ལྷོ་ཤར་ཨེ་ཤ་ཡའི་རྒྱལ་ཁབ་ཁག་གིས་རྒྱ་ནག་གི་ལྷོ་རྒྱུད་མཚོ་ཁུལ་དུ་གླིང་ཕྲན་ ༧ ལྷག་འཛུགས་སྐྲུན་བྱས་ཏེ། གླིང་ཕྲན་ཁག་ཅིག་གི་སྟེང་གནམ་ཐང་གསར་རྒྱག་བྱེད་བཞིན་པར་མཐའ་གཅིག་ཏུ་འགོག་རྒོལ་ཡོད་ཟེར།
ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཧྥི་ལེ་ཕིན་གཞུང་གིས་ཉེ་ལམ་ནས་རྒྱ་ནག་གིས་ལྷོ་རྒྱུད་མཚོ་ཁུལ་ལ་ཆེད་དུ་གླིང་ཕྲན་ཁག་ ༧ བཟོས་ཡོད་པ་དང་། དེང་སྐབས་ (Fiery Cross Reef) ཞེས་པའི་མིས་བཟོས་གླིང་ཕྲན་དེའི་སྟེང་གནམ་གྲུའི་འཕུར་ལམ་བཟོས་ཏེ་ཚོད་ལྟ་བྱེད་པར་མཐའ་གཅིག་ཏུ་ངོ་རྒོལ་ཡོད་སྐོར་བརྗོད་འདུག
ཧྥི་ལེ་ཕིན་གྱི་ཕྱི་འབྲེལ་ཚན་པའི་མགྲིན་ཚབ་པ་ཆར་ལི་སི་ཇོ་སི་ (Charles Jose) ཟེར་བ་ཞིག་གིས། ཝེ་ཋི་ནམ་དང་འདྲ་བར་ཧྥི་ལེ་ཕིན་སྲིད་གཞུང་གི་ངོས་ནས་རྒྱ་ནག་གིས་ཉི་ལམ་ནས་རྒྱ་ནག་གི་ལྷོ་རྒྱུད་མཚོ་ཁུལ་དུ་གླིང་ཕྲན་མང་པོ་འཛུགས་སྐྲུན་བྱས་ཏེ། དེང་སྐབས་ (Fiery Cross Reef) ཞེས་པའི་མིས་བཟོས་གླིང་ཕྲན་སྟེང་གནམ་གྲུའི་འཕུར་ལམ་བཟོས་ཏེ་ཚོད་ལྟ་བྱེད་བཞིན་པ་དེས་རྒྱལ་ཁབ་ཕན་ཚུན་བར་དོ་ཕོག་ཆེན་པོ་བཟོ་ཡི་ཡོད་སྟབས། རྒྱ་ནག་གི་བསམ་སྦྱོར་འདི་རིགས་ལ་མཐའ་གཅིག་ཏུ་འགོག་རྒོལ་ཡོད་སྐོར་བརྗོད་ཅིང་། རྒྱ་ནག་གི་ཕྱི་འབྲེལ་ལྷན་ཁང་གི་མགྲིན་ཚབ་པ་ཧྭ་ཁྲིན་ཡེན་ (Hua Chunying)ཡིས། རྒྱ་ནག་གི་ལྷོ་རྒྱུད་མཚོ་ཁུལ་གྱི་བདག་དབང་རྒྱ་ནག་ལ་ཡོད་སྟབས། རྒྱ་ནག་གཞུང་གིས་མངའ་ཁུལ་དེའི་འགྲིམ་འགྲུལ་གནས་བབ་དང་བསྟུན་ཏེ། གླིང་ཕྲན་སྟེང་གནམ་ཐང་གསར་འཛུགས་བྱ་རྒྱུ་ཐག་བཅད་པ་ཞིག་ཡིན་ལུགས་བཤད་འདུག
རོའུ་ཊར་གསར་ཁང་གིས་སྤེལ་བའི་གནས་ཚུལ་ནང་། ཟླ་འདིའི་ཕྱི་ཚེས་ ༢ ཉིན་ཝེ་ཋི་ནམ་སྲིད་གཞུང་ནས། རྒྱ་ནག་གིས་ (Fiery Cross Reef) ཞེས་པའི་མིས་བཟོས་གླིང་ཕྲན་སྟེང་གནམ་ཐང་གསར་རྒྱག་དང་ཚོད་ལྟ་བྱས་པ་དེས་ཝེ་ཋི་ནམ་གྱི་མངའ་ཁོངས་བདག་དབང་ལ་རྡོག་རོལ་བཏང་བ་ཡིན་སྟབས། རྒྱ་ནག་གཞུང་གིས་བྱ་སྤྱོད་འདི་འདི་མྱུར་དུ་མཚམས་འཇོག་དགོས་པའི་འབོད་སྐུལ་ཞུས་ཡོད་ཀྱང་། པེ་ཅིན་གཞུང་གིས་ཝེ་ཋི་ནམ་དང་ཧྥི་ལེ་ཕིན་གཉིས་ཀྱི་སེམས་ཁྲལ་དང་འགོག་རྒོལ་ལ་ཅི་མི་སྙམ་པར་སྣང་མེད་དུ་གཏོང་གིན་ཡོད་འདུག
ཝེ་ཋི་ནམ་གྱི་ཕྱི་འབྲེལ་ལྷན་ཁང་གི་མགྲིན་ཚབ་པ་ལི་ཧཱེ་བྷེན་ (Le Hai Binh) ཟེར་བ་ཞིག་གིས། རྒྱ་ནག་གིས་འཛུགས་སྐྲུན་དང་གནམ་ཐང་གསར་རྒྱག་བྱས་པའི་མིས་བཟོས་གླིང་ཕྲན་ (Fiery Cross Reef) དེ་ནི་ཝེ་ཋི་ནམ་གྱི་མངའ་ཁོངས་རྩོད་མེད་ཡིན་པ་དང་། རྒྱ་གཞུང་གིས་ཝེ་ཋི་ནམ་གྱི་མངའ་ཁོངས་བདག་དབང་ལ་རྡོག་རོལ་བཏང་སྟེ། ཁྲིམས་འགལ་གྱི་སྒོ་ནས་གླིང་ཕྲན་དེ་འཛུགས་སྐྲུན་དང་གནམ་ཐང་གསར་སྐྲུན་བྱས་པ་ཡིན་སྐོར་བརྗོད་འདུག
ཨ་རིའི་གཞུང་གིས་མཚོ་ཁུལ་འཛུགས་སྐྲུན་དང་མངའ་ཁོངས་རྩོད་གླེང་འདིའི་ཐད་ལ། རྒྱ་གཞུང་གིས་ཉེ་ལམ་ནས་རྒྱ་ནག་གི་ལྷོ་རྒྱུད་མཚོ་ཁུལ་དུ་གླིང་ཕྲན་ཁག་མང་པོ་འཛུགས་སྐྲུན་བྱས་པར་སྐྱོན་བརྗོད་དང་། འབྱུང་འགྱུར་རྒྱ་ནག་གཞུང་གིས་གླིང་ཕྲན་དེ་དག་དྲག་ཆས་དམག་དཔུང་གི་རྟེན་གཞི་བྱ་འཆར་ལ་སེམས་ཁྲལ་ཡོད་སྟབས། མཚོ་ཁུལ་འདིའི་གླིང་ཕྲན་འཛུགས་སྐྲུན་མཚམས་འཇོག་དང་མངའ་ཁོངས་བདག་དབང་ལ་རྩོད་གླེང་མི་འབྱུང་བའི་ཆེད་དུ་རྒྱལ་སྤྱིའི་གསར་འགོད་ལྷན་ཚོགས་བསྐོངས་ཏེ་ཕྱི་གསལ་ནང་གསལ་གྱི་སྒོ་ནས་རྩོད་རྙོག་ཞི་འདུམ་དགོས་སྐོར་བརྗོད་ཡོད་པ་རེད།
གནས་ཚུལ་ལྟར་ན། རྒྱ་ནག་གི་ལྷོ་རྒྱུད་མཚོ་ཁུལ་དེ་ནི་རྡོ་སྣུམ་གྱི་ཐོན་ཁུངས་ཆེན་པོ་ཞིག་ཡིན་ཞིང་། མཚོ་ཁུལ་དེ་ནས་ལོ་རེར་ཨ་སྒོར་ཐེར་འབུམ་ ༥ ལྷག་གི་རྡོ་སྣུམ་ཐོན་སྐྱེད་བྱེད་ཀྱི་ཡོད་པ་དང་། ཉེ་ལམ་ནས་རྒྱ་ནག་གཞུང་གིས་མཚོ་ཁུལ་དེ་ཧྲིལ་བོ་རྒྱ་ནག་གི་མངའ་ཁོངས་ཡིན་ལུགས་བཤད་དེ། མཚོ་ཁུལ་དེའི་གླིང་ཕྲན་ཁག་ ༧ ལྷག་འཛུགས་སྐྲུན་བྱས་པ་དང་། གླིང་ཕྲན་དེ་དག་སྟེང་མཁའ་མཚོ་གཉིས་ཀྱི་དྲག་ཆས་དམག་དཔུང་གི་རྟེན་གཞི་འཛུགས་ཀྱི་ཡོད་པར་བརྟེན། ཝེ་ཋི་ནམ་དང་ཧྥི་ལེ་ཕིན། བྷ་རུ་ནའེ། མ་ལེ་ཞི་ཡ། ཐའེ་ཝན་སོགས་ལྷོ་ཤར་ཨེ་ཤ་ཡའི་རྒྱལ་ཁག་གིས་མཚོ་ཁུལ་དེའི་གླིང་ཕྲན་ཁག་ཅིག་ཁོ་རང་ཚོའི་མངའ་ཁོངས་ཡིན་པ་དང་། རྒྱ་ནག་གིས་མཚོ་ཁུལ་དེའི་གླིང་ཕྲན་ཁག་འཛུགས་སྐྲུན་དང་མཁའ་ལམ་གསར་རྒྱག་མི་ཆོག་པའི་འགོག་རྒོལ་བྱེད་བཞིན་ཡོད་འདུག
གསར་འགོད་པ། པདྨ་རྒྱལ།
