རྒྱ་ནག་གཞུང་གིས་རྒྱ་རིགས་ངལ་རྩོལ་བ་ ༥༣༠ ལ་གླ་དངུལ་རྒྱ་སྒོར་ཐེར་འབུམ་གཉིས་དང་ལྔ་བར་མ་སྤྲད་པའི་ངོ་རྒོལ་ལས་འགུལ་སྤེལ་བཞིན་ཡོད་འདུག
དེ་རིང་ཉིན་རྒྱབ་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ད་ལོའི་ལོ་སར་གྱི་གུང་སེང་དང་སྟབས་བསྟུན་ས་ཁུལ་སོ་སོའི་རྒྱ་རིགས་ངལ་རྩོལ་བ་མང་བོ་ཕྱིར་རྒྱ་ཡུལ་ལ་ལོག་བཞིན་པའི་སྐབས་འདིར་རྒྱ་རིགས་ངལ་རྩོལ་བ་ ༢༠ ལྷག་ཕྱིར་མ་ལོག་པར། ཁོ་ཚོས་ངོ་རྒོལ་འཕྲེད་དར་འཕྱེར་ནས་རྒྱ་ནག་དབུལ་སྐྱོབ་འཕེལ་རྒྱས་ལས་ཁུངས་ཟེར་བར་ཕྱིན་ཏེ། ཁོ་ཚོར་ལོ་གཅིག་གི་གླ་དངུལ་སྤྲད་མེད་སྟབས། ཁོ་ཚོ་ལག་སྟོང་ལ་ཕྱིར་རྒྱ་ཡུལ་ལ་ལོག་ཐབས་མི་འདུག་ཅེས་ངོ་རྒོལ་བྱས་ཡོད་འདུག
ཐེངས་འདིའི་ངོ་རྒོལ་ལས་འགུལ་གྱི་སྣེ་འཁྲིད་མཁན་རྒྱ་རིགས་ཧྥན་ཧྥི་ (Fan Fu) ཟེར་བ་ཞིག་གིས་རོའུ་གསར་འགོད་པར། རྒྱ་ནག་དབུལ་སྐྱོབ་འཕེལ་རྒྱས་ལས་ཁུངས་ལ་དོན་དངོས་སུ་དངུལ་ལོ་མེད་ཀྱང་ཡོད་ཁུལ་བྱེད་ཀྱི་འདུག ད་སྐབས་ཁོ་ཚོར་གླ་དངུལ་སྐར་གང་ཡང་སྤྲོད་རྒྱུ་མི་འདུག ད་ལྟ་ང་ཚོར་བྱ་ཐབས་མི་འདུག ཅེས་བརྗོད་ཡོད་འདུག
གནས་ཚུལ་ལྟར་ན། ཧྥན་ཧྥི་ཚུད་པའི་རྒྱ་རིགས་ངལ་རྩོལ་བ་ ༥༣༠ ལྷག་ལ་ད་ལོའི་སྡོད་ཁང་འཛུགས་སྐྲུན་གྱི་གླ་དངུལ་རྒྱ་སྒོར་ཐེར་འབུམ་ ༢ ནས་ ༥ བར་སྤྲད་མེད་པ་དང་། སྡོད་ཁང་འཛུགས་སྐྲུན་ཚོང་གཉེར་ཁང་དེས་ངལ་རྩོལ་བ་ཚོར། གལ་ཏེ་ཁོ་ཚོས་ངོ་རྒོལ་ལས་འགུལ་མཚམས་བཞག་སྟེ་ཕྱིར་རྒྱ་ཡུལ་ལ་ལོག་ཚེ། མི་འགྱང་བར་སྲིད་གཞུང་གིས་ཁོ་ཚོར་རྒྱ་སྒོར་ཐེར་འབུམ་ ༢ སྤྲོད་རྒྱུ་ཡིན་ལུགས་བཤད་ཡོད་པ་དང་། ཧོང་ཀོང་གྲོང་ཁྱེར་ནང་རྟེན་གཞི་བྱེད་པའི་རྒྱ་ནག་ངལ་རྩོལ་གསར་འཕྲིན་ཁང་ (China Labor Bulletin) གིས་བཏོན་པའི་གནས་ཚུལ་ནང་། ཕྱི་ལོ་ ༢༠༡༥ ལོར་རྒྱ་ནག་ནང་ངལ་རྩོམ་བ་ཚོར་གླ་དངུལ་སྤྲོད་མ་ཐུབ་པའི་གནད་དོན་ཚབས་ཆེ་ཞིང་། ཕྱི་ཟླ་ ༡༢ དང་ ༡ པོའི་ནང་རྒྱ་ནག་ནང་གླ་དངུལ་མ་སྤྲད་པའི་ངལ་རྩོལ་བ་ ༧༧༤ ཡོད་པའི་གྲས་ཀྱི་ངལ་རྩོལ་བ་ ༥༢༩ ལ་འདས་པའི་ཟླ་གཉིས་རིང་གི་གླ་དངུལ་སྤྲད་མེད་པ་ཕུད། གཞན་ངལ་རྩོལ་བ་མང་ཆེ་བར་ལས་ཀ་ལས་ནས་ད་ལྟའི་བར་གྱི་གླ་དངུལ་སྤྲད་མེད་འདུག
འདས་པའི་ལོ་ངོ་ ༢༥ རིང་རྒྱ་ནག་གི་དཔལ་འབྱོར་འཕེལ་རྒྱས་ཀྱི་འགྲོས་ཤིན་ཏུ་དལ་བ་བརྟེན། རྒྱ་ནག་ནང་ངལ་རྩོལ་བའི་དཀའ་སྡུག་དང་ངལ་རྩོལ་བའི་ངོ་རྒོལ་ལས་འགུལ་ཤུགས་ཆེ་རུ་འགྲོ་བཞིན་ཡོད་སྟབས། པེ་ཅིན་གཞུང་གིས་སྡོད་ཁང་འཛུགས་སྐྲུན་མ་དངུལ་ཐད་སྟངས་འཛིན་དང་སྤྱི་མང་གི་ངོ་རྒོལ་ལས་འགུལ་ལ་གཡོལ་ཐབས་བྱེད་ཀྱི་ཡོད་འདུག
གསར་འགོད་པ། པདྨ་རྒྱལ།
