཞུང་ལ་ཇུས་གཏོགས་མེད་པ་མ་ཟད། རྒྱ་གར་གྱི་རྩ་ཁྲིམས་ཀྱི་སྒྲོམ་གཞིའི་ནང་འགྲོ་བ་མིའི་རིགས་ལ་སྨྲ་བརྗོད་རང་དབང་དང་། སོ་སོའི་སྲིད་དོན་གྱི་གདམ་ཀ་སོ་སོས་བྱེད་ཆོག་པ་བཀོད་ཡོད་སྟབས། རྒྱ་གར་གཞུང་གིས་ང་ཚོར་ཐད་ཀར་གནོན་ཤུགས་སྤྲད་སའི་གཞི་ཡོད་པ་མ་རེད། རྒྱ་ཆེའི་མི་མང་གིས་དེར་དང་ལེན་བྱེད་མིན་ནི། ངས་རྒྱ་ཆེའི་མི་མང་ལ་འགྲེལ་བཤད་གང་འདྲ་རྒྱག་མིན་ལ་རག་ལུས་ཡོད་རེད་བསམ་གྱི་འདུག ངས་སྐབས་དང་དུས་ལ་དཔག་པའི་འགྲེལ་བཤད་ཡང་དག་པ་ཞིག་བརྒྱབ་ཏེ། དེ་སྔོན་བཙན་བྱོལ་བོད་གཞུང་གི་མིང་འགྱུར་བ་དེ་བོད་རྒྱ་ཞི་མོལ་དང་རྒྱ་གར་གཞུང་གི་གནོན་ཤུགས་རྐྱེན་པས་འགྱུར་བ་བཏང་བ་རེད་ཟེར་བ་སོགས་འགྲེལ་བཤད་ག་རེ་བརྒྱབ་ཡོད་ཀྱང་། དེར་ངས་རྒྱ་གར་གཞུང་གིས་གནོན་ཤུགས་ཡོང་གི་མེད་པ། བཙན་བྱོལ་བོད་གཞུང་གི་མིང་འགྱུར་བ་བཏང་ནས་རྒྱ་ནག་གཞུང་གིས་ང་ཚོ་དང་ཞི་མོལ་བྱ་རྒྱུའི་ཚབ་ཏུ་སྡུག་ཏུ་བཏང་ཡོད་པ་སོགས་གྲོས་ཚོགས་ནང་གསལ་པོ་བཤད་པ་ཡིན་ན། གྲོས་ཚོགས་ཀྱིས་འདིར་ངོས་འཛིན་ཐུབ་ཀྱི་རེད་བསམ་གྱི་འདུག སྐབས་སྔོན་མའི་གྲོས་ཚོགས་འཐུས་མིས་ངོས་ལེན་མ་བྱས་པ་ཡིན་ཡང་། ད་ལྟ་གྲོས་ཚོགས་ཀྱི་འཐུས་མི་གསར་པ་ཡོང་གི་ཡོད་སྟབས། ཁོ་ཚོས་དངོས་ཡོད་གནས་ཚུལ་ལ་དཔག་པའི་ལས་ཀ་ཞིག་ཏན་ཏན་བྱེད་ཀྱི་རེད་བསམ་གྱི་འདུག འདི་ངའི་གོམ་པ་དང་པོ་དེ་ཡིན། གོམ་པ་གཉིས་པ་དེ་དང་པོ་ང་ཡར་བསླེབ་རྒྱུར་ཤུགས་རྒྱག་དགོས་པ་དང་། གཉིས་པ། ཁྲིམས་དང་སྒྲིག་གཞིའི་འཆར་གཞི་བཟོ་དགོས་པ། གསུམ་པ། རྒྱ་ཆེའི་མི་མང་ལ་ངོ་སྤྲོད་བྱ་རྒྱུ་དང་རྒྱལ་སྤྱིའི་སྤྱི་ཚོགས་ཐོག་ལས་འགུལ་སྤེལ་དགོས་པ་ཆགས་ཡོད་སྟབས། ང་ལ་བོད་རྒྱ་ཆེའི་མི་མང་གིས་རྒྱབ་སྐྱོར་བྱས་ནས་ཡར་བསླེབ་པ་ཡིན་ན། ངས་དབུས་བོད་མིའི་སྒྲིག་འཛུགས་བོད་གཞུང་ལ་འགྱུར་བ་གཏོང་རྒྱུར་སྟབས་བདེ་པོ་ཆགས་ཡོད་པ་མ་ཟད། རྒྱ་གར་གཞུང་གི་གནོན་ཤུགས་བསླེབ་པ་དང་། གྲོས་ཚོགས་དང་བོད་མི་མང་གིས་དང་ལེན་བྱེད་ཀྱི་མ་རེད་བསམ་པའི་སེམས་ཁྲལ་གང་ཡང་མེད། གཙོ་བོ་དེ་མགོར་སྡོད་མཁན་ཚོས་ལས་ཀ་དེ་འཇོན་པ་ཡིན་ན་སོ་སོས་བྱེད་དགོས་པ་དང་། མ་འཇོན་པ་ཡིན་ན་དེའི་གྱོང་དང་གནོན་ཤུགས་རང་ཉིད་ཀྱིས་འཁུར་གྱི་ཡིན་ཟེར་ནས་ཁས་ལེན་དམ་བཅའ་ཞིག་གི་འོག་ཏུ་ཕྱིན་པ་ཡིན་ན། ངས་མིང་འགྱུར་རྒྱུ་འདི་ལས་སླ་པོ་རེད་བསམ་གྱི་འདུག

དྲི་བ། ཁྱེད་རང་བོད་རྒྱལ་ཡོངས་རང་བཙན་ལྷན་ཚོགས་དང་དབང་ཤུགས་ཅན་གྱི་མི་སྣ་ཁག་གཅིག་གིས་ཆབ་སྲིད་ཀྱི་རྩེད་ཆས་སམ་ལག་ཆ་ལྟ་བུ་ཞིག་ཏུ་བེད་སྤྱོད་བྱེད་ཀྱི་ཡོད་ལུགས་བརྗོད་མཁན་མང་པོ་འདུག་པས། དེའི་ཐད་ཁྱེད་ལ་ག་རེ་བཤད་རྒྱུ་ཡོད།

ལན། ང་ཚོ་འདྲ་པོས་སྤྱི་ཚོགས་སྒང་ལ་ལས་ཀ་བྱས་ནས་ཡོང་སྐབས། མི་དེ་ཚོས་གཞན་པས་བེད་སྤྱོད་བཏང་བ་རེད་ཟེར་བ་དང་། མི་ཁ་ཤས་ཀྱིས་སོ་སོས་ལྷག་བསམ་རྣམ་དག་གིས་ལས་ཀ་བྱས་པ་ཡིན་ཡང་། དེ་ཚོ་ཀླུ་མཁར་བྱམས་ཀྱི་ཨབ་ཕྲུག་རེད་ཟེར་བ་དང་ཀླུ་མཁར་བྱམས་ཀྱིས་བེད་སྤྱོད་གཏོང་གི་ཡོད་རེད་ཟེར་བ་སོགས། ང་ཚོའི་སྤྱི་ཚོགས་ནང་བསྡད་ནས་བསྡད་ཚོད་མེད་པ་འདྲ་པོ་ཆགས་ཀྱི་འདུག འདི་ཚོ་མང་ཆེ་བ་དྲ་འབུ་ཡི་སྐད་ཆ་རེད་བསམ་གྱི་འདུག་མ་གཏོགས། སྤྱི་ཚོགས་ཀྱི་དངོས་ཡོད་གནས་ཚུལ་གྱི་སྡིངས་ཆ་ཞིག་གི་སྐད་ཆ་མ་རེད། ང་ཆ་བཞག་ན་རྒྱལ་ཡོངས་རང་བཙན་ལྷན་ཚོགས་ཀྱི་ཚོགས་མི་ཞིག་ཡིན་སྟབས། དེའི་ཁྲིམས་དང་སྒྲིག་གཞིའི་ཁྱབ་ཁོངས་འོག་འགྲོ་དགོས་པ་དང་། ད་ལྟ་དགུ་བཅུ་གསུམ་ཚོགས་པའི་ཚོགས་གཙོ་ཡིན་པའི་ཆ་ནས་ཚོགས་པའི་བྱེད་སྒོ་རྣམ་གཞག་ཁག་ལའང་བསྟུན་དགོས་པ་ཆགས་ཡོད་སྟབས། ང་ཁོ་ཚོའི་རྩེད་མོ་རྩེད་ས་དང་གནོན་ཤུགས་སྤྲོད་ས་རེད་ལབ་ན་འགྲིག་གི་མ་རེད། ཆབ་སྲིད་ཀྱི་ལས་ཀ་བྱེད་སྐབས་མི་གཅིག་ལ་ཆ་བཞག་ན། བོད་རང་བཙན་དེ་མི་གཅིག་གི་ལས་འགན་མིན་སྟབས། བོད་རང་བཙན་ལེན་མཁན་གྱི་ལྟ་ཕྱོགས་མཐུན་པའི་མིའི་ཁྱབ་ཁོངས་ལ་གཅིག་གིས་གཅིག་ལ་མཐུན་སྒྲིལ་དང་མཉམ་འབྲེལ་བྱེད་དགོས་པ་མ་ཟད། མཉམ་འབྲེལ་དེ་ཡང་སྤྱི་འཆང་ཞིག་དང་ཁ་གཏད་ཞིག་གི་ངོས་ནས་བྱེད་དགོས་སྟབས། ང་ཁོ་ཚོའི་ལག་ཆ་རེད་ཟེར་བ་དང་བེད་སྤྱོད་གཏོང་ས་རེད་ཟེར་བ་དེ་ཚོ། ངས་གསང་ལམ་ནང་གི་སྐད་ཆ་ཞིག་ཡིན་པ་ལས་རིན་ཐང་ཆེན་པོ་ཡོད་པར་མཐོང་གི་མི་འདུག ང་ལ་ཆ་བཞག་ན་བློ་ཕམ་ཆེ་ཤོས་དེ་སྐད་ཆ་འདིའི་རིགས་ལ་ཡར་རྒྱས་གཅིག་ཀྱང་འགྲོ་གི་མི་འདུག སྔོན་མ་ནས་འདི་འདྲ་རྐྱང་རྐྱང་བཤད་བསྡད་ཡོད་པ་མ་ཟད། ད་ལྟ་ཡིན་ཡང་བཤད་ཀྱི་ཡོད་པ་རེད། སྤྱི་ཚོགས་ཡར་རྒྱས་འགྲོ་བཞིན་པ་དང་ཆབས་གཅིག་ཏུ་མི་དེ་ཚོའི་ཤེས་ཡོན་དང་གནས་ཚད། སྐད་ཆའི་གླེང་སྟེགས་ལ་འགྱུར་བ་ཞིག་འགྲོ་གི་ཡོད་ན། ང་ལ་ཏན་ཏན་ཕན་ཐོགས་ཀྱི་རེད་མ་གཏོགས། སྐད་ཆ་འདིའི་རིགས་བཤད་པ་ཡིན་ན། བཤད་མཁན་ཞིག་གིས་བཤད་པ་ཡིན་ཡང་། ང་སྒེར་ངོས་ནས་འདི་ཚོའི་རིགས་ལ་ལན་ག་རེ་རྒྱག་དགོས་མིན་ཧ་གོ་གི་མི་འདུག རང་བཙན་དེ་ཀླུ་མཁར་བྱམས་གཅིག་པུའི་ལས་འགན་མིན་པ་མ་ཟད། འཐོབ་པ་ཡིན་ཡང་ང་གཅིག་པུར་འཐོབ་པ་མིན་སྟབས། རྒྱལ་ཡོངས་རང་བཙན་ལྷན་ཚོགས་ཀྱིས་ང་འོས་མིར་བཏོན་པར་བརྟེན། ང་ཁོ་ཚོའི་ཆབ་སྲིད་ཀྱི་ལག་ཆ་རེད་ཟེར་ན་ངས་ངོས་འཛིན་བྱེད་ཀྱི་མ་རེད།

དྲི་བ། ཁྱེད་ཀྱི་སྲིད་གཞུང་གསར་པ་དེ་བསླེབ་ན། དབུ་མའི་ལམ་གྱི་ལྟ་བ་འཛིན་མཁན་ཚོར་དབུགས་ཤིག་གཏོང་བའི་གོ་སྐབས་ཡོད་སྐོར་བརྗོད་པ་དེ་དང་། ཁྱེད་ཀྱི་ལྟ་གྲུབ་བཞི་ཡི་ནང་གཞུང་སྲིད་བར་གནས་ཞེས་པ་གཉིས་འགལ་ཟླ་རུ་འགྲོ་ཡི་མེད་དམ།

ལན། གཞུང་སྲིད་བར་གནས་ཟེར་བ་དེ། གཞུང་གིས་རྩ་བའི་ལས་དོན་བྱེད་ཕྱོགས་ཐོག་ནས་ལབ་ཀྱི་ཡོད་པ་མ་རེད། གཞུང་གི་ཆབ་སྲིད་ཀྱི་སྲིད་བྱུས་དེ་རང་བཙན་ལ་འགྱུར་གྱི་ཡིན་ཟེར་བ་དེ་ཡིན་ཡང་། རང་བཙན་ལ་འགྱུར་བ་དང་ཆབས་གཅིག་བཙན་བྱོལ་བོད་མི་ཡོད་དོ་ཅོག་གི་ལྟ་བ་དེ། རང་བཙན་ལ་འགྱུར་དགོས་པ་དང་གལ་སྲིད་མ་འགྱུར་བ་ཡིན་ན། འདི་དང་འདི་བྱེད་ཀྱི་ཡིན་ཟེར་བའི་གནས་སྟངས་གང་ཡང་ཆགས་ཀྱི་ཡོད་པ་མ་རེད། དཔེར་ན། ང་སྲིད་སྐྱོང་ཆགས་པ་ཡིན་ན། ངའི་གཞུང་གི་ལྟ་བ་དེ་རང་བཙན་ལ་འགྲོ་དགོས་པ་དེ་ཨ་ཅང་ཅང་ཡིན་ཡང་། དབུ་མའི་ལམ་ལ་རྒྱབ་སྐྱོར་བྱེད་མཁན་གྱི་མི་སྒེར་བ་དེ་འདྲ་ཡོང་ཆོག་གི་རེད། དེ་གུ་ཡངས་ཀྱི་རང་བཞིན་ཞིག་རེད། གཞུང་གིས་ལས་དོན་བྱེད་སྐབས་ཁོ་རང་གིས་གཞུང་གི་ལས་དོན་ཏག་ཏག་ཅིག་བསྒྲུབ་པ་ཡིན་ན། ནང་ལ་ཕྱིན་ནས་དབུ་མའི་ལམ་ལ་རྒྱབ་སྐྱོར་བྱེད་ཀྱི་ཡོད་ལབ་ཀྱང་། ངས་དེ་དཀའ་ངལ་ཞིག་ལ་མཐོང་གི་མེད། ངར་སྲིད་སྐྱོང་གི་རྒྱལ་ཁ་འཐོབ་ཉིན་ནས་བཟུང་། དབུ་མའི་ལམ་དང་རང་བཙན་གྱི་སྲིད་སྐྱོང་མིན་པ་མ་ཟད། ཆོས་ལུགས་བྱེ་བྲག་པ་ཞིག་གི་སྲིད་སྐྱོང་ཡང་མ་རེད། བཙན་བྱོལ་བོད་མི་སྤྱི་ལ་དབང་བའི་སྲིད་སྐྱོང་ཡིན་སྟབས་གཅིག་འགྱུར་གྱི་བལྟ་དགོས་པ་རེད། དབུ་མའི་ལམ་རྩོད་མཁན་ཚོར་འབུར་བཅོམ་གཏོང་རྒྱུའི་གནས་སྟངས་རྩ་བ་ཉིད་ནས་ཆགས་ཀྱི་མ་རེད། ངའི་གཞུང་དེ་རང་བཙན་དང་དབུ་མའི་ལམ་གཉིས་ཆ་མིན་པ་ཞིག་ཆགས་ཀྱི་རེད་དམ་ཟེར་ན་དེ་ཆགས་ཀྱི་མ་རེད། གཞུང་གི་སྲིད་བྱུས་དེ་ཕྱི་གསལ་ནང་གསལ་གྱི་ཐོག་ནས་རང་བཙན་ཐོག་འགྲོ་རྒྱུ་མ་ཟད། ང་ཚོས་རང་བཙན་གྱི་ཁྱབ་ཁོངས་ཐོག་ནས་ལས་ཀ་ག་རེ་བྱེད་དགོས་པ་དང་། རྒྱལ་སྤྱིའི་ཁྲིམས་སར་ག་རེ་གཏུག་དགོས་འདུག རྒྱལ་སྤྱིའི་མི་མང་ལ་གང་འདྲ་བྱས་ནས་གོ་རྟོགས་སྤེལ་དགོས་འདུག རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་ལ་གནོན་ཤུགས་སྤྲོད་སྐབས། ང་ཚོས་བོད་རང་བཙན་གྱི་བརྗོད་གཞི་གཙོ་བོར་འགྱུར་བའི་ཐོག་ནས་གནོན་ཤུགས་སྤྲོད་རྒྱུའི་ལས་ཀ་དེ་ཚོ་ཏན་ཏན་བྱེད་ཀྱི་རེད།

དྲི་བ། བཙན་བྱོལ་སྤྱི་ཚོགས་ནང་ཁྱེད་རང་༧གོང་ས་མཆོག་ལ་མཚན་སྨད་ཞུ་མཁན་དང་བོད་མིའི་སྒྲིག་འཛུགས་ཀྱི་ལངས་ཕྱོགས་ལ་ངོ་རྒོལ་བྱེད་མཁན་ཞིག་ཡིན་པའི་ངོས་འཛིན་བྱེད་བཞིན་ཡོད་སྟབས། ཁྱེད་རང་གིས་དེའི་ཐད་གསལ་བཤད་ཅིག་གནང་རོགས།

ལན། བཙན་བྱོལ་སྤྱི་ཚོགས་ནང་ལ་ང་ཚོ་རང་བཙན་རྩོད་མཁན་ཚོ་༧གོང་ས་མཆོག་ལ་ངོ་རྒོལ་བྱེད་མཁན་དང་མཚན་སྨད་ཞུ་མཁན་རེད་ཟེར་བ་དེ། ང་སྲིད་སྐྱོང་ལ་ལངས་སྐབས་ཙམ་མིན་པར། སྔོན་མ་ནས་དེ་འདྲ་རྐྱང་རྐྱང་ཞིག་བཤད་བསྡད་ཡོད་ཀྱང་། ད་རེས་ང་སྲིད་སྐྱོང་གི་འོས་མིར་ལངས་པ་དང་། ཕྱོགས་མཐའ་ཁག་ལ་གཏམ་བཤད་བྱ་རྒྱུ་རག་པ། ལྷག་པར་དུ་བརྒྱུད་ལམ་ཁག་ཏུ་གསལ་བཤད་བྱ་རྒྱུའི་གོ་སྐབས་ཡོད་སྟབས། ང་ལ་ཆ་བཞག་ན་སྐད་ཆ་འདིའི་རིགས་མི་མང་ནང་ལ་ཁ་གསལ་དུ་འགྲོ་རྒྱུ་གོ་སྐབས་ཡག་པོ་ཞིག་རེད་བསམ་གྱི་འདུག མི་མང་གིས་༧གོང་ས་མཆོག་ལ་མཚན་སྨད་ཞུས་ཟེར་བ་དེ་གང་འདྲ་ཞིག་ཡིན་མིན་དང་། ༧གོང་ས་མཆོག་ཁ་ལ་འཁྱེར་ནས་སོ་སོའི་དོན་དག་སྒྲུབ་མཁན་གྱི་དབར་ལ་ས་མཚམས་དབྱེ་རྒྱུའི་དུས་ཚོད་ཅིག་བསླེབས་ཡོད་རེད་བསམ་གྱི་འདུག ང་༧གོང་ས་མཆོག་ལ་མཚན་སྨད་ཞུ་མཁན་རེད་ཟེར་མཁན་གྱི་མི་དེ་ཚོ་དང་། ད་ལྟ་བརྒྱུད་ལམ་ཁག་ཏུ་ང་ཚོའི་དབར་ལ་བགྲོ་གླེང་དེ་འདྲ་ཡོང་བསྡད་ཡོད་སྟབས། འདིས་ང་ལ་ཕན་ཐོགས་ཡོད་པ་ཞིག་དང་། ང་ཚོའི་སྤྱི་ཚོགས་ནང་གི་གནད་དོན་ཁག་གཅིག་ལ་ཕྱི་གསལ་ནང་གསལ་ཆགས་རྒྱུའི་རེ་བ་ཡོད་རེད་བསམ་གྱི་འདུག ངས་ང་ཚོའི་སྤྱི་ཚོགས་ལ་ཁག་ཡོད་མ་རེད་བསམ་གྱི་འདུག སྔོན་མ་ཟམ་གདོང་རིན་པོ་ཆེས་རང་བཙན་རྩོད་མཁན་དེ། ༧རྒྱལ་བ་རིན་པོ་ཆེའི་ཁ་གཏད་རེད། དོལ་རྒྱལ་བསྟེན་མཁན་ལས་རང་བཙན་རྩོད་མཁན་༧རྒྱལ་བ་རིན་པོ་ཆེར་དད་པ་མེད་མཁན་དེ་ཚོ་ཉེན་ཁ་ཚ་བ་ཡོད་པའི་ངོས་འཛིན་གནང་ཡོད་སྟབས། དེ་ལ་ལྟོས་ནས་ང་ཚོའི་བཙན་བྱོལ་སྤྱི་ཚོགས་འདིའི་ནང་ལ་རྙོག་གྲ་ལུང་པ་གང་བྱུང་ཡོད་སྟབས་མི་མང་དཀྱུས་མར་ཁག་གང་ཡང་ཡོད་པ་མ་རེད། ང་ཚོས་དམངས་གཙོའི་ལུང་པའི་ནང་ཁྲིམས་སྒྲིག་དང་ཐོབ་ཐང་རྨང་གཞིར་བཟུང་ནས་སྐད་ཆ་བཤད་ཡོད་པ་ལས། ༧གོང་ས་མཆོག་ལ་མཚན་སྨད་ཞུས་མ་ཞུས་ཀྱི་གནད་དོན་གང་ཡང་ཆགས་མེད་སྟབས། ཉི་མ་ཇེ་རིང་དང་རྩམ་པ་ཇེ་ཞིམ་ཟེར་བ་ལྟར། ངས་༧གོང་ས་མཆོག་ལ་མཚན་སྨད་ཞུས་མེད་པ་ད་ལྟ་མི་མང་ནང་ལ་ངོ་འཕྲོད་ཡོང་གི་འདུག

གསར་འགོད་པ། དོན་གྲུབ།