ཉེ་ལམ་ཧོང་ཀོང་གྲོང་ཁྱེར་ནང་རྟེན་གཞི་བྱས་པའི་དཔེ་སྐྲུན་ཁང་ཞིག་གི་སྦྱིན་བདག་དང་མི་ལས་ ༤ བོར་བརླག་ཕྱིན་པ་དེ་རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་པར་ཚོད་དཔག་བྱེད་ཀྱིན་ཡོད་འདུག
རོའུ་ཊར་གསར་ཁང་གིས་བསྒྲགས་པའི་གནས་ཚུལ་ལྟར་ན། ཁ་སང་དབྱིན་ཇིའི་གཞུང་གིས་ཧོང་ཀོང་གྲོང་ཁྱེར་གྱི་དཔེ་སྐྲུན་ཁང་ (Causeway Bay Books) གསར་དུ་འཛུགས་མཁན་རྒྱ་རིགས་ལའི་པོ་ (Lee Bo) ཟེར་བ་ཞིག་དང་དཔེ་སྐྲུན་ཁང་དེའི་ལས་མི་ ༤ གློ་བུར་གར་སོང་ཆ་མེད་དུ་གྱུར་བའི་གནས་ཚུལ་དེ་ནི་དོན་དམ་རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་ཡོད་པའི་དོགས་གཞིའི་ཐོག་ནས། ཧོང་ཀོང་གྲོང་ཁྱེར་ནང་སྨྲ་བརྗོད་རང་དབང་དང་གསར་འགོད་རང་དབང་། དཔེ་སྐྲུན་རང་དབང་སོགས་སྲུང་སྐྱོབ་དགོས་པའི་ཛ་དྲག་གི་འབོད་སྐུལ་ཞུས་ཡོད་པ་དང་། གློ་བུར་དུ་བོར་བརླག་ཏུ་ཕྱིན་པའི་རྒྱ་རིགས་དེ་ཚོའི་ནང་མི་ཚོས། ཁོ་ཚོས་རྒྱ་ནག་གཞུང་གིས་གཏན་འགོག་བྱས་པའི་རྙོག་འཛིང་ཅན་གྱི་ཆབ་སྲིད་དཔེ་དེབ་མང་པོ་པར་སྐྲུན་འགྲེམ་སྤེལ་བྱེད་བཞིན་ཡོད་སྟབས། ཁོ་ཚོ་རྒྱ་གཞུང་གིས་འཛིན་བཟུང་བཙན་ཁྲིད་བྱས་པར་ཡིད་ཆེས་བྱེད་ཀྱི་ཡོད་འདུག
དེ་ཡང་པེ་ཅན་གྲོང་ཁྱེར་ནང་རྟེན་གཞི་བྱས་པའི་དབྱིན་ཇིའི་གཞུང་ཚབ་ཁང་གི་མགྲིན་ཚབ་པས་རྒྱ་ནག་གི་དབང་འཛིན་པ་ཚོར། ཧོང་ཀོང་ཡུལ་མི་ཚོའི་བདེ་དོན་དང་། ལྷག་པར་དུ་ཧོང་ཀོང་གྲོང་ཁྱེར་གྱི་དཔེ་སྐྲུན་ཁང་དེའི་འགན་འཛིན་དང་ལས་མི་ ༤ གློ་བུར་གར་སོང་ཆ་མེད་དུ་གྱུར་བའི་གནས་སྟངས་ཐད་རྩད་ཞིབ་དགོས་པ་མ་ཟད། ཧོང་ཀོང་དམིགས་བསལ་སྲིད་འཛིན་ས་ཁུལ་ (Hong Kong SAR) སྲིད་གཞུང་གིས་ཁུལ་དེའི་གསར་འགོད་རང་དབང་དང་དཔེ་སྐྲུན་རང་དབང་ལ་འགན་སྲུང་དགོས་པ་དང་། རྒྱ་ནག་གི་དབང་འཛིན་པ་ཚོས་ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་གསར་འགོད་རང་དབང་དང་དཔེ་སྐྲུན་རང་དབང་ལ་མོས་མཐུན་དང་སྲུང་སྐྱོབ་ཡོང་བའི་རེ་སྐུལ་ཞུ་ཡི་ཡོད་སྐོར་བརྗོད་འདུག
ཟླ་འདིའི་ཕྱི་ཚེས་ ༥ ཉིན་དབྱིན་ཇིའི་ཕྱི་སྲིད་དྲུང་ཆེ་ཧྥེ་ལེབ་ཧམ་མོན་ཌ་ (Philip Hammond) ལགས་ཀྱིས་ཉིན་གཉིས་རིང་རྒྱ་ནག་ནང་རྒྱལ་དོན་གཟིགས་སྐོར་སྐབས་སུ། ང་ཚོས་ཧོང་ཀོང་གྲོང་ཁྱེར་དང་རྒྱ་ནག་གི་དབང་འཛིན་པ་ཚོར། དཔེ་སྐྲུན་ཁང་ (Causeway Bay Books) གི་ལས་མི་ ༥ བོར་བརླག་ཕྱིན་པར་རྩད་ཞིབ་དགོས་པའི་ཛ་དྲག་གི་འབོད་སྐུལ་ཞུ་ཡི་ཡོད་ལ། རྒྱ་ནག་གཞུང་གིས“རྒྱལ་ཁབ་གཅིག་ལ་ལམ་ལུགས་གཉིས”ཀྱི་སྲིད་བྱུས་འོག ཧོང་ཀོང་མི་མང་གིས་ཚད་མཐོའི་རང་སྲིད་རང་སྐྱོང་གི་ཐོག་ནས་ཧོང་ཀོང་གྲོང་ཁྱེར་ལ་འཛིན་སྐྱོང་བྱེད་པར་ང་ཚོས་དུས་ནམ་ཡང་བརྩི་མཐོང་བྱེད་ཀྱི་ཡོད། ཅེས་བརྗོད་འདུག
རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པ་ཧྭ་ཁྲིན་ཡེན་ (Hua Chunying) ཟེར་བ་ཞིག་གིས། འདི་ནི་རྒྱ་ནག་གི་ཧོང་ཀོང་གྲོང་ཁྱེར་ནང་ཁུལ་གྱི་གནད་དོན་ཞིག་ཡིན་སྟབས། ཕྱིའི་རྒྱལ་ཁབ་ལ་གནད་དོན་འདིར་ཐེ་གཏོགས་བྱེད་པའི་དབང་ཆ་མེད། ཧོང་ཀོང་གི་ཡུལ་མི་ཚང་མ་རྒྱ་ནག་གི་མངའ་ཁོངས་ནས་སྐྱེས་ཤིང་འཚོ་གཞེས་འཛིན་པའི་རྒྱ་རིགས་ཡིན། ཞེས་བཤད་འདུག
གནས་ཚུལ་ལྟར་ན། ཧོང་ཀོང་དཔེ་སྐྲུན་ཁང་ (Causeway Bay Books) ཞེས་པའི་འགན་འཛིན་ཡིན་སྐུ་ཞབས་ལའི་པོ་ཟེར་བ་དེ་ད་ལྟ་ལོ་ ༦༥ ཡིན་པ་དང་ཁོ་ལ་དབྱིན་ཇིའི་མི་སེར་ལག་འཁྱེར་ཡོད་འདུག དཔེ་སྐྲན་ཁང་དེ་ནི་ཕྱི་ལོ་ ༡༩༩༤ ལོར་ཁོས་གསར་འཛུགས་བྱས་པ་དང་། དཔེ་སྐྲུན་ཁང་དེས་རྒྱ་ནག་གཞུང་གིས་བཀག་སྡོམ་བྱས་ཡོད་པའི་རྙོག་འཛིང་ཅན་གྱི་ཆབ་སྲིད་དཔེ་དེབ་མང་པོ་དཔར་སྐྲུན་འགྲེལ་སྤེལ་བྱས་ཡོད་འདུག དཔེ་སྐྲུན་ཁང་དེའི་འགན་འཛིན་སྐུ་ཞབས་ལའི་པོ་ཟླ་སྔོན་པའི་ཕྱི་ཚེས་ ༣༠ ཉིན། ཁོ་ཧོང་ཀོང་གྲོང་ཁྱེར་གྱི་ཁྲའེ་ཝན་ (Chai Wan) སྲང་ལམ་ནས་གློ་བུར་དུ་བོར་བརླག་ཕྱིན་ཡོད་པ་དང་། དེ་དང་འབྲེལ་ནས་དཔེ་སྐྲུན་ཁང་དེའི་ལས་མི་ ༤ སྔ་རྗེས་སུ་གར་སོང་ཆ་མེད་དུ་གྱུར་ཡོད་སྟབས། ལའི་པོ་ཡི་བདག་མོ་སོ་ཧྥེ་ཡ་ཁྲའོ་ (Sophie Choi) ཟེར་བ་གཙོས་པའི་བོར་བརླག་ཕྱིན་པའི་རྒྱ་རིགས་དེ་ཚོའི་ནང་མི་ཚོས་ཁོ་ཚོ་རྒྱ་གཞུང་གིས་འཛིན་བཟུང་བཙན་ཁྲིད་བྱས་པར་ཚོད་དཔག་བྱེད་ཀྱིན་ཡོད་འདུག
གསར་འགོད་པ། པདྨ་རྒྱལ།
