ཊ་ལི་བྷན་འཇིགས་སྐུལ་དྲག་སྤྱོད་པས་ཨབ་གྷན་གྱི་མི་འགའ་དམར་གསོད་བཏང་བར་མང་ཚོགས་ཚོས་གཞུང་གིས་མང་ཚོགས་ཀྱི་བདེ་འཇགས་འགན་སྲུང་བྱེད་ཐུབ་ཀྱི་མེད་པའི་ངོ་རྒོལ་བྱས་འདུག
དེ་རིང་ཡ་ཧོ་གསར་ལམ་དུ་གནས་ཚུལ་ཐོན་པ་ལྟར་ན། ཁ་སང་ཨལ་ཁོ་ཌ་དང་ཊ་ལེ་བྷན་འཇིགས་སྐུལ་དྲག་སྤྱོད་པས་ཨ་ཧྥི་གྷན་ནེ་སི་ཐན་གྱི་ཞེ་ཡ་ཧ་ཛ་ར་ (Shia Hazaras) གྲངས་ཉུང་མི་རིགས་ཀྱི་ཉེས་མེད་མི་སེར་ ༧ འཛིན་བཟུང་དམར་གསོད་བཏང་སྟེ་ཕུང་པོ་གད་སྙིགས་ཁྲོད་དུ་གཡུགས་ཡོད་པར་བརྟེན། ཛ་བྷུལ་ (Zabul) ཞིང་ཆེན་དུ་ཞེ་ཡ་ཧ་ཛ་ར་གྲངས་ཉུང་མི་རིགས་ཀྱི་ཡུལ་མི་ ༢༠༠༠ ལྷག་འདུ་འཛོམས་ཀྱིས་ཤི་བོའི་པུར་སྒམ་ཁུར་ཏེ་གྲོང་ཁྱེར་གྱི་ཁྲོམ་སྲང་ནས་སྲིད་འཛིན་ཕོ་བྲང་བར་ཞི་བའི་གོམས་བགྲོད་གནང་སྟེ། “ཊ་ལེ་བྷན་གསོད་དགོས”ཞེས་པའི་ངོ་རྒོལ་གྱི་འཕྲེད་དར་འཕྱར་ནས“མི་གསོད་ལག་དམར་ལ་ཉེས་ཆད་གཅོད་དགོས། སྤྱི་དམངས་ཀྱི་བདེ་འཇགས་འགན་སྲུང་བྱེད་དགོས།”ཞེས་ཞི་བའི་སྐད་འབོད་གནང་ཡོད་འདུག
དེ་ཡང་ཉེ་བའི་ཆར་ཨ་ཧྥན་གྷན་ནེ་སི་ཐན་གྱི་ཞིང་ཆེན་གྷ་ཛ་ནེ་ (Ghazni) ནང་ཨལ་ཁོ་ཌ་དང་ཁ་ཆེ་མངའ་ཁུལ་གྱི་འཇིགས་སྐུལ་དྲག་སྤྱོད་པས་ཞེ་ཡ་ཧ་ཛ་ར་མི་རིགས་ཀྱི་བུད་མེད་གསུམ་དང་སྐྱེས་པ་བཞི། བྱིས་པ་གཉིས་བཅས་ཁྱོན་ཡུལ་མི་ ༧ འཛིན་བཟུང་བཙན་ཁྲིད་བྱས་ཏེ་ཁ་སང་གཞི་ནས་དམར་གསོད་བྱས་ཡོད་པ་དང་། ཨ་ཧྥི་གྷན་ནེ་སི་ཐན་གྱི་གསང་བའི་རྟོག་ཞིབ་ཚན་པས། ཡུལ་མི་དེ་ཚོ་དམར་གསོད་གཏོང་མཁན་ནི་ཁ་ཆེ་མངའ་ཁུལ་གྱི་འཇིགས་སྐུལ་དྲག་སྤྱོད་པ་ཡིན་སྐོར་བརྗོད་འདུག
སྤྱི་དམངས་ཁེ་དབང་རྩོད་ལེན་པ་ལྕམ་རྫ་ཧ་ར་སུ་པི་ཧར་ (Zahra Sepehr) ལགས་ཀྱིས་གསར་འགོད་པར། འདས་ལོའི་ཕྱི་ཟླ་ ༣ ནང་བུ་མོ་ཧྥར་ཁུན་ཌ་ (Farkhunda) འཇིགས་སྐུལ་དྲག་སྤྱོད་པས་དམར་གསོད་བཏང་སྐབས། ཁ་བྷུལ་ (Kabul) ཞིང་ཆེན་དུ་ཡུལ་མི་སྟོང་ཕྲག་ ༡༠ ལྷག་འདུ་འཛོམས་ཀྱིས་ཞི་བའི་རྔམ་སྟོན་ཁྲོམ་སྐོར་བྱས་ཡོད་པ་རེད། ང་ཚོར་དྲང་བདེན་དགོས། ང་ཚོར་མི་མང་གི་བདེ་སྡུག་འགན་སྲུང་ཐུབ་པའི་སྲིད་གཞུང་དགོས། ཉེས་མེད་ཡུལ་མི་ཚོ་དམར་གསོད་ཐེབས་པ་དེ་ཡང་ཨ་ཧྥི་གྷན་ནེ་སི་ཐན་གཞུང་གིས་རྒྱལ་དམངས་ཀྱི་བདེ་འཇགས་སྲུང་མ་ཐུབ་པས་རེད་ལ། ལོ་སྔོན་མར་ཡང་ཊ་ལེ་བྷན་གྱིས་ཨ་ཧྥི་གྷན་ནེ་སི་ཐན་ནང་ཟིང་འཁྲུག་བསླངས་པ་མ་ཟད། ཁ་ཆེ་མངའ་ཁུལ་གྱི་འཇིགས་སྐུལ་དྲག་སྤྱོད་པས་ལྷོ་རྒྱུད་ཀྱི་ཞིང་ཆེན་ནན་གྷར་ཧར་ (Nangarhar) དང་ཛ་བྷུལ་ཞིང་ཆེན་ཁག་ཏུ་ཟིང་འཁྲུག་སློང་གི་ཡོད་ཚོད་རེད། ཅེས་སོགས་བརྗོད་འདུག
གནས་ཚུལ་ལྟར་ན། ཕྱི་ལོ་ ༡༩༩༠ ལོ་ནས་བཟུང་ཨ་ཧྥི་གྷན་ནེ་སི་ཐན་གྱི་ཞིང་ཆེན་ཁག་ཏུ་ཨལ་ཁི་ཌ་དང་ཊ་ལེ་བྷན། ཁ་ཆེ་མངའ་ཁུལ་གྱི་འཇིགས་སྐུལ་དྲག་སྤྱོད་ཤོག་ཁག་བར་མི་རིགས་དབྱེ་འབྱེད་དང་ཆོས་ལུགས་ཕྱོགས་རིས་འཐེན་འཁྱེར་སོགས་ཀྱི་ཟིང་འཁྲུག་ཁྲོད་དུ་ཞེ་ཡ་ཧ་ཛ་ར་གྲངས་ཉུང་མི་རིགས་ཀྱི་ཡུལ་མི་མང་པོར་སྡུག་སྦྱོང་དང་དམར་གསོད་ཐེབས་མུས་ཡིན་འདུག
གསར་འགོད་པ། པདྨ་རྒྱལ།
