དེ་རིང་རྒྱ་ནག་ཀོང་ཏུང་ས་ཁུལ་གྱི་གླི་ག་ཞིག་ཏུ་ཁང་རྩེག་མང་པོ་རྡིབ་སྐྱོན་བྱུང་སྟེ་མི་ ༩༡ ཙམ་གར་སོང་ཆ་མེད་དུ་གྱུར་ཡོད་འདུག
དེ་རིང་ཀོང་ཏུང་ཞིང་ཆེན་ཧྲིན་ཀྲིན་གྲོང་ཁྱེར་བཟོ་ལས་གླིང་ག་ཞིག་ཏུ་ས་ཉིལ་རྒྱབ་པའི་ཁྲོད་ཁང་རྩེག་ ༣༣ ལྷག་རྡིབ་སྐྱོན་བྱུང་སྟེ། ད་ལྟའི་བར་མི་ ༩༡ གར་སོང་ཆ་མེད་དུ་གྱུར་ཡོད་འདུག བོར་བརླག་བྱུང་པའི་དེ་དག་ཁྲོད་སྐྱེས་པ་ ༥༩ དང་བུད་མེད་ ༣༢ ཡོད་འདུག་འདུག
རྒྱ་གཞུང་གི་དབུས་བརྙན་འཕྲིན་ཁང་གིས། དོན་རྐྱེན་དེའི་ཁྲོད་མི་ ༡༤ ལྷག་སྐྱོབ་ཐུབ་ཡོད་པ་དང་དེ་དག་རྨས་སྐྱོན་ཆེན་པོ་ཕོག་མེད་སྐོར་དང་། རྒྱ་ནག་གཞུང་གི་ཉེན་སྐྱོབ་མི་སྣ་ ༡༥༠༠ ལྷག་གིས་རྡིབ་སྐྱོན་བྱུང་ཡུལ་དུ་མི་མྱུར་སྐྱོབ་དང་འཚོལ་ཞིབ་བྱེད་ཀྱིན་ཡོད་སྐོར་བཀོད་པ་ལས། མི་འདས་གྲོངས་སུ་སོང་བའི་གནས་ཚུལ་གང་ཡང་བསྒྲགས་མི་འདུག
གནས་ཚུལ་ཡོང་ཁུངས་གཞན་དུ། གཟའ་ཉི་མའི་སྔ་དྲོ་ཆུ་ཚོད་ ༡༡། ༤༠ ཡས་མས་ནས་ཧྲིན་ཀྲིན་གྲོང་ཁྱེར་རུ་ས་ཉུལ་བྱུང་སྟེ་ཁང་རྩེག་རྡིབ་སྐྱོན་བྱུང་ཡོད་པ་དང་། སྐབས་དེར་ཧྲིན་ཀྲིན་གྱི་གསར་འགྱུར་ལམ་ཁག་ཏུ། གར་སོང་ཆ་མེད་དུ་གྱུར་པའི་མི་གྲངས་ ༤༠ ལྷག་ཡིན་ཚུལ་ཁྱབ་བསྒྲགས་བྱས་ཡོད་ཀྱང་། དེ་རིང་གྲངས་ཚད་དེ་འཕར་ཏེ་མི་ ༩༡ ཙམ་གར་སོང་ཆ་མེད་ཆགས་ཡོད་སྐོར་བཀོད་འདུག
ཧྲིན་ཀྲིན་གྲོང་ཁྱེར་གྱི་སྲིད་གཞུང་གིས། ས་ཉུལ་བྱུང་སྟེ་འདམ་རིལ་གྱིས་རྨི་གྲུ་བཞི་མ་ཁྲི་ ༣༨ ལྷག་ཁེབས་ཡོད་པ་དང་། ཆེས་མཐོ་བའི་ས་ཉིལ་གྱི་མཐུག་ཚད་རྨི་ཁྲི་ལྷག་ཡོད་སྐོར་བརྗོད་འདུག་ཀྱང་། བྷི་བྷི་སིས་གནས་ཚུལ་སྤེལ་བའི་ནང་། ཐེངས་འདིར་རྒྱ་ནག་ཧྲིན་ཀྲིན་ནང་ས་ཉིལ་དོན་རྐྱེན་བྱུང་བ་དེ་རྒྱ་ནག་ས་ཞིང་ཐོན་ཁུངས་ཀྱི་མི་སྣས་བཟོས་པ་ཞིག་ཡིན་པ་ལས། སྔོན་ཆེད་ཀྱི་རི་ཡོད་པའི་ས་ཆ་དེ་དག་ཉིལ་རྒྱབ་མེད་ཚུལ་བརྗོད་འདུག
གསར་འགོད་པ། འཇིགས་མེད་རྒྱ་མཚོ།
