བཙན་བྱོལ་བོད་མིའི་སྲིད་སྐྱོང་དང་སྤྱི་འཐུས་འོས་བསྡུའི་དེབ་སྐྱེལ་ལ་གོ་སྐབས་གཉིས་པ་འབུལ་རྒྱུ་ཡིན་སྟབས་ཕྱི་ལོ་ ༢༠༡༦ ཟླ་ ༢ ཚེས་ ༢༨ ཉིན་ནང་ཚུན་དུ་དེབ་སྐྱེལ་ཟིན་པ་དགོས་ཀྱི་ཡོད་འདུག
ཟླ་འདིའི་ཚེས་༦ ཉིན་དབུས་འོས་བསྡུ་ལས་ཁང་ནས་ཡོངས་ཁྱབ་གསལ་བསྒྲགས་ཤིག་གནང་སྟེ། འོས་བསྡུའི་དེབ་སྐྱེལ་ལ་གོ་སྐབས་གཉིས་པ་ཞིག་གནང་སྐྱོང་ཡོང་བའི་རེ་བ་ཞུ་མཁན་བྱུང་བ་ལྟར། གོ་སྐབས་གཉིས་པ་ཞིག་འབུལ་རྒྱུ་དགེ་མཚན་ཆེ་བར་གཟིགས་ཏེ། དོན་ཚན་གསུམ་གཏན་འབེབས་གནང་ཡོད་སྐོར་གསུངས་འདུག་སྟབས། ཕྱི་ལོ་ ༢༠༡༦ ཟླ་ ༢ ཚེས་ ༢༨ ནང་ཚུན་དུ་དེབ་སྐྱེལ་ཟིན་པ་དགོས་ཀྱི་ཡོད་འདུག
དེ་ཡང་གསལ་བསྒྲགས་ནང་། བོད་མིའི་སྒྲིག་འཛུགས་ཀྱི་སྲིད་སྐྱོང་དང། བོད་མི་མང་སྤྱི་འཐུས་སྐབས་ ༡༦ པའི་སྤྱི་འཐུས་ཀྱི་འོས་བསྡུ་ཆེན་མོའི་སྐབས་ཀྱི་འོས་འཕེན་པའི་མིང་གཞུང་དེབ་སྐྱེལ་སྒྲིག་གསལ་ཆ་ཚང་ཟིན་པ་དང། སྔོན་འགྲོའི་འོས་བསྡུའི་ལས་རིམ་ཡང་ལེགས་གྲུབ་བྱུང་ཡོད། ཡིན་ནའང་ས་གནས་མང་པོ་ཞིག་ནས་དངོས་གཞིའི་འོས་བསྡུ་ཆེན་མོའི་སྐབས་ཁྱབ་ཁོངས་ས་གནས་སུ་དེ་སྔ་འོས་འཕེན་པའི་མིང་གཞུང་དེབ་སྐྱེལ་ཞུ་མ་ཐུབ་པ་དང་། རང་ལོ་ ༡༨ ཧྲིལ་པོ་ལོན་པ་རེ་ཟུང་འདུག་པ་དེབ་སྐྱེལ་བྱ་རྒྱུའི་དུས་ཚོད་འཕར་མ་ཞིག་གནང་སྐྱོང་ཞུ་མཁན་ཡོང་འདུག་པ་དེ་དག་གི་ཆེད། སླར་ཡང་འོས་འཕེན་པའི་མིང་གཞུང་དེབ་སྐྱེལ་དུས་ཚོད་གཉིས་པ་ཞིག་འབུལ་རྒྱུ་དགེ་མཚན་ལ་དགོངས་ཏེ་གཤམ་གསལ་ལྟར་གཏན་འབེབས་ཞུས་པ་ཡིན།
༡༽ དངོས་གཞིའི་འོས་བསྡུ་ཆེན་མོའི་དུས་ཚེས་ལས་རིམ་ལྟར་ ༢༠༡༦།༠༣།༢༠ ཉིན་ཡིན་པ་དེའི་ཉིན་བོད་ཀྱི་ཆབ་འབངས་སུ་ཞིག་རང་ལོ་ ༡༨ ཧྲིལ་པོ་ལོན་གྱི་ཡོད་པ་དང། ཡང་དེ་སྔོན་འོས་འཕེན་པའི་མིང་གཞུང་དེབ་སྐྱེལ་མ་ཐུབ་པ་ཡོད་རིགས་དེ་དག་གིས་སོ་སོའི་ཕྱི་ལོ་ ༢༠༡༥ ལོའི་དཔྱ་ཁྲལ་འབུལ་འབབ་ཆ་ཚང་ཕུལ་ཟིན་ཡོད་མེད་ཞིབ་རྒྱུ།
༢༽ ས་གནས་འོས་བསྡུའི་འགན་འཛིན་གྱིས་ཁྱབ་ཁོངས་ཡོངས་ལ་འོས་འཕེན་པའི་མིང་གཞུང་དེབ་སྐྱེལ་བྱ་རྒྱུའི་གོ་སྐབས་གཉིས་པ་དགོངས་བཞེས་གནང་སྐོར་དང་། ཁྱབ་ཁོངས་མི་མང་འོས་འཕེན་དེབ་འགོད་ཆ་རྐྱེན་ཚང་བ་ཡོད་རིགས་ནས་དེབ་སྐྱེལ་བྱེད་དགོས་པའི་བརྡ་ཁྱབ་མ་ལེན་མ་འགྱོད་མེད་པ་ཁུངས་སོ་སོ་ནས་འགན་འཁུར་གྱིས་འཐུས་ཚང་ཞུ་དགོས་རྒྱུ།
༣༽ ས་གནས་སོ་སོའི་ཁོངས་སུ་འོས་འཕེན་པའི་དེབ་སྐྱེལ་གསར་པ་ཆོལ་ཁ་ཆོས་བརྒྱུད་ཐོབ་ཁུངས་འདྲེས་མེད་ཇི་བྱུང་གི་གྲངས་ཐོ་ཁ་གསལ་སྙིང་བསྡུས་ཤིག་འདི་གར་གང་སྔ་གློག་འཕྲིན་སོགས་བརྒྱུད་ནས་སྙན་གསན་ཞུ་དགོས་རྒྱུ། ཞིབ་ཆའི་འོས་འཕེན་པའི་མིང་གཞུང་དེབ་འགོད་ཟུར་འཛར་ (ཀ) ནང་གསལ་ལྟར་ཐོབ་ཁུངས་བཅས་ཆ་ཚང་འཛོལ་མེད་ཞིབ་བཀང་གིས་ ༢༠༡༦།༠༢།༢༨ འགྱངས་མེད་འབུལ་འཐུས་བཅས་ཀྱི་གསལ་བསྒྲགས་སུ། ཞེས་བཀོད་འདུག
གསར་འགོད་པ། པདྨ་མཚོ།
