འགྲེམས་སྟོན་ཁང་ཟེར་བ་དེ་གནད་འགག་ཆེན་པོ་ཆགས་ཡོད།

ཕྱི་དྲིལ་བཀའ་བློན་མཆོག་གིས་དམངས་གཙོའི་འཕེལ་རིམ་གྱི་འགྲེམས་སྟོན་དབུ་འབྱེད་གནང་སྐབས་༧གོང་ས་མཆོག་གི་བཀའ་དྲིན་ལ་བརྟེན་ནས་ང་ཚོ་དམངས་གཙོའི་ལམ་ལུགས་ཐོག་འགྲོ་ཐུབ་པ་དེ་ནམ་ཡང་བརྗེད་ཉན་གྱི་མ་རེད་ཅེས་གསུངས་སོང་།

དེ་རིང་སྔ་དྲོའི་ཆུ་ཚོད་ ༡༡།༠༠ ཐོག་གཙུག་ལག་ཁང་གི་ཉེ་འཁྲིས་བོད་ཀྱི་འགྲེམས་སྟོན་ཁང་དུ། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་འགྲེམས་སྟོན་ཚན་པའི་གོ་སྒྲིག་འོག བཙན་བྱོལ་བོད་མིའི་དམངས་གཙོའི་འཕེལ་རིམ་སྐོར་གྱི་འགྲེམས་སྟོན་ཞིག་དབུ་འབྱེད་གནང་སོང་ལ། སྐུ་མགྲོན་གཙོ་བོར་ཕྱི་དྲིལ་ལས་ཁུངས་ཀྱི་བཀའ་བློན་བདེ་སྐྱིད་ཆོས་དབྱངས་མཆོག་གི་དབུས་དྲུང་ཆེ་རྣམ་གཉིས་དང་། ཕྱི་ནང་གི་གསར་འགོད་པ་དང་ཕྱི་རྒྱལ་བ་ཁག་ཅིག་བཅས་འཛོམས་འདུག

མཛད་སྒོའི་ཐོག་མར་སྐུ་མགྲོན་གཙོ་བོ་མཆོག་གིས་འགྲེམས་སྟོན་དབུ་འབྱེད་ཀྱི་དར་སྣེ་གཅོད་འབྲེག་གནང་བ་དང་སྦྲགས། བཙན་བྱོལ་བོད་མིའི་དམངས་གཙོའི་འཕེལ་རིམ་གྱི་པར་རིས་ཁག་ལ་རིམ་པས་གཟིགས་ཞིབ་གནང་རྗེས་གསུང་བཤད་གནང་དོན། འགྲེམས་སྟོན་ཁང་ཟེར་བ་དེ་གལ་ཆེན་པོ་དང་གནད་འགག་ཆེན་པོ་ཞིག་ཆགས་བསྡད་ཡོད་པ་རེད། དེ་གལ་ཆེན་པོ་རྩི་དགོས་དོན་ག་རེ་རེད་ཟེར་ན། མི་རབས་གཅིག་ནས་གཅིག་བརྒྱུད་དེ་སྤྱི་དོན་གྱི་ཉམས་མྱོང་དང་དྲན་པ་རྒྱུན་འཁྱོངས་བྱ་རྒྱུ་དཔེ་མི་སྲིད་པའི་གལ་ཆེན་པོ་ཆགས་བསྡད་ཡོད་སྟབས། ང་ཚོའི་འགྲེམས་སྟོན་ཁང་འདིས་གཙོ་བོ་པར་རིས་དང་གློག་བརྙན་བརྒྱུད་དེ། བོད་དང་འབྲེལ་བའི་ལོ་རྒྱུས་དང་རིག་གཞུང་། དེ་བཞིན་བོད་ནང་གི་ཆབ་སྲིད་གནས་སྟངས་སྐོར་ལ་ངོ་སྤྲོད་ཞུ་བཞིན་ཡོད་པ་རེད།  བོད་ཀྱི་འགྲེམས་སྟོན་ཁང་ཟེར་བ་འདི། བོད་མིའི་སྒྲིག་འཛུགས་ཀྱི་ཡོད་ན་མེད་ན་ཞིག་ཆགས་ཡོད་སྟབས། ལོ་གཅིག་ནང་མི་སྟོང་ཕྲག་མང་པོ་བསླེབས་ཀྱི་ཡོད་པ་རེད། འདི་གཞི་རྒྱ་ཆེན་པོ་མེད་ཀྱང་འགྲེམས་སྟོན་བྱས་པ་དེ་ནང་དོན་དང་བརྗོད་གཞི། འགྲེལ་བཤད་བཅས་ཀྱི་ཐོག་ལ་ཡིན་ཡང་གང་ཐུབ་ཐུབ་ཀྱིས་གནད་ལ་ཁེལ་བ་སྤུས་དག་པོ་དང་། ཁྱད་ལས་ཀྱི་ངོ་བོ་གཅིག་ཡོང་བར་འབད་བརྩོན་ཞུས་དང་ཞུ་བཞིན་པ་རེད། ཅེས་དང་།

ཡང་དམངས་གཙོའི་འཕེལ་རིམ་གྱི་པར་རིས་དང་འབྲེལ་བའི་ཐོག་ཁོང་མོས། ད་ལྟའི་དམངས་གཙོའི་འཕེལ་རིམ་གྱི་པར་རིས་འགྲེམས་སྟོན་འདི། འཆར་གཞིའི་ནང་བསྒྲིགས་ནས་ཕྱག་ལས་གནང་སྟེ་དུས་ཚོད་ཏོག་ཙམ་ཕྱིན་ཡོད་ཀྱང་། ད་ལྟ་འོས་བསྡུ་ཆེན་མོའི་བརྒྱུད་རིམ་འགྲོ་དང་འགྲོ་བཞིན་པ་ཡིན་དུས། ང་ཚོས་དུས་ལ་བབ་པའི་གོ་སྐབས་འདི་བཟུང་ནས། བཙན་བྱོལ་སྤྱི་ཚོགས་ཀྱི་དམངས་གཙོའི་འཕེལ་རིམ་བྱུང་སྟངས་ངོ་སྤྲོད་བྱ་རྒྱུའི་གོ་སྐབས་ཡག་པོ་ཞིག་ལ་མཐོང་སྟེ་དེ་རིང་དབུ་འབྱེད་ཞུ་ཡི་ཡོད་པ་རེད། དམངས་གཙོའི་འཕེལ་རིམ་འདི་ང་ཚོས་ཁག་བཞི་ལ་དབྱེ་ཡི་ཡོད་པ་རེད། དང་པོ། ཕྱི་ལོ་ ༡༩༦༠ ལོར་སྤྱི་འཐུས་ལྷན་ཚོགས་དབུ་འཛུགས་དང་། གཉིས་པ།  ཕྱི་ལོ་ ༡༩༩༡ ལོར་བཅའ་ཁྲིམས་གཏན་འབེབས་གནང་བ་རེད། གསུམ་པ། ཕྱི་ལོ་ ༢༠༠༡ ལོར་མི་མང་གིས་ཐད་ཀར་བཀའ་བློན་ཁྲི་པ་འོས་འདེམས་བྱ་རྒྱུ་བྱུང་པ་བཅས་ཀྱི་བྱུང་རིམ་ཞིག་དང་། མཐའ་མ་ཕྱི་ལོ་ ༢༠༡༡ ལོར་༧གོང་ས་མཆོག་གིས་མི་མང་གིས་ཐད་ཀར་འོས་འདེམས་གནང་བའི་དབུ་ཁྲིད་ལ་ཆབ་སྲིད་ཀྱི་སྐུ་དབང་རྩིས་སྤྲོད་གནང་བ་བཅས་ཀྱི་སྐོར་ལ་གསལ་བཤད་ཞུ་ཡི་ཡོད་པ་རེད། ང་ཚོས་༧གོང་ས་མཆོག་གི་བཀའ་དྲིན་ལ་བརྟེན་ནས་དམངས་གཙོའི་ལམ་ལུགས་ཐོག་འགྲོ་ཐུབ་པ་དེ། ནམ་ཡང་བརྗེད་ཉན་གྱི་མ་རེད། དེ་རིང་ང་ཚོས་འགྲེམས་སྟོན་འདི་ཞུས་པ་དེས། ཕྱི་རྒྱལ་གྱི་མི་སྣ་གང་མང་མང་ཞིག་གིས་གཟིགས་ཐུབ་པའི་རེ་བ་ཞུ་བཞིན་ཡོད་པ་མ་ཟད། ང་ཚོ་བོད་མི་དང་ཡང་སྒོས་བོད་རིགས་གཞོན་སྐྱེས་ཚོས་གཟིགས་ཐུབ་དགོས་རྒྱུ་གལ་ཆེན་ཡིན་པར་རྩི་ཡི་ཡོད། ཅེས་གསུངས་སོང་།

དེའི་རྗེས་གསར་འགོད་པས་ཕྱི་དྲིལ་ལས་ཁུངས་འགྲེམས་སྟོན་ཚན་པའི་འགན་འཛིན་ལས་ཚབ་བསྟན་འཛིན་ཕན་བདེ་ལགས་སུ། འཕྲལ་སེལ་འགྲེམས་སྟོན་འདི་ཟླ་གསུམ་རེའི་མཚམས་སུ་བརྗེ་པོ་རྒྱག་གི་ཡོད་སྟབས། མ་འོངས་ལས་འཆར་གསར་པ་དེ་འདྲ་ག་རེ་གནང་འཆར་ཡོད་དྲིས་པར་ཁོང་གིས། འདི་ལོའི་ཟླ་དྲུག་པའི་ནང་འཕྲལ་སེལ་འགྲེམས་སྟོན་ཚན་པ་འདི་དབུ་འཛུགས་གནང་སྟེ། ཚན་པ་འདི་འཕྲལ་སེལ་འགྲེམས་སྟོན་རང་བྱས་ཡོད་པ་མ་ཟད། དེ་སྔོན་ང་ཚོས་ཐེངས་གཅིག་གཉིས་ཤིག་བརྗེ་པོ་བརྒྱབ་ཡོད་པ་རེད། ད་ལྟའི་ཆར་ང་ཚོས་དམངས་གཙོའི་འཕེལ་རིམ་ཐོག་ལ་འདིར་འཕྲལ་སེལ་གྱི་འགྲེམས་སྟོན་ཞིག་མགོ་འཛུགས་ཞུས་ཡོད་པ་རེད། སྤྱིར་བཏང་བྱས་ན་དམངས་གཙོའི་འཕེལ་རིམ་གྱི་འགྲེམས་སྟོན་འདི། ཕྱི་ཟླ་ ༩ པའི་ཚེས་ ༢ ཉིན་འགྲེམས་སྟོན་ཞུ་རྒྱུ་བྱས་ཡོད་ཀྱང་། གཅིག་ནས་དུས་ཚོད་དང་གཉིས་ནས་ང་ཚོའི་འགྲེམས་སྟོན་ཕྱི་ཕྱོགས་ལ་ཕྱོགས་སྐྱོད་བྱེད་དགོས་པ་སོགས་ཀྱི་རྐྱེན་པས་ད་བར་མགོ་འཛུགས་ཐུབ་མེད་སྟབས། ད་ཐེངས་དམངས་གཙོའི་འོས་བསྡུ་འགྲོ་བཞིན་པ་དང་བསྟུན་ཏེ། འདི་དང་འབྲེལ་ནས་ང་ཚོས་འགྲེམས་སྟོན་འདི་གོ་སྒྲིག་ཞུས་པ་ཡིན། སྤྱིར་བཏང་འཕྲལ་སེལ་འགྲེམས་སྟོན་འདི་ང་ཚོས་དེ་སྔོན་གསར་འགྱུར་བརྒྱུད་ལམ་ཁག་བརྒྱུད་ནས་ཞུས་ཡོད་པ་རེད། ང་ཚོས་འཆར་གཞི་བྱས་ན་ཟླ་གསུམ་རེའི་ནང་འཕྲལ་སེལ་འགྲེམས་སྟོན་འདི་བརྗེ་པོ་རྒྱག་བཞིན་ཡོད་ཀྱང་། སྐབས་རེར་ཟླ་བ་གསུམ་ལས་མང་བ་འགྲེམས་སྟོན་ཞུ་དགོས་པ་ཆགས་ཀྱི་ཡོད་པ་རེད། འགྲེམས་སྟོན་འདི་ཐོག་མར་འཛུགས་སྐབས། ང་ཚོས་ཟླ་བ་གསུམ་བཞི་ནང་འགྲེམས་སྟོན་གསར་པ་དེ་འདྲ་སྟོན་རྒྱུ་དང་། དེ་མིན་ཕྱི་ཕྱོགས་ནས་མི་སྒེར་སོ་སོས་པར་རིས་དང་རི་མོ། རིག་རྩལ་སོགས་ག་རེ་ཡོད་པ་ཡིན་ཡང་འགྲེམས་སྟོན་བྱས་ན་འགྲིག་གི་ཡོད་པ་ཞུས་ཡོད་སྟབས། མ་འོངས་པར་འགྲེམས་སྟོན་ཚན་པར་འབྲེལ་བ་གནང་བ་ཡིན་ན། ང་ཚོས་དུས་ཚོད་གཏན་ཁེལ་གྱིས་གོ་སྒྲིག་གནང་ཐུབ་རྒྱུའི་འཆར་གཞི་སྒྲིག་གི་ཡོད། ཅེས་བརྗོད་བྱུང་།

ད་ལྟ་བོད་ཀྱི་འགྲེམས་སྟོན་ཁང་གིས་ཨ་རིར་སྐོར་སྐྱོད་གནང་བཞིན་ཡོད་སྟབས། དེའི་ནང་དོན་གང་ཡིན་དྲིས་པར་ཁོང་གིས། ད་ལྟ་ཨ་རིར་འགྲེམས་སྟོན་ཁང་གི་འགན་འཛིན་གྱིས་སྐོར་སྐྱོད་གནང་བཞིན་ཡོད་པ་མ་ཟད། འགྲེམས་སྟོན་གནང་བཞིན་པ་དེ་ཡང་། ད་ལོ་༧གོང་ས་མཆོག་དགུང་ལོ་བརྒྱད་བཅུར་ཕེབས་པའི་གྱ་སྟོན་དང་འབྲེལ་བའི་ཐོག་ནས་ཡིན་དུས། ཟླ་གཅིག་རིང་ཨ་རིའི་ས་ཁུལ་ཁག་བཞིའི་ནང་བསྐྱོད་ནས་༧གོང་ས་མཆོག་གི་མཛད་རྣམ་དང་འབྲེལ་བའི་ཐོག་འགྲེམས་སྟོན་གནང་དང་གནང་རྒྱུའི་ལས་འཆར་ཡོད་པ་རེད། ཅེས་བརྗོད་བྱུང་།

མཇུག་ཏུ་གསར་འགོད་པས་འགྲེམས་སྟོན་གཟིགས་མཁན་པཱ་ཆོས་འཕེལ་ལགས་སུ་འགྲེམས་སྟོན་འདིར་བལྟས་རྗེས་ཚོར་སྣང་གང་བྱུང་དྲིས་པར་ཁོང་གིས། ང་དེ་རིང་མ་གཏོགས་འདིར་ཡོང་མྱོང་མེད། ཡིན་ཡང་ང་རང་གིས་བསམ་ཚོད་དང་གདེང་ཚོད་བྱས་ནས་ཞུས་པ་ཡིན་ན། ༧གོང་ས་མཆོག་གི་བཀའ་དྲིན་ཉག་ཅིག་ལ་བརྟེན་ནས་ལས་འགན་ཁུར་མཁན་གྱིས་ཁུར་མ་ཤེས་ན་གནས་ཚུལ་ལོགས་ཀ་རེད་མ་གཏོགས། ཕྱག་ལས་གནང་མཁན་གྱི་གནང་ཤེས་པ་ཡིན་ན་ཚད་ལས་བརྒལ་བའི་ཕྱག་ལས་གནང་རྒྱུ་འདུག་བསམ་གྱི་ཡོད། ཅེས་བརྗོད་བྱུང་།

གསར་འགོད་པ། དོན་གྲུབ།