སོད། སོད། སོད་ཅེས་པའི་བཀའ་སྒུག་བཞིན་ཡོད།

གསར་གནས་མཉམ་སྦྲེལ་ཁང་(AP)གིས་སྤེལ།

སྐལ་ལྡན་གྱིས་ཕབ་སྒྱུར་བྱས།

རྒྱ་ནག་དྲག་པོའི་དཔུང་སྡེར་ན་གཞོན་མི་རབས་གསར་པ་མཉམ་ཞུགས་ཀྱི་དང་བ་འདྲེན་ཕྱིར། ཆེས་བཟོ་བཀོད་ལེགས་ཤིང་དེང་རབས་དར་སོ་ཆེ་ལ་ཟང་ཟིང་འཁྲུག་ཆ་དོད་པའི་གཞས་མ་གཏམ་(rap-rock)སྒྲ་འཇུག་བྱས་པའི་བརྙན་ཐུང་སྒྲིག་བཟོ་བྱས་ཏེ་དྲིལ་བསྒྲགས་བྱེད་བཞིན་ཡོད།

རྒྱ་ནག་དྲག་པོའི་དཔུང་སྡེས་མཁའ་དམག་གནམ་གྲུ་དང་། ཁྲབ་ལྡན་འཐབ་འཁོར་(tanks)དམིགས་བསལ་དཔུང་ཚོགས་ (special force) སོགས་དྲག་ཆས་ཀྱི་བཀོད་པ་མཛེས་ལ་དེང་རབས་ཀྱི་གཞས་མ་གཏམ་(rap-rock)སྒྲ་འཇུག་བྱས་པའི་བརྙན་འཕྲིན་སྒྲིག་བཟོ་བྱས་ཏེ། ན་གཞོན་མི་རབས་གསར་པ་དམག་དཔུང་ལ་འཛུལ་ཞུགས་བྱེད་པའི་དྲིལ་བསྒྲགས་དང་འབོད་སྐུལ་བྱེད་ཀྱི་ཡོད།

བརྙན་ཐུང་ནང་གི་གཞས་ཚིག་ཅིག་ནི། (སོད། སོད། སོད་ཅེས་པའི་བཀའ་སྒིག་བཞིན་ཡོད།)ཅེས་པ་དེ་ཡིན་པ་དང་། གཞས་གདངས་དང་ལྷན་མེ་མདའ་འཕེན་མཁན་ཐོག་མ་(first person shooter)ཞེས་པའི་བརྙན་འཕྲིན་རྩེད་ཆས་ནང་གི་ལེ་ཚན་(Call of Duty)འགན་འཁྲིའི་འབོད་སྒྲ་ཞེས་པ་དཔེར་བླངས་ཏེ། ན་གཞོན་འགའ་ཞིག་འབོད་འགུག་གིས་མེ་མདའི་དམིགས་པ་གཏོད་དུ་འཇུག་པའི་བརྙན་ཐུང་ཞིག་ཡིན་པ་དང་། བརྙན་ཐུང་ནང་མེ་མདའི་དམིགས་འབེན་གྱི་ནུས་མཐུའི་རང་བཞིན་གསལ་ཁ་དོད་པོ་བཀོད་མེད་ཀྱང་། “དམག་འཁྲུག་གི་དུས་ཟིང་ནམ་ཡང་འབྱུང་སྲིད་པས། ཁྱོད་ཚོ་གྲ་སྒྲིག་ཨང་གསར་ཡིན་ནམ།”ཞེས་དོགས་ཟོན་དགོས་པའི་ཉེན་བརྡ་གཏོང་གི་ཡོད་པ་རེད།

བརྙན་ཐུང་དེ་བཞིན་རྒྱ་ནག་བདེ་སྲུང་ལྷན་ཁང་གི་གཞུང་འབྲེལ་དྲ་ཚིགས་ངོས་སུ་ཡོད་པ་དང་། མི་དམངས་བཅིངས་འགྲོལ་དམག་གི་གྲངས་འབོར་ས་ཡ་ ༢.༣ ལས་དམག་འཐབ་ཀྱི་ནུས་པ་གོང་འཕེལ་གཏོང་ཕྱིར་དམག་དཔུང་གི་གྲངས་འབོར་འབུམ་ ༣ ཙམ་ཉུང་ཕྲི་བྱ་རྒྱུ་དང་། མཁའ་དམག མཚོ་དམག དེ་བཞིན་འཕུར་མདའ་བཟོ་སྐྲུན་གྱི་ལས་གཞི་སོགས་ལ་དོ་སྣང་དང་འགྲོ་གྲོན་མང་དུ་གཏོང་རྒྱུའི་སྐོར་ཡང་བཀོད་ཡོད་པ་རེད།

བརྙན་ཐུང་དེས་མི་དམངས་བཅིངས་འགྲོལ་དམག་གི་དེང་རབས་འཕྲུལ་རྩལ་གྱི་ནུས་པ་དང་དྲག་པོའི་དམག་འཐབ་ཀྱི་ནུས་ཤུགས་ཇི་ཙམ་ཡོད་མེད་ཀྱི་སྣང་བརྙན་གཤོམ་སྟོན་བྱས་ཡོད་པ་དང་། རྒྱལ་ཞེན་ལྟ་བ་མཁྲེགས་པོ་རྒྱུད་འཛིན་བྱེད་ཅིང་། རྒྱལ་སྤྱིའི་དཔུང་སྟོབས་ཆེ་ཤོས་ཀྱི་རྒྱལ་ཁབ་དེས་དམག་འཐབ་ཀྱི་ནུས་པ་གོང་འཕེལ་དང་རྒྱ་སྐྱེད་གཏོང་བར་ཧུར་བརྩོན་མུ་འཐུད་བྱེད་ཀྱི་ཡོད་པ་རེད། རྒྱ་ནག་གི་མཁའ་དམག་གནམ་གྲུ་སྐྱེལ་འདྲེན་གྲུ་གཟིངས་ལེའོ་ནིང་(Liaoning)ཁོ་ན་ལ་ཆ་མཚོན་ན་བཟོ་བཀོད་འབུར་དུ་ཐོན་པ་བྱས་ཡོད་ལ། དེ་བཞིན་དེང་རབས་ཅན་གྱི་ཁྲབ་ལྡན་འཐབ་འཁོར་(tanks)དང་། མཁའ་དམག་གནམ་གྲུ་(warplanes)འཐབ་རྒོལ་ཐད་འཕུར་གནམ་གྲུ་(attack helicopters )སྒྱོགས་མདེལ་སོགས་ཇི་འདྲ་ཡོད་མེད་ཕྱི་ཟླ་དགུ་པའི་ནང་གཞི་རྒྱ་ཆེ་བའི་དྲག་ཆས་འགྲེམས་སྟོན་སྐབས་པེ་ཅིན་གཞུང་ལམ་དུ་བཏོན་ཡོད་པ་རེད།

བརྙན་ཐུང་གི་གཞས་ཚིག་གཅིག་ནི། ཞི་བདེ་ཡི་ཕོ་ཉ་ཡིན། རྒྱལ་ཁབ་ཀྱི་ལམ་སྟོན་པ་ཡིན། དྲག་པོ་ཡི་ཕོ་ཉ་ཡིན། སྟག་ངར་གྱི་མཆེ་བ་ཡིན། ཞེས་པ་དེ་རེད།

རྒྱ་ནག་གི་སྔར་སྲོལ་སྐམ་སའི་དམག་འཐབ་ལ་བརྟེན་ནས་ཐའེ་ཝན་སོགས་ཡུལ་གྲུ་གཞན་ལ་བཙན་འཛུལ་བྱེད་པའི་ཁ་ཕྱོགས་བསྒྱུར་སྟེ། ད་ཆ་རྒྱ་ནག་མི་དམངས་བཅིངས་འགྲོལ་དམག་གིས་དེང་རབས་འཕྲུལ་རྩལ་ལ་བརྟེན་ནས་ཤར་རྒྱ་ནག་རྒྱ་མཚོར་མྱུལ་ཞིབ་དང་། ཨེ་དྷན་མཚོ་ཁུག་གི་མཚོ་ཇག་གཏོར་རྒོལ། ལྷོ་རྒྱ་ནག་རྒྱ་མཚོའི་བདག་དབང་སྲུང་སྐྱོབ་སོགས་གཞན་ལ་འཇིགས་སྐུལ་བྱེད་པའི་རྣམ་པ་གསར་པ་ཞིག་ཏུ་གྱུར་ཡོད་པ་རེད།