སྟོབས་ཆེན་རྒྱལ་ཁབ་ཁག་ཧྲང་ཧེ་རུ་ཚོགས།

འཛམ་གླིང་སྟོབས་ཆེན་རྒྱལ་ཁབ་ ༢༠ ཚོགས་ཆེན་དེ་བཞིན་རྒྱ་ནག་ཧྲང་ཧེ་གྲོང་ཁྱེར་དུ་ཚོགས་ཀྱང་ཚོགས་ཆེན་སྟེང་དེང་གི་གླིང་འཛམ་སྤྱིའི་དཔལ་འབྱོར་ཉམ་ཉེས་བསྐྱར་གསོ་ཐབས་མེད་སྐོར་བརྗོད་འདུག

ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་རྒྱ་ནག་ཧྲང་ཧེ་གྲོང་ཁྱེར་དུ་འཛམ་གླིང་སྟོབས་ཆེན་རྒྱལ་ཁབ་ ༢༠ ཚོགས་ཆེན་ (G20) ཞེས་པ་དེ་ཚོགས་ཡོད་པ་དང་། ཚོགས་ཆེན་སྟེང་ཨ་རིའི་དཔལ་འབྱོར་འདུ་འགོད་ཁང་གི་འགན་འཛིན་ཇ་ཁོ་བྷི་ལུ་ཝ་ (Jacob Lew) དང་། ཨ་རིའི་དབུས་དངུལ་ཁང་གི་གཙོ་འཛིན་ལྕམ་ཇ་ནི་ཊ་ཡུ་ལིན་ (Janet Yellen) དང་། རྒྱ་ནག་གི་དཔལ་འབྱོར་བློན་ཆེན་ལོ་ཅེ་ཝི་ (Lou Jiwei) དང་རྒྱ་ནག་དབུས་དངུལ་ཁང་གི་སྤྱི་ཁྱབ་དཔོན་རིགས་ཀྲུའུ་ཞོ་ཁྲན་ (Zhou Xiaochuan)། ཡུ་རོབ་དབུས་དངུལ་ཁང་གི་འགན་འཛིན་མ་རེའོ་ཌ་ར་གྷེ་ (Mario Draghi) དེ་བཞིན་ལྷོ་ཀོ་རི་ཡ་དང་རྒྱ་གར། ལྷོ་ཨ་ཧྥི་རེ་ཁ་དང་ཡུ་རོབ་གླིང་བཅས་ཀྱི་དཔལ་འབྱོར་དང་དངུལ་ཁང་གི་དཔོན་རིགས་རྣམས་མཉམ་ཞུགས་ཐོག འཛམ་གླིང་ཤར་ནུབ་ཀྱི་དཔལ་འབྱོར་ཉམ་ཉེས་སྲུང་སྐྱོབ་དང་ལས་གནས་གསར་འཛུགས་གནང་ཕྱོགས་ཐད་ལ་བགྲོ་གླེང་དང་གྲོས་བསྡུར་བྱས་ཡོད་འདུག

རྒྱལ་སྤྱིའི་ཐེབས་རྩ་ཁང་ (IMF) གི་འགན་འཛིན་ལྕམ་ཁིར་སི་ཊེན་ལ་གྷར་ཌི་ (Christine Lagarde) ཡིས། འཛམ་གླིང་ཤར་ནུབ་རྒྱལ་ཁབ་ཁག་གི་སྲིད་གཞུང་དག་གིས་ཕྱི་ལོ་ ༢༠༡༤ ལོའི་འཛམ་གླིང་སྟོབས་ཆེན་རྒྱལ་ཁབ་ ༢༠ ཚོགས་ཆེན་སྟེང་བཞག་པའི་གྲོས་ཆོད་ཁག་གཞིར་བཟུང་གིས་སོ་སོའི་རྒྱལ་ནང་གི་དཔལ་འབྱོར་འདུ་འགོད་ཐད་ལ་བཅོས་བསྒྱུར་དང་ཡར་རྒྱས་གཏོང་དགོས་པ་དང་། རེབ་དེའི་གྲོས་ཆོད་ནང་ཉོ་འཚོང་འདུ་འགོད་དང་། དཔལ་འབྱོར་འཛུགས་སྐྲུན། བཟོ་ལས་རིག་རྩལ་བཅས་ཡར་རྒྱས་གཏོང་ཕྱོགས་སྐོར་གྱི་གྲོས་ཆོད་དོན་ཚན་ ༨༠༠ ལྷག་བྱུང་ཡོད་ནའང་། ཤར་ནུབ་རྒྱལ་ཁབ་རེ་ཟུང་གིས་ད་ལྟའི་བར་གྲོས་ཆོད་དེ་དག་ལག་བསྟར་ཐུབ་མེད་པ་དང་། གྲོས་ཚོགས་ཁག་གིས་དཔལ་འབྱོར་འཚོལ་སྒྲུབ་ཀྱི་སྲིད་ཇུས་གསར་འཛུགས་མི་དགོས་པར་ཁོང་ཚོས་ཚོགས་ཆེན་སྟེང་བཞག་པའི་གྲོས་ཆོད་ཁག་ལག་བསྟར་དགོས་སྐོར་བརྗོད་འདུག

དབྱིན་ཇིའི་དབུས་དངུལ་ཁང་གི་འགན་འཛིན་མར་ཀི་ཁར་ནིའུ་ (Mark Carney) ཡིས། འཛམ་གླིང་ཤར་ནུབ་རྒྱལ་ཁབ་ཁག་གི་རྒྱལ་ནང་གི་དཔལ་འབྱོར་བཅོས་བསྒྱུར་དང་འཕོ་འགྱུར་ཐད་ལ་འཐུས་ཤོར་ཆེན་པོ་བྱུང་ཡོད་སྐོར་དང་། འཛམ་གླིང་སྤྱིའི་དཔལ་འབྱོར་ལེགས་བཅོས་དང་ཁ་ཕྱོགས་ལ་འཕོ་འགྱུར་གཏོང་མ་ཐུབ་པས། འཛམ་གླིང་སྤྱིའི་དཔལ་འབྱོར་འདུ་འགོད་ཀྱི་འགྲོས་ཤིན་ཏུ་དལ་བ་ནི་དངོས་གནས་བློ་ཕམ་ཞིག་ཡིན་ཚུལ་བརྗོད་འདུག

གཞན། འཇར་མིན་གྱི་དཔལ་འབྱོར་བློན་ཆེན་ཝོལ་ཧྥི་གྷང་སི་ཆུ་བྷལ་ (Wolfgang Schauble) གྱིས། དེང་སྐབས་རྒྱལ་ཁབ་ཀྱི་དཔྱ་ཁྲལ་ཡོང་འབབ་ལ་ཚོད་འཛིན་ཐེབས་ཡོད་སྟབས། འཇར་མན་གཞུང་གིས་རྒྱལ་སྤྱིའི་དཔལ་འབྱོར་མཉམ་ལས་ནང་མ་དངུལ་འཛུགས་རྒྱུར་མོས་མཐུན་མེད་སྐོར་དང་། ཡང་ཁོང་གིས་འཛམ་གླིང་རྒྱལ་ཁབ་ཁག་གིས་སོ་སོའི་རྒྱལ་ནང་གི་དཔལ་འབྱོར་སྲིད་ཇུས་ལ་བཅོས་བསྒྱུར་གཏོང་དགོས་པའི་ཛ་དྲག་གི་འབོད་སྐུལ་ཞུས་པའི་ནང་། ང་ཚོས་དཔལ་འབྱོར་སྲིད་ཇུས་ལ་གྲོས་འཆར་མ་བཏོན་པས་ཕོངས་པ་མིན་པར། ང་ཚོས་དཔལ་འབྱོར་སྲིད་ཇུས་ལག་བསྟར་མ་བྱས་པའི་ལན་པ་ཡིན་སྐོར་བརྗོད་འདུག

རྒྱ་ནག་དབུས་དངུལ་ཁང་གི་སྤྱི་ཁྱབ་དཔོན་རིགས་ཀྲུའུ་ཞོ་ཁྲན་གྱིས། འདས་ལོར་རྒྱ་ནག་གི་དཔལ་འབྱོར་འདུ་འགོད་ཀྱི་འགྲོས་ཤིན་ཏུ་དལ་བ་དེས་འདས་པའི་མི་ལོ་ ༢༥ རིང་གི་རྒྱ་ནག་གི་དཔལ་འབྱོར་འདུ་འགོད་བརྒྱ་ཆ་ ༧.༣ ཙམ་མར་ཆགས་ཡོད་ཚུལ་བཤད་འདུག

གནས་ཚུལ་ལྟར་ན། འདས་པའི་ལོ་ངོ་གཉིས་རིང་འཛམ་གླིང་སྤྱིའི་དཔལ་འབྱོར་འཚོལ་སྒྲུབ་ཀྱི་འགྲོས་དལ་བར་བརྟེན་ནས། དཔལ་འབྱོར་ཁེ་ལས་དབྱེ་ཞིབ་པ་ཚོས། དེང་གི་དཔལ་འབྱོར་གྱི་གནས་བབ་ཧ་ཅང་ཛ་དྲག་ཆགས་ཀྱི་ཡོད་པར་ཚོད་དཔག་བྱེད་ཀྱི་འདུག

འདི་ལོར་རྒྱལ་སྤྱིའི་ཐེབས་རྩ་ཁང་གིས་འཛམ་གླིང་སྤྱིའི་དཔལ་འབྱོར་འཕེལ་ཚད་བརྒྱ་ཆ་ ༣.༤ ནས་ ༠.༢ མར་བཅག་ཡོད་པ་མ་ཟད། ད་ལོའི་ཕྱི་ཟླ་ ༤ ནང་ད་དུང་མར་གཅོག་སྲིད་སྐོར་བརྗོད་འདུག

གསར་འགོད་པ། པདྨ་རྒྱལ།