མཉམ་འབྲེལ་རྒྱལ་ཚོགས་ལ་མི་མང་གི་ཚབ་མཚོན་དབུ་ཁྲིད་ངོ་མ་འདེམ་པའི་གོ་སྐབས།

སྐལ་ལྡན་གྱིས་བསྒྱུར།

འདས་ཟིན་མང་གཙོའི་ལམ་ལུགས་དང་འགལ་བའི་རྒྱུད་རིམ་ལ་སྒྱུར་བཅོས་ཀྱིས་ཐེངས་དང་པོར་རྒྱལ་ཚོགས་ཀྱི་ཁྱབ་ཁོངས་རྒྱལ་ཁབ་ ༡༩༣ གྱིས་འོས་འགྲན་པ་རྣམས་ལ་བཅར་འདྲི་བྱེད་ཆོག་པ་ཡིན།

ལོ་ངོ་བདུན་བཅུ་འཁོར་ཟིན་པའི་མཉམ་འབྲེལ་རྒྱལ་ཚོགས་མུ་འཐུད་ཚགས་ཚུད་དང་། དུས་སྐབས་དང་འཚམ་པ། ནུས་པ་ལྡན་པ་བཅས་ཡོང་བར་བཅོས་སྒྱུར་བྱེད་དགོས་པ་ཧ་ཅང་གལ་ཆེན་པོ་ཡིན། འཛིན་སྐྱོང་དང་འབྲེལ་བའི་ལས་དོན་ལེགས་བཅོས་དང་གསར་གཏོད་ཀྱིས་ལྷན་ཁང་ཁག་དང་། ཡན་ལག མ་དངུལ་སྡེ་ཚན་སོགས་ཀྱི་བར་འབྲེལ་ལམ་དུས་དང་རྣམ་པ་ཀུན་ཏུ་འགྱུར་བ་འགྲོ་མུས་ཡིན། འོན་ཀྱང་དངོས་ཡོད་སྒྱུར་བཅོས་ནན་པོ་བྱེད་དགོས་ས་ནི་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་དང་སྲུང་སྐྱོབ་ལྷན་ཁང་སོགས་མཐོ་རིམ་སྡེ་ཚན་ཁག་ཆགས་ཡོད། ལོ་ངོ་བཅུ་ཕྲག་ཁ་ཤས་གྲོས་མོལ་བྱས་ཀྱང་བཟང་ཕྱོགས་ཀྱི་འགྱུར་བ་མ་ཕྱིན་པའི་གནས་སྟངས་དེར་ངེས་པར་སྒྱུར་བཅོས་མ་བྱས་ཐབས་མེད་ཆགས་ཡོད། འབྱུང་འགྱུར་རྒྱལ་ཚོགས་ཀྱི་དྲུང་ཆེ་དྲང་བདེན་དང་ཕྱི་གསལ་ནང་གསལ་གྱི་རྒྱུད་རིམ་ཐོག་འདེམ་སྐོ་བྱེད་ཐུབ་པ་བྱུང་ཚེ། གནད་དོན་དེས་རྒྱལ་ཚོགས་ཀྱི་ལངས་ཕྱོགས་ལ་འགྱུར་བ་འགྲོ་སྲིད་པ་རེད་ལ། ལས་དོན་ཐད་ལ་ཡང་གཡོ་འགུལ་ཐེབས་སྲིད་པ་ཞིག་རེད།

ཕྱི་ཟླ་ ༡༢ ཚེས་ ༣༠ ཉིན་དྲུང་ཆེ་བྷན། ཀི མུན་གྱི་དུས་བཀག་གཉིས་པའི་ལས་ཡུན་རྫོགས་འགྲོ་བཞིན་ཡོད་པ་དང་། ཁོང་གི་གོ་གནས་རྒྱུད་འཛིན་སླད་འོས་འགྲན་མི་སྣ་དགུས་དང་ལེན་བྱས་ཡོད། དེ་དག་ཁྲོད་འོས་འགྲན་པ་བཞི་ནི་བུད་མེད་ཡིན། དེ་སྔ་རྒྱལ་ཚོགས་ཀྱི་དྲུང་ཆེར་བུད་མེད་འོས་འདེམ་བྱས་པའི་ལོ་རྒྱུས་མེད། འོན་ཀྱང་བུད་མེད་འདེམ་སྐོ་བྱེད་མིན་དེ་སྔར་སྲོལ་དང་མི་འདྲ་བའི་གནད་དོན་གཅིག་པོ་དེ་མ་ཡིན་པར། ད་རེབ་མཉམ་འབྲེལ་རྒྱལ་ཚོགས་ཀྱི་ཁྱབ་ཁོངས་རྒྱལ་ཁབ་ ༡༩༣ ཚང་མར་དྲུང་ཆེའི་འོས་མིར་བཅར་འདྲི་བྱེད་པའི་གོ་སྐབས་ཐོག་མ་དེ་སྤྲད་ཡོད་པ་རེད། དེ་ནི་རྒྱལ་ཚོགས་ཀྱི་ལེགས་བཅོས་ཆེ་ཤོས་དེ་ཡིན། ད་བར་མཐོ་རིམ་དཔོན་རིགས་འདེམ་སྐབས་དེ་ལྟ་བུའི་མངོན་གསལ་དོད་པོ་དང་ཕྱི་གསལ་ནང་གསལ་ཞིག་ཡོང་མྱོང་མེད།

དེ་སྔོན་དྲུང་ཆེ་འདེམ་སྐོའི་བྱ་གཞག་དེ་ནི་གསང་རྒྱ་ཆེ་བའི་གནད་དོན་ཞིག་ཡིན། མཉམ་འབྲེལ་རྒྱལ་ཚོགས་སྲུང་སྐྱོབ་ལྷན་ཁང་གི་གཏན་འཇགས་རྒྱལ་ཁབ་ལྔས་དྲུང་ཆེ་འདེམ་སྐོའི་མཐའ་མའི་ཐག་གཅོད་བྱེད་ཀྱི་ཡོད། རྒྱལ་ཚོགས་ཀྱི་སྒྲིག་གཞི་ལྟར་ན་དྲུང་ཆེའི་གོ་གནས་དེར་གཏན་འཇགས་རྒྱལ་ཁབ་ལྔ་པོའི་ཁོངས་མི་བསྐོ་གཞག་བྱེད་མི་ཆོག་པ་ཡིན། རྒྱལ་ཁབ་དེ་དག་ནི་རྒྱ་ནག ཨིན་ཇི། ཧྥ་རན་སི། ཨུ་རུ་སུ། ཨ་རི་བཅས་ལྔ་ཡིན། འོན་ཀྱང་རྒྱལ་ཁབ་དེ་དག་གིས་རང་ཉིད་ཀྱི་དགག་བྱའི་དབང་ཚད་བེད་སྤྱད་དེ་འོས་མི་རེ་ཕྱིར་འཐེན་བྱེད་པའི་ཐོབ་ཐང་ཡོད། དྲུང་ཆེ་བསྐོ་གཞག་གི་བརྒྱུད་རིམ་དེས་དྲུང་ཆེ་རང་ཉིད་ལྷན་ཚོགས་དེ་དག་གི་གྲིབ་གཟུགས་འོག་འགྲོ་སྡོད་བྱེད་པའི་སྐྱོན་འཛུགས་བྱེད་གཞི་ཞིག་ཀྱང་ཆགས་ཡོད།

ད་རེས་དྲུང་ཆེ་འོས་འདེམ་བྱེད་ཕྱོགས་དེ་བཞིན་མངའ་ཁུལ་སྐོར་རིམ་གཞི་རྩར་བཟུང་སྟེ་བྱེད་རྒྱུ་དང་། ཤར་ཡུ་རོབ་ཀྱི་མི་མང་ཚོས་ད་རེབ་ཁོ་པ་ཚོའི་སྐོར་རིམ་ཡིན་ཞེས་རྗོད་ཀྱི་ཡོད་པ་རེད། དོན་ལ་ཡང་དྲུང་ཆེའི་འོས་འགྲན་པ་མང་ཆེ་བ་མངའ་ཁུལ་དེ་དག་གི་མི་ཡིན་པ་རེད།

མཉམ་འབྲེལ་རྒྱལ་ཚོགས་ཀྱིས་མང་གཙོ་དང་འདྲ་མཉམ་གོང་འཕེལ་གཏོང་བར་སྐུལ་འདེད་བྱེད་ཀྱིན་ཡོད། གལ་ཏེ་རྒྱལ་ཚོགས་ཀྱི་ཁྱབ་ཁོངས་རྒྱལ་ཁབ་ཐུན་མོང་གིས་དྲུང་ཆེ་བུད་མེད་ཅིག་འདེམ་ཐུབ་པ་བྱུང་ཚེ་དེ་བས་བཟང་ཕྱོགས་ཀྱི་རྣམ་པ་ཡིན། འོན་ཀྱང་ལས་དོན་ནི་མཚོན་དོན་ལས་གལ་འགངས་ཆེ་བ་ཞིག་ཡིན་ཕྱིན། རྒྱལ་ཚོགས་ལ་དགོས་པ་ནི་འབྱོན་ཐང་ཆེ་ལ། མིག་རྒྱང་རིང་བ། ལག་ལེན་བྱེད་ཐུབ་པའི་དབུ་ཁྲིད་ཅིག་ཡིན། དེ་ལྟ་བུའི་དབུ་ཁྲིད་དེས་རྒྱལ་ཚོགས་དེ་བཞིན་མི་མང་གི་མངོན་འདོད་སྐོང་བའི་གལ་ཆེའི་ལྷན་ཚོགས་ཤིག་གྲུབ་ཐུབ་པ་ཡིན་ལ། རྒྱལ་ཁབ་ཕན་ཚུན་ལག་གདང་སྦྲེལ་ཏེ་ཐུན་མོང་གི་དཀའ་རྙོག་སེལ་ཐུབ་པ་དང་། ཐུན་མོང་གི་དམིགས་ཡུལ་འགྲུབ་པར་ལེགས་སྐྱེས་འབུལ་ཐུབ་པ་ཡིན།

མ་རྩོམ་འབྲེལ་ཐག http://www.scmp.com/comment/insight-opinion/article/1936767/golden-chance-united-nations-pick-leader-who-can-truly