ངའི་འོས་ཤོག་གི་སྐད་ཆ།

                          རྔ་བ་མེ་རོ།

ད་སྐབས་རྒྱལ་སྤྱིའི་ནང་ཁ་འཐོར་དུ་གནས་པའི་བོད་རིགས་ཚོས། རྒྱ་གར་ནང་ཡོད་པའི་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་ཕྱི་མ་གདམ་རྒྱུའི་ཐད་ལ་གྲོས་བསྡུར་གནང་བཞིན་པའི་སྒང་ཡིན། སྲིད་སྐྱོང་སྔོན་མའི་བྱུས་འཆར་གྱི་རྩ་དོན་བཞིའི་རྗེས་སུ་འབྲང་ནས། རང་ཉིད་ཀྱིས་ཀྱང་ཐོབ་ཐང་ལྟར་རྒྱབ་སྐྱོར་བྱས་ཡོད། ད་ཐེངས་ངས་རང་ཉིད་ཀྱི་འདོད་འདུན་སྔོན་དུ་བསྒྲགས་ནས། ངའི་འདོད་འདུན་སྒྲུབ་ཐུབ་མཁན་ཞིག་ལ་འོས་ཤོག་ལྡུག་ན་འདོད། གལ་ཏེ་ངའི་འདོད་འདུན་སྒྲུབ་ཐུབ་པའི་སྐྱེས་བུ་ཞིག་མེད་ཚེ། ངས་རང་གི་འོག་ཤོག་གཅིག་པུ་སུའང་ལ་ལྡུག་རྒྱུ་མིན། རྒྱུ་མཚན་ངས་ཡང་བསྐྱར་གནོང་འགྱོད་ཅིག་འཁུར་འདོད།

ངའི་འདོད་འདུན་ནི་རང་ཉིད་ཀྱི་སྲིད་གཞུང་ཉམས་རྒུད་ནས་སྐྱོབ་ཆེད་ཡིན། ངའི་སྲིད་གཞུང་ཐོག་མར་མང་གཙོ་ཀ་བ་གསུམ་ལྡན་ལ་ཆོས་སྲིད་ཟུང་འབྲེལ་གྱི་ཁྱད་ཆོད་ཡོད་པའི་ཐོག་༧གོང་མཆོག་གིས་གསར་འཛུགས་གནང་འདུག ཡང་དག་པའི་སྲིད་གཞུང་འདི་ད་སྐབས་ཉམས་རྒུད་ནས་ཉམས་རྒུད་ཡིན་པ་ལས་ཡར་རྒྱས་ཀྱི་རྣམ་པའི་ཆ་ཙམ་ཡང་མ་མཐོང་། གནད་དོན་དེ་བཀའ་སྤྱི་གང་གིས་ཀྱང་རྟོག་ཞིབ་ཀྱི་ལམ་ནས་སྔོག་འདོན་མ་བྱས་པར་ལྷག་ཡོད། ཉེན་ཁ་འདི་ལས་བསྐྱབ་པའི་ཐད་ལ་མི་བུ་སྐོར་ཞིག་གིས། ཤེས་ཡོན་གྱིས་འཚར་ལོངས་འབྱུང་རྒྱུའི་མ་འོངས་པའི་མི་རབས་གསར་བར་རེ་བ་བཅངས་ཡོད། ཁོང་ཚོའི་རེ་ལྟས་ཆེ་བའི་མི་རབས་གསར་བ་ལ་ལོ་ངོ་ཉི་ཤུ་ནས་ལྔ་བཅུའི་བར་ཐག་ཡོད། ངས་བསམ་ན་ལོ་ལྔ་བཅུའི་རྗེས་ནས་ངའི་སྲིད་གཞུང་གི་ཚེ་ཚད་རྫོགས་པའི་སྐབས་ཤིག་རེད་སྙམ། སྐབས་དེར་སུས་ཀྱང་བསྐྱབ་མི་ཐུབ། ད་སྐབས་སྐྱོབ་ན་སྐྱོབ་དུས་ཡིན་ལ། འདི་སྐྱོབ་མཁན་ནི་སྲིད་སྐྱོང་ལྟ་བུའི་མི་བུ་གཅིག་དང་། སྤྱི་འཐུས་ལྟ་བའི་མི་མང་ཁ་རྙོག་ཅན་ཚོ་མིན། འདི་སྐྱོབ་མཁན་ནི་རྒྱལ་སྤྱིའི་ཤེས་ཡོན་པའི་སྡིངས་ཆའི་ཐོག་བསླེབས་ཟིན་པའི་མི་རབས་ཤིག་ཡིན། མི་རབས་དེ་ནི་ད་ནས་བརྩིས་པའི་ལོ་ལྔ་བཅུའི་སྔོན་གྱི་མི་རབས་གསར་བ་དེ་རེད། མི་རབས་དེ་བཙན་བྱོལ་གཞུང་གིས་སྐྱེད་སྲིང་འོག་འཚར་ལོངས་བྱུང་བའི་མི་རབས་ཤིག་ཡིན། མི་རབས་དེ་ད་སྐབས་གང་དུ་ཡོད་དམ། མི་རབས་དེ་ནི་བཙན་བྱོལ་གཞུང་གིས་སྐྱེད་སྲིང་བྱས་ཀྱང་། བཙན་བྱོལ་གཞུང་གིས་བོར་བརླག་སོང་བའི་མི་རབས་ཤིག་རེད། གསལ་བོར་བཤད་ན། བཙན་བྱོལ་གཞུང་གིས་དུས་ནམ་ཞིག་གི་ལོར། ཆེད་སྦྱོང་སློབ་མ་ཕྱི་ཡུལ་དུ་བཏང་ནས་ད་ལྟའི་བར་ལོ་ཅི་ཙམ་ལོན་ཡོད། ཆབ་དཔལ་རིག་གསུམ་གྱིས་བསྡུས་པའི་ཚད་མཐོའི་འབུམ་རམས་པའི་ལག་ཁྱེར་བླངས་ཡོད་པའི་མི་སྣ་ཅི་ཙམ་ཡོད། ཁོང་ཚོ་ཅིའི་ཕྱིར་རང་ཉིད་ཀྱི་སྲིད་གཞུང་ནང་མཉམ་ཞུགས་མ་གནང་བ་ཡིན། རྒྱུ་མཚན་ཅི་ཞིག་ལ་བཙན་བྱོལ་གཞུང་གིས་ཁོང་ཚོའི་ལས་གནས་དང་མཐུན་པའི་སྡིངས་ཆ་ཞིག་མ་བསྐྲུན་པ་རེད། མི་རབས་དེས་ཕྱི་ཡུལ་ནས་རང་ཉིད་ཀྱི་ཁྱིམ་ཚང་སྐྱོང་གིན་ཡོད་དམ། ཡང་ན་རང་མི་རིགས་ཀྱི་བདེ་མཐའི་སླད་དུ་ལས་དོན་སྒྲུབ་བཞིན་ཡོད། གལ་ཏེ་མི་རབས་དེས་ཕྱི་ཡུལ་གང་སྐྱིད་གང་བདེ་ནས་མི་ཚེ་སྐྱེལ་བཞིན་ཡོད་ན། ༧གོང་ས་མཆོག་གི་རྩ་བའི་དགོངས་གཞི་ལ་ལྡོག་ཕྱོགས་ཀྱི་འབྲས་བུར་གྱུར་འདུག

ང་ཚོ་ལ་ང་ཚོའི་ལོ་རྒྱུས་ཀྱིས་བཤད་ན། ང་ཚོ་ནི་རང་མི་རིགས་ཀྱི་བདེ་མཐའ་རྩོད་ཆེད་བཙན་བྱོལ་དུ་ཡོང་བ་ཡིན་ཟེར། ང་ཚོའི་གནས་སྟངས་ཀྱིས་ང་ཚོར་བསྟན་དོན་ལྟར་ན། ང་ཚོ་བཙན་བྱོལ་དུ་མི་ཚེ་སྐྱེལ་རྒྱུའི་ཆེད་དུ་ཡོང་བ་འདྲ། དོན་དངོས་ང་ཚོའི་དཀའ་སྡུག་གིས་བསགས་པའི་སྟོབས་ཤུགས་ཀྱིས་མི་ཚེ་སྐྱེལ་བཞིན་ཡོད་དམ། ཡང་ན་མི་རིགས་ཀྱི་བདེ་མཐའ་རྩོད་བཞིན་ཡོད། སྤྱིར་སློབ་གྲྭ་ནི་སྤྱི་ཚོགས་བཟོ་བྱེད་ཀྱི་བཟོ་གྲྭ་ཞིག་རེད། བཟོ་གྲྭ་དེ་ལས་ཐོན་པའི་ཐོན་དངོས་ཆེས་བཟང་ཤོས་བོར་བརླག་ཏུ་སོང་ན་དོ་བདག་ལ་ཁེ་གྱོང་ཅི་ཙམ་ཡོད་དམ།

ངས་སང་ལོའི་བཀའ་སྤྱི་གང་ཡིན་པའི་འོས་མི་གསར་བ་ལ། བོད་རྒྱའི་དཀའ་རྙོག་སེལ་ཐུབ་པའི་རེ་བ་རྒྱག་རྒྱུ་ཕར་བཞག མཐའ་ན་བཙན་བྱོལ་གཞུང་མང་གཉིས་ཀྱི་དཀའ་ངལ་ཙམ་ཡང་སེལ་ཐུབ་རྒྱུ་རེད་བསམ་གྱི་མེད། རྒྱུ་མཚན་དཔེར་འཇོག་གིས་བཤད། ངའི་གློག་ཀླད་འདི་ཆེས་བཟང་བའི་བཟོ་གྲྭ་ལས་ཐོན་པའི་འཕྲུལ་ཆས་ཡག་ཤོས་ཤིག་ཡིན། འོན་ཀྱང་གློག་ཀླད་ནང་དྲ་འབུ་མང་སོང་བས་མ་ལག་ཡོངས་ཀྱི་དུག་འབུ་བསལ་མི་ཐུབ་པའི་གནས་སུ་ལྷག་ཡོད། གློག་ཀླད་ནང་ལ་མ་ལག་གསར་བ་རེ་བསྐྱར་བརྗེ་ཐུབ་ན། ད་གཟོད་གཞི་ནས་ངའི་དཀའ་ངལ་སེལ་ཐུབ་ལ། ངས་ལས་དོན་ཡང་བསྒྲུབ་ཐུབ། ངས་ནུས་སྟོབས་ཀྱང་འདོན་ཐུབ།

ངའི་འདོད་འདུན་ངོ་མ་དེ། གཞུང་ངོས་ནས་ཕྱི་ཡུལ་དུ་མངགས་པའི་ཤེས་ཡོན་གྱིས་འཚར་ལོངས་བྱུང་བའི་མི་སྣ་གང་ཡོད། ཕྱིར་རང་གཞུང་ནང་མཉམ་ཞུགས་བྱ་རྒྱུ་དེ་ཡིན། མི་སྣ་འདི་དག་ལ་ངའི་སྲིད་གཞུང་ཉམས་རྒུད་ནས་སྐྱོབ་ཐུབ་པའི་རེ་བ་ཡོད། རྒྱུ་མཚན་དེས་ཕྱིར། ངས་འོས་ཤོག་ལྡུག་འདོད་པའི་འོས་མི་དེས། ཕྱི་ཡུལ་དུ་མངགས་པའི་མི་སྣ་དེ་དག་ནང་འགུག་བྱེད་ཨེ་ཐུབ། ཁོང་ཚོའི་ཆེད་སྦྱོང་དང་མཐུན་པའི་ལས་གནས་སྤྲོད་ཨེ་ཐུབ། དེ་ངའི་འོས་ཤོག་གིས་འོས་མི་ལ་བཤད་པའི་སྐད་ཆ་ཡིན།

ད་དུང་ངའི་མ་འོངས་སྲིད་སྐྱོང་ལགས། ཁྱེད་དང་ང་གཉིས་ཐེ་བའི་ང་ཚོ་བཙན་བྱོལ་གཞུང་མང་གཉིས་ཀྱི་ནང་ཁུལ་ལ། གཟི་བརྗིད་མེད་ཀྱང་གཟི་བརྗིད་ངོམ་རྒྱུར་དགའ། ང་ཚོའི་དགའ་ཕྱོགས་དེའི་ཐོག་ནས་བལྟས་ན། ངའི་སྲིད་གཞུང་འདི་ཡར་རྒྱས་དང་གོང་འཕེལ་ཡིན། ང་ཚོའི་གཞུང་མང་གཉིས་དོན་དངོས་བཤད་རྒྱུར་མི་དགའ། བདེན་དོན་རྒྱབ་བླངས་དང་། དགེ་སྐྱོན་དབྱེ་འབྱེད་ཀྱིས་གཞུང་གི་སྲིད་བྱུས་ཡོ་བསྲང་བྱེད་ཐབས་ལ་མི་དགའ། ངས་ང་ཚོ་ཆེས་མི་དགའ་བའི་ཕྱོགས་ནས་ཅུང་ཙམ་བཤད།

ང་ཚོའི་སྲིད་གཞུང་གི་སྒྲོམ་གཞིའི་ནང་། ཆོས་ལུགས་གྲུབ་མཐའ་གོང་འཕེལ་གཏོང་ཐབས་ཀྱི་ལྷན་ཁང་ཡོད་ལ་ལས་གནས་ཡོད། ལས་ཁུངས་མང་། རྩོད་རྙོག་ཆེ་བའི་ཆོས་རྒྱུད་ཁག་གི་དཀའ་ངལ་ད་དུང་སེལ་མེད། ཤེས་ཡོན་སྲིད་བྱུས་དར་སྤེལ་གཏོང་ཐབས་ཀྱི་ལྷན་ཁང་ཡོད། ལས་གནས་ཡོད། ལས་ཁུངས་མང་། མཐའ་ན་བརྡ་སྤྲོད་ཐོག་གི་དཀའ་གནད་ཙམ་གསེད་འགྲོལ་དང་། བཀས་བཅད་ཀྱི་ལམ་ནས་གཏན་འབེབས་བྱས་ཐུབ་མེད། འཕྲོད་བསྟེན་བྱེད་སྒོའི་ཐད་ལྷན་ཁང་ཡོད་ལ་ལས་གནས་ཡོད། ལས་ཁུངས་མང་། སྨན་ཁང་ཡོད། ཛ་དྲག་གི་ནད་གཞི་མྱུར་སྐྱོབ་ཐུབ་པའི་སྨན་ཁང་མེད་སྨན་པ་མེད། དཔལ་འབྱོར་འཚོལ་སྒྲུབ་བྱེད་ཐབས་ཀྱི་ལྷན་ཁང་ཡོད། ལས་ཁུངས་མང་། ལས་གནས་ཡོད། མང་ཚོགས་ཀྱི་འཚོ་བ་དཀའ་ཁག་ཅན་ཡིན་པར་མ་ཟད། གཞུང་ཞབས་པའི་ཟླ་ཕོག་གིས་ཀྱང་རང་ཉིད་ཀྱི་ཁྱིམ་ཚང་སྐྱོང་ཐུབ་མིན་ཙམ་རེད། ད་ང་ཚོས་ནང་ཁུལ་ལ་གཟི་བརྗིད་ངོམ་ནས་འདུག་གམ། ཡང་ན་དོན་དངོས་བསྡུར་ནས་རྒྱལ་སྐྱོབ་འབངས་སྐྱོབ་ཀྱི་བྱེད་ཐབས་འཚོལ།

མང་ཚོགས་ཀྱི་ཚབ་མཚོན་ཐུབ་པའི་སྤྱི་འཐུས་གསར་བ་ལགས། དགྲ་ཕྱོགས་ལ་ས་ཚུགས་ཀྱིས་དབང་དུ་བྱས་ན། ང་ཚོས་ནང་ཁུལ་ལ་དཔའ་ངོམ་བྱེད་བཞིན། ཆོལ་ཁ་དང་ཆོས་ལུགས་བར་གྱི་རྒྱལ་ཕམ་རྩོད་ནས་བསྡད་ན་འགྲིག རྒྱུ་མཚན། མདུན་ཕྱོགས་སུ་རྒྱ་གར་དང་བལ་ཡུལ་གྱིས་བཅད་འདུག རྒྱབ་ཕྱོགས་སུ་རི་བོ་ཧི་མ་ལ་ཡའི་བྲག་ལྗོངས་བརྗིད་པས་ཡུལ་འདི་བཙན་ས་ཞིག་རེད། འོན་ཀྱང་། དགྲ་ཟླའི་སྟོབས་ཤུགས་ཀྱིས་འཛམ་གླིང་དབང་སྒྱུར་བྱེད་ཕྱོགས་ནས་བཤད་ན། ང་ཚོས་ནང་ཁུལ་ལ་དཔའ་ངོམ་བྱེད་དུས་མིན། རྒྱའི་དཔལ་འབྱོར་དང་རྒྱའི་མི་སེར་གྱིས་འཛམ་གླིང་གསུམ་ཆའི་གཉིས་ཙམ་ཟིན་བཞིན་ཡོད། ལྷག་པར་དགྲ་ཟླའི་ཆབ་སྲིད་དབང་བསྒྱུར་ཀྱང་ང་ཚོའི་སྒོ་འགྲམ་དུ་བསླེབས་ཟིན། དེ་ནི་བལ་ཡུལ་གཞུང་གི་སྲིད་ཇུས་དམར་ཤོག་ལམ་ལུགས་སུ་བསྒྱུར་ཉིན་ནས་རེད། ལམ་ལུགས་དེའི་མིང་ལ་མའོ་པཱ་ཏེས་ཟེར། ནང་དོན་མའོ་ཙེ་ཏུང་གི་རྗེས་འབྲང་བ་རེད། མའོ་ཙེ་ཏུང་གི་ཆབ་སྲིད་ལམ་ལུགས་རྒྱ་གར་གྱི་མཐའ་མཚམས་སཱོ་ནཱ་ལེའི་བར་དུ་བསླེབས་ཡོད། ད་དུང་རྒྱ་གར་ནང་དམར་ཤོག་ལམ་ལུགས་སུ་དགའ་མཁན་མི་གྲངས་ཉུང་ཉུང་མིན་ལ། མའོ་ཙེ་ཏུང་གི་ལམ་ལུགས་སུ་དགའ་མཁན་ཉུང་ཉུང་གཏན་ནས་མ་རེད། བལ་ཡུལ་ནང་ཡོད་པའི་ང་ཚོའི་གཞུང་གི་སྣེ་ལེན་ཁང་སྟོང་པ་ཆགས་འདུག་ལ། རྒྱ་གར་ནང་ཡོད་པའི་རྒྱ་ནག་གི་གཞུང་ཚབ་ཁང་གི་སྒོ་འགྲམ་ན་བོད་མི་ཚོས་འཚིང་ཁ་ཤིག་ཤིག་རེད། དོན་གནད་འདི་དག་ལ་ཕྱོགས་ཡོངས་ནས་ཁྱེད་ཀྱིས་རྟོགས་གཞིག་བྱས་མྱོང་ཡོད་དམ།

ངས་བསམ་ན་ང་ཚོའི་གནས་སྟངས་འདི་ཧ་ཅང་ཉེན་ཁ་ཅན་ཞིག་རེད། ད་ང་ཚོས་ནང་ཁུལ་ལ་གཟི་བརྗིད་མི་ངོམ། དཔའ་ངོམ་མི་བྱེད། ནང་ཁུལ་གྱི་རྒྱལ་ཕམ་མི་རྩོད། བོད་ནས་གསར་དུ་འབྱོར་བའི་རིགས་སུ་གཞུང་ངོས་ནས་སྐྱོ་གསོ་ཙམ་ཡང་སྤྲད་མ་ཐུབ་པ་དང་། གཞིས་འགོ་ཁག་གི་འཛུགས་བསྐྲུན་ཡར་རྒྱས་སུ་གཏོང་མ་ཐུབ་པས། མི་མང་ཤོས་ཕྱི་ཡུལ་དུ་འཁྱམ་བཞིན་ཡོད། མང་ཤོས་བོད་ནང་དུ་ཕྱིར་ལོག་བཞིན་ཡོད། གནད་དོན་དེ་སྐྱ་ཟད་སྔོ་སྡུག་གི་འཚོ་བ་རོལ་མ་ཐུབ་པས་རེད།

ང་ཚོས་བོད་ནང་གི་རྒྱའི་བཤུ་གཞོག་གཉའ་གནོན་གྱི་སྲིད་ཇུས་དེ། གཞིས་བཞུགས་སྤུན་ཟླ་ཚོས་བསྒྱུར་ཐུབ་རྒྱུའི་རེ་བ་བཅངས་ཡོད། དེ་ནི་ང་ཚོའི་ངོ་ཚ་རེད། རྒྱུ་མཚན་ང་ཚོའི་བཙན་བྱོལ་གཞུང་མང་གཉིས་ཀྱིས་ནུས་སྟོབས་ཅི་ཡང་མ་ཐོན་པས་ཡིན། ཕྱི་ཡུལ་དུ་སོང་བའི་བོད་རིགས་རྣམས་ལ་སྟོབས་ཤུགས་ལྡན་ཚེ། རྗེས་ཕྱོགས་རང་གཞུང་ནང་འཁོར་རྒྱུའི་རེ་བ་བཟུང་ཡོད། དེ་ནི་ང་ཚོའི་ས་བོན་ས་ལ་མ་བཏབ་པའི་ལོ་ཏོག་གི་འབྲས་བུ་ཞིག་རེད། རྒྱུ་མཚན། ང་ཚོའི་སློབ་གསོའི་ལམ་ལུགས་ཀྱི་ཐོག་ནས་ཁོང་ཚོའི་རྒྱུད་ལ་རྒྱལ་གཅེས་པའི་སེམས་ཁམས་ཅི་ཡང་འཇོག་ཐུབ་མེད། རྒྱ་གར་གྱི་སྐྱབས་བཅོལ་ལག་ཁྱེར་འཛིན་མཁན་ཚོར་གྱོང་གུད་དང་། ཕྱི་རྒྱལ་གྱི་མི་སེར་ལག་ཁྱེར་འཛིན་མཁན་ཚོར་ཁེ་བཟང་ཐོབ་པའི་ཉིན་ཞིག་བསླེབ་གྲབས་ཡོད། དེ་ནི་དགྲ་ཟླས་ཡུན་རིང་སྒུག་པའི་ཉི་མ་ཞིག་རེད་ལ། ང་ཚོས་རང་ཉིད་ཀྱི་སྲིད་གཞུང་རང་ཉིད་ཀྱིས་མུག་གསོད་བྱས་པའི་དུས་ངན་ཞིག་ཀྱང་རེད།

ངའི་མ་འོངས་པའི་སྲིད་སྐྱོང་ལགས། ད་སྔ་ང་ཚོས་ལས་འགུལ་སྤེལ་ཚད་ལ་ཕྱོགས་བསྡོམས་ཤིག་བྱས་ན། བོད་མི་མང་གི་བཟོད་དཀའ་བའི་སྡུག་བསྔལ་རྒྱལ་སྤྱིའི་ཐོག་བརྒྱུད་བསྒྲགས་སྤེལ་ཐབས་ཤིག་དང།  བོད་མི་མང་གི་མ་འོངས་པའི་བདེ་མཐའ་རྒྱ་གཞུང་བ་རེ་ཞུ་ཕུལ་ཐབས་ཤིག་རེད། མདོར་བསྡུས་ན། སྙན་ཞུ་དང་གསལ་བསྒྲགས་གཉིས་རེད། རྗེས་ཕྱོགས་ཁྱེད་ལ་ཤོག་ལྷེ་དེ་གཉིས་ལས་འདས་པའི་ལས་འགུལ་ཐད་ཐབས་བྱུས་ཅི་ཞིག་ཡོད། ངའི་མ་འོངས་པའི་སྤྱི་འཐུས་ལགས། ང་ཚོའི་གཞིས་འགོའི་འཛུགས་བསྐྲུན་ལ་ཕན་བྱེད་དང་། གཞིས་ས་གང་ཡང་མེད་པའི་གསར་འབྱོར་བའི་འཚོ་བ་ལ་ཕན་བྱེད། ཡུ་རོབ་ཕྱོགས་ཀྱི་སྐྱབས་བཅོལ་མ་རེག་པའི་མི་གྲངས་གཉིས་སྟོང་ཡས་མས་དང་། ཧྥ་རན་སའི་ཟབ་འོག་ཏུ་ཉལ་བའི་བོད་མི་ཚོ། ཨ་རིའི་མཚོ་མཐའི་གཟིངས་ཆག་ནང་སྡོད་པའི་མི་གྲངས་ལྔ་བརྒྱ་ཡས་མས་ཀྱི་དཀའ་ངལ་སེལ་ཐབས་སུ། ཁྱེད་ཀྱིས་སྲིད་གཞུང་ལ་གྲོས་འཆར་འདོན་ཐབས་ཅི་ཞིག་ཡོད་དམ། ང་ཚོའི་སྲིད་གཞུང་གིས་ཕྱི་རྒྱལ་ནང་རྒྱལ་ཡོངས་ཀྱི་བཙན་བྱོལ་མང་ཚོགས་ཀྱི་དཀའ་ངལ་སེལ་ཐུབ་བམ། མི་ཐུབ་ན་ང་ཚོའི་སྲིད་གཞུང་གི་སྟོབས་ཤུགས་འཐོར་འདེགས་གཏོང་ཐབས་སུ་ཁྱེད་ལ་དགོངས་འཆར་ཅི་ཞིག་ཡོད། ཁྱེད་ནི་མང་ཚོགས་ཀྱི་འཐུས་ཚབ་རེད།

མཇུག་མཐར། ང་རང་ཉིད་ཐེ་བའི་ང་ཚོར་དྲི་བ་ཞིག་འདོན། ང་ཚོས་གོ་སྐབས་བཟང་ཤོས་གཉིས་ཤོར་ཚར་ཡོད། གཅིག རྒྱ་ནག་གི་སྲིད་འཛིན་ཏུན་ཞོ་ཕིན་གྱིས་གྲོས་འཆར་ཚུར་གནང་བའི་གོ་སྐབས་དེ་རེད། གཉིས། རྒྱལ་སྤྱིའི་ཨོ་རྩེད་འགྲན་ཚོགས་ཆེན་མོ་རྒྱ་ནག་ནང་འཚོགས་པའི་གོ་སྐབས་ཡིན། ད་ང་ཚོ་ལ་གོ་སྐབས་གསུམ་པ་ཞིག་ཡོད་དམ། ང་ནི་རང་གཞུང་ལ་དང་བླང་དཔྱ་ཁྲལ་འཇལ་བཞིན་པའི་མི་སེར་དཀྱུས་མ་ཞིག་ཡིན་རུང་། རང་ཉིད་ཀྱི་སྲིད་གཞུང་ལ་སེམས་ཁྲལ་ཡོང་གི།

ཕྱི་ལོ་ ༢༠༡༥། ༡༠ ། ༡༡ ཉིན་བྲིས།