ཨེ་ཊ་ལིའི་རྒྱལ་ས་རོམ་དུ་བསྡུས་པའི་ཕྱི་ལོ་ ༢༠༡༦ ལོའི་སྤྱི་ལེ་ ༢༠ ཡི་རྒྱལ་སྤྱིའི་བུད་མེད་ཀྱི་འདུར་རྒྱུག་འགྲན་སྡུར་ཁྲོད་བོད་རིགས་ལུས་རྩལ་བ་ཆོས་དབྱངས་སྐྱིད་ལགས་ལ་སྒེར་གྱི་བྱ་དགའ་ཨང་གསུམ་པ་ཐོབ་ཡོད་འདུག
དེ་རིང་མཚོ་སྔོན་རྒྱང་སྒྲོག་བརྙན་འཕྲིན་ཁང་གིས་གནས་ཚུལ་སྤེལ་བ་ལྟར་ན། རྒྱལ་སྤྱིའི་ལུས་རྩལ་མཉམ་འབྲེལ་མཐུན་ཚོགས་(International Association of Athletics Federations)ཀྱིས། ཨེ་ཊ་ལིའི་རྒྱལ་ས་རོམ་དུ་བསྡུས་པའི་ཕྱི་ལོ་ ༢༠༡༦ ལོའི་སྤྱི་ལེ་ ༢༠ ཡི་རྒྱལ་སྤྱིའི་བུད་མེད་ཀྱི་འདུར་རྒྱུག་འགྲན་སྡུར་ཁྲོད། བོད་རིགས་བུ་མོ་ཆོས་དབྱིངས་སྐྱིད་ལགས་ལ་ཐུན་མོང་གི་བྱ་དགའ་ཨང་དང་པོ་དང་། སྒེར་གྱི་བྱ་དགའ་ཨང་གསུམ་པ་ཐོབ་ཡོད་འདུག
ཐེངས་འདིའི་འདུར་རྒྱུག་ཁྲོད་ཨང་དང་པོ་ལེན་མཁན་རྒྱ་ནག་གི་འདུར་རྒྱུག་པ་ལོའུ་ཧུང་(Liu Hong) གི་མགྱོགས་ཚད་ཆུ་ཚོད་གཅིག་དང་སྐར་ཆ་ ༢༥། སྐར་མ་ང་དགུ་ཡིན་པ་དང་། ཨང་གཉིས་པ་མེག་སི་ཁོ་ཡི་བུ་མོ་གྷོན་ཛ་ལི་ཛི་(Gonzalez)ཡི་མགྱོགས་ཚད་ཆུ་ཚོད་གཅིག་དང་སྐར་མ་ ༢༦ སྐར་ཆ་ ༡༧། ཨང་གསུམ་པ་ཆོས་དབྱངས་སྐྱིད་ཀྱི་མགྱོགས་ཚད་ཆུ་ཚོད་གཅིག་དང་སྐར་མ་ ༢༦ སྐར་ཆ་ ༤༩ ཡིན་འདུག
རྒྱལ་སྤྱིའི་ལུས་རྩལ་མཉམ་འབྲེལ་མཐུན་ཚོགས་ཀྱི་དྲ་རྒྱའི་ཐོག་གནས་ཚུལ་སྤེལ་བའི་ནང་། འདུར་རྒྱུག་གི་མཇུག་མཐའི་ས་མཚམས་སུ་བསླེབ་རྒྱུར་སྤྱི་ལེ་ ༢ མ་གཏོགས་མེད་པར་ཆེས་ཛ་དྲག་གི་སྐབས་དེར། ཆོས་དབྱིངས་སྐྱིད་ལགས་ཀྱོག་མཚམས་ཤིག་ནས་ས་ལ་འགྱེལ་ཡོད་ཀྱང་། སྐར་མ་གཅིག་གི་ནང་ཁོང་མོ་ཨང་གཉིས་པ་ཐོབ་མཁན་མེག་སི་ཁོ་ཡི་འདུར་རྒྱུག་པ་གྷོན་ཛ་ལི་ཛི་(Gonzalez)ལགས་ཀྱི་ཐག་ཉེ་སར་བསླེབས་ཐུབ་ཡོད་སྐོར་བརྗོད་འདུག
ཉེ་སྔོན་ཕོར་ཆི་སྒལ་(Portugal)གྱི་ནང་བསྡུས་པའི་ཕྱི་ལོ་ ༢༠༡༦ ལོའི་རྒྱལ་སྤྱིའི་མཆོང་རྒྱུག་འདུར་གསུམ་གྱི་འགྲན་ཚོགས་ཐོག ཆོས་དབྱིངས་སྐྱིད་ལགས་ཀྱིས་མགྱོགས་ཚད་དུས་ཚོད་གཅིག་དང་། སྐར་མ་ཉེར་བདུན་སྐར་ཆ་ང་གཉིས་ཀྱི་ནང་སྤྱི་ལེ་ ༢༠ ཡི་བུད་མེད་ཀྱི་འདུར་རྒྱུག་འགྲན་སྡུར་ཁྲོད་བྱ་དགའ་ཨང་དང་པོ་བླངས་ཡོད་འདུག
གསར་འགོད་པ། པདྨ་མཚོ།
