ལྷིང་འཇགས་གནང་རོགས།

དབྱངས་ཅན་དགྱེས་པའི་བློ་གྲོས་ལགས་ཀྱི་མཆན་བཏབ་པ།
མི་མང་གིས་གཞུང་ཟེར་ན་འདི་འདྲ་ཞིག་ལ་ཟེར་བ་ཨེ་རེད། སྐྱེ་བོ་སྒེར་བ་ཞིག་གི་བདེན་དོན་ལ་རྒྱབ་ལངས་བྱེད་མི་ཐུབ་པའི་བཀའ་ཤག་འདི་ལྟ་བུ་ཞིག་གིས་མི་རིགས་ཞིག་གི་དྲང་བདེན་དེ་ཅི་ལྟར་རྩོད་རྒྱུ་ཡིན་ནམ།

དོན་རྐྱེན་འདིའི་ཐད་ལ་དཔལ་ལྡན་སྲིད་སྐྱོང་གིས་འགོ་ཁྲིད་པའི་བཀའ་ཤག་གིས་ད་བར་ལས་ཀ་ག་རེ་བྱས་ཡོད་དམ། དོན་དངོས་ཐོག་བོད་མིའི་སྒྲིག་འཛུགས་འདི་འགོ་ནས་དཔོན་པོ་བྱེད་རྒྱུ་གཅིག་པུ་མ་ཡིན་པར་རང་གི་ཁྱབ་ཁོངས་ཀྱི་མི་མང་ལ་བདག་པོ་རྒྱག་དགོས་རྒྱུ་དེ་ལས་འགན་གལ་ཆེ་ཤོས་གཅིག་རེད། དོན་རྐྱེན་འདིའི་སྐོར་ལ་བོད་མིའི་སྒྲིག་འཛུགས་གཞུང་འབྲེལ་དྲ་རྒྱ་ནང་དུ་ཚིག་གཅིག་ཀྱང་བཀོད་མེད། གནས་ཚུལ་ལེགས་ཉེས་ག་རེ་ཡིན་ནའང་དངོས་ཡོད་བྱུང་བའི་གནས་ཚུལ་དེ་ཚོ་ངེས་པར་བཀོད་དགོས་རྒྱུ་རེད། བོད་མིའི་སྒྲིག་འཛུགས་ཀྱིས་མི་མང་ལ་འགན་ཁྱེར་སྟངས་དེ་ཧ་ཅང་སྐྱོ་བོ་འདུག མི་མང་ལྷིང་འཇགས་ཡོང་དགོས་ན་བོད་མིའི་སྒྲིག་འཛུགས་ངོས་ནས་རང་གི་མི་མང་ལ་བདག་པོ་ཡག་པོ་བརྒྱབ་ན་རྙོག་དྲ་ཡོང་གི་མ་རེད། དཔྱ་ཁྲལ་སྤྲོད་སྐབས་བོད་མིའི་སྒྲིག་འཛུགས་ཟེར་ནས་ཆེ་མཐོང་དགོས་རྒྱུ་ཞིག་དང་། མི་མང་སྒེར་ལ་དོན་རྐྱེན་བྱུང་སྐབས་ཞི་མིའི་ནང་བཞིན་བཀབ་ནས་འདུག་རྒྱུའི་གཞུང་དེ་འདྲ་ཞིག་མི་མང་ལ་དགོས་དོན་མི་འདུག སྤྱི་ཚོགས་དྲ་རྒྱ་ཁག་གི་ནང་དུ་རྙོག་གླེང་ཡོང་གི་ཡོད་པ་དངོས་ཡོད་ཡིན་ནའང་། གཞུང་གི་ངོས་ནས་གསལ་གསལ་ཐིང་ཐིང་ཅིག་དང་འགན་ཞིག་འཁྱེར་ན་མི་མང་གིས་ཀྱང་དེ་འདྲ་བྱེད་དགོས་དོན་ཡོད་མ་རེད། བོད་མིའི་སྒྲིག་འཛུགས་ཀྱི་ལས་བྱེད་ཚོས་གོང་རིམ་ལ་སྤྲེལ་ལད་འཁྲབ་ནས་རང་དོན་ཁོག་བཅིངས་བྱས། གོང་རིམ་འགོ་ཁྲིད་ཚོས་ཀྱང་སྤྲེལ་ལད་འཁྲབ་མཁན་ལ་དགའ་བོ་བྱས། བོད་མིའི་སྒྲིག་འཛུགས་འགོ་རྔ་ཚང་མའི་ནང་སྤྲེལ་ལད་འཁྲབ་མཁན་དང་སྤྲེལ་ལད་ལ་དགའ་མཁན་ཁེངས་བསྡད་འདུག གཟབ་གཟབ་མ་བྱས་ན་རང་ཉིད་རུལ་ནས་ཕྱིའི་མི་ལ་རུལ་དྲི་ཁ་སྐབས་ཕྱིས་དྲགས་པ་རེད། ད་སྐབས་བོད་མིའི་སྒྲིག་འཛུགས་ལས་རྡ་སའི་ཚོགས་པ་ཁག་ལ་དཔྱ་ཁྲལ་སྤྲད་ན་ལེགས་པ་འདུག གང་ལྟར་རང་ཉིད་ཐེ་བའི་མི་ཞིག་ལ་དོན་རྐྱེན་འདི་འདྲ་བྱུང་སྐབས་ཚོགས་པ་ཁག་གིས་ཕན་ཐོགས་ཆེན་པོ་འདུག རྡ་སའི་ཚོགས་པ་ཁག་དང་མི་སྒེར་བཅས་ལ་ཐུགས་རྗེ་ཆེ་ཞུ་རྒྱུ་དང་། བོད་མིའི་སྒྲིག་འཛུགས་ལ་བློ་ཕམ་ཞུ་རྒྱུ་ཡིན།