རྒྱ་ནག་གཞུང་འབྲེལ་བརྒྱུད་ལམ་ཁག་ཏུ་གནས་ཚུལ་ཐོན་པར། ཕྱི་ཟླ་ ༤ པའི་ཚེས་ ༡༤ ཉིན་གྱི་སྔ་དྲོར་དཀར་མཛེས་གེ་སར་གནམ་གྲུ་ཐང་འཛུགས་སྐྲུན་ལས་གཞི་དངོས་སུ་མགོ་འཛུགས་མཛད་སྒོ་ཚོགས་ཡོད་པ་དང་། ལས་གཞི་འདི་ ༢༠༡༧ ལོར་འཛུགས་སྐྲུན་ལེགས་འགྲུབ་བྱས་ཏེ་གནམ་གྲུ་ཤར་གཏོང་ཚོད་ལྟ་བྱ་རྒྱུ་ཡིན་འདུག
དཀར་མཛེས་གེ་སར་གནམ་གྲུ་ཐང་ནི་དཀར་མཛེས་ཁུལ་གྱི་བྱང་རྒྱུད་ཀྱི་དཀར་མཛེས་རྫོང་དང་སྡེ་དགེ་རྫོང་གི་ས་མཚམས་སུ་ཡོད་པ་དང་། མཚོ་ངོས་ལས་མཐོ་ཚད་སྨིས་ ༤༠༦༨ ཡོད་པ་དང་། དཀར་མཛེས་རྫོང་མཁར་བར་དུ་གཞུང་ལམ་གྱི་རིང་ཚད་སྤྱི་ལེ་ ༥༢ དང་སྡེ་དགེ་རྫོང་མཁར་བར་སྤྱི་ལེ་ ༡༥༠ ཡོད་འདུག
གནམ་ཐང་འདི་འཕུར་སྐྱོད་ས་ཁུལ་གྱི་ཚད་རིམ་ 4C ཞེས་པ་དེ་ཡིན་པ་དང་། རིང་ཚད་སྨིས་ ༤༠༠༠ དང་། ཞེང་ཚད་སྨིས་ ༤༥ ཡོད་པའི་རྒྱུགས་ལམ་ཞིག་གསར་བསྐྲུན་བྱ་རྒྱུ་དང་། སྨིས་གྲུ་བཞི་མ་ ༣༦༠༠ ཡོད་པའི་མཁའ་སྐྱོད་ས་ཚིགས་ཀྱི་ཐོག་ཁང་དང་། དེ་བཞིན། མཁའ་སྐྱོད་དོ་དམ་དང་སྣུམ་བླུག་ས། མེ་འགོག་ཉེན་སྐྱོབ་དང་སྤྱི་པའི་སྒྲིག་ཆས་ཆ་ཚང་སོགས་གོ་སྒྲིག་བྱ་འཆར་ཡོད་འདུག
རྒྱ་ནག་གི་གནས་ཚུལ་ནང་བཀོད་པ་ལྟར་ན། དཀར་མཛེས་གེ་སར་གནམ་ཐང་ལས་གཞིའི་ཐད་མ་དངུལ་རྒྱ་སྒོར་དུང་ཕྱུར་ ༢༤།༨༨ གཏོང་རྩིས་ཡོད་པ་དང་། གནམ་གྲུ་ཐང་འདི་ལེགས་འགྲུབ་བྱས་རྗེས་རྒྱ་ནག་རྒྱལ་ཡོངས་ཀྱི་གནམ་གྲུ་ཐང་གསུམ་ཡོད་པའི་མི་རིགས་རང་སྐྱོང་ཁུལ་ཐོག་མ་དེ་ཡིན་སྐོར་ཡང་འཁོད་འདུག
ལྷོ་ཕྱོགས་ས་གནས་གསར་འགོད་པ་དོན་འགྲུབ་བཀྲ་ཤིས།
