ཐོག་མའི་མི་ཚང་གཉིས་ཀྱི་བོད་དོན་ཞུ་གཏུག་ལས་འགུལ་དེ་ད་ཆར་མི་ཚང་དྲུག་གི་ལས་འགུལ་ཆགས་ཏེ་ཁ་སང་ལས་འགུལ་ཐེངས་ ༤༩ པ་དེ་སྤེལ་ཡོད་ཅིང་། མི་འགྱངས་བར་ཐེངས་ ༥༠ པ་དེ་སྤེལ་འཆར་ཡོད་པའི་སྟེང་མི་མང་མཉམ་ཞུགས་ཡོང་བའི་འབོད་སྐུལ་ཞུས་འདུག
འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཉིན་འདི་འགར་ཡུ་རོབ་ཁྱོན་ཡོངས་སུ་གནམ་གཤིས་ཧ་ཅང་གྲང་ན་ཡང་ཁ་སང་ཚེས་ ༡༣ ཉིན། སུད་སི་ཇི་ནེ་ཝ་རྒྱལ་ཚོགས་ལས་ཁུངས་མདུན་དུ། སུད་སིར་གནས་སྡོད་ལྷུན་འགྲུབ་ཚང་ཀརྨ་བཀྲ་ཤིས་ཚེ་རིང་དང་། སྟག་ཚང་དཀོན་ཅོག་ཁྱིམ་ཚང་། བཀྲ་བསྟན་ཚང་པ་སངས་ལགས། ངག་དབང་ཚང་ངག་དབང་དཔལ་ལྡན། རྒྱལ་བསྟན་ཚང་བཀྲ་ཤིས་ལྷ་མོ། ལིང་བཀྲ་ཤིས་ཟླ་བ་ལགས། ཨོ་སི་ཊི་རེ་ཡར་གནས་སྡོད་ཡེ་ཤེས་ལྷ་མོ་བཅས་ལས་བོད་དོན་ཞུ་གཏུག་གི་ལས་འགུལ་དེ་སྤེལ་ཡོད་འདུག
ལས་འགུལ་ཐེངས་རྗེས་མ་ནི་ཞུ་གཏུག་གི་ལས་འགུལ་ཐེངས་ ༥༠ དེ་ཆགས་ཀྱི་ཡོད་སྟབས། སྐབས་དེར་ལས་འགུལ་དམིགས་བསལ་ཞིག་སྤེལ་རྒྱུར་འབད་བརྩོན་ཞུ་བཞིན་ཡོད་པ་དང་། སྐབས་དེའི་ལས་འགུལ་ནང་མི་མང་གང་མང་མཉམ་ཞུགས་གནང་ཡོང་བའི་འབོད་སྐུལ་ཞུས་འདུག་ལ། ཁོང་ཅག་གི་འཆར་གཞི་ལྟར་ན་ ༢༠༡༦ ལོར་ཟླ་བ་རེ་རེ་བཞིན་ལས་འགུལ་སྤེལ་འཆར་ཡོད་པ་དང་། ཐེངས་འདིའི་ལས་འགུལ་ནང་སུད་སི་དང་ལིཀ་ཏེན་སིཊཡན་བོད་རིགས་མི་མང་གི་པར་པ་འགྲོན་ཐར་བཀྲ་ཤིས་རྣམ་རྒྱལ་ལགས་ཀྱིས་ལས་འགུལ་ལ་རྒྱབ་སྐྱོར་དང་། བོད་དོན་ཁྱབ་བསྒྲགས་དང་གསར་འགོད་ལས་དོན་དྭང་བླངས་གནང་ཡོད་འདུག
ཐེངས་འདིར་ཁོང་ཅག་གིས་སུད་སི་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ལས་ཁུངས་མདུན་དུ། བོད་ཕྱི་ནང་གཉིས་སུ་སྐུ་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམ་པའི་སྐུ་པར་བཤམ་པའི་མཐའ་རུ་བོད་ཀྱི་རྒྱལ་དར་སྒྲེང་ཞིང་། ཁོང་རྣམས་ཀྱིས་སྐུ་ལུས་མེར་བསྲེགས་གནང་དགོས་པའི་རྒྱབ་ལྗོངས་ངོ་སྤྲོད་དང་། ཁོང་ཅག་གི་འབོད་སྒྲའམ་དགོས་འདུན་འཁོད་པའི་ཡིག་ཆ་ཁག་འགྲེམས་སྤེལ་གནང་ཡོད་འདུག དེ་བཞིན། སྐུ་ལུས་མེར་བསྲེགས་གནང་བའི་ཐད་༧གོང་ས་མཆོག་དང་བོད་མིའི་སྒྲིག་འཛུགས་ཀྱི་ལངས་ཕྱོགས་དང་དགོངས་ཚུལ་ག་རེ་ཡིན་པའི་ཡིག་ཆ་དང་། ༢༠༡༥ ལོའི་བོད་ནང་གི་འགྲོ་བ་མིའི་ཐོབ་ཐང་སྐོར་གྱི་ཡིག་ཆ། ༧གོང་ས་མཆོག་གིས་དམིགས་བསལ་རྒྱ་རིགས་ཚོར་བསྩལ་བའི་བཀའ་སློབ་ཡིག་ཆ་དང་གསར་འགོད་གསལ་བསྒྲགས་སོགས་རྒྱ་ཡིག་དང་དབྱིན་ཡིག ཧྥ་རན་སིའི་སྐད་བཅས་ཀྱི་ནང་ཕྱི་རྒྱལ་མི་རིགས་དང་རྒྱལ་ཚོགས་ཀྱི་ལས་བྱེད། རྒྱ་རིགས་ཡུལ་སྐོར་བ་སོགས་ལ་འགྲེམ་སྤེལ་ཡོད་འདུག
བོད་དོན་ཞུ་གཏུག་གི་ལས་འགུལ་འདི་ཐོག་མར་ཕྱི་ལོ་ ༢༠༡༢ ཟླ་ ༡༢ ཚེས་ ༡༠ ཉིན་ཁྱིམ་ཚང་གཉིས་ཀྱིས་མགོ་འཛུགས་གནང་ཞིང་། རིམ་བཞིན་བཀྲ་བསྟན་ཚང་པ་སངས་ལགས་དང་། ངག་དབང་ཚང་ངག་དབང་དཔལ་ལྡན། རྒྱལ་བསྟན་ཚང་བཀྲ་ཤིས་ལྷ་མོ། ཨོ་སི་ཊི་རེ་ཡར་གནས་སྡོད་ཡེ་ཤེས་ལྷ་མོ་བཅས་མཉམ་ཞུགས་ཀྱིས་ཁྱིམ་ཚང་ལྔ་ཡི་ལས་འགུལ་ཆགས་ཤིང་། ཐེངས་འདིར་སུད་སིར་གནས་བཞུགས་མི་ལིང་བཀྲ་ཤིས་ཟླ་བ་ལགས་མཉམ་ཞུགས་ཀྱིས་ད་ལྟ་ཁྱིམ་ཚང་དྲུག་གི་ལས་འགུལ་དུ་གྱུར་ཡོད་འདུག
གཤམ་དུ་ ༢༠༡༦ ལོའི་བོད་དོན་ཞུ་གཏུག་ལས་འགུལ་གྱི་རེའུ་མིག་བཀོད་ཡོད།
གནས་ཚུལ་གཏོང་མཁན་ཙ་ཡུས་ཕུན་ཚོགས།
ལས་འགུལ་བའི་ཁྱིམ་མིང་དང་མིང་། ཞལ་པར་ཨང་།
༡ ངག་དབང་ཚང་ངག་དབང་དཔལ་ལྡན། ༠༧༦༣༣༠༣༩༧༣
༢ བཀྲ་བསྟན་ཚང་པ་སངས། ༠༧༦༦༢༠༡༠༥༡
༣ རྒྱལ་ཚང་བཀྲ་ཤིས་ལྷ་མོ། ༠༧༦༨༠༤༨༨༧༡
༤ སྟག་ཚང་དཀོན་ཅོག ༠༧༦༤༧༧༤༡༦༢
༥ ཡེ་ཤེས་ལྷ་མོ། ༠༤༡༠༢༢༣༥༥༨
༦ མི་ལིང་བཀྲིས་ཟླ་བ། ༠༧༦༥༨༨༢༨༥༩