༼གཅིག༽
ཕྱི་ཟླ་ ༡ ཚེས་ ༡ ཉིན་གྱི་སྔར་ནུབ། རྒྱ་ནག་ཧྲེང་ཧེ་གྲོང་ཁྱེར་བད་ཐན་ཁྲིན་ཡས་ཐང་ཆེན་དུ་མི་ཞིག་གིས་ཨ་སྒོར་མང་པོ་གཏོར་བར་བརྟེན་ཏེ། མི་མང་གིས་འཚང་ཁ་བརྒྱབ་ནས་མི་ ༣༥ འདས་གྲོངས་དང་མི་ ༤༦ ལ་རྨས་སྐྱོན་ཕོག་ཡོད། རྒྱ་ནག་གཞུང་གིས་དེ་ནི་དགོང་མོ་དེར་མི་ཁྲི་ ༡༥ ལྷག་གིས་ཡེ་ཤུ་ལོ་གསར་གྱི་གློག་སྒྲོན་ལ་ལྟ་སྐབས་འཚང་བརྒྱབ་སྟེ་དོན་རྐྱེན་དེ་བྱུང་སྐོར་བརྗོད་ཡོད།
༼གཉིས།༽
ཕྱི་ཟླ་ ༦ ཚེས་ ༡༡ ཉིན། རྒྱ་ནག་དབུས་ཆབ་སྲིད་ལྷན་ཁང་རྒྱུན་ལས་ཟུར་བ་ཀྲུའུ་ཡོན་ཁཱང་གིས་ལྐོག་རྔན་འབོར་ཆེན་བླངས་བ་དང་དབང་ཆ་ལོག་སྤྱོད་བྱས་པ། རྒྱལ་ཁབ་ཀྱི་གསང་བ་ཕྱིར་གྱར་བྱས་པ་བཅས་ཀྱི་ནག་ཉེས་འོག་ཚེ་བཙོན་དང་ཚེ་གང་ཆབ་སྲིད་ཀྱི་ཁེ་དབང་འཕྲོག་པ། རྒྱུ་ནོར་གཞུང་བཞེས་བཏང་བ་སོགས་ཀྱི་ཁྲིམས་ཐག་བཅད་པ་ཁྱབ་བསྒྲགས་བྱས།
༼གསུམ།༽
ཕྱི་ཟླ་ ༩ ཚེས་ ༣ ཉིན། པེ་ཅིན་དུ་རྒྱ་ནག་གཞུང་གིས་འཛམ་གླིང་དམག་ཆེན་གཉིས་པ་མཇུག་སྒྲིལ་ཏེ་ལོ་ངོ་ ༧༠ འཁོར་བའི་དུས་སྟོན་སྟེང་། སྲིད་འཛིན་ཞི་ཅིན་ཕིན་གྱིས་འཛམ་གླིང་ཞི་བདེ་སྲུང་སྐྱོབ་ཆེད་རྒྱ་ནག་གི་དམག་མི་ཁྲི་ ༣༠ ཙམ་ཉུང་འཕྲི་གཏོང་རྒྱུ་ཁྱབ་བསྒྲགས་བྱས། སྐབས་དེའི་མཛད་སྒོའི་ཐོག་རྒྱལ་ཁབ་ཁག་གི་དཔོན་རིགས་ ༣༠ ཙམ་མཉམ་ཞུགས་བྱས་ཡོད།
༼བཞི།༽
ཕྱི་ཟླ་ ༨ ཚེས་ ༡༢ ཉིན། ཐེན་ཅིན་མཚོ་འགྲམ་གྱི་རྫས་འགྱུར་མཛོད་ཁང་ཞིག་ལ་འབར་གས་དོན་རྐྱེ ན་བྱུང་སྟེ། ཁྱོན་མི་ ༡༧༣ གྲོངས་པའི་ཁྲོད་སྤྱི་བདེ་མི་སྣ་ ༢༤ དང་ཐེན་ཅིན་མེ་གསོད་པ་ ༨༠། དམངས་དམག་ ༡༡ ། གཞན་མི་ ༥༨ གྲོངས་ཡོད་འདུག མི་ ༥༦༥ ཙམ་ལ་རྨས་སྐྱོན་ཕོག་ཡོད་འདུག དེ་ནི་རྒྱ་ནག་མི་མང་སྤྱི་མཐུན་རྒྱལ་ཁབ་མགོ་བཙུགས་ནས་མེ་གསོད་པ་འདས་གྲོངས་ཟིན་པའི་གྲངས་ཚད་མཐོ་ཤོས་ཆགས་ཡོད་ཚུལ་བསྒྲགས།
༼ལྔ།༽
ཕྱི་ཟླ་ ༡༠ ཚེས་ ༤ ཉིན་ཧོང་ཀོང་དུ། རྒྱ་མི་ཝུ་ཏ་རུང་ངམ་བོད་མིང་ལ་པདྨ་འོད་གསལ་ཟེར་བ་ཞིག་གིས། རྒྱ་ནག་གི་གློག་བརྙན་འཁྲབ་སྟོན་པ་གྲགས་ཅན་ཀྲང་ཐའེ་ལིན་ཡང་བླ་སྤྲུལ་ཞིག་ལ་ངོས་འཛིན་ཁྲི་འདོན་གྱི་མཛད་སྒོ་བསྡུས་ཏེ། བོད་བརྒྱུད་ནང་བསྟན་གྱི་སྤྲུལ་སྐུ་ངོས་འཛིན་དང་ཁྲི་འདོན་ལམ་སྲོལ་དང་མི་མཐུན་པའི་ཆོས་དང་ཆབ་སྲིད་འདྲེས་པའི་བྱ་སྤྱོད་སྤེལ་བར། ནང་པའི་རྗེས་འཇུག་པ་མང་པོས་སྐྱོན་བརྗོད་བྱས་མཐར་ཝུ་ཏ་རུང་གིས་དགོངས་སེལ་ཞུས།
༼དྲུག༽
ཕྱི་ཟླ་ ༡༠ ཚེས་ ༢༩ ཉིན་པེ་ཅིན་དུ། རྒྱ་ནག་གི་སྐབས་བཅོ་བརྒྱད་པའི་ཆབ་སྲིད་རྒྱུན་ལས་ལྷན་ཚོགས་ཐེངས་ལྔ་པ་ཚོགས་པའི་ཐོག རྒྱ་ནག་གི་འཆར་ལྡན་བུ་སྐྱེས་སྲིད་བྱུས་ལ་བཅོས་བསྒྱུར་བཏང་སྟེ་ཕྲུ་གུ་གཉིས་རེ་སྐྱེས་ཆོག་པ་དང་། སྲིད་བྱུས་དེ་ ༢༠༡༦ ལོའི་ཟླ་ ༡ པོ་ནས་ལག་བསྟར་བྱ་རྒྱུ་ཡིན་པ་ཁྱབ་བསྒྲགས་བྱས།
༼བདུན།༽
ཕྱི་ཟླ་ ༡༡ ཚེས་ ༧ ཉིན། སེང་གྷ་པུར་གྱི་ཤམ་བྷ་ལའི་གསོལ་མགྲོན་ཁང་དུ། རྒྱ་ནག་གི་སྲིད་འཛིན་ཞི་ཅིན་ཕིན་དང་ཐའེ་ཝན་གྱི་སྲིད་འཛིན་མཱ་ཡོན་ཅའུ་གཉིས་ཐུག་འཕྲད་བྱས་ཤིང་། དེ་ནི་གོ་མིན་ཏང་དང་གུང་ཁྲན་ཏང་འཐབ་འཁྲུག་མཇུག་བསྒྲིལ་ནས་ལོ་ངོ་ ༦༠ རྗེས་སུ་རྒྱ་ནག་དང་ཐའེ་ཝན་གྱི་སྲིད་འཛིན་ཐུག་འཕྲད་བྱས་པ་ཐོག་མ་ཡིན།
༼བརྒྱད།༽
ཕྱི་ཟླ་ ༡༡ ཚེས་ ༢༠ ཉིན་པེ་ཅིན་དུ། རྒྱ་ནག་གི་སྲིད་བློན་ཟུར་པ་འདས་པོ་ཧུའུ་ཡོ་པང་སྐྱེས་ནས་ལོ་ ༡༠༠ འཁོར་བའི་རྗེས་དྲན་ཚོགས་འདུ་བསྐོངས་པའི་སྟེང་། སྲིད་འཛིན་ཞི་ཅིན་ཕིན་གཙོས་པའི་ཆབ་སྲིད་ལྷན་ཁང་གི་ཚོགས་མི་རྣམས་མཉམ་ཞུགས་བྱས་ཤིང་། ཞི་ཅིན་ཕིན་གྱིས་ཧུའུ་ཡོ་པང་ནི་ཏང་དང་རྒྱལ་ཁབ་ལ་དགའ་ཞེན་ཡོད་པའི་བསྔགས་བརྗོད་དང་ཁོང་ལ་སློབ་སྦྱོང་བྱ་དགོས་སྐོར་བརྗོད།
༼དགུ།༽
ཕྱི་ཟླ་ ༡༢ ཚེས་ ༢༩ ཉིན། རྒྱ་ནག་ཧེ་ནན་སན་ཡ་གྲོང་ཁྱེར་དུ་ ༢༠༡༥ ལོའི་འཛམ་གླིང་མཛངས་མའི་འགྲན་བསྡུར་ཚོགས་སྐབས། ཁེ་ན་ཌའི་མཛངས་མ་རྒྱ་རིགས་ཨེན་སི་ཊ་སི་ལིན་ (Anastasia Lin)ལ་རྒྱ་ནག་གཞུང་གིས་ཐོངས་མཆན་སྤྲད་མེད། ཁོང་མོ་ནི་ཆོས་འཁོར་རྩ་རླུང་སྒོམ་སྒྲུབ་པར་དད་མོས་དང་འགྲོ་བ་མིའི་ཐོབ་ཐང་དོན་གཉེར་བ། བོད་རིགས་གཙོས་པའི་གྲངས་ཉུང་མི་རིགས་ཀྱི་གནད་དོན་གླེང་མཁན་ཞིག་ཡིན་འདུག
༼བཅུ།༽
ཕྱི་ཟླ་ ༡༢ ཚེས་ ༢༢ ཉིན། རྒྱ་ནག་པེ་ཅིན་མི་དམངས་འབྲིང་རིམ་ཁྲིམས་ཁང་གཉིས་པས་རང་དབང་རྩོད་ལེན་གྱི་ཁྲིམས་རྩོད་པ་ཕུ་ཀྲི་ཆང་གིས་མི་རིགས་ལ་ཞེ་འཁོན་བསླངས་པ་དང་། སྤྱི་ཚོགས་ལ་ཟིང་ཆ་བཟོས་པའི་ཉེས་མིང་འོག་ལོ་ ༣ གྱི་ཁྲིམས་ཐག་ལག་བསྟར་བྱ་རྒྱུ་ཁྱབ་བསྒྲགས་བྱས་འདུག ཕུ་ཀྲི་ཆང་ལ་ཁྲིམས་བཤེར་སྐབས་ཁྲིམས་ཁང་ཕྱི་ལོགས་སུ་རྒྱལ་ཁབ་ཕྱི་ནང་གི་གསར་འགོད་པ་དང་ཕུ་ཀྲི་ཆང་གི་རྒྱབ་སྐྱོར་བ་ ༡༠ འཛིན་བཟུང་བཀག་སྐྱིལ་བྱས་འདུག
གསར་འགོད་པ། འཇིགས་མེད་རྒྱ་མཚོ།
