མཉམ་འབྲེལ་རྒྱལ་ཚོགས་ཀྱིས་འདས་པའི་ལོ་ངོ་ ༢༠ ནང་གནམ་གཤིས་འགྱུར་ལྡོག་གི་གནོད་སྐྱོན་ཁྲོད་མི་གྲངས་ཁྲི་ ༦༠ ལྷག་གི་ཚེ་སྲོག་ཤོར་ཡོད་སྐོར་བརྗོད་འདུག
མི་འགྱངས་བར་ཧྥ་རན་སིའི་རྒྱལ་ས་ཕ་རི་སིར་རྒྱལ་ཁབ་ ༡༢༠ ལྷག་གི་དབུ་ཁྲིད་རྣམས་ལྷན་དུ་འཛོམས་ཏེ། གནམ་གཤིས་འགྱུར་ལྡོག་གི་ཉེན་ཁའི་སྐོར་ལ་གྲོས་སྡུར་གནང་འཆར་ཡོད་པའི་སྐབས་དང་བསྟུན། དེ་རིང་འཛམ་གླིང་མཉམ་འབྲེལ་རྒྱལ་ཚོགས་ཀྱི་རང་བྱུང་ཉེན་འགོག་ལས་ཁུངས་ (United Nations Office for Disaster Risk Reduction )ཀྱིས། གནམ་གཤིས་འགྱུར་ལྡོག་གི་གནོད་སྐྱོན་སྐོར་གྱི་ཞིབ་འཇུག་སྙན་ཐོ་ཞིག་ཡོངས་བསྒྲགས་བྱས་འདུག
སྙན་ཐོ་དེའི་ནང་འདས་པའི་ལོ་ངོ་ ༢༠ ནང་གནམ་གཤིས་འགྱུར་ལྡོག་གི་གནོད་སྐྱོན་ཁྲོད་མི་གྲངས་ཁྲི་ ༦༠ ལྷག་གི་ཚེ་སྲོག་ཤོར་བ་དང་། མི་དུང་ཕྱུར་ ༤༡ ཙམ་ལ་རྨས་སྐྱོན་ཕོག་ཡོད་པ་དང་། ཉུང་མཐར་ཨ་སྒོར་ཐེར་འབུམ་ ༡༩ ལྷག་གི་དཔལ་འབྱོར་གྱོང་གུན་ཐེབས་ཡོད་ལ། མ་འོངས་པར་རང་བྱུང་གནོད་སྐྱོན་འདི་རིགས་ཇེ་མང་དུ་འགྲོ་རྒྱུ་ཡིན་པ་མ་ཟད། ཤུགས་རྐྱེན་སྔར་ལས་ཆེ་རུ་འགྲོ་རྒྱུ་ཡིན་སྟབས། ཚོགས་འཆར་ཡོད་པའི་རྒྱལ་ཁབ་ཁག་གི་དབུ་ཁྲིད་ལྷན་ཚོགས་ཐོག གནམ་གཤིས་འགྱུར་ལྡོག་དང་འབྲེལ་བའི་གྲོས་ཆོད་གསར་པ་ཞིག་འཇོག་དགོས་རྒྱུ་ཧ་ཅང་གལ་གནད་ཆེན་པོ་ཆགས་ཡོད་ལུགས་བརྗོད་འདུག
ཡང་སྙན་ཐོའི་ནང་། འདས་པའི་ལོ་ངོ་ ༢༠ ནང་གནམ་གཤིས་དང་འབྲེལ་བའི་གནོད་འཚེ་ཕལ་ཆེ་བ་ནི་ཆུ་ལོག་ལས་བྱུང་ཡོད་པ་དང་། ཆུ་ལོག་མང་ཆེ་བ་ཨེ་ཤ་ཡ་ཁུལ་དུ་བྱུང་སྟེ་ཁྱོན་མི་གྲངས་འབུམ་ ༢ ལྷག་(༢.༤༢༠༠༠) རྐྱེན་འདས་སུ་ཕྱིན་ཡོད་པ་དང་། ཕྱི་ལོ་ ༢༠༠༨ ལོའི་འབར་མའི་མཚོ་རླུང་གནོད་སྐྱོན་ཁོ་ནའི་ཁྲོད་མི་གྲངས་འབུམ་གཅིག་ལྷག་(༡.༣༨༠༠༠) གི་ཚེ་སྲོག་ཤོར་ཡོད་པ་དང་། དེ་བཞིན་ཨ་ཧྥེ་རི་ཁའི་ནང་ཐན་སྐྱོན་ཚབས་ཆེན་བྱུང་སྟེ་མི་གྲངས་དུང་ཕྱུར་ ༡༠ ཙམ་ལ་གནོད་པ་ཐེབས་ཏེ་བཀྲེས་སྐོམ་དང་ནད་རིགས་ཀྱིས་མནར་བ་མ་ཟད། སྤྱི་ཡོངས་ཀྱི་ཞིང་ལས་ཡོང་འབབ་ཆད་དེ་དུས་ཡུན་རིང་པོར་རྗེས་ལུས་ཀྱི་ཁྲོད་དུ་ལྷག་ཉེན་ཡོད་ལུགས་དང་། གཞན་ཡང་། འདས་པའི་ལོ་ངོ་ ༢༠ ནང་མེ་རི་འབར་གས་སོགས་ཚ་དྲོད་ཀྱི་གནོད་སྐྱོན་འོག་མི་གྲངས་འབུམ་གཅིག་ལྷག་(༡.༤༨༠༠༠)འདས་གྲོངས་སུ་གྱུར་ཡོད་པ་དང་། ཚ་དྲོད་ཀྱི་གནོད་འཚེ་མང་ཆེ་བ་ཡུ་རོབ་ཁུལ་དུ་བྱུང་ཡོད་སྐོར་བརྗོད་ཡོད་པ་མ་ཟད། ལོ་ ༢༠ ནང་ཆ་སྙོམ་བྱས་ན་ཨ་རིའི་ནང་ལོ་རེར་གནམ་གཤིས་དང་འབྲེལ་བའི་གནོད་སྐྱོན་ཐེངས་ ༣༣༥ བྱུང་ཡོད་པ་དང་། རྒྱ་ནག་དང་རྒྱ་གར་ནི་གནམ་གཤིས་ཀྱི་ཤུགས་རྐྱེན་ཆེས་ཆེ་བའི་རྒྱལ་ཁབ་གཉིས་ཆགས་ཡོད་འདུག
ཉེ་སྔོན་རྒྱ་ནག་གི་ཆེད་མཁས་པ་ ༥༥༠ ཡིས་གནམ་གཤིས་འགྱུར་ལྡོག་སྐོར་ལ་ཞིབ་འཇུག་སྙན་ཐོ་ཞིག་ཡོངས་བསྒྲགས་བྱས་ཡོད་པ་དང་། ཆེད་མཁས་ཞིབ་འཇུག་པ་ཀྲང་ཧེ་པིན་གྱིས་གནམ་གཤིས་འགྱུར་ལྡོག་གི་ཞིབ་འཇུག་སྙན་ཐོ་ཐོག་མ་དེ་ལོ་ ༩ ཡི་སྔོན་དུ་བཏོན་ཡོད་པ་དང་། སྙན་ཐོ་དང་པོ་དང་གཉིས་པ། གསུམ་པ་བཅས་རིམ་པར་བཏོན་པ་བརྒྱུད། གནམ་གཤིས་འགྱུར་ལྡོག་གིས་རྒྱ་ནག་ལ་གནོད་སྐྱོན་ཐེབས་བཞིན་ཡོད་པ་ཇེ་གསལ་ནས་ཇེ་གསལ་དུ་ཕྱིན་ཏེ། གནོད་སྐྱོན་རང་བཞིན་ལ་ངེས་ཤེས་གཏིང་ཟབ་བྱུང་ཡོད་ལུགས་དང་། འཛམ་གླིང་གི་གནམ་གཤིས་འགྱུར་ལྡོག་གིས་རྒྱ་ནག་གི་ཐོན་སྐྱེན་ཐད་ཁོར་ཡུག་གི་གནོད་སྐྱོན་དང་རྒྱལ་སྤྱིའི་བསམ་འཆར་བཅས་ཕྱོགས་གཉིས་ནས་གནོན་ཤུགས་ཐེབས་ཀྱི་ཡོད་སྐོར་བརྗོད་འདུག
ཡང་སྙན་ཐོ་དེའི་ནང་། རྒྱ་ནག་ནི་དཔལ་འབྱོར་འཕེལ་རྒྱས་ཤུགས་ཆེན་འགྲོ་བཞིན་པའི་རྒྱལ་ཁབ་ཅིག་ཡིན་པ་མ་ཟད། འབག་བཙོག་གི་འབྱུང་ཁུངས་ཆེ་ཤོས་ཤིག་ཀྱང་ཆགས་ཡོད་སྟབས། ཨ་རི་དང་ཡུ་རོབ་སོགས་འཛམ་གླིང་རྒྱལ་ཁབ་ཁག་གིས་རྒྱ་ནག་ཕྱོགས་ནས་མེ་ཤུགས་དང་གློག་ཤུགས་ལ་བརྟེན་པའི་ཐོན་སྐྱེན་ཚད་གཞི་དམའ་རུ་གཏོང་རྒྱུར་ཁ་ཡོད་ལག་ཡོད་ཀྱི་ཁས་ལེན་བྱེད་པར་རེ་བ་རྒྱག་བཞིན་ཡོད་པ་ལྟར། པེ་ཅིན་གཞུང་གིས་ངེས་པར་དུ་ཕན་ནུས་ལྡན་པའི་ཐག་གཅོད་ཅིག་བྱ་དགོས་པའི་འབོད་སྐུལ་གནང་འདུག
གསར་འགོད་པ། པདྨ་མཚོ།
