ཨ་རིའི་ (Wall Street Journal) གསར་ཁང་གི་དཔྱད་གཏམ། པདྨ་རྒྱལ་གྱིས་བོད་སྒྱུར་བྱས།
_____ཕྱིའི་གནོན་ཤུགས་ཀྱིས་རྒྱ་ནང་གི་ཆབ་སྲིད་བཙོན་མ་ཚོར་རམ་འདེགས་ཐུབ་ངེས་རེད།
འདས་པའི་མི་ལོ་གཅིག་དང་ཟླ་བ་དྲུག་རིང་བཙོན་འཇུག་བྱས་པ་དང་བདུན་ཕྲག་སྔོན་མར་ཆུ་ཚོད་གསུམ་རིང་ཁྲིམས་བཤེར་བྱས་རྗེས། ཁ་སང་རེས་གཟའ་མིག་དམར་ཉིན་པེ་ཅིན་མི་དམངས་འབྲིང་རིམ་ཁྲིམས་ཁང་གིས་འགྲོ་བ་མིའི་ཐོབ་ཐང་གི་ཁྲིམས་རྩོད་པ་གྲགས་ཅན་པུ་ཀྲི་ཆང་བཙོན་ཁང་ནས་གློད་དེ་ལོ་གསུམ་གྱི་བཟང་བཙོན་བྱ་རྒྱུ་བྱས་ཡོད་པར་གཞིག་ན། རྒྱལ་སྤྱིའི་སྤྱི་མང་གི་འབོད་སྐུལ་དང་གནོན་ཤུགས་དེས་པེ་ཅིན་གཞུང་ལ་ཤན་ཤུགས་ཕྲ་ལ་ཕྲན་བུ་ཐེབས་ཡོད་ངེས་རེད།
སྐུ་ཞབས་པུ་ཀྲི་ཆང་གིས་སྤྱི་ཚོགས་བརྒྱུད་ལམ་ཁག་ཏུ་རྒྱ་ནག་གཞུང་གི་དཔོན་རིགས་ཚོ་དང་ཡུ་གུར་གྲངས་ཉུང་མི་རིགས་ཐོག་འཛིན་པའི་རྒྱ་ནག་གི་སྲིད་ཇུས་ལ་ཐེར་འདོན་བྱས་པ་གཞིར་བཟུང་སྟེ་པེ་ཅིན་མི་དམངས་འབྲིང་རིམ་ཁྲིམས་ཁང་ནས་སྐུ་ཞབས་པུ་ཀྲི་ཆང་གིས་ “མི་རིགས་བར་ཞེ་འཁོན་བསླངས་པ་དང་ཁ་བྲལ་བཏང་བ” “སྤྱི་ཚོགས་སྟེང་ཟིང་ཆ་བཟོས་པ” སོགས་ཀྱི་ནག་ཉེས་འཛུགས་ཏེ་མ་འོངས་མི་ལོ་གསུམ་རིང་གི་བཟང་བཙོན་འོག ཁོ་རང་དབང་གི་སྒོ་ནས་རྒྱལ་ཁབ་ཕྱི་ནང་གང་ལའང་འགྲོ་སྡོད་མི་ཆོག་པ་མ་ཟད། གཅིག་བྱས་ན་ཁོ་བསྐྱར་དུ་ཁྲིམས་རྩོད་ཀྱི་ལས་ཀར་ཡང་ཞུགས་ཆོག་གི་ཡོད་པ་མ་རེད།
རྒྱ་ནག་གཞུང་གིས་པུ་ཀྲི་ཆང་ལ་ལོ་བརྒྱད་ཀྱི་ཁྲིམས་ཐག་གཅོད་འཆར་ཡོད་པ་དེ་ཅིའི་ཕྱིར་ལོ་གསུམ་གྱི་བཟང་བཙོན་དུ་བསྒྱུར་བ་ཡིན་ནམ། གནད་དོན་འདི་གསལ་བོ་ཞིག་རྟོགས་ཐབས་མི་འདུག་ནའང་། གཅིག་བྱས་ན་པུ་ཀྲི་ཆང་གི་གནས་ཚུལ་རྒྱལ་ཁབ་ཕྱི་ནང་གང་སར་ཁྱབ་གདལ་ཤུགས་ཆེར་ཕྱིན་པ་དེས་ཁོ་ལ་ཕན་ཐོག་བྱུང་ཡོད་ངེས་རེད།
གཟའ་འཁོར་སྔོན་མར་པེ་ཅིན་མི་དམངས་འབྲིང་རིམ་ཁྲིམས་ཁང་གིས་པུ་ཀྲི་ཆང་ལ་ཁྲིམས་གཤེར་བྱེད་སྐབས། ཁྲིམས་ཁང་གི་ཕྱི་ལོགས་སུ་ཉེན་རྟོག་པས་པུ་ཀྲི་ཆང་ལ་རྒྱབ་སྐྱོར་གྱི་སྐད་འབོད་གནང་མཁན་ཚོར་རྡུང་རྡེག་བཏང་བ་དང་། དེའི་ཁྲོད་དུ་ཕྱི་ཕྱོགས་ཀྱི་གསར་འགྱུར་བརྒྱུད་ལམ་ཁག་གི་གསར་འགོད་པའང་ཡོད་ལ། ཐ་ན་ཨ་རིའི་གཞུང་ཚབ་ཁང་གི་ལས་ཀྱི་སྣེ་མོ་བ་ཚོས་ཀྱང་པུ་ཀྲི་ཆང་ལ་རྒྱབ་སྐྱོར་གྱི་བསྒྲགས་གཏམ་སྤེལ་བཞིན་འདུག
དེ་དང་ཕྱོགས་མཚུངས་རྒྱལ་སྤྱིའི་སྤྱི་མང་གི་གདུང་སེམས་མཉམ་སྐྱེད་དང་འབོད་སྐུལ་རམ་འདེགས་འོག ཟླ་སྔོན་མར་པེ་ཅིན་གཞུང་གིས་ལོ་ ༧༡ ལ་སོན་པའི་བཙན་འོག་གི་རྒྱ་རིགས་གསར་འགོད་པ་གོ་ཡེ་ (Gao Yu) ལགས་ཀྱི་འཕྲོད་བསྟེན་གནས་སྟངས་ལ་བརྟག་དཔྱད་སྨན་བཅོས་བྱ་རྒྱུ་ཁག་ཐག་བྱས་ཡོད་པ་རེད།
གནས་ཚུལ་འདི་དག་ལ་བལྟས་ཡོང་ན། རྒྱ་ནག་གི་སྲིད་འཛིན་ཞི་ཅིན་ཕིན་ (བདུན་ཕྲག་སྔོན་མར་ཁོས“འཛམ་གླིང་དྲ་རྒྱའི་གྲོས་གླེང་ཚོགས་འདུ” (World Internet Conference) ལ་གཙོ་སྐྱོང་བྱེད་བཞིན་པའི་སྐབས་དེར། ཁོ་རང་གི་སྲིད་གཞུང་ནས་ཁྲིམས་རྩོད་པ་པུ་ཀྲི་ཆང་གིས་སྤྱི་ཚོགས་བརྒྱུད་ལམ་ཁག་ཏུ་གནས་ཚུལ་སྤེལ་བར་ཁྲིམས་གཤེར་བྱེད་ཀྱི་ཡོད) རྒྱལ་སྤྱིའི་སྐྱོན་བརྗོད་ (འདི་ནི་རྒྱ་ནག་གི་འགལ་འདུ་རྒྱ་ཡན་དུ་མ་བཏང་བའི་རྒྱུ་མཚན་ཡིན) ལ་སུན་སྣང་སྐྱེ་ཀྱི་ཡོད་པ་འདྲ།
མ་རྩོམ་འབྲེལ་ཐག http://www.wsj.com/articles/beijing-frees-a-lawyer-1450829174
