རྒྱ་མོ་ཚོས་ཕྱི་གླིང་བར་མཛའ་འབྲེལ་བྱས་མི་ཆོག

ཕྱི་གླིང་གི་ཡུལ་སྐོར་སྤྲོ་འཆམ་པའི་ཁྲོད་དུ་གསང་བའི་ལས་ཁུངས་ཀྱི་མྱུལ་མ་ཡོད་སྲིད་པས་རྒྱ་ནག་གཞུང་འབྲེལ་ལས་སྣེ་ཁག་གི་བུད་མེད་ཚོས་གང་བྱུང་མཛའ་འབྲེལ་བཙུགས་མི་ཆོག་ཟེར།

དེ་རིང་ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་རྒྱལ་ཡོངས་ཤེས་ཡོན་སྲུང་སྐྱོབ་ཉིན་མོར་ (NSED) རྒྱ་ནག་གཞུང་གིས་རྒྱ་ནག་དབུས་བརྙན་འཕྲིན་ཁང་ (CCTV) གཙོས་པའི་གསར་ལམ་ཁག་ཏུ་རྒྱ་ནག་གཞུང་འབྲེལ་ལས་སྣེ་ཁག་གི་ལས་བྱེད་བུད་མེད་ཚོས་རྒྱལ་ནང་དུ་འགྲོ་འོང་བྱེད་མཁན་ཕྱི་གླིང་གི་སྐྱེས་པ་ཚོ་དང་མཛའ་འབྲེལ་འཛུགས་མི་ཆོག་པ་དང་། དེ་དག་ནི་ཡུལ་སྐོར་སྤྲོ་འཆམ་དང་སློབ་སྦྱོང་གི་མང་ཐོག་ནས་ཡོང་བའི་ཕྱི་རྒྱལ་ཁག་གི་གསང་བའི་མི་སྣ་ཡིན་སྲིད་ཉེན་བརྡའི་གསལ་བསྒྲགས་ཤིག་བཀྲམ་ཡོད་འདུག

ཁ་བྱང་ལ “བརྩེ་དུང་གི་ཉེན་ཁ”ཞེས་པའི་དོན་ཚན་བཅུ་དྲུག་ཅན་གྱི་གསལ་བསྒྲགས་དེའི་ནང་། རྒྱ་རིགས་བུ་མོ་སྤྱི་དམངས་ཞབས་ཞུ་མ་ཞོ་ལེ་ (Xiao Li) ཟེར་ཞིག་དགོང་ཟས་རོལ་ཚོགས་ཤིག་གི་སྟེང་ཕྱི་གླིང་གི་སྐྱེས་པ་ཌ་བེ་ཌི་ (David) ཟེར་བ་ཞིག་ལ་འཕྲད་དེ། ཁོང་གཉིས་བར་མཛའ་འབྲེལ་བྱུང་བའི་གཏམ་བརྒྱུད་བཀོད་ཡོད་པ་དང་། ཌ་བེ་ཌི་ཟེར་བའི་ཕྱི་གླིང་གི་སྐྱེས་པ་དེས་ཁོ་རང་ཡུལ་སྐོར་ལྗོངས་རྒྱུ་བ་ཞིག་ཡིན་སྐོར་བཤད་ཀྱང་། དོན་དངོས་སུ་ཁོ་ཕྱི་གླིང་གི་གསང་མྱུལ་བ་ཞིག་ཡིན་ལུགས་དང་། ཁོས་རྒྱ་རིགས་བུ་མོ་ཞོ་ལེ་ཡི་འཇོ་སྒེག་ལ་བསྟོད་བསྔགས་བྱས་པ་དང་ཁོ་མོར་རྒྱ་སེ་མེ་ཏོག་སྤྲད་པ། ཆེད་མངགས་དགོང་ཟས་སྤྲོ་ཚོགས་ལ་ཁྲིད་པ་དང་སྐྱེད་མོས་ཚལ་དུ་འཆམ་འཆམ་སོགས་བྱས་ཏེ་ཁོང་གཉིས་བར་མཛའ་འབྲེལ་བྱུང་རྗེས། བུ་མོ་ཞོ་ལེ་ཡིས་རང་ཉིད་ཀྱི་ལས་གནས་རྒྱ་ནག་དབུས་དྲིལ་བསྒྲགས་ལས་ཁུངས་ཀྱི་གསང་བའི་ཡིག་ཆ་ཁག་ཅིག་ཌ་བེ་ཌི་ལ་མཁོ་སྤྲོད་བྱས་ཡོད་སྟབས། ཁོང་གཉིས་རྒྱ་ནག་ཉེན་རྟོག་དམག་མིས་འཇུ་བཟུང་བྱས་ཡོད་ལུགས་སོགས་འཁོད་འདུག

གཞན། ད་ལྟའི་རྒྱ་ནག་སི་ཁྲོན་ས་ཁུལ་ནས་ཡིན་ཞིང་རྒྱ་ནག་གཞུང་འབྲེལ་འཕྲུལ་རིག་ལས་སྒོར་ཞུགས་པའི་རྒྱ་རིགས་ཧོང་ཡུའུ་ (Huang Yu) ཟེར་བ་ཞིག་གིས་དྲ་ལམ་བརྒྱུད་ནས་ཐའེ་ཝན་གཙོས་པའི་ཕྱི་གླིང་གི་གསང་མྱུལ་སྒྲིག་འཛུགས་ཤིག་ལ་འབྲེལ་བ་བྱས་ཏེ་གཞུང་འབྲེལ་གསང་བའི་ཡིག་ཆ་འབུམ་ ༡༥ མཁོ་འཚོང་བྱས་པའི་ནག་ཉེས་འོག ལས་གནས་ནས་ཕྱིར་ཕུད་བཏང་བ་མ་ཟད། བཀག་བསྐྱིལ་འདྲི་བརྩད་མང་པོ་བྱས་མཐར། ཟླ་འདིའི་རེས་གཟའ་མིག་དམར་ཉིན་སྲོག་ཐོག་ཏུ་བཏང་ཡོད་འདུག

གསར་འགོད་པ། པདྨ་རྒྱལ།