ཉེ་སྔོན་འབྲི་རུ་རྫོང་མི་མང་སྲིད་གཞུང་གིས་ཆོས་ལུགས་ཁྱབ་ཁོངས་བཅོས་སྒྲིག་གཙང་བཤེར་ཐད་སྔར་ལས་ཤུགས་སྣོན་དགོས་སྐོར་གྱི་བརྡ་ཐོ་ཞིག་སྤེལ་ཡོད་འདུག
རྒྱ་ཤོད་བསྟན་འཛིན་རབ་བརྟན་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་ ༩ ཚེས་ ༡༩ ཉིན་འབྲི་རུ་རྫོང་མི་མང་སྲིད་གཞུང་ཟེར་བས། གནས་སྐབས་ལག་བསྟར་བྱ་རྒྱུ་ཡིན་པའི་བཀའ་ཁྱབ་འོག ཆོས་ལུགས་ཁྱབ་ཁོངས་བཅོས་སྒྲིག་གཙང་བཤེར་ལ་སྔར་ལས་ཤུགས་སྣོན་དགོས་པ་དང་། ཁྲིམས་དང་འགལ་ན་ཆད་པ་ནན་པོ་གཅོད་རྒྱུ་ཡིན་སྐོར་གྱི་བརྡ་ཐོ་ཞིག་སྤེལ་ཡོད་པ་དང་། བརྡ་ཐོའི་ངོ་བཤུས་རྫོང་ཨུད་གཞུང་ལས་ཁང་དང་མི་མང་འཐུས་ཚོགས་གཞུང་ལས་ཁང་། སྲིད་གྲོས་གཞུང་ལས་ཁང་བཅས་ལའང་སྤྲད་ཡོད་འདུག
འདི་གར་བཏང་བའི་བརྡ་ཐོ་དེའི་ནང་དུ། གྲོང་རྡལ་མི་མང་སྲིད་གཞུང་ཁག་དང་། རྫོང་(དབུས་གཞུང་)ཐད་གཏོགས་ཚན་པ་ཁག དགོན་སྡེ་དོ་དམ་ཨུ་ཡོན་ལྷན་ཁང་དང་། མངའ་ཁོངས་སྡེ་ཁུལ་དོ་དམ་ཨུ་ཡོན་ལྷན་ཁང་། ཆེད་མངག་པ་བཅས་ཀྱི་ཕྱོགས་ལ། ད་ལྟ་༼ཆོས་ལུགས་ཁྱབ་ཁོངས་བཅོས་སྒྲིག་གཙང་བཤེར་དང་ཚད་ལྡན་བཟོ་རྒྱུའི་ལས་དོན་སྔར་བས་གཏིང་ཟབ་སྤེལ་རྒྱུ་དང་། དགོན་སྡེའི་”དབང་ཆ་བཞིར་”ཁྲིམས་ལྟར་ཤུགས་སྣོན་རྒྱག་རྒྱུའི་ལས་ཀའི་འགན་འཁྲི་རྩད་གཅོད་མཐར་ཕྱིན་བྱ་རྒྱུའི་སྐོར་གྱི་འབྲི་རུ་རྫོང་མི་མང་སྲིད་གཞུང་གི་ཆད་གཅོད་གཏན་འབེབས།༽་ ཁྱེད་རྣམ་པར་འགྲེམ་སྤེལ་བྱ་རྒྱུ་ཡིན་པས་ཚང་མས་ལག་བསྟར་དོན་འཁྱོལ་ཏན་ཏིག་ཐུབ་པ་བྱེད་དགོས། ཞེས་བཀོད་འདུག
གནས་ཚུལ་མཁོ་སྤྲོད་པས། བརྡ་ཐོ་དེར་ཤོག་གྲངས་ ༥༢ དང་དོན་ཚན་ ༧༣ ཡོད་ལ། བརྡ་ཐོ་དེའི་ངོ་བཤུས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དུ་སྤྲད་ནས་ཞིབ་འཇུག་གནང་བཞིན་ཡོད་སྟབས། མི་འགྱངས་བར་དེའི་ཐད་གསར་འགོད་གསལ་བསྒྲགས་ཤིག་སྤེལ་འཆར་ཡོད་སྐོར་བརྗོད་བྱུང་།
གསར་འགོད་པ། པདྨ་མཚོ།
བོད་མི་རིགས་ཀྱི་ཆོས་དང་རིག་གཞུང་རྩ་བ་ཚུགས་སའམ་རྒྱུན་འཛིན་དར་སྤེལ་གཏོང་སའི་དགོན་སྡེ་ཁག་ལ་དམ་བསྒྲགས་བྱས་པ་འདི་བོད་མི་རིགས་ཀྱི་རྩ་བ་བརླག་པར་བྱེད་པའི་ཇུས་ངན་ཞིག་ཡིན་པས་ཚང་མས་དོ་སྣང་གནང་རོགས།