པེ་ཅིན་གཞུང་གིས་ཏཱ་ལའི་བླ་མ་དང་མཉམ་དུ་བཞུགས་མོལ་བྱས་ན་ལེགས།

_______གལ་ཏེ་རྒྱ་ནག་གི་ཞི་ཅིན་ཕིན་གྱིས་ཐའེ་ཝན་སྲིད་འཛིན་དང་ལྷན་དུ་གྲོས་མོལ་ཕོད་ན། ཁོས་བོད་ཀྱི་དབུ་ཁྲིད་དང་མཉམ་དུའང་གྲོས་མོལ་བྱེད་ཐུབ་ཅིང་། གཅིག་བྱས་ན་འདི་ནི་ཁོའི་ཆེས་མཐའ་མཇུག་གི་གོ་སྐབས་ཤིག་ཡིན་ཡང་སྲིད།

རྩོམ་མཁན་ཨ་ལིན་ཁ་རལ་སོན། (Allen R. Carlson) པདྨ་རྒྱལ་གྱིས་བོད་སྒྱུར་བྱས།

ཉེ་ཆར་ཐའེ་ཝན་གྱི་སྲིད་འཛིན་མ་ཡེན་ཇོ་ལ་ཐུག་འཕྲད་བྱས་པ་ལྟར། རྒྱ་ནག་གི་སྲིད་འཛིན་ཞི་ཅིན་ཕིན་གྱིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དཔོན་རབས་སྔོན་མ་ཚོའི་ལས་འཕྲོ་ཙམ་མ་ཡིན་པར་ལས་དོན་འཐུས་ཚང་ཞིག་བསྒྲུབ་དགོས་ཀྱི་ཡོད་ལ། གལ་སྲིད་ཞི་ཅིན་ཕིན་གྱིས་རང་ཉིད་ནི་སྔར་ལས་ལྷག་པར་རྒྱ་ནག་གི་ཡིད་རྟོན་རུང་བའི་དབུ་ཁྲིད་ཅིག་ཡིན་པར་འདོད་ན། ཁོས་བོད་དོན་ལའང་དོ་སྣང་བྱེད་དགོས་ཀྱི་ཡོད།

འདས་པའི་ལོ་ངོ་འདི་དག་རིང་པེ་ཅིན་གཞུང་གིས་བོད་ནང་གི་བོད་མི་ཚོའི་མངོན་འདོད་སྐོང་གི་ཡོད་པར་འདོད་ཀྱང་། དོན་དངོས་སུ་རྒྱ་གན་གིས་བོད་ཀྱི་འབྱུང་འགྱུར་གྱི་གྲོས་གཞི་སྟེ་ཏཱ་ལའི་བླ་མ་དང་། བོད་ཀྱི་ཆབ་སྲིད་དང་ཐད་ཀར་འབྲེལ་བའི་དཀའ་རྙོག་སེལ་ཐབས་བྱེད་ཀྱི་མེད།

ཕྱི་ལོ་ ༡༩༨༩ ལོར་ནོ་བྷིལ་ཞི་བདེ་གཟེངས་རྟགས་ཐོབ་པའི་ཏཱ་ལའི་བླ་མ་ ༡༩༥༩ ལོར་བོད་ནས་ཡུལ་བྱོལ་ཏུ་ཕེབས་ཏེ་རྒྱ་གར་ནང་སྐྱབས་བཅོལ་དུ་འཚོ་བཞིན་ཡོད་ཅིང་། གང་ལྟར་ཁོང་ལ་བོད་མི་རིགས་ཀྱིས་སྙིང་དབུས་ནས་གུས་བརྩི་དང་ཡིད་ཆེས་བྱེད་ཀྱི་ཡོད་སྟབས། ཁོང་ནི་བོད་རྒྱ་གཉིས་བར་འབྲེལ་ལམ་ཡོང་ཐབས་གཙོ་བོ་ཆགས་ཡོད།

རྒྱ་ནག་གི་མགོ་ཁྲིད་ཚོས་བོད་མིའི་མགོ་ཁྲིད་ཚོ་དང་ལྷན་དུ་འབྲེལ་མོལ་ཐེངས་འགར་བྱེད་བཅུག་ཀྱང་། ཉེ་བའི་ལོ་ངོ་འདི་དག་རིང་གི་འབྲེལ་མོལ་དེ་ནི་དོགས་གཞི་ཞིག་སྟེ། རྒྱ་ནག་གཞུང་གིས་བོད་རྒྱའི་གནད་དོན་ཐག་གཅོད་བྱ་རྒྱུ་ནར་འགྱང་བྱས་ཏེ། ཏཱ་ལའི་བླ་མའི་དགུང་གྲངས་ལ་རེ་སྒུག་བྱེད་ཀྱི་ཡོད་པ་ཧ་ཅང་མངོན་གསལ་རེད།

མཐའ་གཞུག་ཞི་ཅིན་ཕིན་ཐའེ་ཝན་གྱི་སྲིད་འཛིན་དང་ཐུག་འཕྲད་བྱེད་རྒྱུའི་ཐག་གཅོད་བྱས་པ་ལྟར། ཁོས་བོད་མིའི་དབུ་ཁྲིད་དང་ལྷན་དུའང་འབྲེལ་མོལ་བྱེད་དགོས་པ་ཆགས་ངེས་ཡིན། གལ་སྲིད་ཞི་ཅིན་ཕིན་གྱིས་རྒྱ་ནག་གི་སྲིད་ཇུས་དེ་ཐུན་མོང་མ་ཡིན་པ་ཞིག་ཡིན་ཞེས་དམ་དམ་གྱིས་འཛམ་གླིང་ལ་དག་འབུལ་བྱེད་ཀྱི་ཡོད་ན། ཁོས་སྤྱིར་བཏང་གི་གྲྭ་བ་དཀྱུས་མ་ཞིག་ཏུ་འབོད་པའི་ཏཱ་ལའི་བླ་མ་དང་མཉམ་དུ་གྲོས་མོལ་བྱེད་དགོས་ཀྱི་ཡོད་ཅིང་། སྤྱིར་ཏཱ་ལའི་བླ་མ་དང་ཞི་ཅིན་ཕིན་གཉིས་ཀྱི་འབྲེལ་མོལ་ལ་དོན་འབྲས་ཆེན་པོ་འཐོན་མི་སྲིད་ནའང་། དེ་ནི་བོད་རྒྱ་གཉིས་ཀྱི་རེ་འདུན་དང་འབྲེལ་ལམ་སོགས་མངོན་གསལ་དོད་པོར་འཕོ་འགྱུར་དང་ཡར་རྒྱས་ཡོང་ཐབས་སུ་ཧ་ཅང་གལ་ཆེའི་རང་བཞིན་ཆགས་ཡོད་ལ། འདས་པའི་མི་ལོ་བཅུ་ཕྲག་རིང་ཕྱོགས་གཉིས་བར་འབྲེལ་མོལ་བྱུང་ཐུབ་ཡོད་པ་མ་རེད།

དེར་མ་ཟད་འདི་ནི་དམིགས་བསལ་གྱི་དུས་སྐབས་གལ་ཆེན་ཞིག་ལའང་འཁེལ་ཡོད་དེ། གཅིག་བྱས་ན་བོད་རྒྱ་འབྲེལ་མོ་འདི་ཐེས་མཐའ་མཇུག་གི་ཞི་ཅིན་ཕིན་གྱི་བྱ་བའི་གོ་སྐབས་ཤིག་ཡིན་ཡང་སྲིད།

ཏཱ་ལའི་བླ་མའི་དགོངས་པ་རྫོགས་ཚར་རྗེས། པེ་ཅིན་གཞུང་གིས་བོད་མི་མང་མོས་ཀྱི་ཐོག་ནས་བོད་དོན་གྲོས་མོལ་བྱེད་ས་ཞིག་རྙེད་དཀའ་ཞིང་། ཕྱོགས་གཞན་ཞིག་ནས་གལ་སྲིད་རྒྱ་ནག་གིས་ཏཱ་ལའི་བླ་མའི་དགོངས་པ་རྫོགས་རག་བར་དུ་སྒུག་བསྡད་པ་ཡིན་ན། མཐའ་མར་རྒྱ་ནག་གཞུང་གིས་བོད་ཀྱི་གནད་དོན་སེལ་ཐབས་མེད་པའི་དཀའ་རྙོག་ཅིག་ཆགས་ངེས་ཡིན་ལ། དེ་དང་མཉམ་དུ་མ་འོངས་བོད་ཀྱི་དབུ་ཁྲིད་དེས་ཀྱང་བོད་རྒྱུའི་དཀའ་རྙོག་སེལ་ཕྱོགས་ལ་མོས་མཐུན་བྱ་མིན་ཡང་ཚོད་དཔག་དཀའ་བ་ཞིག་རེད།

ཏཱ་ལའི་བླ་མས་ནམ་རྒྱུན་ཁོང་ཕྱིར་བོད་ལ་ལོག་ནས་པེ་ཅིན་གཞུང་དང་མཉམ་དུ་གྲོས་མོལ་བྱེད་འདོད་ཡོད་སྐོར་གསུང་གི་ཡོད་པ་ནི་བོད་རྒྱུའི་དཀའ་རྙོག་སེལ་ཐབས་ཀྱི་གོམ་པ་དང་པོ་དེ་རེད། གང་ལྟར། རྒྱ་ནག་གི་དཔོན་རིགས་ཚོས་ཏཱ་ལའི་བླ་མ་ཕྱིར་བོད་ལ་ལོག་པའི་དགོས་འདུན་བཏོན་རུང་། གཅིག་བྱས་ན་གཞིས་བྱེས་བོད་མི་ཚོས་དེ་ལ་མོས་མཐུན་བྱེད་འདོད་མེད་ཀྱང་སྲིད།

སྤྱིར་བོད་རྒྱའི་འབྲེལ་ལམ་བསྐྱར་མཐུད་ཡོང་རྒྱུ་ཁག་པོ་ཡིན་རུང་། གཅིག་བྱས་ན་དེ་ཡང་བདུན་ཕྲག་གཅིག་གི་སྔོན་ཏག་ཏག་ལ་ཐའེ་རྒྱ་གཉིས་ཀྱི་འབྲེལ་ལམ་བསྐྱར་མཐུད་བྱུང་བ་དང་གཅིག་མཚུངས་སུ་མཐོང་ཡང་སྲིད་ཅིང་། སྐབས་དེར་མ་ཞི་གཉིས་ཀྱི་ལག་འཇུ་དེས་ཕྱོགས་གཉིས་ཀྱི་ལངས་ཕྱོགས་ལ་འཕོ་འགྱུར་ཐེབས་ཏེ། ཐའེ་རྒྱ་གཉིས་བར་འབྲེལ་མོལ་གྱི་ལེ་ཚན་གསར་བ་ཞིག་གི་ཁ་ཕྱེས་ཡོད་ངེས་རེད། དེར་བརྟེན། ཞི་ཅིན་ཕིན་དང་རྒྱ་ནག་གཞུང་གིས་བོད་ལའང་ཐའེ་རྒྱ་གཉིར་བར་བྱུང་བའི་འབྲེལ་ལམ་དེ་གཅིག་མཚུངས་ཤིག་འབྱུང་ཐབས་སུ་མནོ་བསམ་དགོས་ཡོད། གལ་ཏེ་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་དེ་ལྟར་ཕུགས་རྒྱང་རིང་བའི་མནོ་བསམ་གཏོང་ཚེ། ཏཱ་ལའི་བླ་མས་བོད་རྒྱའི་དཀའ་རྙོག་སེལ་བའི་མཛད་རྗེས་བླ་མེད་འཇོག་ངེས་རེད།