ཨ་རིའི་གསར་དེབ་ཁང་ (Wall Street Journal) གི་དཔྱད་བརྗོད། པདྨ་རྒྱལ་གྱིས་བོད་སྒྱུར་བྱས།
_____པེ་ཅིན་གཞུང་གིས། ཁྱོད་རང་ཡུལ་ལུང་གང་དུ་བྱོལ་ཡང་ང་ཚོའི་གསང་བའི་མི་སྣས་ཁྱོད་ཧོབ་འཕྲོག་རྒྱག་ངེས་ཡིན། ཞེས་པའི་སྡིགས་མོའི་བརྡ་འཕྲིན་སྤྲིངས་པ།
རྒྱ་ནག་དམར་ཤོག་ཚོགས་པའི་ཁ་གཏད་དུ་ལང་མཁན་རྒྱ་རིགས་གསར་འགོད་པ་ལེ་ཞེན་ (Li Xin) ལགས་ཕྱི་ ༡ ཚེས་ ༡༡ ཉིན་ཐའེ་ལན་ཌི་ནས་བློ་བུར་གར་སོང་ཆ་མེད་དུ་གྱུར་ཅིང་། རེས་གཟའ་ལྷག་པའི་ཉིན་ཁོས་རང་གི་བཟའ་ཟླར་འཕྲིན་ཡིག་ཅིག་བྲིས་པའི་ནང་། ངས་རྒྱ་ནག་གི་ཞིབ་བཤེར་དང་དུ་བླངས་ནས་ཕྱིར་རྒྱ་ནང་ལ་འབྱོར་ཡོད་ཅེས་འཁོད་འདུག སྐུ་ཞབས་ལེ་ཞེན་གྱི་བཟའ་ཟླ་ཧི་ཧྥན་མའེ་ (He Fangmei)ལགས་རྒྱ་ནག་གི་གཡོ་འོག་ཏུ་མ་ཚུད་པར་ཁོ་མོས་ཨ་རིའི་གསར་དེབ་ཁང་ (Wall Street Journal) ལ། ངས་ཁོ་ཚོའི་སྐད་ཆ་དེ་ཧ་གོ་སོང་། རྒྱ་ནག་གཞུང་གིས་ལེ་ཞེན་རང་གི་སྨོན་འདུན་ལ་རྒྱབ་འགལ་གྱི་སྐད་ཆ་དེ་བཙན་གྱིས་ཤོད་དུ་བཅུག་པ་རེད། ཅེས་བརྗོད།
ལྕམ་ཧི་ཧྥན་མའེ་ཡི་སྐད་ཆ་དེ་ཡིད་རྟོན་ཆོག་པ་ཞིག་སྟེ། ཉེ་བའི་ཟླ་བ་འདི་དག་རིང་རྒྱ་ནག་དམར་ཤོག་ཚོགས་པའི་ཁ་གཏད་དུ་ལང་མཁན་ཚོ་སྔ་རྗེས་སུ་ཐའེ་ལན་ཌི་དང་ཧོང་ཀོང་གྲོང་ཁྱེར་གཉིས་ནས་གློ་བུར་གར་སོང་ཆ་མེད་དུ་གྱུར་ཅིང་། ཕྱིས་སུ་གོ་ཐོས་ལྟར་ན། ཁོ་ཚོ་རང་གི་རེ་འདུན་ལྟར་ཕྱིར་རྒྱ་ནག་ནང་ལོག་པ་དང་། འཛམ་གླིང་མི་མང་གིས་དེ་ལ་བྱུས་གཏོགས་གང་ཡང་བྱས་མེད་ཅིང་། ཁོ་ཚོའི་ནང་མི་དང་ཉེ་གྲོགས་ཚོས་བཤད་ན། ཁོ་ཚོས་རང་གི་ནང་མི་དང་ཉེ་གྲོགས་ཚོར་བཏང་བའི་ཡིག་ཐོག་གི་སྐད་ཆ་དེ་དག་རྒྱ་ནག་གཞུང་གི་བཙན་སྐུལ་འོག་ཤོད་བཅུག་པ་ཞིག་ཡིན་རབས་འདུག
རྒྱ་ནག་ནང་གཏན་འགོག་བྱེད་བཞིན་པའི་དཔེ་ཚོང་གཉེར་མཁན་སི་ཝི་ཌན་ (Sweden) གྱི་མི་སེར་གུ་མེན་ཧྭེ་ (Gui Minhai) ཕྱི་ཟླ་ ༡༠ ཚེས་ ༡༧ ཉིན་གློ་བུར་གར་སོང་ཆ་མེད་དུ་གྱུར་ཅིང་། ཐའེ་ལན་གྱི་དཔོན་རིགས་ཚོས་ཁོ་ག་དུས་ཞིག་ལ་ཐའེ་ལན་ཌི་ནས་ཕྱིར་རྒྱ་ནག་ནང་ལོག་པའི་གནས་ཚུལ་མ་ཤེས་ཚུལ་བཤད་འདུག ཕྱི་ཟླ་ ༡ ཚེས་ ༡༧ ཉིན་རྒྱ་ནག་གཞུང་འབྲེལ་བརྙན་འཕྲིན་སྟེང་སྐུ་ཞབས་གུ་མེན་ཧྭེ་ཡིས་སྔར་བྱས་ལ་གནོང་འགྱོད་སྐོར་གྱི་གནས་ཚུལ་ཞིག་བསྒྲགས་པའི་ནང་། གུ་མེན་ཧྭེ་རང་འགུལ་གྱིས་ཕྱིར་རང་རྒྱལ་དུ་ལོག་ནས་ཕྱི་ལོ་ ༢༠༠༣ ལོར་ཆང་རག་འཐུང་སྟེ་རླངས་འཁོར་བསྐོར་བའི་ཉེས་ཆད་དང་ལེན་བྱས་ཡོད་ལུགས་བཤད་ཡོད་པ་མ་ཟད། ཕྱི་ཟླ་ ༡༠ བའི་ནང་གུ་མེན་ཧྭེ་ཡི་ལས་རོགས་རྒྱ་རིགས་གཞན་གསུམ་རྒྱ་ནག་ལ་ནང་མིར་ཐུག་འཕྲད་དུ་ཕྱིན་པའི་སྐབས་སུ་གློ་བུར་བོར་བརླག་བྱུང་ཡོད་པ་རེད།
དེ་མིན་གུ་མེན་ཧྭེའི་ལས་རོགས་གཞན་ཞིག་སྟེ་མིང་ལ་ལི་པོ་ (Lee Bo) ཟེར་བས་གསར་འགོད་པར། ཁོ་ཡུན་རིང་ལ་ཧོང་ཀོང་གྲོང་ཁྱེར་ནང་སྡོད་རྒྱུར་སྐྲག་གི་མེད་སྐོར་བརྗོད་ཅིང་། ཕྱི་ཟླ་ ༡༢ བའི་ཚེས་ ༣༠ ཉིན་ཁོ་ཧོང་ཀོང་གྲོང་ཁྱེར་གྱི་ཚོང་ཁང་ཆེན་པོ་ཞིག་ནས་གློ་བུར་གར་སོང་ཆ་མེད་དུ་གྱུར་ཅིང་། ཧོང་ཀོང་ས་གནས་སྲིད་གཞུང་གིས་ཁོ་ཕྱིར་རྒྱ་ནག་ནང་ལོག་ཡོད་མེད་ལ་གསལ་ཁ་མེད་ཚུལ་བཤད་འདུག སྐུ་ཞབས་ལི་པོ་ཡིས་ཧྲིན་ཀྲིན་ (Shenzhen) གྲོང་ཁྱེར་དུ་སྡོད་པའི་ཁོའི་བཟའ་ཟླར་ཁ་པར་བཏང་སྟེ། ཁོས་ས་གནས་ཞིབ་བཤེར་ཉེན་རྟོག་པར་རོགས་བྱེད་ཀྱི་ཡོད་སྐོར་བརྗོད་ཅིང་། ཁོས་སྔ་གཞུག་ཐེངས་གཉིས་ལ་འཕྲིན་ཡིག་བཏང་བའི་ནང་། ཁོས་ཞིབ་བཤེར་ཉེན་རྟོག་པར་རོགས་བྱེད་འདོད་མེད་སྐོར་འཁོད་ཡོད་པ་དང་། སྐུ་ཞབས་ལི་པོ་ནི་དབྱིན་ཇིའི་མི་སེར་ཞིག་ཡིན་ནའང་། ཁོ་དང་གུ་མེན་ཧྭེ་གཉིས་རྒྱལ་ཁབ་སོ་སོའི་དོན་གཅོད་ཁང་གི་དཔོན་རིགས་ཚོར་ཐུག་འཕྲད་བྱེད་བཅུག་མེད།
རེ་གཟའ་ཟླ་བའི་ཉིན་ཨ་རིའི་རྒྱལ་སྲུང་ལྷན་ཁང་གི་མགྲིན་ཚབ་ལས་རོགས་གཞོན་པ་ཇོན་ཁེར་བྷེ་ (John Kirby) ཡིས། ད་ལྟའི་བར་ཧོང་ཀོང་གྲོང་ཁྱེར་ནང་དཔེ་ཚོང་གཉེར་མཁན་རྒྱ་རིགས་ ༥ གློ་བུར་གར་སོང་ཆ་མེད་དུ་གྱུར་ཡོད་སྟབས། ཧོང་ཀོང་གྲོང་ཁྱེར་གྱི་རང་སྐྱོང་བདག་དབང་ལ་འཇིག་ཉེན་ཐེབས་སྲིད་པར་སེམས་འཚབ་ཡོད་པའི་སྐོར་ལ་ཁོང་གིས། ང་ཚོས་རྒྱ་ནག་གཞུང་གིས་སྔ་རྗེས་སུ་དཔེ་ཚོང་གཉེར་མཁན་རྒྱ་རིགས་ ༥ གར་སོང་ཆ་མེད་དུ་གྱུར་བའི་གནས་ཚུལ་དང་། ད་ལྟའི་གནས་སྟངས་ལ་གསལ་བཤད། ཁོ་ཚོ་ཕྱིར་སོ་སོའི་ཡུལ་ལ་ལོག་འཇུག་དགོས་པའི་ཛ་དྲག་གི་འབོད་སྐུལ་ཞུ་རྒྱུ་ཡིན། ཞེས་བརྗོད་འདུག
རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལུ་ཀང་ (Lu Kang) ཟེར་བས། ཁོང་ཁྲོའི་ངང་ནས་ཧོང་ཀོང་གྲོང་ཁྱེར་རྒྱ་ནག་གི་ཆ་ཤས་ཡིན་སྟབས། ཕྱིའི་རྒྱལ་ཁབ་ཁག་ལ་ཇུས་གཏོགས་བྱེད་པའི་དབང་ཆ་མེད། ཅེས་བརྡ་ལན་ཞིག་སྤྲད་ཡོད་པ་དང་། ཁོས་དཔེ་ཚོང་གཉེར་མཁན་དེ་ཚོ་གློ་བུར་གར་སོང་ཆ་མེད་དུ་གྱུར་བའི་རྒྱབ་ལོགས་ན་རྒྱ་ནག་གི་དཔོན་རིགས་ཚོ་ཡོད་པ་ངོས་ལེན་བྱས་ཡོད་ཀྱང་། ཁོས་ད་དུང་རྒྱ་ནག་གི་དཔོན་རིགས་ཚོས་ཕྱིའི་རྒྱལ་ཁབ་ཀྱི་རྩ་ཁྲིམས་ལ་གཏོར་བརླག་བྱེད་ཀྱི་མེད་པའི་སྐོར་ལ། གལ་ཏེ་ང་ཚོར་ཕྱིའི་རྒྱལ་ཁབ་ཀྱི་སྲིད་གཞུང་ཁག་དང་ལྷན་དུ་མཉམ་ལས་ལག་བསྟར་བཅའ་ཁྲིམས་ཤིག་དགོས་ཀྱི་ཡོད་ན། བཅའ་ཁྲིམས་དེ་གཞིར་བཟུང་གིས་ཕན་ཚུན་བར་མོས་མཐུན་གྱི་གྲོས་ཆོད་བཞག་ཆོག ཅེས་བརྗོད་ཡོད་པ་རེད།
གཅིག་བྱས་ན་ཐའེ་ལན་སྲིད་གཞུང་གིས་ལེ་ཞེན་དང་གུ་མེན་ཧྭ་གཉིས་བཙན་ཁྲིད་བྱེད་བཅུག་ཡོད་སྲིད་དེ། བྷན་ཁོ་ཁི་སྲིད་གཞུང་གིས་དེ་སྔོན་ནས་པེ་ཅིན་གཞུང་གི་བཀོད་འདོམས་ལ་ཉན་ཏེ་གནད་དོན་འདིའི་ཐད་མི་སྨྲ་བའི་རྟུལ་ཞུགས་བཟུང་ཡོད་པ་རེད། ཕྱི་ཟླ་ ༡༡ པའི་ནང་ཐའེ་ལན་གཞུང་གིས་རྒྱ་ནག་གིས་འཚོལ་བཞིན་པའི་རྒྱ་རིགས་ཏུང་ཀུང་ཕེན་ (Dong Guangping) དང་ཅིང་ཡེ་ཧྥི་ (Jiang Yefei) གཉིས་རྩིས་སྤྲོད་བྱས་ཡོད་ནའང་། ཨ་རིའི་གཞུང་གིས་ཁོ་གཉིས་རྒྱལ་ཁབ་གཞན་ནང་གནས་སྡོད་བྱེད་བཅུག་ཡོད་པ་རེད། དེར་མ་ཟད་ཕྱི་ཟླ་ ༧ པའི་ནང་བྷན་ཁོ་ཁི་སྲིད་གཞུང་གིས་ཡུ་གུར་སྐྱབས་བཅོལ་བ་མི་ ༡༠༩ བཙན་གྱིས་ཕྱིར་རྒྱ་ནག་ནུབ་རྒྱུད་ཀྱི་ཡུ་གུར་མི་རིགས་རང་སྐྱོང་ཟེར་བའི་ནང་ཕྱིར་འཕུད་བཏང་བ་རེད།
རྒྱ་ནག་སྐམ་ས་ཆེན་མོའི་བདེ་འཇགས་དཔོན་རིགས་ཚོས་དུས་ཡུན་རིང་བོར་ས་གནས་སྲིད་གཞུང་གི་ཆོག་མཆན་མ་ཞུས་པར་གང་འདོད་དུ་ཧོང་ཀོང་གྲོང་ཁྱེར་ནང་རྟོག་ཞིབ་བྱས་ཡོད་པ་དང་། སྐུ་ཞབས་ལི་པོ་གནད་དོན་དེ་འདྲ་ཞིག་གི་ཐོག་ནས་བཙན་ཁྲིད་བྱས་ཡོད་པ་མ་ཟད། རྒྱ་ནག་གི་ཉེན་རྟོག་པ་ཚོས་ད་དུང་མཱ་ཁུ་ (Macau) གྲོང་ཁྱེར་གྱི་མི་མང་འཛིན་བཟུང་བྱས་ཡོད་པ་རེད། ཧོང་ཀོང་སྲིད་འཛིན་ས་ཁུལ་གྱི་གཙོ་འཛིན་ལུང་ཀྲུན་ཡེན་ (Leung Chun-ying) གྱིས་ཉེན་རྟོག་ལྷན་ཁང་ལ་རྩོད་པ་རྒྱག་གི་ཡོད་སྟབས། ཧོང་ཀོང་གྲོང་ཁྱེར་གྱི་དཔོན་རིགས་འགའ་རེས་རྒྱ་ནག་གི་སྡིགས་མོ་དང་ལྟ་རྟོག་ལ་བསྟུན་ཏེ་རྒྱ་ནག་སྐམ་ས་ཆེན་མོའི་དཔོན་རིགས་ཚོ་དང་ལྷན་དུ་མཉམ་ལས་བྱེད་བཞིན་ཡོད་པ་དེར་ཧ་ལས་དགོས་པ་གང་ཡང་མི་འདུག
པེ་ཅིན་གཞུང་གིས་ཉེས་ཅན་ཕྱིར་སྤྲོད་ཀྱི་བཅའ་ཁྲིམས་སྣང་མེད་ལ་བཏང་སྟེ། རྒྱལ་སྤྱིའི་སྟེང་རང་གི་ཆེ་མཐོང་ལ་གོད་ཆག་བཟོ་འདོད་ཡོད་པ་འདྲ། རྒྱ་ནག་ནས་བཏང་བའི་བརྡ་ཁྱབ་དེའི་ནང་། གལ་ཏེ་ཁྱོད་རང་དམར་ཤོག་ཚོགས་པའི་ཁ་གཏད་དུ་ལངས་ན། འཛམ་གླིང་སྒང་འདིར་ཁྱེད་རང་སྐུང་གནས་ཤིག་ནམ་ཡང་མེད་པ་གསལ་བོར་བསྟན་འདུག
མ་རྩོམ་འབྲེལ་ཐག http://www.wsj.com/articles/chinas-overseas-abductions-1454633130
