རྒྱ་གར་དབུས་སློབ་འཛིན་ཚོགས་འོག་གི་དམའ་རིམ་སློབ་གྲྭ་ ༥ དང་འབྲིང་རིམ་གྱི་སློབ་གྲྭ་ ༥ བཅས་གང་མགྱོགས་རྩིས་སྤྲོད་རྒྱུ་ཡིན་འདུག
དེ་རིང་བོད་མི་མང་སྤྱི་འཐུས་གྲོས་ཚོགས་ནང་ཤེས་རིག་ལས་ཁུངས་ཀྱི་སྔོན་རྩིས་གཏན་འབེབས་དང་འབྲེལ་ཏེ། མདོ་སྨད་སྤྱི་འཐུས་རྒྱ་རིགས་མཐར་ལགས་ཀྱིས་ཤེས་རིག་ལས་ཁུངས་ངོས་ནས་རྒྱ་གར་དབུས་སློབ་འཛིན་ཚོགས་འོག་གི་སློབ་གྲྭ་ཁག་རྩིས་ལེན་ཐུབ་ཀྱི་ཡོད་མེད་དང་། ད་ལྟའི་ཆར་སློབ་གྲྭ་དེ་དག་གི་ཤེས་ཡོན་ཐོག་འཐུས་ཤོར་ཆེན་པོ་འགྲོ་བཞིན་ཡོད་སྐོར་སོགས་གསུངས་པའི་ལན་དུ་ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས། གནད་དོན་དེའི་ཐོག་ཐེངས་འདིའི་གྲོས་ཚོགས་ནང་དགོངས་ཚུལ་ཡོང་གི་རེད་བསམ་སོང་ལ། ཤེས་ཡོན་ཞེ་དྲགས་གལ་ཆེན་པོ་ཡིན་པ་ལྟར་དགོངས་ཚུལ་བྱུང་ཡང་བྱུང་སོང་། ན་ནིང་གྲོས་ཚོགས་ནང་སློབ་གྲྭ་ཁག་མགྱོགས་པོར་རྩིས་ལེན་ཐུབ་ཀྱི་ཡོད། སྟབས་ཡག་ན་གྲོས་ཚོགས་མ་གྲོལ་གོང་ལ་གནས་ཚུལ་སྙན་གསེང་ཞུ་རྒྱུ་ཞིག་རག་སྲིད་པ་རེད། གལ་སྲིད་དེ་ལྟར་མ་བྱུང་ཡང་དུས་ཚོད་ཐུང་ཐུང་ནང་རྩིས་ལེན་ཐུབ་ཀྱི་རེད་ཅེས་ཞུ་རྒྱུ་བྱུང་། འོན་ཀྱང་རྒྱ་གར་གཞུང་ངོས་ནས་ལོ་གསུམ་གྱི་དུས་ཚོད་ཅིག་གནང་ཡོད་པ་ལྟར་འབྲེལ་ཡོད་ཚོའི་ངོས་ནས་ཀྱང་དུས་ཚོད་དེ་བཟུང་སྟེ་གཡོལ་བསྡད་པ་རེད། ཤེས་རིག་ལས་ཁུངས་ངོ་ལས་དང་། ལྷག་པར་དུ་དཔལ་ལྡན་སྲིད་སྐྱོང་ངོས་ནས་ཐབས་ཤེས་ཡོད་དགུ་རྩལ་སྦྲུགས་བྱས་པ་རེད། མཐའ་དོན་རྒྱ་གར་གཞུང་གི་སྲིད་བྱུས་ལ་འགྱུར་བ་གང་ཡང་མེད་ནའང་དེའི་བར་གྱི་ལས་བྱེད་ཁ་ཤས་ཤིག་གིས་བཀག་འགོག་བྱས་ཡོད་པ་གསལ་བོ་ཧ་གོ་ཡི་འདུག
ད་ལྟའི་ཆ་ལ་ཚང་མར་ཐུགས་ཚབ་ཡོད་སྟབས་གནས་ཚུལ་བཟང་བོ་ཞིག་གོ་ན་སྤྲོ་བོ་ཡོང་གི་རེད་བསམ་ནས་འདིར་སྙན་གསེང་ཞུ་རྒྱུ་ཞིག་ལ། རྒྱ་གར་དབུས་ཤེས་རིག་ལས་ཁུངས་ཐོག་ནས་ལས་རིམ་གཉིས་པ་སྟེ། འཛིམ་རིམ་བརྒྱད་པའི་བར་གྱི་དམའ་རིམ་གྱི་སློབ་གྲྭ་ ༥ དང་། འབྲིང་རིམ་གྱི་སློབ་གྲྭ་ ༥ བཅས་ཁྱོན་སློབ་གྲྭ་ ༡ ༠ ཙམ་རྩིས་སྤྲོད་རྒྱུ་ཟླ་འདིའི་ཚེས་ ༡༧ ཉིན་བཀའ་འཁྲོལ་གནང་སོང་། རྩིས་སྤྲོད་རྩིས་ལེན་གྱི་ཞིབ་ཕྲའི་འགྲོ་ཕྱོགས་དེ་བོད་སློབ་འཛིན་སྐྱོང་ཚོགས་པས་ཡིག་ཆ་གྲ་སྒྲིག་བྱེད་བཞིན་ཡོད་པ་རེད། བདུན་ཕྲག་དང་པོ་གཉིས་པའི་ནང་ལ་རྩིས་ལེན་ཐུབ་པ་རེད་བསམ་གྱི་ཡོད།
ད་དུང་མཇུག་སྒྲིལ་གྱི་ཡོད་པ་མ་རེད། འཛིན་རིམ་བཞི་པའི་སློབ་གྲྭ་ཁག་ཅིག་དང་བཅུ་གཉིས་ཀྱི་སློབ་གྲྭ་ཁག་ཅིག་ཡོད་སྟབས། ལས་རིམ་གསུམ་པའི་ནང་དུ་སློབ་གྲྭ་དེ་དག་ཐོག་ལས་ཀ་བྱེད་དགོས་པ་རེད། ཡིན་ནའང་སྤྲོད་མཁན་དང་ལེན་མཁན་བར་གྱི་གནས་ཚུལ་ཞིག་ཆགས་ཡོད་སྟབས། ང་ཚོས་ག་ཚོད་ཡར་ཞུས་ནའང་གནས་ཚུལ་ཁ་ཤས་ངས་དེ་རིང་གྲོས་ཚོགས་ནང་ཞུ་མ་ཐུབ་པ་འདྲ་བོ་རེད། ལས་དོན་འདིའི་ཐོག་རྒྱ་གར་ཕྱི་སྲིད་ལས་ཁུངས་ནས་རོགས་རམ་ཡང་པོ་གནང་སོང་། ཟླ་འདིའི་ཚེས་ ༧ ཉིན་ལྡི་ལིར་རྒྱ་གར་ཕྱི་སྲིད་ལས་ཁུངས་དབུ་བཞུགས་ཐོག་ཚོགས་འདུ་ཚོགས་པ་རེད།
མདོ་དོན། ད་རེབ་ཚེས་བཅུ་བདུན་ཉིན་སློབ་གྲྭ་བཅུ་རྩིས་སྤྲོད་རྒྱུ་ཡིན་པའི་ཕྱག་ཡིག་འབྱོར་ཡོད་པ་རེད། དེ་སྔོན་སློབ་གྲྭ་ ༤ རྩིས་ལེན་དང་། སྔོན་འགྲོའི་སློབ་གྲྭ་ ༣༣ རྩིས་བླངས་ཚར་བ་རེད། འབྲིང་རིམ་མཐོ་བ་དང་འཛིན་རིམ་བཅུ་གཉིས་ཀྱི་སློབ་གྲྭ་ཁག་ཅིག་རྩིས་ལེན་རྒྱུ་ལྷག་ཡོད་པ་རེད། དེ་དག་ལའང་ང་ཚོས་མུ་མཐུད་མཇུག་སྐྱོང་བྱ་རྒྱུ་ཡིན། དེ་གྲོས་ཚོགས་ལ་སྙན་གསེང་ཞུ་འདོད་བྱུང་སོང་། སྤྱིར་བཏང་སློབ་གྲྭ་དེ་དག་ནང་དཀའ་ངལ་ཡོད་པ་དངོས་ཡོད་ཡིན་ཡང་། མ་སུ་རི་ལྟ་བུའི་སློབ་གྲྭ་ཁ་ཤས་ནང་ཞེ་དྲགས་ཡག་པོ་གནང་གི་འདུག ཅེས་གསུངས་སོང་།
གསར་འགོད་པ། དོན་འགྲུབ་བཀྲ་ཤིས།
གནས་ཚུལ་བཟང་པོ་རེད།
ཡང་དེ་རིང་གྲོས་ཚོགས་ནང་ཤེས་རིག་བཀའ་བློན་གྱིས་ “རྒྱ་གར་དབུས་ཤེས་རིག་ལས་ཁུངས་ཐོག་ནས་ལས་རིམ་གཉིས་པ་སྟེ། འཛིམ་རིམ་བརྒྱད་པའི་བར་གྱི་དམའ་རིམ་སློབ་གྲྭ་ ༥ དང་། འབྲིང་རིམ་སློབ་གྲྭ་ ༥ བཅས་ཁྱོན་སློབ་གྲྭ་ ༡ ༠ ཙམ་རྩིས་སྤྲོད་རྒྱུ་ཟླ་འདིའི་ཚེས་ ༡༧ ཉིན་བཀའ་འཁྲོལ་གནང་སོང་།” ཞེས་གསུངས་ཡོད། དེ་ནི་གཏམ་བཟང་ཞིག་གཏན་ནས་མིན་ཏེ། ཕྱི་ལོ་ ༢༠༡༣ ཟླ་ ༡ པོའི་ནང་རྒྱ་གར་དབུས་གཞུང་ནས་བོད་སློབ་འཛིན་ཚོགས་ཀྱི་སློབ་གྲྭ་ཁག་བོད་མིའི་སྒྲིག་འཛུགས་ལ་ལོ་གསུམ་ནང་ཚུད་རྩིས་སྤྲོད་གནང་རྒྱུའི་ཐག་གཅོད་གནང་ཟིན་པས། ཐག་གཅོད་འདི་འདྲ་ཞིག་བསྐྱར་དུ་གནང་དགོས་དོན་གང་ཡིན་ནམ།
༡། ད་སྔ་ཤེས་རིག་ལས་ཁུངས་ནས་གསལ་བསྒྲགས་གནང་བ་བཞིན་ལོ་གསུམ་གྱི་དུས་ཚོད་ནང་སློབ་གྲྭ་ཁག་རྩིས་ལེན་མ་ཐུབ་པའི་རྒྱུ་རྐྱེན་གང་ཡིན་ནམ།
༢། ད་ལྟ་འཛིན་རིམ་བརྒྱད་པ་མན་གྱི་སློབ་གྲྭ་རྩིས་ལེན་གནང་རྒྱུའི་ཐག་གཅོད་བྱུང་སྟབས་ད་སྔའི་ཐག་གཅོད་ལ་འགྱུར་བ་སོང་བ་ཡིན་དམ།
༣། འཛིན་རིམ་དགུ་པ་ཡན་གྱི་སློབ་གྲྭ་ཁག་རྩིས་ལེན་གནང་འཆར་ཡོད་དམ་མེད། ཡོད་ན་དུས་ཚོད་ཅི་ཙམ་ནང་རྩིས་ལེན་གནང་འཆར་དང་། མེད་ན་སློབ་གྲྭ་དེ་དག་གི་གནས་སྟངས་ལ་ཤེས་རིག་ལས་ཁུངས་ནས་གནང་འཆར་ཇི་ཡོད། བཅས་ལ་ཤེས་རིག་བཀའ་བློན་གྱིས་ངེས་པར་བཀའ་ལན་གནང་གལ།
ཡང་སྲིད་སྐྱོང་ལྟར། བསྒྲགས་མ་རན་གོང་ནས་བསྒྲགས། དོན་ལ་འབབ་རྒྱུ་མེད་པ་དེ་འདྲ་མ་ཡིན་པ་ཤོག