ཇོ་ནང་གིས་རྒྱུ་མཚན་བཞི་བརྗོད་དེ་ཟས་བཅད་དང་ཞུ་འབུལ་ལས་འགུལ་མཚམས་འཇོག་གནང་སོང་།
དེ་རིང་སྔ་དྲོའི་ཆུ་ཚོད་ ༡༡ ཐོག སྲིད་སྐྱོང་བློ་བཟང་སེང་གེ་མཆོག་དང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག ཚོགས་གཞོན་མཁན་པོ་བསོད་ནམས་བསྟན་འཕེལ་ལགས་བཅས་ནས། ཇོ་ནང་པའི་ཟས་བཅད་ལས་འགུལ་བ་ཚོའི་གནས་སྟངས་ལ་འཚམ་གཟིགས་དང་སྦྲགས་འཐུང་ཆུ་གནང་ནས་ཟས་བཅད་མཚམས་བཞག་སོང་བ་དང་། ཐེངས་འདིའི་ཞུ་འབུལ་ལས་འགུལ་མཚམས་བཞག་པའི་ཐད་གསར་འགོད་གསལ་བསྒྲགས་ཤིག་ཀྱང་སྤེལ་སོང་།
གསར་བསྒྲགས་ཐོག་ལྷན་ཚོགས་ཀྱི་ཚོགས་གཙོ་ཚངས་དབྱངས་རྒྱ་མཚོ་ལགས་ཀྱིས། ང་ཚོ་ཇོ་ནང་འགྲོ་ཕན་ལྷན་ཚོགས་ཀྱི་གོ་སྒྲིག་འོག བོད་མི་མང་སྤྱི་འཐུས་ལྷན་ཚོགས་ཀྱི་སྐབས་ ༡༥ པའི་གྲོས་ཚོགས་ཚོགས་དུས་ ༡༠ པའི་ཉིན་དང་པོ་ནས་འགོ་བཙུགས་ཏེ་ལས་འགུལ་སྤེལ་བ་དང་། ལས་འགུལ་ཉིན་ ༣ པར་བཀའ་སྤྱི་གཉིས་ནས་གནང་བའི་བཀའ་ལན་ལ་ང་ཚོས་ངོས་ལེན་ཞུ་ཐབས་མེད་པས། ང་ཚོས་བསྐྱར་དུ་དགོས་འདུན་དོན་ཚན་ ༧ ཅན་གྱི་ཞུ་སྙན་ཞིག་བཀའ་སྤྱི་ལྷན་རྒྱས་སུ་ཕུལ་བ་ལྟར། དེ་རིང་གྲོས་ཚོགས་ཚོགས་དུས་ ༡༠ པའི་ཉིན་མཐའ་མ་དང་ཟས་བཅད་ལས་འགུལ་སྤེལ་ནས་ཉིན་ ༨ པ་དེ་ཆགས་ཡོད། སྤྱིར་བཏང་ང་ཚོས་དགོས་འདུན་དོན་ཚན་ ༧ དེ་མ་འགྲུབ་བར་དུ། ཇོ་ནང་གཞིས་ལུས་མི་མང་འབུམ་ ༢ ལྷག་གི་མངོན་འདོད་གཞིར་བཟུང་ནས་ཟས་བཅད་ལས་འགུལ་འདི་མཚམས་འཇོག་ཐབས་མེད་པ་ཞིག་ཆགས་ཡོད་ཀྱང་། ང་ཚོས་དེ་རིང་འདིར་ཟས་བཅད་ལས་འགུལ་མཚམས་འཇོག་དགོས་པའི་རྒྱུ་རྐྱེན་གཅིག བཀའ་སྤྱི་ལྷན་རྒྱས་ནས་བཀའ་མོལ་རབ་དང་རིམ་པར་གནང་བ་དང་། ལྷག་པར་དུ་སྤྱི་འཐུས་ལྷན་ཚོགས་ཀྱི་ངོས་ནས་སྔར་རྗེས་སུ་བཞུགས་མོལ་འཚོགས་འདུ་ཐེངས་ ༦ ཙམ་གནང་བ། དེ་བཞིན་བཀའ་ཤག་གི་ངོས་ནས་བཞུགས་མོལ་འཚོགས་འདུ་ཐེངས་མང་ཚོགས་ནས་ང་ཚོའི་དགོས་འདུན་དོན་ཚན་ཁག་ལ་བཀའ་བསྡུར་མང་པོ་གནང་ཡོད་པ་རེད།
གཉིས་ནས་མདང་དགོང་བོད་བཞུགས་དཔལ་རྒྱལ་བ་ཇོ་ནང་བའི་བསྟན་བདག་འཇིགས་མེད་རྡོ་རྗེ་མཆོག་ནས་ཇོ་ནང་བའི་ཆོས་བརྒྱུད་ཀྱི་ཆེད་དུ་ཕྱི་ལོགས་ནས་ལས་འགུལ་སྤེལ་བཞིན་པ་དང་། ལྷག་པར་དུ་འདི་གར་ཟས་བཅད་ལས་འགུལ་གནང་བཞིན་པའི་གནས་སྟངས་ཧ་ཅང་ཛ་དྲག་ཆགས་ཀྱི་ཡོད་སྟབས། ཞུ་འབོད་ལས་འགུལ་འདི་མཚམས་འཇོག་གནང་རོགས་ཞེས་བཀའ་གནང་བ་དང་། གསུམ་ནས་ཁེ་ཉིན་དགའ་ལྡན་ཕོ་བྲང་ནས་བཀའ་གནང་བ་ལྟར་ཇོ་ནང་འགྲོ་ཕན་ལྷག་ཚོགས་ཀྱི་ལས་ཚོགས་མཁན་པོ་དང་ངེད་གཉིས་བཅར་དུས། དགའ་ལྡན་ཕོ་བྲང་གི་དྲུང་ཆེ་རྣམ་བཞི་མཉམ་འཛོམས་ཐོག ༧གོང་ས་སྐྱབས་མགོན་རིན་པོ་ཆེ་མཆོག་གིས་ཁྱོད་ཚོར་ཐོབ་ཐང་ཡོད་པ་རེད། ཁྱོད་ཚོར་བདེན་པ་ཡོད་པ་རེད། རྩོད་དགོས་ཀྱི་རེད་ཅེས་བཀའ་གནང་བ་ནང་བཞིན། ཁྱོད་རང་ཚོས་ཆོས་བརྒྱུད་སྤྱི་མཚུངས་ཀྱི་ཐོབ་ཐང་རྩོད་ཀྱི་ཡོད་སྟབས། ང་ཚོའི་ངོས་ནས་ལས་འགུལ་འདི་ལ་རྒྱབ་སྐྱོར་བྱེད་ཀྱི་ཡོད། ཡིན་ན་ཡང་ཉིན་གཉིས་ཀྱི་རྗེས་སུ་གྲོས་ཚོགས་གྲོལ་རྒྱུ་ཡིན་པ་དང་། ཁྱོད་ཚོས་མུ་མཐུད་དུ་ལས་འགུལ་སྤེལ་པ་ཡིན་ན། དེ་ལ་དམིགས་བསལ་གྲུབ་འབྲས་གང་ཡང་འཐོན་གྱི་མེད་དུས། ཐེངས་འདིའི་ཟས་བཅད་ལས་འགུལ་མཚམས་བཞག་ན་ཞེས་བཀའ་ཕེབས་སོང་། བཞི་ནས་ཁ་སང་གྲོས་ཚོགས་ཀྱི་བཞུགས་མོལ་འཚོགས་འདུའི་སྟེང་ང་ཚོའི་དགོས་འདུན་དོན་ཚན་ཁག་གི་ནང་ནས། བོད་གཞུང་མང་རྒྱལ་ཡོངས་ཚོགས་ཆེན་དང་ཛ་དྲགས་ཚོགས་ཆེན་སོགས་ཀྱི་ཐད་ནས་ཆོས་བརྒྱུད་གཞན་པ་སྤྱི་མཚུངས་ལྟར་ཐོབ་ཐང་གང་ཡོད་པ་དེ་མཐོར་འདེགས་གནང་རྒྱུ་དང་། བཀའ་ཤག་གི་ངོས་ནས་མདང་དགོང་བཀའ་ཤག་ལྷན་རྒྱས་ཚོགས་ནས། ཤེས་རིག་ལས་ཁུངས་ཀྱི་སློབ་དེབ་ཁག་ནང་ཇོ་ནང་བའི་ཆོས་འབྱུང་འགོད་རྒྱུ་མ་ཟད། ཆོས་རིགས་ལས་ཁུངས་ཀྱི་རིགས་གཅིག་རྐང་འཛིན་གྱི་སློབ་མའི་གྲངས་ཀ་གཅིག་གྱུར་བཟོ་རྒྱུའི་ཞལ་བཞེས་གནང་སོང་ལ། དེ་མིན་འཛིན་སྐྱོང་གི་ངོས་ནས་གནང་ཐུབ་པ་ག་རེ་ཡོད་པ་དེ་ཡིག་ཐོག་ཏུ་བཀོད་ནས་ཕུལ་བ་ཡིན་ན། ཁོང་ལྷན་རྒྱས་ནས་བཀའ་བསྡུར་གནང་གི་ཡིན་གསུངས་ཡོད་པར་བརྟེན། ད་ཐེངས་ཀྱི་ལས་འགུལ་འདི་གནས་སྐབས་སུ་འཚམས་འཇོག་གནང་གི་ཡིན། ཞེས་བརྗོད་བྱུང་།
གྲོས་ཚོགས་མཇུག་བསྡོམས་ཐོག་སྲིད་སྐྱོང་བློ་བཟང་སེང་གེ་མཆོག་གིས། ཁ་སང་བཀའ་ཤག་གི་གསལ་བཤད་ཐོག་བགྲོ་གླེང་བྱུང་བ་དེར་འགྲོ་དགོས་ཆགས་སོང་། གཙོ་བོ་ཇོ་ནང་པ་ཁོ་རང་ཚོ་དང་མཇལ་ནས་བཀའ་མོལ་ལྷུག་པོ་ཞེ་དྲག་བྱུང་ལ། ད་ལྟ་ཁོ་རང་ཚོའི་ལས་འགུལ་མཚམས་འཇོག་གནང་བ་དེ་ཡག་པོ་ཞེ་དྲགས་བྱུང་། ཞེས་གསུངས་སོང་།
དེ་བཞིན་སྤྱི་འཐུས་ཚོགས་གཙོ་སྤེན་ཚེ་རིང་མཆོག་གིས། ད་ལྟའི་བར་དུ་ང་ཚོས་བདག་པོ་མ་བརྒྱབ་པ་དེ་འདྲ་མ་ཡིན་པར་བདག་པོ་བརྒྱབ་ནས་གྲོས་ཚོགས་ཚོགས་དུས་ ༩ པའི་ནང་བསླེབས་པ་རེད། དམངས་གཙོའི་འགྲོ་ལུགས་ཀྱི་ཐོག་ནས་གཏན་ལ་འབེབས་མ་ཐུབ་པའི་གནས་ཚུལ་བྱུང་བ་རེད། ཅེས་དང་། སྐབས་ ༡༥ པའི་གྲོས་ཚོགས་ཐོག་དགོས་འདུན་དོན་ཚན་ ༧ ཆ་ཚང་སྒྲུབ་ཐུབ་ཡོད་པ་མ་རེད། ཡིན་ན་ཡང་གྲོས་ཚོགས་སྐབས་ ༡༦ པའི་སྐབས་སུ། ལས་འགུལ་སྤེལ་སྟངས་དང་རྣམ་འགྱུར་སྟོན་སྟངས། སྙན་ཞུ་འབུལ་ཕྱོགས་སོགས་དང་འབྲེལ་བའི་ཐད་ནས་འགྱུར་བ་འགྲོ་སྲིད་ཀྱི་རེད། ཅེས་གསུངས་སོང་།
གསར་འགོད་པ། པདྨ་རྒྱལ།
