ཡུལ་ཤུལ་ཡོང་ཤུལ་དགོན་པར་དེ་སྔ་སློབ་གཉེར་བ་སྐྱ་སེར་ ༢༠༠ ལྷག་ཡོད་ཀྱང་སྲིད་གཞུང་གིས་སྒྲིག་ཁྲིམས་འདྲ་མིན་བཟོས་ཤིང་སློབ་གཉེར་བ་དང་ནང་མི་སོགས་ལ་སུན་གཙེར་ཡང་ཡང་བྱས་ཏེ་ད་ཆར་སློབ་གཉེར་བ་ ༡༢ ལས་ལྷག་མི་འདུག་ཟེར།
ལོ་ཤས་སྔོན་ནས་ཡུལ་ཤུལ་ཁུལ་ཁྲི་འདུ་རྫོང་བསྡོམ་མདའ་ཤང་སྐར་ཆེན་རུ་ཁག་དུ་ཡོད་པའི་ཡོང་ཤུལ་དགོན་པའི་ནང་གྲྭ་བ་དང་བླ་མ་ ༢༠༠ ལྷག་ཡོད་པ་དང་དགོན་བདག་སྤྲུལ་སྐུ་ཀརྨ་ཆོས་འཕེལ་གཙོས་བའི་བླ་གྲྭ་ཡོངས་ནས་ལོ་རེར་ས་གནས་དེར་ཡོད་པའི་འབྲོག་པ་ཉམས་ཐག་ཚོའི་བུ་ཕྲུག་ལ་རིན་མེད་སློབ་ཁྲིད་དང་། བོད་སྐད་གཙང་མའི་ཚོགས་པ་ཞིག་གསར་འཛུགས་གནང་སྟེ། ས་གནས་དེར་ཡོད་པའི་འབྲོག་པའི་བུ་ཕྲུག་རྣམས་གུང་གསེང་སྐབས་རིན་མེད་ཐོག་བོད་ཡིག་སློབ་ཀྱིན་ཡོད་འདུག
༢༠༡༡ ཡས་མས་ཞིག་ནས་སྤྲུལ་སྐུ་ཀརྨ་ཆོས་འཕེལ་མཆོག་ལ་ཁྲི་འདུ་རྫོང་ཆོས་ལུག་དོ་དམ་ཅུའུ་ཡིས་ཐེངས་གཉིས་ལ་སྐད་བཏང་སྟེ། ཚོགས་པ་འདྲ་མིན་འཛུགས་པ་དང་གྲྭ་བ་མ་ཡིན་པའི་བྱིས་པ་མང་པོ་དགོན་ནང་དུ་ཉར་མི་མཆོག་པའི་ཉེན་བརྡ་ཞིག་བཏང་ཡོད་སྟབས། ས་གནས་མི་མང་ལ་ཆོས་དད་རང་དབང་དང་རང་སྐད་རང་བདག་གི་ཐོབ་ཐང་ཡོད་སྐོར་གོང་རིམ་ལ་ཞུ་གཏུག་བྱས་ཡོད་འདུག
༢༠༡༣ ཟླ་ ༢ པའི་ནང་ནས་དགོན་པ་དེར་ཆ་རྐྱེན་སྐྱོ་བའི་འབྲོག་པའི་བུ་ཕྲུག་ ༨༠ ཙམ་སློབ་གྲྭའི་གུང་གསེང་སྐབས་སློབ་ཁྲིད་བྱེད་སའི་ལྟེ་གནས་ཞིག་དུ་འགྱུར་ཡོད་ཅིང་། ཡུལ་མི་ཚོའི་སོ་སོའི་བུ་ཕྲུག་དགོན་ནང་དུ་སློབ་གྲྭར་བསྐྱལ་ཞོར་དུ་དགོན་པ་དང་ལྷ་ཁང་ཁ་ཤས་ཉམས་གསོ་བྱས་ཡོད་པ་དང་། མང་ཚོགས་ནང་དུའང་ཕྱག་འཚལ་སྐོར་སྦྱོང་དང་། ཁ་འདོན། བསངས་གསོལ་དར་འཛུགས་སོགས་སྔོན་དང་མ་འདྲ་བའི་ཡར་རྒྱས་ཀྱི་རྣམ་པ་ཧ་ཅང་བྱུང་ཡོད་པ་རེད་།
༢༠༡༤ ལོ་མགོ་ནས་ཡུ་ཤུལ་ཁུལ་དང་ཁྲི་འདུ་རྫོང་ཆོས་ལུགས་དོ་དམ་ཨུ་ཡོན་ལྷན་ཁང་གི་མི་སྣ་འགའ་ཡོང་སྟེ། དགོན་ནང་དུ་འབྲོག་པའི་བུ་ཕྲུག་ཚོར་སློབ་སྦྱོང་སྤྲོད་མི་ཆོག་པའི་བཙན་བཀའ་བཏང་ཞིང་། ཉམས་ཐག་སློབ་ཕྲུག་ཚོའི་སྡོད་ཁང་དག་ཀྱང་གཏོར་ཤིག་བཏང་སྟེ། གྲྭ་བཙུན་སུ་ཞིག་དགོན་པར་ཆོས་ཞུགས་བྱེད་པར་རང་ལོ་ ༡༨ ཧྲིལ་བོ་ལོན་དགོས་པ་མ་ཟད། ཕ་མའི་འགན་ལེན་འོག་རྒྱལ་ཁབ་ལ་དགའ་ཞེན་དང་། རྫོང་སྤྱི་བདེ་ལས་ཁུངས་ཀྱི་དགག་བྱ་མེད་པའི་ཆོག་མཆན་ཡིག་ཆ། རང་ཉིད་དང་། ཁྱིམ་ཚང་ཕ་མ་བཅས་ཀྱི་དེ་སྔའི་ལོ་རྒྱུས་ནང་ཆབ་སྲིད་གནད་དོན་མེད་པ། རང་ཉིད་སྐྱེས་པའི་ས་གནས་ལས་ཁུངས་ཀྱི་ཡིག་ཆ་སོགས་དགོས་ལུགས་བརྗོད་དེ་སློབ་ཉེར་གནང་མཁན་ཚོར་སུན་གཙེར་བཟོས་ཡོད་འདུག
དགོན་པ་དེར་ཆབ་སྲིད་སློབ་གསོའི་ལས་དོན་ཚོགས་ཆུང་དང་། དགོན་པའི་སྤྱི་བདེ་མངགས་གཏོང་ཁང་ཟེར་བ་སོགས་བཙུགས་ཏེ། གྲྭ་བཙུན་རྣམས་ལ་རྒྱ་དམར་གྱི་ཆབ་སྲིད་དང་ཁྲིམས་ལུགས་སློབ་གསོ་སྤེལ་ཏེ། གྲྭ་བཙུན་ཡོངས་ཀྱིས་སེམས་ཐག་གཙང་བཅད་ཀྱིས་ཏྭ་ལའི་རུ་ཚོགས་དང་དབྱེ་མཚམས་གསལ་བོ་གཅོད་དགོས་ཚུལ་སོགས་བརྗོད་པར་བརྟེན་ཏེ། ད་ཆར་དགོན་པར་གྲྭ་བ་ ༡༢ ལས་མེད་པར་དགོན་པ་འཐོར་ལ་ཉེ་བ་ཆགས་ཡོད་འདུག
སྦེལ་ཀོབ་ས་གནས་གསར་འགོད་པ། དོན་འགྲུབ་བཀྲ་ཤིས།
