ཁ་ན་ཌའི་ནུབ་རྒྱུད་མངའ་སྡེ་ཨལ་བྷར་ཊིའི་ནང་མེ་སྐྱོན་ཆེན་པོ་བྱུང་སྟེ་སྡོད་མང་ཁྲི་ ༩ མ་ཟིན་ཙམ་གྱིས་རང་ཁྱིམ་བསྐྱུར་ཏེ་བྲོས་བྱོལ་དུ་འགྲོ་དགོས་བྱུང་ཡོད་འདུག
ཟླ་འདིའི་ཕྱི་ཚེས་ ༡ ཉིན་ནས་བཟུང་ཁ་ན་ཌའི་མངའ་སྡེ་ཨལ་བྷར་ཊི་(Alberta)ཡི་བྱང་ཤར་གྱི་ནགས་ཚལ་ཆེན་མོའི་ནང་མེ་སྐྱོན་བྱུང་སྟེ། ནགས་ཚལ་གྱིས་མཐའ་ནས་བསྐོར་བའི་གྲོང་ཁྱེར་ཧྥོར་ཊི་མེག་མཱ་རི་(Fort McMurray)ནང་ཚིག་སྐྱོན་ཆེན་པོ་བྱུང་ཡོད་པ་དང་། གྲོང་ཁྱེར་དེའི་ཡུལ་མི་དང་སི་རི་ཡ་ནས་ཡོང་བའི་སྐྱབས་བཅོལ་བ་བཅས་མི་གྲངས་ ༨ ༨༠༠༠ ལྷག་གིས་སྡོད་ཁྱིམ་རྒྱབ་ཏུ་བསྐྱུར་ཏེ་གནས་གཞན་ལ་བྲོས་བྱོལ་དུ་འགྲོ་དགོས་བྱུང་ཡོད་པ་དང་། བརྒྱུད་ལམ་ཁག་ནས་གནས་ཚུལ་ཐོན་པ་ལྟར་ན། ཐེངས་འདིའི་མེ་སྐྱོན་ཁྲོད་མི་ལ་ཤི་རྨས་བྱུང་མེད་ཀྱང་། སྡོད་ཁང་ ༡༦༠༠ ལྷག་གི་གཙོས་ཁང་རྩེག་དང་རླངས་འཁོར་སོགས་ལ་ཚིག་སྐྱོན་ཆེན་པོ་བྱུང་སྟེ། ཁ་ན་ཌའི་ལོ་རྒྱུས་ནང་བྱུང་མ་མྱོང་བའི་མེ་སྐྱོན་ཚབས་ཆེན་ཕོག་ཡོད་འདུག
མངའ་སྡེ་གཞུང་གིས་དཀའ་ངལ་འཕྲད་པའི་མི་མང་ལ་སྣེ་ལེན་གྱི་ལྟེ་གནས་ཁང་ ༨ གསར་འཛུགས་བྱས་ཏེ། སྡོད་ཁྱིམ་བསྐྱུར་ནས་བྲོས་བྱོལ་དུ་ཡོང་བའི་མི་མང་ལ་སྡོད་གནས་དང་བཟའ་བཏུང་གི་མཐུན་རྐྱེན་སྦྱོར་གྱི་ཡོད་པ་དང་སྦྲགས། མེ་གསོད་མི་སྣ་ ༡༠༠༠ ལྷག་དང་། ཐད་འཕུར་གནམ་གྲུ་ ༡༥༠ ཙམ། དེ་བཞིན་མེ་གསོད་གནམ་གྲུ་ ༢༢ བཅས་ཆེད་གཏོང་གིས་མེ་གསོད་ཐབས་བྱེད་བཞིན་ཡོད་ཀྱང་། བརྒྱུད་ལམ་ཁག་ནས་གནས་ཚུལ་ཐོན་པ་ལྟར་ན། སྡོད་མང་ཁུལ་གྱི་མེ་སྐྱོན་ཚོད་འཛིན་བྱེད་ཐུབ་ཡོད་ཀྱང་། ཚ་བ་དང་སྐམ་གཤིས་ཆེ་བ། ལྷག་རླུང་རྒོད་པའི་རྒྱུན་ལྡན་མིན་པའི་གནམ་གཤིས་ཀྱིས་ནགས་ཚལ་ཁུལ་གྱི་མེ་ཤུགས་སྔར་ལས་ཆེ་རུ་འགྲོ་བཞིན་ཡོད་པ་དང་། ད་ལྟའི་བར་ས་ཁྱོན་སྤྱི་ལེ་ཆིག་སྟོང་ལྷག་མེ་ཡིས་ཚིག་ཡོད་འདུག
ཟླ་འདིའི་ཕྱི་ཚེས་ ༥ ཉིན་ཁ་ན་ཌའི་སྲིད་བློན་ཇ་སི་ཊིན་ཊིར་ཌོ་(Justin Trudeau) ལགས་ཀྱིས་གྲོས་ཚོགས་ནང་། རྒྱ་གྲམ་དམར་པོའི་ཚོགས་པ་ནས་དྲ་རྒྱ་དང་ཁ་པར་སོགས་ཀྱི་བརྒྱུད་ལམ་ནས་རོགས་དངུལ་བསྡུ་རུབ་བྱེད་བཞིན་ཡོད་པ་དང་། རྒྱ་གྲམ་དམར་པོ་ཚོགས་པས་རོགས་དངུལ་ཅི་ཙམ་བསྡུ་ཐུབ་ན། སྲིད་གཞུང་ནས་གྲངས་འབོར་དེ་རང་གི་རོགས་དངུལ་སྤྲོད་རྒྱུ་ཡིན་སྐོར་ཁྱབ་བསྒྲགས་བྱས་ཡོད་འདུག
གསར་འགོད་པ། པདྨ་མཚོ།
