འབྲི་རུ་རྫོང་གི་མགོ་ཁྲིད་སངས་རྒྱས་བཀྲ་ཤིས་ཟེར་བ་ཞིག་གིས་བཙན་པོ་དབང་ཡོད་ཀྱིས་འབྲི་རུ་རྫོང་རྒྱ་ཤོད་སེན་ཚ་གྲོང་ཚོའི་མི་མང་གི་ས་ཁང་གཏོར་བཤིག་གཏོང་བ་སོགས་ཀྱི་བྱ་སྤྱོད་སྤེལ་ཏེ་ཡུལ་མི་ཚོར་དཀའ་ངལ་ཆེན་པོ་འཕྲད་བཞིན་ཡོད་འདུག
རྒྱ་ཤོད་བསྟན་འཛིན་རབ་བརྟན་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། འབྲི་རུ་རྫོང་གི་མགོ་ཁྲིད་སངས་རྒྱས་བཀྲ་ཤིས་ཟེར་བ་ཞིག་གིས། ཉེ་བའི་ལོ་ཤས་ནས་བཟུང་མི་མང་ལ་ཚད་ལས་བརྒལ་བའི་དཀའ་སྡུག་བཟོས་ཡོད་པ་ཡོངས་གྲགས་ཡིན་ལ། ད་སྐབས་ཡང་འབྲི་རུ་རྫོང་རྒྱ་ཤོད་སེན་ཚ་གྲོང་ཚོའམ་གཡང་ཤོད་གྲོང་ཚོ་དང་། པད་དཀར་གྲོང་ཚོ་གཉིས་ཀྱི་ནང་མི་མང་གིས་བཟོད་དཀའ་བའི་ཇུས་ངན་སྣ་ཚོགས་ཤིག་ལག་བསྟར་བཞིན་ཡོད་པ་དང་། འབྲི་རུ་རྒྱ་ཤོད་སེན་ཚ་གྲོང་ཚོའམ་གཡང་ཤོད་གྲོང་ཚོའི་དུད་ཁྱིམ་སོ་སོར་མི་རབས་ནས་བདག་པའི་ས་ཞིང་དང་། བོད་ལུགས་སྡོད་ཁང་། ཁང་པའི་ར་སྐོར་ཡོད་དོ་ཅོག་བཙན་དབང་གིས་གཏོར་བཤིག་གཏོང་གིན་ཡོད་པ་དང་། སྡོད་ཁང་རྒྱ་ཆེན་པོ་ཡོད་པའི་དུད་ཁྱིམ་རྣམས་ལ་ཁྲིམས་མེད་ལུགས་མེད་ཀྱིས་སྐྱོན་བརྗོད་དང་འབྲེལ། དེ་སྔའི་སྡོད་ཁང་བཤིག་སྟེ་རྒྱལ་ཁབ་ཀྱི་ཚད་ཡོད་ཁང་པ་གསར་རྒྱག་དགོས་པའི་བཙན་བཀའ་གཏོང་གི་ཡོད་པ་མ་ཟད། ས་གནས་བོད་མི་ཚོའི་སྡོད་ཁང་གཏོར་བའི་གླ་དངུལ་ཡང་སྤྲོད་དགོས་པའི་བཙན་བཀའ་གཏོང་བཞིན་ཡོད་འདུག
ས་གནས་བོད་མི་ཚོས་ཆབ་མདོ་ནས་ཡིན་པའི་སངས་རྒྱས་བཀྲ་ཤིས་ཟེར་བ་དེའི་དམིགས་ཡུལ་ནི་ས་གནས་མི་མང་གི་ཁང་ཞིང་དང་ར་སྐོར་བཅས་བཙན་འཕྲོག་བྱས་ཏེ་གྱོང་གུད་ཆེན་པོ་བཟོས་རྗེས། ད་ལྟའི་བོད་ལུགས་ཀྱི་ཁྱད་ཆོས་ལྡན་པའི་སེན་ཚ་གྲོང་ཚོ་རྒྱ་བསྐྱེད་གཏོང་བར་ཁ་གཡར་ཏེ་རྒྱ་མི་ནང་འདྲེན་གྱིས་རྒྱ་སྡེ་ཅན་དུ་བསྒྱུར་རྩིས་ཡིན་སྐོར་བརྗོད་འདུག
འདི་ལོའི་ཕྱི་ཟླ་ ༨ པ་ནང་རྒྱ་གཞུང་གི་བཙན་བཀའི་འོག་སེན་ཚ་གྲོང་ཚོའི་མི་མང་ཚང་མས་སྔར་ལས་རྟ་རྒྱུགས་དུས་ཆེན་ལ་མཉམ་ཞུགས་བྱས་ཏེ་དགའ་སྤྲོའི་རྣམ་པ་སྟོན་ཐབས་བྱེད་དགོས་པ་དང་། སྐབས་དེར་ངེས་པར་དུ་སྟག་པགས་དང་གཟིག་པགས་ཀྱི་རྒྱན་གོས་གྱོན་དགོས་པའི་བཙན་བཀའ་ཡང་བཏང་ཡོད་འདུག ཡིན་ནའང་། བོད་མི་ཚོས་པགས་རིགས་མ་གྱོན་པར་བརྟེན་སྟག་པགས་དང་གཟིག་པགས་ཀྱི་རྒྱན་གོས་བཙན་གྱིས་རྟ་རྒྱུགས་སྐབས་མང་ཚོགས་ལ་འགྲེམས་སྟོན་བྱེད་དུ་བཅུགས་ཡོད་པ་དང་། འདས་ལོའི་ཕྱི་ཟླ ༡༡ ནང་སེན་ཚ་གྲོང་ཚོའི་མགོ་ཁྲིད་ངག་དབང་སྨོན་ལམ་ཟེར་བ་ཞིག་དམར་གསོད་བཏང་བའི་གནད་དོན་ཡང་བྱུང་ཡོད་ཀྱང་། ད་དུང་སངས་རྒྱས་བཀྲ་ཤིས་དང་ཁོའི་ལག་རོགས་གཡང་ཤོད་གྲོང་ཚོའི་མགོ་ཁྲིད་དམ་ཆོས་རིན་ཆེན་ཟེར་བ་གཉིས་ངན་འབྲེལ་གྱིས་མུ་མཐུད་མི་མང་ལ་གཉའ་གནོན་བཤུ་གཞོག་གི་བྱ་སྤྱོད་སྤེལ་བཞིན་ཡོད་པ་མ་ཟད། གལ་ཏེ་བཙན་བཀའ་ལ་མ་ཉན་ཚེ་བཙོན་འཇུག་ཁྲིམས་གཅོད་དང་ཡུལ་མི་རྣམས་དབྱར་རྩ་དགུན་འབུ་བརྐོ་རྒྱུར་བཀག་འགོག་བྱ་རྒྱུ་ཡིན་ཚུལ་གྱི་འཇིགས་སྐུལ་གཏོང་བཞིན་ཡོད་འདུག
གཞན་ཡང་འབྲི་རུ་རྒྱ་ཤོད་པད་དཀར་གྲོང་ཚོའི་རྡོ་རྟེང་དགོན་ངོ་མཚར་ཕུན་ཚོགས་གླིང་ཞེས་པའི་བོན་དགོན་རྙིང་གྲས་ཤིག་ཡོད་པ་དེའི་ནང་། ལོ་ཤས་གོང་ནས་བཟུང་མཚན་ཉིད་འཛིན་གྲྭ་བཙུགས་ཏེ་མཚན་ཉིད་ཀྱི་དགེ་རྒན་ཁྱུང་པོ་སོགས་ས་ཕྱོགས་གཞན་ནས་གླས་ཏེ། ད་བར་སློབ་གཉེར་བ་མང་པོར་ཕན་ཐོགས་ཆེན་པོ་བྱུང་སྟེ་ས་གནས་ཀྱི་ཤེས་ཡོན་ཡར་རྒྱས་ཕྱིན་པའི་རྣམ་པ་ཆེས་ཆེར་མངོན་ཐུབ་ཡོད་པ་མ་ཟད། ད་ལྟའི་ཆར་མཚན་ཉིད་སློབ་གཉེར་བ་ ༦༠ ཙམ་གྱིས་ཚད་མ་རིག་པར་སྦྱང་བརྩོན་བྱེད་བཞིན་ཡོད་ཀྱང་། སྟབས་མ་ལེགས་པར་ད་སྐབས་རྫོང་དང་གྲོང་ཚོའི་དཔོན་རིགས་ཚོས་མཚན་ཉིད་འཛིན་གྲྭ་གཏན་འགོག་བྱས་ཡོད་སྟབས། ཡུལ་མི་ཚོས་ཧ་ཅང་བློ་ཕམ་བྱེད་ཀྱི་ཡོད་འདུག དེ་བཞིན་པད་དཀར་དགོན་པའི་ལྷག་བསམ་ཅན་གྱི་དགེ་སློང་སྙན་གྲགས་ཞུ་བ་ཞིག་གིས། ཕྱི་ལོ་ ༢༠༠༧ ལོར་ཁོང་སྐུ་སྒེར་གྱིས་བོད་ཀྱི་རིག་གཞུང་སྲུང་སྐྱོབ་དང་། ཡང་སྒོས་ཡུལ་ལུང་དེའི་གཞོན་སྐྱེས་ཚོར་དམིགས་ཏེ་བོད་ཀྱི་གསོ་བ་རིག་པའི་སློབ་གྲྭ་ཞིག་ཆེད་བཙུགས་གནང་ནས་སློབ་མ་བརྒྱ་ལྷག་ལ་བོད་ཀྱི་གསོ་བ་རིག་པའི་གཙོས་སུམ་རྟགས་དག་གསུམ་གྱི་སློབ་སྦྱོང་ཚད་ལྡན་སྤྲོད་བཞིན་པའི་སྐབས་སུ། རྒྱ་གཞུང་གིས་གཏན་དུ་སྒོ་བརྒྱབ་ཏེ་སློབ་གྲྭའི་དགེ་སློབ་ཚང་མ་ཅི་བྱ་གཏོལ་མེད་གྱི་གནས་སུ་གྱར་ཡོད་འདུག
རྒྱ་ཤོད་པད་དཀར་གྲོང་ཚོ་ཡ་ང་བྱ་མདའ་དགའ་ལྡན་མཁའ་སྤྱོད་གླིང་དུ་བཙུན་མ་ ༢༠༠ ཙམ་ཡོད་ཀྱང་། འདི་ལོའི་བོད་ཟླ་ ༨ པའི་ཚེས་ ༡༤ (ཕྱི་ཟླ་ ༩ ཚེས་ ༢༧ )ནས་མགོ་བཙུགས་ཏེ་ཉིན་གསུམ་རིང་འབྲི་རུ་རྫོང་གི་མགོ་ཁྲིད་སངས་རྒྱས་བཀྲ་ཤིས་ཟེར་བ་བཙུན་དགོན་དེར་ཆེད་བཅར་གྱིས། བཙུན་མ་ ༢༠༠ ཙམ་ཡོད་པའི་ནང་ནས་བཙུན་མ ༡༠༠ འདི་ལོར་སླར་ཡང་ཕྱིར་ཕུད་བཏང་བའི་གནས་ཚུལ་བྱུང་ཡོད་པ་དང་། སྔར་ལོའི་ད་ཚོད་ཅིག་ལ་ཡང་ཁོ་བོའི་ངན་ཇུས་འོག་བཙུན་དགོན་དེའི་བཙུན་མ་ ༢༦ ཕྱིར་ཕུད་བཏང་ཡོད་འདུག དེ་བཞིན། ད་ལྟའི་ཆར་བྱ་མདའ་དགོན་དུ་བཙུན་མ་བརྒྱ་ལྷག་ཡོད་པའི་ཁྲོད་ནས་ ༤༩ ཚད་བཀག་ཆོག་མཆན་ཡོད་པའི་སྒྲིག་མཐུན་ཚོགས་ཞུགས་བའི་གྲས་སུ་བཞག་ཡོད་པ་དང་། གཞན་བཙུན་མ་ ༥༡ སློབ་གཉེར་དང་སྒྲིག་ཞུགས་ཀྱི་ཐོབ་ཐང་མེད་པར་དགོན་པ་དེའི་འཛིན་སྐྱོང་དང་ཁྱབ་ཁོངས་ཚོང་ཁང་མགྲོན་ཁང་སོགས་ཀྱི་ལས་ཀ་བྱེད་མཁན་འབའ་ཞིག་ཏུ་བཞག་ཡོད་པ་དང་། ཕྱིར་ཕུད་ཟིན་པའི་བཙུན་མ་ ༡༠༠ ཡིས་རང་ཁྱིམ་དུ་གཟན་ཆས་གྱོན་མི་ཆོག་པ་དང་། གལ་སྲིད་གྲྭ་ཆས་གྱོན་པ་ཡིན་ན་ཁྲིམས་འགལ་ཡིན་པ་མ་ཟད། ཕྱིར་ཕུད་ཟིན་པའི་བཙུན་མ་ཚོའི་སྒེར་ཤག་ཚང་མ་བཤིག་དགོས་པའི་བཙན་བཀའ་བཏང་ཡོད་པ་དང་། དེ་བཞིན་ས་གནས་གཞན་དུ་སློབ་གཉེར་བྱེད་དུ་འགྲོ་མི་ཆོག་པ་དང་། གལ་སྲིད་སོང་བ་ཡིན་ན་གྲོང་ཚོའི་མགོ་ཁྲིད་དང་ཁྱིམ་ཚང་བཅས་བཙོན་འཇུག་བྱ་རྒྱུ་ཡིན་པའི་ཁར། ལོ་གསུམ་ལ་དབྱར་རྩྭ་དགུན་འབུ་བརྐོ་མི་ཆོག་པ་སོགས་ཀྱི་ཉེན་བརྡ་བཏང་ཡོད་འདུག ཡང་སྒྲིག་ཞུགས་བཙུན་མའི་ཁོངས་སུ་རང་ལོ་ ༥༠ ལོན་ཚེ་དགོན་པའི་ནང་བཞུགས་མི་ཆོག་པར་ཐད་ཀར་རྒན་གསོ་ཁང་དུ་བཅུག་དགོས་པའི་བཙན་དཀའ་ཡང་གཏོང་བཞིན་ཡོད་འདུག
གསར་འགོད་པ། འཇིགས་མེད་རྒྱ་མཚོ།
