དེ་རིང་སྔ་དྲོར་རྔ་བ་རྫོང་གི་ཁྲོམ་གཞུང་དུ་ཞི་རྒོལ་གནང་མཁན་ཀིརྟི་དགོན་གྱི་གྲྭ་བློ་བཟང་བསྟན་པ་ལགས་ཀློད་གྲོལ་བཏང་ཡོད་འདུག
བོད་མི་ཞིག་གིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། དེ་རིང་སྔ་དྲོར་རྔ་བ་ཀིརྟི་དགོན་གྱི་གྲྭ་བློ་བཟང་བསྟན་པ་ལགས་སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་གྱི་ནར་མ་སོན་པའི་གཞོན་ནུའི་བཙོན་ཁང་ཐོས་ཞན་ཟེར་བ་ཞིག་ནས་ཀློད་གྲོལ་བཏང་སྟེ། སང་ཉིན་ཕྱིར་ཕ་ཡུལ་དུ་འབྱོར་གྱི་ཡོད་པ་དང་། ཁོང་གི་ནང་མི་སོགས་ཁྲིན་ཏུའུ་རུ་ཕེབས་བསུར་ཕྱིན་ཡོད་འདུག
གྲྭ་བློ་བཟང་བསྟན་པ་ལགས་ཀྱིས་ ༢༠༡༤ ལོའི་ཕྱི་ཟླ་ ༡༡ ཚེས་ ༧ ཉིན་རྔ་བ་རྫོང་གི་ཁྲོམ་གཞུང་དུ། སྒང་ལ་བོད་ཀྱི་རྒྱལ་དར་ཡོད་པའི་༧གོང་ས་མཆོག་གི་སྐུ་པར་ཆེན་པོ་ཞིག་གནམ་ལ་འཕྱར་ཏེ་བོད་ལ་རང་དབང་དགོས། རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས་ཞེས་པའི་འབོད་ཚིག་བསྒྲགས་ནས་ཁྲོམ་སྐོར་བྱས་ཡོད་པ་དང་། དེ་མ་ཐག་རྒྱ་གཞུང་ཉེན་རྟོག་པས་འཛིན་བཟུང་བྱས་ཏེ་མནར་གཅོད་སྣ་ཚོགས་མྱངས་མཐར་རྔ་བ་ཁུལ་གྱི་ལྟེ་གནས་འབར་ཁམས་འབྲིང་རིམ་མི་མང་ཁྲིམས་ཁང་ཟེར་བས། རྒྱལ་ཁབ་ལ་ངོ་ལོག་གི་བྱ་སྤྱོད་སྤེལ་བའི་ཉེས་མིང་འོག ཁྲིམས་རར་ནང་མི་དང་ཁྲིམས་རྩོད་པ་གཅིག་ཀྱང་སྐད་གཏོང་དུ་མ་བཅུག་པར་ལོ་ ༢ གྱི་ཁྲིམས་ཐག་བཅད་ཡོད་པ་རེད།
གསར་འགོད་པ། པདྨ་མཚོ།
