ཐའེ་ཝན་སྲིད་འཛིན་ལས་ཁུངས་ནས་བསྒྲགས་གཏམ་ཞིག་སྤེལ་ཏེ་ཧོང་ཀོང་ནི་ཆབ་སྲིད་ཀྱི་ཚོར་ཤུགས་སྐྱེན་པའི་ས་ཁུལ་ཞིག་ཡིན་སྟབས་ཐའེ་ཝན་མཚོ་འགག་གི་བདེ་འཇགས་འགན་སྲུང་སླད་དུ་མཱ་ཡེན་ཇོ་ཧོང་ཀོང་ནང་སྐོར་སྐྱོད་མི་ཆོག་ཟེར།
དེ་རིང་རོའུ་གསར་ཁང་གིས་གནས་ཚུལ་སྤེལ་བ་ལྟར་ན། ཐའེ་ཝན་མཚོ་འགག་གི་སྲིད་གཞུང་གསར་བས་ཐའེ་ཝན་མཚོ་འགག་གི་བདེ་འཇགས་སླད་དུ་གོ་མན་ཏང་སྲིད་གཞུང་གི་སྲིད་འཛིན་ཟུར་བ་མཱ་ཡེན་ཇོ་ཧོང་ཀོང་སྲིད་འཛིན་ས་ཁུལ་ནང་སྐོར་སྐྱོད་མི་ཆོག་པའི་སྐྱོན་བརྗོད་བྱས་ཡོད་འདུག
ཐའེ་ཝན་གོ་མན་ཏང་སྲིད་འཛིན་ལས་ཁུངས་ནས་སྐུ་ཞབས་མཱ་ཡེན་ཇོ་ཧོང་ཀོང་སྲིད་འཛིན་ས་ཁུལ་དུ་སྐོར་སྐྱོད་ལས་གཞི་དེས་ཐའེ་ཝན་མཚོ་འགག་གི་ཆབ་དང་སྤྱི་ཚོགས་ལ་ཕན་གནོད་གང་ཡང་མེད་ལུགས་བཤད་ཅིང་། ལྕམ་ཚའེ་ཡེན་ཝན་གྱི་སྲིད་འཛིན་ལས་ཁུངས་ནས་གླེང་གཞི་དེའི་ཐད་གསར་འགོད་གསལ་བསྒྲགས་ཤིག་སྤེལ་ཏེ། ཧོང་ཀོང་ནི་ཆབ་སྲིད་ཀྱི་ཚོར་ཤུགས་སྐྱེན་པའི་ས་ཁུལ་ཞིག་ཡིན་སྟབས། ཐའེ་ཝན་མཚོ་འགག་ལ་འཕྲད་བཞིན་པའི་རྒྱལ་སྤྱིའི་གནས་བབ་དང་། ཐའེ་ཝན་མཚོ་འགག་གི་བདེ་འཇགས་དང་ཁེ་ལས་སོགས་འགན་སྲུང་བྱེད་ཆེད་སྐུ་ཞབས་མཱ་ཡེན་ཇོ་ཡི་སྐོར་སྐྱོད་བཀག་སྡོམ་བྱས་པ་ཡིན་སྐོར་བརྗོད་འདུག
ཡང་ཧོང་ཀོང་རང་དབང་གསར་ཁང་གིས་སྤེལ་བའི་གནས་ཚུལ་ཞིག་གི་ནང་། གོ་མན་ཏང་སྲིད་འཛིན་ལས་ཁུངས་ནས་སྐུ་ཞབས་མཱ་ཡེན་ཇོ་ཡི་སྐོར་སྐྱོད་བཀག་སྡོམ་བྱས་པ་དེ་ནི་ཐའེ་ཝན་མཚོ་འགག་གི་སྲིད་འཛིན་ཟུར་བར་གུས་བརྩི་མ་བྱས་པ་དང་། བྱ་སྤྱོད་དེས་ཐའེ་ཝན་མཚོ་འགག་ནི་རང་དབང་དམངས་གཙོའི་རྒྱལ་ཁབ་ཅིག་ཡིན་པའི་སྣང་བརྙན་ལ་གཏོར་བརླག་བཟོས་པ་ཡིན་ཚུལ་བཤད་འདུག
དེ་རིང་ཞོགས་པར་གོ་མན་ཏང་སྲིད་གཞུང་གི་སྲིད་འཛིན་ཟུར་བ་མཱ་ཡེན་ཇོ་ཡིས་ཐའེ་ཝན་དབུས་བརྙན་འཕྲིན་ཁང་གཙོས་པའི་གནས་འཕྲིན་བརྒྱུད་ལམ་ཁག་གི་གསར་འགོད་པར། ང་ཧོང་ཀོང་ནང་སྐོར་སྐྱོད་མི་ཆོག་པའི་ཐག་གཅོད་དེའི་ཐད་སྤྱི་དམངས་ནང་གླེང་གཞི་སྣ་ཚོགས་ཡོང་གི་ཡོད་པ་རེད། ཐག་གཅོད་དེ་དགོས་ངེས་ཤིག་ཡིན་ནམ། དེ་དྲང་བདེན་ཞིག་ཡིན་ནམ། དེ་ལ་གནས་ལུགས་རྒྱུ་མཚན་ལྡན་ནམ། གནད་དོན་དེའི་ཐའེ་ཝན་རྒྱལ་ཡོངས་མི་མང་གིས་མཐོང་གི་ཡོད་སྟབས། སྤྱི་དམངས་ཀྱིས་གནད་དོན་དེའི་ཐོག་ཁོ་རང་ཚོའི་ལྟ་ཚུལ་དང་བསམ་ཚུལ་ཡང་དག་ཅིག་འདོན་ངེས་རེད། ཅེས་བཤད་ཡོད་སྐོར་འཁོད་འདུག
གནས་ཚུལ་ལྟར་ན། ཕྱི་ལོ་ ༡༩༤༩ ལོར་གོ་གུང་གཉིས་ཀྱི་ཟིང་འཁྲུག་ཁྲོད་མའོ་ཙེ་ཏུང་གི་དབང་སྒྱུར་འོག་གི་གུང་ཁྲན་ཏང་ལ་རྒྱལ་ཁ་ཐོབ་རྗེས། ཅང་ཅེ་ཧྲིའི་གཙོ་འཛིན་འོག་གི་ཐའེ་ཝན་གོ་མན་ཏང་དེང་གི་ཐའེ་ཝན་མཚོ་འགག་ཏུ་བྲོས་བྱོལ་དུ་བསྐྱོད་དགོས་བྱུང་བ་དང་། སྐབས་དེ་ནས་བཟུང་ཐའེ་ཝན་མཚོ་འགག་ཕྱིར་རྒྱ་ནག་གི་མངའ་འོག་ཏུ་འཇུག་རྒྱུ་ནི་དམར་ཤོག་ཚོགས་པའི་འགྱུར་མེད་དམ་བཅའ་ཡིན་པ་དང་། ཕྱི་ལོ་ ༡༩༩༧ ལོར་དེ་སྔོན་དབྱིན་ཇིའི་མི་སེར་སྤེལ་ཡུལ་དུ་གྱུར་བའི་ཧོང་ཀོང་གྲོང་ཁྱེར་རྒྱ་ནག་གཞུང་གིས་བཏོན་པའི་ “རྒྱལ་ཁབ་གཅིག་ལམ་ལུགས་གཉིས” ཀྱི་རྩ་འཛིན་འོག་ཕྱིར་རྒྱ་ནག་གི་སྲིད་དབང་འོག་རྩིས་ལེན་བྱས་པ་དང་། སྤྱིར་བཏང་རྒྱ་ནག་སྲིད་གཞུང་གིས་བཏོན་པའི” རྒྱལ་ཁབ་གཅིག་ལུགས་གཉིས” ཀྱི་རྩ་འཛིན་འོག ཧོང་ཀོང་སྲིད་འཛིན་ས་ཁུལ་ནི་དཔལ་འབྱོར་འཁོར་རྒྱུག་གི་ལྟེ་བ་ཆགས་ཀྱི་ཡིན་སྟབས། ཧོང་ཀོང་སྲིད་འཛིན་ས་ཁུལ་ནང་ཚད་མཐོའི་རང་སྐྱོང་གི་གནས་བབ་ཁས་ལེན་ཁག་ཐག་བྱས་ཡོད་ནའང་། རྒྱ་ནག་གཞུང་གི་དམ་དྲག་སྲིད་ཇུས་འོག ཧོང་ཀོང་མི་མང་གི་རང་དབང་དམངས་གཙོའི་སྲིད་འཛིན་འོས་བསྡུའི་ཁེ་ཐོབ་ཀྱི་རེ་འབོད་བསྒྲགས་ཏེ་ཁྲོམ་སྲང་གང་སར་ཞི་བའི་ངོ་རྒོལ་ལས་འགུལ་སྤེལ་མུས་ཡིན་པ་རེད།
རྒྱ་ནག་གཞུང་གིས་ཐའེ་ཝན་མཚོ་འགག་ལའང་ “རྒྱལ་ཁབ་གཅིག་ལམ་ལུགས་གཉིས” ཀྱི་ཆ་རྐྱེན་འདོན་གྱི་ཡོད་ནའང་། ཐའེ་ཝན་མཚོ་འགག་གི་དཔོན་རིགས་ཚོས་དེ་དོན་ངོས་ལེན་བྱེད་ཀྱིན་མེད་པ་རེད། དེར་མ་ཟད་གལ་ཏེ་ཐའེ་པེ་གཞུང་ནས་པེ་ཅིན་གཞུང་གིས་བཏོན་པའི་ “རྒྱ་ནག་རྒྱལ་ཁབ་གཅིག” གི་རྩ་འཛིན་འོག ཐའེ་ཝན་མཚོ་འགག་རྒྱ་ནག་གི་ཆ་ཤས་ཡིན་པར་ངོས་ལེན་མི་བྱེད་ཚེ། རྒྱ་ནག་གཞུང་གིས་ཐའེ་ཝན་མཚོ་འགག་ལ་ལྡོག་ཕྱོགས་ཀྱི་གནོན་ཤུགས་སྤྲོད་སྲིད་པའི་ཉེན་བརྡ་གཏོང་མུས་ཡིན་པ་དང་། ད་ལྟའི་ཐའེ་ཝན་མཚོ་འགག་གི་སྲིད་འཛིན་གསར་བ་ལྕམ་ཚའེ་ཡེན་ཝན་གྱིས་ “ད་ལྟའི་ཐའེ་རྒྱ་གཉིས་ཀྱི་འབྲེལ་ལམ་དང་དེའི་གནས་བབ་རྒྱུན་འཁྱོངས” བྱེད་པ་ལས་ “རྒྱ་ནག་རྒྱལ་ཁབ་གཅིག” གི་རྩ་འཛིན་ངོས་ལེན་བྱེད་ཀྱིན་མེད་པ་རེད།
གསར་འགོད་པ། པདྨ་རྒྱལ།
