ཞི་ཅིན་ཕིན་ཏང་དང་རྒྱལ་ཁབ་ཀྱི་སྲིད་འཛིན་ལས་རྩ་དགོངས་ཞུ་དགོས་པའི་ཞུ་ཡིག་ཅིག་དང་འབྲེལ་ཏེ་ཤིན་ཅང་གི་ཝུ་ཡེ་གསར་ཁང་གི་རྩོམ་སྒྲིག་པ་དང་ལས་བྱེད་ ༤ འཛིན་བཟུང་བྱས་ཡོད་འདུག
ཧྥ་རན་སིའི་གསར་ཁང་ (AFP) གིས་གནས་ཚུལ་སྤེལ་བ་ལྟར་ན། ཁ་སང་རྒྱ་ནག་གཞུང་གིས་ཤིན་ཅང་གི་ཝུ་ཇེ་ (Wujie) གསར་ཁང་གི་རྩོམ་སྒྲིག་པ་དང་ལས་བྱེད་ ༤ འཛིན་བཟུང་བྱས་ཡོད་པ་དང་། ཁོ་ཚོ་འཛིན་བཟུང་བྱེད་དོན་གཙོ་བོ་ཉེ་ཆར་གསར་ཁང་དེའི་དྲ་ཚིགས་སྟེང་ཞི་ཅིན་ཕིན་ཏང་དང་རྒྱལ་ཁབ་ཀྱི་སྲིད་འཛིན་ལས་རྩ་དགོངས་ཞུ་དགོས་པའི་ཞུ་ཡིག་ཅིག་སྤེལ་བའི་རྐྱེན་གྱིས་ཡིན་ཞིང་། (ད་ཆར་ཞུ་ཡིག་དེ་འབྲི་མཁན་སུ་ཡིན་གསལ་ཁ་བྱུང་མེད་པ་རེད)
ཞུ་ཡིག་དེའི་ནང་ཞི་ཅིན་ཕིན་གྱིས་ཏང་དང་རྒྱལ་ཁབ་ཀྱི་སྲིད་དབང་སྒེར་འཛིན་དང་སྒེར་གཅོད་བྱས་པའི་རྐྱེན་པས། དེང་སྐབས་ང་ཚོར་ཆབ་སྲིད་དཔལ་འབྱོར་དང་བསམ་བློ་རིག་གནས་སོགས་ཕྱོགས་ནས་དཀའ་རྙོག་ལ་འཕྲད་ཀྱི་ཡོད་པ་དང་། ང་ཚོ་ཚང་མ་ཏང་ལ་བློ་དཀར་བའི་ཐོག་ནས་ཏང་དང་རྒྱལ་ཁབ་ཞི་བདེ་བརྟན་ལྷིང་། ཁྱེད་དང་ཁྱེད་ཀྱི་ནང་མིའི་བདེ་འཇགས་ཀྱི་ཆེད་དུ་ང་ཚོས་ཁྱེད་རང་ཏང་དང་རྒྱལ་ཁབ་ཀྱི་སྲིད་འཛིན་ལས་གནས་ནས་རྩ་དགོངས་ཞུ་རོགས་ཞེས་འབོད་སྐུལ་ཞུ་བཞིན་ཡོད་སྐོར་སོགས་འཁོད་ཅིང་། གནས་ཚུལ་སྤེལ་སའི་ཤིན་ཅང་གི་ཝུ་ཡེ་གསར་ཁང་ནི་ཕྱི་ལོ་ ༢༠༡༥ ལོར་རྒྱ་ནག་གི་ཚོང་གཉེར་ཁང་ཆེན་མོ་ཨ་ལེ་བྷ་བྷ་ (Alibaba) ཡིས་མཐུན་འགྱུར་འོག་རྒྱ་ནག་གི་ནུབ་བྱང་ཤིན་ཅང་ནང་གསར་འཛུགས་བྱས་པ་ཞིག་ཡིན་འདུག
མིང་བརྗོད་འདོད་མེད་པའི་གསར་ཁང་དེའི་ལས་བྱེད་ཅིག་གིས། ང་ཚོའི་དྲ་ཚིགས་སྟེང་ཞུ་ཡིག་དེ་སྤེལ་བའི་རྐྱེན་གྱིས། རེས་གཟའ་སྔོན་མ་ནས་ང་ཚོའི་གསར་ཁང་གི་རྩོམ་སྒྲིག་པ་ཧུང་ཀྲེ་ཅེ་ (Huang Zhijie) གཙོས་པའི་གཞན་ལས་མི་ ༤ འཛིན་བཟུང་བྱས་སོང་། ངས་བསམ་ན་ད་སྐབས་ཁོ་ཚོར་འདྲི་གཅོད་དང་ཞིབ་བཤེར་བྱེད་བཞིན་ཡོད་ཀྱི་རེད། གཅིག་བྱས་ན་གསང་བའི་སྒོ་ནས་ང་ཚོའི་དྲ་ཚིགས་སྟེང་སྤེལ་བའི་ཞུ་ཡིག་དེར་ཞིབ་བཤེར་བྱས་ཏེ་ང་ཚོའི་གསར་ཁང་གི་སྒོ་ཡང་རྒྱག་ཏུ་འཇུག་སྲིད་པ་རེད། ཅེས་སོགས་བརྗོད་འདུག
གནས་ཚུལ་ལྟར་ན། ཕྱི་ལོ་ ༢༠༡༢ ལོར་ཞི་ཅིན་ཕིན་གྱིས་རྒྱ་ནག་གི་སྲིད་དབང་བཟུང་བ་ནས་རྒྱལ་ནང་གི་གསར་འགྱུར་ལས་རིགས་ཁག་ཏང་ལ་བློ་དཀར་དགོས་པའི་བཙན་སྐུལ་ཐོག་སྤྱི་ཚོགས་བརྒྱུད་ལམ་ཁག་དང་གནས་འཕྲིན་དྲ་ཚིགས་ཁག་ལ་སྟངས་འཛིན་ཤུགས་ཆེན་བྱེད་ཀྱི་ཡོད་པ་མ་ཟད། ཞི་ཅིན་ཕིན་གྱི་ལྐོག་ཟ་རུལ་སུངས་གཙང་བཤེར་ལས་འགུལ་ལག་བསྟར་ཁྲོད་དུ་དམར་ཤོག་ཚོགས་པའི་དཔོན་རིགས་ ༣༠༠་༠༠༠ འཛིན་བཟུང་བཀག་བསྐྱིལ་བྱས་ཡོད་འདུག
གཞན། ཧོང་ཀོ་གསར་ཁང་གིས་སྤེལ་བའི་གནས་ཚུལ་ཞིག་གི་ནང་། ཟླ་འདིའི་ཕྱི་ཚེས་ ༡༡ ཉིན་པེ་ཅིན་གྲོང་ཁྱེར་ཉེན་རྟོག་པས་རྒྱ་ནག་གི་གསར་འགོད་པ་ཇ་ཇ་ (Jia Jia) ཟེར་བ་ཞིག་པེ་ཅིན་ནས་ཧོང་ཀོང་ལ་འགྲོ་ཁར་པེ་ཅིན་གནམ་ཐང་ནས་འཛིན་བཟུང་བྱས་ཡོད་པ་དང་། ཁོ་འཛིན་བཟུང་བྱེད་དོན་ཞི་ཅིན་ཕིན་ཏང་དང་རྒྱལ་ཁབ་ཀྱི་སྲིད་འཛིན་ལས་གནས་ནས་རྩ་དགོངས་ཞུ་དགོས་པའི་ཞུ་ཡིག་དེ་དང་འབྲེལ་བའི་དོགས་གཞིའི་འོག་འཛིན་བཟུང་བྱས་ཡོད་སྐོར་བརྗོད་ཡོད་པ་དང་། བྷེ་བྷེ་སེ་གསར་ཁང་གིས་གནས་ཚུལ་བསྒྲགས་པའི་ནང་། ཞི་ཅིན་ཕིན་རྩ་དགོངས་ཞུ་དགོས་པའི་ཞུ་ཡིག་དེའི་གནད་དོན་ཐོག་ད་ཆར་དོགས་ཡོད་མི་སྣ་ ༢༠ འཛིན་བཟུང་བྱས་ཡོད་སྐོར་བརྗོད་འདུག
གསར་འགོད་པ། པདྨ་རྒྱལ།
