ཨ་རི་དང་སིང་གྷ་པུར་བར་དམག་དོན་གྲོས་མཐུན་བཞག

ཨ་རི་དང་སིང་གྷ་པུར་གྱི་མགོ་ཁྲིད་ཐུག་འཕྲད་བྱས་ཏེ་རྒྱ་ནག་གི་རྒྱ་སྐྱེད་རིང་ལུགས་ལ་ཁ་གཏད་གཅོག་རྒྱུའི་དམག་དོན་གྲོས་མཐུན་ཞིག་བཞག་འདུག

ཁ་སང་ཝ་ཤིན་ཌོན་དུ་ཨ་རིའི་བདེ་སྲུང་དྲུང་ཆེ་ཨཱ་ཤཱི་ཀཱར་ཌར་ (Ash Carter)  དང་སིང་གྷ་པུར་གྱི་བདེ་སྲུང་བློན་ཆེན་ཨིན་ཧན་ (Ng Eng Hen) ཐུག་སྟེ། ཨ་རིས་ཟླ་འདིའི་ནང་སིང་གྷ་པུར་དུ་ཨ་རིའི་སོ་མྱུལ་གནམ་གྲུ་ ཧྥི་བརྒྱད་རྟགས་ཅན་(P8 Poseidon spy plan)གྱི་དཔུང་དམག་འགྲེམས་འཇོག་བྱ་རྒྱུའི་གྲོས་མཐུན་བཞག་ཡོད་ཅིང་། དེ་ནི་ཉེ་ལམ་རྒྱ་ནག་གཞུང་གིས་ལྷོ་རྒྱ་ནག་རྒྱ་མཚོའི་བདག་དབང་རྩོད་ལེན་བྱེད་བཞིན་ཡོད་པར་ངན་ཕྱོགས་ཀྱི་བརྡ་ལན་དང་ཁ་གཏད་བཅགས་པ་ཞིག་ཡིན་འདུག

རོའུ་ཌར་གསར་ལམ་སྟེང་མགོ་ཁྲིད་རྣམ་གཉིས་ཀྱིས་ཐུན་མོང་བསྒྲགས་གཏམ་སྤེལ་བའི་ནང་། ཁ་སང་ནས་བཟུང་ཕྱི་ཚེས་ ༡༤ ཉིན་བར་རྒྱལ་ཁབ་གཉིས་པོས་སིང་གྷ་པུར་དུ་ཨ་རིའི་སོ་མྱུལ་དམག་རྒྱག་གནམ་གྲུ་འགྲེམས་འཇོག་བྱ་རྒྱུའི་མཛད་སྒོ་གཉེར་ཏེ། ཐུན་མོང་ཐོག་ཨེ་ཤ་ཡའི་བདེ་འཇགས་ལ་འགན་ཁུར་རྒྱུ་མ་ཟད། མ་འོངས་པར་དམག་རྒྱག་གནམ་གྲུ་རྒྱ་སྐྱེད་བཏང་ནས་མཉམ་ལས་དམག་སྦྱོང་བྱས་ཏེ། ལྷོ་རྒྱ་ནག་རྒྱ་མཚོ་སྲུང་ནས་ད་ལྟའི་ཨེ་ཤ་ཡའི་རྐྱེན་ངན་འགོག་ཐབས་བྱ་རྒྱུ་ཡིན། ཞེས་བརྗོད་འདུག

ཨ་རིས་རྒྱ་ནག་གཞུང་གིས་རྡོ་སྣུམ་གྱིས་ཕྱུག་པའི་ལྷོ་རྒྱ་ནག་རྒྱ་མཚོའི་བདག་དབང་རྩོད་ལེན་བྱས་ཏེ། མཚོ་ཐོག་གི་ལོ་རེའི་རྒྱལ་སྤྱིའི་ཚོང་འབྲེལ་ཨ་སྒོར་ཁྲག་ཁྲིག་ཆེན་མོ་ ༥ ལྷག་འགོག་ཐབས་བྱ་རྒྱུའི་བྱ་འགུལ་བསྟུད་མར་སྤེལ་ནས། ཁྱིམ་མཚེས་རྒྱལ་ཁབ་དང་ཨ་རིའི་མཐུན་གྲོགས་རྒྱལ་ཁབ་ཀྱི་བདེ་འཇགས་ལ་བསུན་བཙེར་བཟོས་དང་བཟོ་མུས་ཡིན་པར་སྐྱོན་བརྗོད་བྱས་པ་མ་ཟད། ཉེ་ལམ་རྒྱ་ནག་གཞུང་གིས་ཧྥི་ལི་ཕིན་དང་རྩོད་གཞི་ཡོད་པའི་མཚོ་གླིང་སི་པར་ལི་ (Spratly archipelago) རུ་གནམ་ཆུ་གཉིས་ཐོག་ནས་སྐོར་གཡེང་བྱས་ཏེ། མཚོ་ཁུལ་བཙན་འཕྲོག་བྱེད་རྩིས་བྱས་པར་སྐྱོན་འཛུགས་བྱས་ཡོད། དེ་བཞིན། ཟླ་སྔོན་མའི་ནང་ཨོ་བྷ་མས་རྒྱ་ནག་གཞུང་གིས་ཞི་བདེ་རྒྱ་མཚོ་དང་ལྷོ་རྒྱ་ནག་རྒྱ་མཚོའི་ཐོག་མཚོ་གླིང་གསར་རྒྱག་བྱ་རྒྱུ་མཚམས་འཇོག་མ་བྱས་ཚེ། ཨ་རིས་མུ་མཐུད་རྒྱལ་སྤྱིའི་མཚོ་ཐོག་གི་རང་དབང་རྩོད་ལེན་བྱ་རྒྱུ་ཡིན་པའི་ཉེན་བརྡ་བཏང་ཡོད་ཀྱང་། དེར་རྒྱ་ནག་གཞུང་གིས་བཟང་ཕྱོགས་ཀྱི་བརྡ་ལན་གང་ཡང་སྤྲད་མེད་པ་མ་ཟད། ད་དུང་ཁོ་ཚོས་མཚོ་གླིང་ཐོག་མུ་མཐུད་དམག་སྒར་དང་གྲོང་སྡེ་འཛུགས་སྐྲུན་བྱ་རྒྱུ་ཡིན་ཚུལ་བརྗོད་ཡོད་པ་རེད།

དེ་རིང་ཨ་རིའི་སྙན་གྲགས་ཅན་གྱི་བདུན་རེའི་དུས་དེབ་ (Newsweek) དང་དབྱིན་ཡུལ་གྷར་ཌིན་གྱིས། རྒྱ་ནག་གཞུང་གིས་ཨ་རི་དང་ཁྱིམ་མཚེས་རྒྱལ་ཁབ་ཀྱིས་སྐྱོན་བརྗོད་བྱེད་མིན་ལ་མ་ལྟོས་པར། འདས་པའི་ལོ་ཤས་རིང་མཚོ་གླིང་གི་བདག་དབང་རྩོད་ལེན་ཤུགས་ཆེ་བྱས་ནས་རྒྱལ་ཁབ་མང་པོར་ཕོག་ཐུག་བཏང་ཡོད་སྟབས། ཨ་རིས་ད་ལྟ་རྒྱ་ནག་དང་མཚོ་གླིང་གནད་དོན་ཐོག་རྩོད་གཞི་བྱུང་བཞིན་ཡོད་པའི་ལྦེ་ཋེ་ནམ་དང་ཧྥི་ལི་ཕིན། མ་ལེ་ཞི་ཡ་དང་ཐའེ་ཝན། བྷུར་ཎེ་བཅས་དང་དམག་དོན་གྲོས་ཆོད་བཞག་སྟེ། ཉི་ཧོང་དང་ཧྥི་ལི་ཕིན། མ་ལེ་ཞི་ཡ་བཅས་སུ་སོ་ཉུལ་གནམ་གྲུ་ (P8s) རྟགས་ཅན་འགྲེམས་འཇོག་བྱས་ནས་རྒྱ་ནག་གི་རྒྱ་སྐྱེད་རིང་ལུགས་ཀྱི་འཐབ་ཇུས་ལ་ལྐོག་ལྟ་བྱེད་བཞིན་ཡོད་པ་ལྟར། ད་ལྟ་སིང་གྷ་པུར་ནང་(P8 Poseidon spy plan) རྟགས་ཅན་གྱི་དམག་རྒྱག་གནམ་གྲུ་འགྲེམས་འཇོག་གིས་རྒྱ་ནག་གི་བྱ་སྤྱོད་ལ་ཚོད་འཛིན་བྱ་རྒྱུའི་རྨང་གཞི་རྟིང་མགོ་བཙུགས་ཡོད་སྐོར་བཀོད་འདུག

ཆབ་སྲིད་དབྱེ་ཞིབ་པ་ཚོས། ཨ་རིས་འདི་ལོའི་ཕྱི་ཟླ་ ༡༠ ནང་དམག་གྲུ་བཏང་སྟེ། རྒྱ་ནག་གི་མཚོ་ཁུལ་འཁྲིས་སུ་སྐོར་གཡེང་བྱས་ཡོད་པ་མ་ཟད། ཉེ་ལམ་ལྷོ་རྒྱ་ནག་རྒྱ་མཚོའི་མཚོ་གླིང་དུ་དམག་རྒྱག་གནམ་གྲུ་བྷི་ ༥༢ རྟགས་ཅན་ (B-52) བཏང་སྟེ། རྒྱ་ནག་ལ་ཉེན་བརྡ་དང་སྡིགས་ར་སྐུལ་ཡོད་པར་བརྟེན། ད་ལྟ་རྒྱལ་ཁབ་གཉིས་ཀྱི་འབྲེལ་ལམ་སྡུག་ཏུ་ཕྱིན་ནས་རྒྱལ་སྤྱིའི་བདེ་འཇགས་ལ་ཉེན་ཁ་འཕྲད་བཞིན་ཡོད་སྟབས། ཕྱོགས་གཉིས་པོས་གྲོས་མོལ་བརྒྱུད་དཀའ་རྙོག་འདི་སེལ་དགོས་པའི་དུས་ལ་སླེབ་ཡོད་པ་རེད། ཅེས་བརྗོད་འདུག

གསར་འགོད་པ། དོན་གྲུབ།