“དཀར་ཟས་བ”ཞེས་པའི་རྩོམ་ཡིག་ལ་བྱ་དགའ་ཐོབ།

ད་ལོའི་རྒྱལ་སྤྱིའི་མེན་བྷོས་ཁིར་རྩོམ་རིག་བྱ་དགའ་ལྷོ་ཀོ་རི་ཡའི་བུད་མེད་རྩོམ་པ་པོ་ཧཱན་གཱང་གི་བརྩམས་ཆོས་“དཀར་ཟས་བ་”ཞེས་པར་ཐོབ་འདུག

ཕྱི་ཟླ་ ༥ པའི་ཚེས་ ༡༧ ཉིན། དབྱིན་ཇིའི་རྒྱལ་ས་ལོན་ཌོན་ཏུ། ༢༠༡༦ ལོའི་རྒྱལ་སྤྱིའི་མེན་བྷོས་ཁིར་རྩོམ་རིག་བྱ་དགའ་(International Manbooker Prize)སྤྲོད་བཞེས་ཀྱི་ཚོགས་འདུ་ཚོགས་པའི་སྟེང་། དཔྱད་འདེམས་པ་ལྔ་ལས་གྲུབ་པའི་ཚོགས་ཆུང་གིས་བརྩམས་ཆོས་ ༡༥༥ ཙམ་གྱི་ཁྲོད་ནས་དཔྱད་འདེམས་བྱས་མཐར། ལྷོ་ཀོ་རི་ཡའི་བུད་མེད་རྩོམ་པ་པོ་ལྕམ་ཧཱན་གཱང་(Han Kang)ལགས་ཀྱིས་བརྩམས་པའི་“དཀར་ཟས་བ་”<< The Vegetarian>>ཞེས་པ་ཨང་དང་པོར་བདམས་ཐོན་བྱུང་འདུག

བརྩམས་ཆོས་དེ་ནི། རྩོམ་པ་པོས་ ༡༩༨༠ ལོའི་ཀོ་རི་ཡའི་ལོ་རྒྱུས་རང་བཞིན་ལྡན་པའི་དམངས་གཙོ་འཐབ་རྩོད་ཀྱི་ལས་འགུལ་ལ་སྲིད་གཞུང་གིས་དྲག་གནོན་བྱས་པ་རྒྱབ་ལྗོངས་སུ་བྱས་ཏེ་བྲིས་ཡོད་པ་དང་། འགྲོ་བ་མི་ལ་འཚེ་བ་དང་བློས་གཏོང་། སྙིང་རྗེ་བཅས་རང་ཆས་སུ་ཡོད་པའི་གོ་རྟོགས་བསྐྱེད་པའི་འབྲས་བུ་ལས་བྱུང་བ་ཞིག་ཡིན་སྐོར་ནེའུ་ཡོག་དུས་བབ་ཀྱི་བཅར་འདྲིའི་ནང་དུ་གསུངས་འདུག

བུད་མེད་རྩོམ་པ་པོ་ཧཱན་གཱང་གིས་འདས་བའི་ལོ་ངོ་ ༢༠ ལྷག་གི་རིང་ལ་ཀོ་རི་ཡིའི་སྐད་ཡིག་ནང་དུ་སྙན་ངག་དང་རྟོག་སྒྲུང་གི་རྩོམ་མང་པོ་སྤེལ་མྱོང་བ་དང་། “དཀར་ཟས་པ།”ཞེས་པ་ནི་ཁོ་མོའི་བརྩམས་ཆོས་རྣམས་ཀྱི་ཁྲོད་ནས་དབྱིན་ཡིག་ཏུ་བསྒྱུར་བའི་བརྩམས་ཆོས་ཐོག་མ་དེ་ཡིན་འདུག

རྒྱལ་སྤྱིའི་མེན་བྷོས་ཁིར་རྩོམ་རིག་བྱ་དགའ་ཞེས་པ་དེ་ནི་ ༢༠༠༥ ལོར་ཐོག་མར་མགོ་བཙུགས་པ་དང་། ༢༠༡༥ ལོའི་བར་དུ་ལོ་གཉིས་རེའི་ནང་དུ་རྒྱལ་ཁབ་དང་རིགས་རུས་ས་མཚམས་མེད་པར་དབྱིན་ཡིག་གམ་དབྱིན་ཡིག་ནང་དུ་བསྒྱུར་བའི་བརྩམས་ཆོས་རྩེ་ཕུད་དག་ལ་སྤྲོད་སྲོལ་ཡོད་ཀྱང་། ༢༠༡༦ ལོ་ནས་བཟུང་དབྱིན་བསྒྱུར་བྱས་པའི་བརྩམས་ཆོས་ཁོ་ནར་སྟེར་རྒྱུ་དང་། བྱ་དགའི་མ་དངུལ་དབྱིན་སྒོར་ ༥༠༠༠༠ ནི་རྩོམ་པ་པོ་དང་ཡིག་སྒྱུར་བ་གཉིས་ལ་བགོ་བཤའ་བྱེད་རྒྱུའི་ཐག་གཅོད་བྱས་ཡོད་འདུག

ཆོས་རྒྱལ་སྐྱབས་ཀྱིས་བསྡུ་སྒྲིག་བྱས།