རྒྱ་ནག་དབུས་ཆབ་སྲིད་ལྷན་ཁང་གི་ཚོགས་ཆེན་ཐེངས་ལྔ་བའི་སྟེང་རྒྱ་ནག་མི་མང་གིས་ཕྲུ་གུ་གཉིས་རེ་སྐྱེས་ཆོག་པའི་སྲིད་བྱུས་ཤིག་བཏོན་པ་དེ་རྒྱ་ནག་གི་འཆར་ལྡན་བུ་སྐྱེས་སྲིད་བྱུས་ལ་མི་ལོ་ ༣༠ རྗེས་ཀྱི་འགྱུར་བ་དེ་ཆགས་ཡོད་འདུག
ཁ་སང་རྒྱ་ནག་གི་སྐབས་བཅོ་བརྒྱད་པའི་ཆབ་སྲིད་རྒྱུན་ལས་ལྷན་ཚོགས་ཐེངས་ལྔ་པ་དེ་པེ་ཅིན་དུ་མཇུག་སྒྲིལ་ཡོད་པ་དང་། ཐེངས་འདིའི་ཚོགས་འདུའི་སྟེང་། རྒྱ་ནག་གི་འཆར་ལྡན་བུ་སྐྱེས་ཀྱི་རྩ་བའི་སྲིད་བྱུས་མུ་མཐུད་རྒྱུན་སྐྱོང་བྱ་རྒྱུ་དང་། མི་འབོར་འཕེལ་རྒྱས་ཀྱི་ཐབས་ཇུས་ལ་འཐུས་སྒོ་ཇེ་ཚང་དུ་གཏོང་བ་དང་མཉམ་དུ་ཕྲུ་གུ་གཉིས་རེ་སྐྱེས་ཆོག་པའི་སྲིད་བྱུས་ལག་བསྟར་བྱས་ཏེ། རྒྱ་ནག་གི་སྤྱི་ཚོགས་མི་རབས་རྒན་པར་འགྱུར་པ་ལ་གདོང་ལེན་བྱ་རྒྱུ་གཏེན་ཁེལ་བྱས་ཡོད་ཀྱང་། ཨ་རི་སྲིད་གཞུང་དང་འགྲོ་བ་མིའི་ཐོབ་ཐང་འཐབ་རྩོད་པ་དག་གིས་དེ་ཙམ་གྱི་ད་དུང་འགྲིག་གི་མེད་པའི་སྐྱོན་བརྗོད་བྱེད་བཞིན་ཡོད་འདུག
དེ་རིང་ཨ་རིའི་རླུང་འཕྲིན་རྒྱ་སྐད་སྡེ་ཚན་གྱིས་གནས་ཚུལ་སྤེལ་པའི་ནང་། ཉེ་བའི་ལོའི་ནང་རྒྱ་ནག་གིས་ཕྲུ་གུ་གཅིག་སྐྱེས་པའི་སྲིད་བྱུས་ཅུང་གུ་ཡངས་སུ་བཏང་ཡོད་ཅིང་། ཞིང་ཆེན་ཁ་ཤས་ཀྱི་གྲོང་གསེབ་ཁུལ་དུ་བུ་མོ་སྐྱེས་ཡོད་པའི་ཁྱིམ་ཚང་གིས་ཕྲུ་གུ་ལྷག་མ་གཅིག་སྐྱེས་ཆོག་ཡོད་འདུག
༢༠༡༣ ལོ་ནས་རྒྱ་ནག་གཞུང་གིས་ཕྲུ་གུ་གཅིག་རེ་ཡིན་པའི་ཁྱིམ་ཚང་གཉིས་ཀྱི་བུ་ཕྲུག་བཟའ་ཚང་བྱས་རྗེས་ཁོ་ཚོས་ཕྲུ་གུ་གཉིས་རེ་སྐྱེས་ཆོག་གི་ཡོད་འདུག ད་ལྟ་བཟའ་ཚང་ཡོངས་ཀྱིས་ཕྲུ་གུ་གཉིས་རེ་སྐྱེས་ཆོག་པའི་སྲིད་བྱུས་གསར་བ་དེ་ མི་གྲངས་ལེགས་སྒྲིག་གི་སྲིད་བྱུས་ཆེན་པོ་ཞིག་ཡིན་པ་དང་། ལོ་མང་ལ་ཕྲུ་གུ་ཁེར་སྐྱེས་བྱེད་དགོས་པའི་ཁྱབ་བསྒྲགས་གཏོང་མཁན་གྱི་རྒྱ་ནག་བརྒྱུད་ལམ་ཁག་གིས་ད་ལྟ་ཡང་བསྐྱར། བུ་ཕྲུག་སྐྱེས་པ་ཁྱེད་ཀྱི་ཐག་གཅོད་ཡིན་ཡང་ལོ་ན་རྒས་པའི་རང་བཞིན་ཉུང་འཁྲི་གཏོང་དགོས་པ་དང་། ཕྲུ་གུ་གཉིས་སྐྱེས་པའི་སྲིད་བྱུས་ཀྱིས་མ་འོངས་པར་ཕན་ཐོགས་ཡོང་པའི་ཁྱབ་བསྒྲགས་བྱེད་ཀྱིན་ཡོད་འདུག འོན་ཀྱང་ཨ་རིའི་གཞུང་དང་འགྲོ་བ་མིའི་ཐོབ་ཐང་ཚོགས་སྡེ་ཁག་གིས་རྒྱ་ནག་གི་ཕྲུ་གུ་གཉིས་སྐྱེས་ཆོག་པའི་སྲིད་བྱུས་དེར་ཡང་མུ་མཐུད་ངོ་རྒོལ་བྱས་ཏེ། ཕྲུ་གུ་སྐྱེས་པར་ཚད་བཀག་བཟོ་བ་ནི་འགྲོ་བ་མིའི་ཐོབ་ཐང་དང་འགལ་གྱི་ཡོད་པའི་སྐྱོན་བརྗོད་བྱེད་བཞིན་ཡོད་འདུག
རེས་གཟའ་ཕུར་བུའི་ཉིན་ཨ་རིའི་ཕོ་བྲང་དཀར་པོའི་མགྲིན་ཚབ་པ་ཇོ་ཞི་ཨེར་ནད་སི་ཊི་ (Josh Earnest) ཡིས། རྒྱ་ནག་གིས་སྲིད་བྱུས་བཅོས་སྒྱུར་བྱས་པ་དེ་བཟང་ཕྱོགས་ཀྱི་འགྱུར་བ་ཞིག་ཡིན་ཡང་། ཨ་རིའི་རེ་བ་ནི་རྒྱ་གཞུང་གིས་བུ་འཆར་ལྡན་བུ་སྐྱེས་སྲིད་བྱུས་དེ་རྦད་དེ་མཚམས་འཇོག་བྱེད་དགོས་པ་དེ་ཡིན། ཞེས་བརྗོད་འདུག
རྒྱལ་སྤྱིའི་མཐའ་མཚམས་མེད་པའི་བུད་མེད་ཐོབ་ཐང་ཚོགས་པ་ (Women’s Rights Without Frontiers) ཡི་ཚོགས་གཙོ་རེས་ཇོའུ་ (Reggie Littlejohn) ཡིས། མི་གྲངས་བསྡོམས་རྩིས་སྟེང་ནས་བལྟས་ན། རྒྱ་ནག་མི་རིགས་རྒན་པ་འགྱུར་བཞིན་ཡོད་སྟབས་ཕྲུ་གུ་གཉིས་རེ་སྐྱེས་ཆོག་པའི་སྲིད་བྱུས་བཏོན་པ་རེད། འོན་ཀྱང་འགྲོ་བ་མིའི་ཐོབ་ཐང་གི་ཕྱོགས་ནས་ཕྲུ་གུ་གཅིག་དང་གཉིས་སྐྱེས་པ་གནད་དོན་གཙོ་བོ་མ་རེད། གནད་དོན་གཙོ་བོ་བཙན་ཤེད་ཀྱིས་མངལ་དབྱུང་བྱས་པ་ནི་ཁྲིམས་གཅོད་དྲག་པོ་ཞིག་ཡིན་སྟབས། ཕྲུ་གུ་གཉིས་སྐྱེས་ཆོག་པའི་སྲིད་བྱུས་ཀྱིས་ཁྲིམས་གཅོད་དྲག་པོའི་གནད་དོན་དེ་མཇུག་བསྡུས་མི་འདུག ཅེས་བརྗོད་འདུག
དེ་རིང་ཀྲུང་གོ་ལྟ་བ་ཞེས་པའི་དྲ་བའི་སྟེང་། ཧྲན་ཏོན་ཞིང་ཆེན་ནས་ཡིན་པའི་རུས་ལ་ཀྲང་ཟེར་བའི་ལོ་རབས་ ༨༠ ནས་སྐྱེས་པའི་བུད་མེད་ཅིག་གིས། ངའི་སྤུན་མཆེད་ཅིག་ལ་ཕྲུ་གུ་བུ་ཞིག་དགོས་ཏེ་ཕྲུ་གུ་གཉིས་པ་མངལ་ཆགས་བཅུག་པ་དང་སྐབས་དེར་མོ་ག་ས་གང་དུ་ཡིབ་ཀྱང་། རྗེས་སུ་གྲོང་ཚོའི་སྲིད་གཞུང་གིས་ཤེས་ཏེ་མོའི་གཟའ་ཟླའི་ལས་ཀ་ཤོར་བ་མ་ཟད། རྒྱ་སྒོར་ཁྲི་ ༡༠༠ ཡིས་ཉེས་ཆད་བཅད་སོང་། སྐབས་དེར་ཁོ་ཚོའི་ནང་གི་ཁྱིམ་ཆས་ཚང་མ་བཙོང་དགོས་བྱུང་པ་རེད། ཅེས་བརྗོད་འདུག ཁོ་མོས་མུ་མཐུད་དུ། ང་ལ་བག་ཆགས་ཆེས་གཟབ་མོ་ཞིག་ཡོད་པ་ནི། བུད་མེད་གཅིག་ལ་ཕྲུ་གུ་གཉིས་པ་མངལ་ཆགས་ནས་ཟླ་ ༨ ལྷག་འགོར་བའི་སྦྲུམ་མ་ཞིག གྲོང་ཚོའི་སྲིད་གཞུང་དཔོན་རིགས་ཞིག་གིས་མོ་ས་རུ་ཕུད་རྒྱག་བཏང་སྟེ་མོའི་མངལ་ཤོར་བཅུག་པ་དེ་རེད། ཅེས་བརྗོད་འདུག
འདས་པའི་ལོ་ ༣༠ ལྷག་གི་ཡ་སྔོན་ནས་རྒྱ་གཞུང་གིས་འཆར་ལྡན་བུ་སྐྱེས་ཁྲོད་ཕྲུ་གུ་གཅིག་གི་སྲིད་བྱུས་ལག་བསྟར་བྱས་པ་དང་བསྟུན་ཏེ་རྒྱལ་སྤྱིའི་ཐོག་དོ་སྣང་ཆེན་པོ་བྱས་ཡོད་སྟབས། རྒྱ་གཞུང་གིས་སྲིད་བྱུས་ལག་བསྟར་བྱས་པ་དང་རྒྱ་ནག་གི་བུད་མེད་མང་པོས་སྤྲུམ་འགོག་བྱས་པ་དང་མངལ་སྤྲུམ་གཏོར་བ། སྲོལ་རྒྱུན་གྱི་རྙིང་ཞན་ཁྲོད་ཕོ་མཆོག་མོ་དམན་གྱི་ལྟ་སྟངས་འོག་ཕྲུ་གུ་བུ་མོ་སྐྱེས་སྐབས་ཕྲུ་གུ་དོར་བ་སོགས་བྱས་ཏེ། ནུབ་ཕྱོགས་རྒྱལ་ཁབ་དང་འགྲོ་བ་མིའི་ཐོབ་ཐང་ཚོགས་སྡེ་ཁག་གིས་རྒྱ་གཞུང་གི་འཆར་ལྡན་བུ་སྐྱེས་སྲིད་བྱུས་ལ་སྐྱོན་བརྗོད་བྱེད་ཀྱི་འདུག
ཉེ་བའི་ལོའི་ནང་རྒྱ་གཞུང་གིས་ཕྲུ་གུ་གཅིག་རེ་ཡིན་པའི་ཁྱིམ་ཚང་གཉིས་ཀྱི་བུ་ཕྲུག་བཟའ་ཚང་བྱས་རྗེས་ཁོ་ཚོས་ཕྲུ་གུ་གཉིས་རེ་སྐྱེས་ཆོག་པའི་སྲིད་བྱུས་ལག་བསྟར་བྱེད་སྐབས། ཐོག་མར་ཁོ་ཚོས་ལོ་རེའི་ནང་མི་གྲངས་ཁྲི་ ༢༠༠ འཕར་པའི་ཚོད་དཔག་བྱས་ཡོད་ཀྱང་། ༢༠༡༤ ལོར་སྐྱེས་པའི་གྲངས་འབོར་ལོ་སྔོན་མ་དང་བསྡུར་ན་མི་ཁྲི་ ༤༧ ལས་འཕར་མི་འདུག
ད་ལོའི་ལོ་སྟོད་ལ་རྒྱ་ནག་སྤྱི་ཚོགས་ཚན་རིག་སློབ་ཆེན་གྱིས་སྔོན་དཔག་བྱས་པ་ལྟར་ན། ༢༠༢༠ ལོའི་སྔོན་ལ་རྒྱ་ནག་གི་ཁྲོམ་རའི་མི་གྲངས་ལོ་རེར་ཁྲི་ ༡༥༥ ཉུང་དུ་འགྲོ་རྒྱུ་ཡིན་པ་དང་། ༢༠༢༠ ལོ་ནས་ ༢༠༣༠ བར་ལོ་རེར་མི་ཁྲི་ ༧༩༠ ཉུང་དུ་འགྲོ་རྒྱུ་ཡིན་པ་མ་ཟད། ༢༠༢༠ ལོ་ནས་ ༢༠༥༠ ལོའི་བར་ངལ་རྩོད་པའི་མི་གྲངས་ལོ་རེར་ཁྲི་ ༨༣༥ ཉུང་དུ་འགྲོ་རྒྱུའི་ཚོད་དཔག་བྱས་འདུག
གསར་འགོད་པ། འཇིགས་མེད་རྒྱ་མཚོ།
