རྒྱ་དཀར་ནག་གཉིས་ཀྱི་མཐའ་སྲུང་དམག་དཔུང་མཉམ་འབྲེལ་དམག་སྦྱོང་དེ་ཕྱོགས་གཉིས་ཀྱི་འབྲེལ་ལམ་ཡར་རྒྱས་དང་དུས་ཡུན་རིང་བོའི་མཐའ་མཚམས་རྩོད་གླེང་གི་རྙོག་འཛིང་འགྲིག་ཡོང་ཐབས་ཡིན་ཟེར།
དེ་རིང་ཧིན་རྡུ་ (Hindu) གསར་ཁང་གིས་གནས་ཚུལ་སྤེལ་དོན་ལྟར་ན། ཁ་སང་རྒྱ་དཀར་ནག་གཉིས་ཀྱི་མཐའ་སྲུང་དམག་དཔུང་མཉམ་འབྲེལ་དམག་སྦྱོང་ཞིག་ཚོགས་ཡོད་པ་དང་། དམག་སྦྱོང་དེའི་དམིགས་འབེན་གཙོ་བོ་རྒྱ་དཀར་ནག་གི་མཐའ་སྲུང་དམག་དཔུང་མཉམ་འབྲེལ་གྲོས་ཆོད་ལག་བསྟར་དང་། མཐའ་ཁུལ་ཁག་བརྟན་ལྷིང་ཡོང་ཐབས་ཤིག་ཡིན་འདུག
ཁ་སང་རེས་གཟའ་ཟླ་བའི་ཉིན་རྒྱ་ནག་རྒྱལ་སྲུང་ལྷན་ཁང་གི་དྲ་ཚིགས་སྟེང་བསྒྲགས་གཏམ་ཞིག་སྤེལ་བའི་ནང་། ཐེངས་འདིའི་རྒྱ་དཀར་ནག་མཐའ་སྲུང་དམག་དཔུང་མཉམ་འབྲེལ་དམག་སྦྱོང་དེ་ཕྱོགས་གཉིས་ཀྱི་འབྲེལ་ལམ་ཡར་རྒྱས་དང་། དུས་ཡུན་རིང་བོའི་མཐའ་མཚམས་རྩོད་གླེང་གི་རྙོག་འཛིང་ཞི་འགྲིག་ཡོང་ཐབས་ཡིན་སྐོར་དང་། ན་ནིང་ཕྱི་ཟླ་ ༥ ནང་རྒྱ་གར་གྱི་སྲིད་བློན་མཱོ་ཌེ་དང་རྒྱ་ནག་གི་སྲིད་བློན་ལེ་ཁི་ཆང་གཉིས་ཐུག་འཕྲད་བརྒྱུད། ཕྱོགས་གཉིས་ཀྱི་དམག་ཁུལ་ཁག་ཏུ་སྐོར་སྐྱོད་དང་། མཐའ་སྲུང་དམག་དཔུང་རྒྱ་སྐྱེད་ཐད་ལ་བསམ་ཚུལ་བརྗེ་རེས་བྱས་ཡོད་སྐོར་འཁོད་འདུག
གནས་ཚུལ་ལྟར་ན། ཕྱི་ལོ་ ༡༩༦༢ ལོར་རྒྱ་དཀར་ནག་གཉིས་བར་མཐའ་ཁུལ་རྩོད་གླེང་གི་ཟིང་འཁྲུག་ལངས་པ་ནས་བཟུང་། ད་ལྟའི་བར་ཕྱོགས་གཉིས་ཀྱི་མཐའ་ཁུལ་རྩོད་གླེང་གི་གནད་དོན་འདུམ་ཐུབ་མེད་ལ། རྒྱ་ནག་གིས་ཧི་མ་ལ་ཡའི་ཤར་ཁུལ་ནས་སྤྱི་ལེ་གྲུ་བཞི་མ་ཁྲི་ ༩ ལྷག་རྒྱ་ནག་གི་མངའ་ཁོངས་སུ་གླེང་གི་ཡོད་ཅིང་། ཁུལ་དེའི་སྤྱི་ལེ་གྲུ་བཞི་མ་ཁྲི་ ༣༥ ད་ཆར་རྒྱ་གར་གྱི་བདག་དབང་འོག་ཡོད་པ་དང་། རྒྱ་གར་གཞུང་གིས་རྒྱ་གར་ནུབ་རྒྱུད་ཀྱི་ཨ་ཁི་སཱེ་ཆེན་ (Aksai Chin) མངའ་ཁུལ་དུ་སྤྱི་ལེ་གྲུ་བཞི་མ་ཁྲི་ ༣༨ རྒྱ་ནག་གིས་བཙན་བཟུང་བྱས་ཡོད་པ་མ་ཟད། རྒྱ་གར་དང་པ་ཀི་སི་ཐན་རྒྱལ་ཁབ་གཉིས་ཀྱི་མངའ་ཁོངས་རྩོད་གླེང་ (Jammu and Kashmir) ཐད་ནས་རྒྱ་ནག་གཞུང་གིས་པ་ཀི་སི་ཐན་ལ་རྒྱབ་སྐྱོར་བྱེད་ཀྱི་ཡོད་པར་དོགས་གཞི་བྱེད་བཞིན་ཡོད་འདུག
གསར་འགོད་པ། པདྨ་རྒྱལ།
