བོད་མི་མང་སྤྱི་འཐུས་ལྷན་ཚོགས་ཀྱིས་རྒྱ་གར་ཧི་མ་ཅལ་མངའ་སྡེའི་གྲོས་ཚོགས་ཀྱི་འཐུས་མི་ཡོངས་ལ་ཉིན་གུང་གསོལ་སྟོན་བཤམས་པ་དང་སྟབས་བསྟུན་ཏེ་ཧིན་བོད་གཉིས་ཀྱི་མཛད་གཙོ་རྣམས་ཕན་ཚུན་མཇལ་འཕྲད་གནང་སོང་།
དེ་རིང་སྔ་དྲོའི་ཆུ་ཚོད་ ༡༠།༣༠ སྟེང་། དྷ་རམ་ས་ལའི་རྒྱ་གར་ཧི་མ་ཅལ་མངའ་སྡེའི་གྲོས་ཚོགས་ཀྱི་ཚོགས་ཁང་ཆེན་མོའི་ནང་། བཙན་བྱོལ་བོད་མིའི་སྤྱི་འཐུས་ཚོགས་དྲུང་ལས་ཁུངས་ཀྱིས་རྒྱ་གར་ཧི་མ་ཅལ་མངའ་སྡེའི་གྲོགས་ཚོགས་ཀྱི་འཐུས་མི་ཡོངས་ལ་ཉིན་གུང་གསོལ་ཚིགས་གོ་སྒྲིག་གནང་སོང་།
གསོལ་ཚིགས་འདེགས་འབུལ་གྱི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག རྒྱ་གར་ཧི་མ་ཅལ་མངའ་སྡེའི་བློན་ཆེན་ཤཱི་རེ་བིར་བྷ་ཌར་སིགྷ་ (Sh. Virbhadra Singh) མཆོག་དང་གྲོས་ཚོགས་ཀྱི་ཚོགས་གཙོ་སྐུ་ཞབས་ཤཱི་རེ་བྷ་རྗེ་བྷི་ཧ་རེ་ལད་བྷུ་ཊེལ་ (Sh. Brij Behari Lal Butail) མཆོག་བཅས་ཀྱིས་དབུས། ཧིན་བོད་གཉིས་ཀྱི་གྲོས་ཚོགས་འཐུས་མི་གསར་རྙིང་ཁྱོན་མི་གྲངས་ ༧༠༠ ལྷག་འཛོམས་འདུག
བོད་མི་མང་སྤྱི་འཐུས་ལས་ཐོག་ཨཅརྱ་ཡེ་ཤེས་ཕུན་ཚོགས་ལགས་ཀྱིས་གསོལ་སྟོན་བཤམས་པའི་དགོས་དམིགས་ངོ་སྤྲོད་གནང་དོན། འདས་པའི་ལོ་ངོ་མང་པོའི་རིང་ལ་སྤྱིར་བཏང་ཧི་མ་ཅལ་མངའ་སྡེའི་གྲོས་ཚོགས་འཚོགས་སྟངས་དེ་དབྱར་གནས་དང་དགུན་གནས་གཉིས་ཡོད་ཀྱང་། རྗེས་སུ་ཧི་མ་ཅལ་མངའ་ཁུལ་འདི་གུ་ཡངས་པོ་ཡོད་སྟབས། ཧི་མ་ཅལ་མངའ་སྡེའི་གཞུང་གིས་གྲོས་ཚོགས་འཚོགས་གནས་དེ་འདི་གར་སྤར་བ་ཞིག་རེད་ལ། ང་ཚོ་བོད་མིའི་སྒྲིག་འཛུགས་དང་། ལྷག་དོན་༧གོང་ས་མཆོག་གི་བཞུགས་སྒར་སོགས་བཙན་བྱོལ་བོད་མིའི་གནས་གཞི་གཙོ་བོ་དེ་ཡང་རྒྱ་གར་ཧི་མ་ཅལ་མངའ་སྡེ་འདི་རང་ཆགས་ཀྱི་ཡོད་སྟབས། བོད་མི་དམངས་སྤྱི་འཐུས་སྐབས་ ༡༣ པ་ནས་བཟུང་འདས་པའི་ལོ་ངོ་བཅུ་གྲངས་ཤིག་གི་ནང་ལ་རྒྱ་གར་ཧི་མ་ཅལ་མངའ་སྡེའི་གྲོས་ཚོགས་ཀྱི་འཐུས་མི་རྣམ་པ་དང་ལས་ཀྱི་སྣེ་མོ་བ་རྣམ་པ། དེ་བཞིན། སྤྱི་ཁྱབ་བློན་ཆེན་དང་ཁ་གཏད་ཚོགས་པའི་ཚོགས་མི་ཡོངས་གདན་འདྲེན་ཞུ་སྲོལ་ཡོད་ནའང་། སྐབས་དེར་དེ་རིང་བཞིན་གྲོས་ཚོགས་ཀྱི་འཐུས་མི་ཡོངས་གཞི་རྒྱ་ཆེན་པོའི་སྒོ་ནས་ཚང་འཛོམ་ཐུབ་ཀྱི་ཡོད་པ་མ་རེད།
དེར་བརྟེན། འདི་ལོར་དམིགས་བསལ་ང་ཚོ་ཞབས་ཞུའི་སྡེ་ཚན་ལ་འགན་སྤྲད་དེ། འདི་ལོའི་ཕྱི་ཟླ་ ༩ པའི་ནང་རྒྱ་གར་གྲོས་ཚོགས་འཐུས་མི་ ༦༨ ཀྱིས་ཚོགས་གཙོ་མཆོག་ལ་སྙན་སེང་ཕུལ་བ་ལྟར། དེ་རིང་འདིར་ང་ཚོས་རྒྱ་གར་གཞུང་ལ་ཆེས་མཐོང་གི་ཐོག་ནས་ཉིན་གུང་གསོལ་སྟོན་འདི་གོ་སྒྲིག་ཞུས་པ་ཡིན་ལ། འདིར་ཧི་མ་ཅལ་མངའ་སྡེའི་གཞུང་ཡོངས་རྫོགས་འཛོམས་ཡོད་པ་ལྟར། ང་ཚོ་བོད་མིའི་སྒྲིག་འཛུགས་ཀྱི་ལས་ཀྱི་སྣེ་མོ་བ་ཡོངས་རྫོགས་འདིར་ཕེབས་ནས་ཕན་ཚུན་མཇལ་འཕྲད་བརྒྱུད། བོད་མིའི་སྒྲིག་འཛུགས་དང་བོད་མི་མང་སྤྱི་འཐུས་ལྷན་ཚོགས་འདི་བཞིན་ངོ་སྤྲོད་མཚམས་སྦྱོར་ཞུ་བའི་གོ་སྐབས་ལེགས་པོ་བྱུང་སོང་ལ། བོད་མིའི་སྒྲིག་འཛུགས་ཀྱི་ངོས་ནས་རྒྱ་གར་གྱི་གྲོས་ཚོགས་ར་བའི་ནང་གསོལ་སྟོན་འདི་འདྲ་ཞིག་གོ་སྒྲིག་ཞུས་པ་དེ་ཐོག་དང་པོ་ཆགས་ཀྱི་ཡོད་སྟབས་ལོ་རྒྱུས་ཤིག་ཆགས་ཀྱི་ཡོད། མ་འོངས་པར་ང་ཚོས་འདི་ལས་ལྷག་པའི་ཚགས་ཚུད་སྤུས་དག་ཅིག་གོ་སྒྲིག་བྱ་དགོས་པ་ཞིག་ཆགས་བསྡད་ཡོད་པ་རེད། ད་རེབ་ཀྱི་གསོལ་སྟོན་ཐོག ཧིན་བོད་གཉིས་ཀྱི་གྲོས་ཚོགས་ཕན་ཚུན་མཇལ་འཕྲད་བརྒྱུད་མ་འོངས་བོད་ཀྱི་འཐབ་རྩོད་ཐད་ལ་རྒྱབ་སྐྱོར་ཡོང་བར་ཕན་ནུས་གང་འཚམ་འཐོན་གྱི་ཡོད་པ་རེད། ཅེས་སོགས་བརྗོད་སོང་།
ཧི་མ་ཅལ་མངའ་སྡེའི་གྲོས་ཚོགས་ཀྱི་ཚོགས་གཙོ་སྐུ་ཞབས་ཤཱི་རེ་བྷ་རྗེ་བྷི་ཧ་རེ་ལད་བྷུ་ཊེལ་མཆོག་གིས། ད་ལྟའི་བར་ཧི་མ་ཅལ་གཞུང་དམངས་གཉིས་གཙོས་པའི་རྒྱ་གར་གཞུང་བཙན་བྱོལ་བོད་གཞུང་དམངས་གཉིས་ལ་བཀའ་དྲིན་ཆེན་པོ་ཡིན་པ་དང་། བོད་དོན་འཐབ་རྩོད་ཐད་ལ་ངེས་པར་དུ་རྒྱབ་སྐྱོར་ཡོང་དགོས་པ། ལྷག་པར་དུ་བོད་ཀྱི་ཆོས་དང་རིག་གཞུང་དེ་ཧ་ཅང་གལ་འགེངས་ཆེན་པོ་ཡིན་དུས། བོད་མིའི་ཆོས་དང་རིག་གཞུང་ཉམས་པ་བསླར་གསོ་དང་མ་ཉམས་གོང་སྤེལ་ཐུབ་པ་ཡིན་ན། བོད་མིའི་འཐབ་རྩོད་ལའང་རང་བཞིན་གྱིས་ནུས་པ་ལྡན་པ་ཞིག་དང་། སྤྱིར་གནའ་བོའི་རྒྱ་གར་གྱི་ཆོས་དང་རིག་གཞུང་དེ་བོད་ལ་དར་འཕེལ་བྱུང་བ་ལྟར། ད་ལྟའི་བར་ང་ཚོ་རྒྱ་གར་ལས་ལྷག་ཅིག་ཁྱེད་ཚོ་བོད་དང་བོད་མིས་སྲུང་སྐྱོབ་དར་སྤེལ་བཏང་ཡོད་སྐོར་བརྗོད་སོང་།
གསར་འགོད་པ། པདྨ་རྒྱལ།
