རྒྱ་ནག་གཞུང་གིས་འཇིགས་སྐུལ་དྲག་སྤྱོད་པའི་གནས་ཚུལ་ཟུར་ཙམ་ཡང་རྒྱལ་ནང་དུ་བསྒྲགས་མི་ཆོག་ཅིང་། གལ་སྲིད་དྲག་སྤྱོད་པའི་གནས་ཚུལ་དངོས་སུ་བྱུང་མཚམས་སྲིད་གཞུང་གིས་དྲག་སྤྱོད་པར་འགོད་རྒོལ་བྱེད་སྟངས་ཁྱབ་བསྒྲགས་བྱ་རྒྱུ་ཡིན་ཟེར།
དེ་རིང་གནས་ཚུལ་ཐོན་པ་ལྟར་ན། རྒྱ་ནག་ལྷོ་རྒྱུད་ཧྲིན་ཀྲིན་ (Shenzhen) གྲོང་ཁྱེར་གྱི་ཀང་མིན་ (Guangming) རྫོང་གི་ས་གནས་གློག་འཕྲིན་ཁེ་ལས་ཁང་ཞིག་གི་དཔོན་རིགས་གཉིས་ཀྱིས་གློང་འཕྲིན་ཁེ་ལས་ཁང་གི་དྲ་ལམ་དུ་བརྡ་འཕྲིན་ཞིག་བཀྲམ་པའི་ནང་། ཕྱི་ཕྱོགས་ཀྱི་ཁ་ཆེ་འཇིགས་སྐུལ་དྲག་སྤྱོད་པས་དམག་སྦྱོང་སྤྲད་པའི་ཡུ་གུར་བ་མི་ ༣༠༠ རྒྱ་ནག་ལྷོ་རྒྱུད་གྲོང་ཁྱེར་ཧྲིན་གྲིན་གྲོང་ཁྱེར་ནང་འབྱོར་གྱི་ཡོད་པའི་ཉེན་བརྡ་བཏང་ཡོད་སྟབས། གྲོང་ཁྱེར་དེའི་ཉེན་རྟོག་དམག་གིས་དཔོན་རིགས་དེ་གཉིས་ཀྱིས་སྤྱི་ཚོགས་ཀྱི་བརྟན་ལྷིང་ལ་དཀྲོག་གཏམ་བཟོས་པའི་ཉེས་མིང་འོག་འཛིན་བཟུང་བྱས་ཡོད་པ་དང་། དཔོན་རིགས་དེ་གཉིས་ཀྱི་མིང་དང་གློག་འཕྲིན་ཁེ་ལས་ཁང་གི་མིང་སོགས་གསལ་བཤད་བྱས་མི་འདུག
གནས་ཚུལ་འདིའི་ནང་མུ་མཐུད་དུ། ཟླ་འདིའི་ཕྱི་ཚེས་ ༣༠ ཉིན་རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་སྟེང་གཏན་འབེབས་བྱས་པའི་རྒྱལ་ཁབ་ཕྱི་ནང་གི་འཇིགས་སྐུལ་དྲག་སྤྱོད་པར་འགོག་རྒོལ་བྱེད་ཐབས་ཀྱི་བཅའ་ཁྲམས་གསར་བ་དེ་ལ་ཕན་ནུས་ཅི་ཡང་འཐོན་གྱི་མེད་པ་དང་། རྒྱ་ནག་གཞུང་གི་བཅའ་ཁྲིམས་གསར་བ་དེ་ཡང་ལྐོག་ཟ་རུལ་སུངས་གཙང་བཤེར་སྲིད་ཇུས་དང་འདྲ་བར། རྒྱ་ནག་དམར་ཤོག་ཚོགས་པས་ཁ་གཏད་ཀྱི་དཔོན་རིགས་ཚོ་ཚར་གཅོད་བྱེད་ཐབས་ཤིག་ཡིན་པ་མ་ཟད། རྒྱ་ནང་གི་ཡུ་གུར་གྲངས་ཉུང་མི་རིགས་ཐོག་འཛིན་པའི་དྲག་གནོན་སྲིད་ཇུས་ཤིག་ཡིན་པ་དང་། རྒྱ་ནག་གཞུང་གིས་ཡུ་གུར་གྲངས་ཉུང་མི་རིགས་ས་གནས་ཁག་ཏུ་འབྱུང་བཞིན་པའི་གནད་དོན་དེ་ཕྱི་ཕྱོགས་ཀྱི་ཁ་ཆེ་འཇིགས་སྐུལ་དྲག་སྤྱོད་པར་འབྲེལ་བ་ཡོད་ལུགས་ནན་བཤད་བྱེད་ཀྱི་ཡོད་ཀྱང་། དོན་དངོས་སུ་དེ་ནི་པེ་ཅིན་གཞུང་གིས་རྒྱལ་ནང་གི་གྲངས་ཉུང་མི་རིགས་ཁག་གི་ཆོས་ལུགས་རིག་གནས་ཐོག་འཛིན་སྲིད་ཇུས་ཤིག་ཡིན་ཞིང་། འདས་པའི་ལོ་ངོ་འདི་དག་རིང་པེ་ཅིན་གཞུང་གིས་ཡུ་གུར་གྲངས་ཉུང་མི་རིགས་ནང་འཇིགས་སྐུལ་དྲག་སྤྱོད་པར་འགོག་རྒོལ་བྱེད་རྒྱུར་ཁ་གཡར་ནས། ནག་ཉེས་ཡོད་མེད་ཀྱི་ཡུ་གུར་མི་སེར་བརྒྱ་ཕྲག་མང་པོ་འཆི་ལམ་དུ་དེད་དང་འདེད་ཀྱི་ཡོད་སྐོར་བརྗོད་འདུག
འཇིགས་སྐུལ་དྲག་སྤྱོད་པར་འགོག་རྒོལ་བྱེད་ཕྱོགས་ཀྱི་བཅའ་ཁྲིམས་གསར་བ་དེའི་ནང་། སྤྱི་ཚོགས་བརྒྱུད་ལམ་ཁག་ཏུ་འཇིགས་སྐུལ་དྲག་སྤྱོད་པ་དང་འབྲེལ་བའི་བརྡ་འཕྲིན་གཅིག་ཀྱང་སྤེལ་མི་ཆོག་པ་དང་། གལ་ཏེ་འཇིགས་སྐུལ་དྲག་སྤྱོད་པས་དངོས་སུ་འཇབ་རྒོལ་ཐེབས་པའི་ཉེན་ཁའི་སྐབས་སུ་ད་གཟོད་རྒྱ་ནག་གཞུང་གི་འཇིགས་སྐུལ་དྲག་སྤྱོད་རྒོལ་རྡུང་རུ་ཁག་གིས་འཇིགས་སྐུལ་དྲག་སྤྱོད་པར་འགོག་རྒོལ་བྱེད་ཕྱོགས་ཀྱི་གནས་ཚུལ་ཁྱབ་བསྒྲགས་བྱས་ཆོག་ལུགས་འཁོད་ཡོད་འདུག
གསར་འགོད་པ། པདྨ་རྒྱལ།
