བོད་མིའི་སྐྱབས་མགོན་༧རྒྱལ་བ་རིན་པོ་ཆེ་མཆོག་གིས་གལ་ཏེ་སངས་རྒྱས་མི་ཡུལ་འདིར་འབྱོན་པའི་དབང་དུ་བཏང་ན་ཁོང་གིས་ཁ་ཆེ་བའི་སྤུན་ཟླ་ཕོ་མོ་ཚོར་མགོན་སྐྱབས་གནང་ངེས་ཡིན་ཞེས་གསུངས་འདུག
དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་གཟའ་ཟླ་བའི་ཉིན་བོད་མིའི་སྐྱབས་མགོན་༧རྒྱལ་བ་རིན་པོ་ཆེ་མཆོག་གིས་རོའུ་ཊར་གསར་འགོད་པར་འབར་མའི་རྒྱལ་སྲིད་སློབ་སྟོན་པ་ལྕམ་ཨང་སན་སུའུ་སྐྱིད་མཆོག་ལ་འབར་མའི་ནང་གི་གྲངས་ཉུང་མི་རིགས་དང་ཁ་ཆེ་གྲངས་ཉུང་མི་རིགས་གཉིས་བར་གྱི་འཁྲུག་ཟིང་ཞི་འགྲིག་བཟོ་རྒྱུའི་བཟང་སྤྱོད་ཀྱི་འགན་འཁྲི་ཡོད་སྐོར་གསུངས་འདུག
༧གོང་ས་རྒྱལ་བ་རིན་པོ་མཆོག་ནས་གསུངས་དོན། ལྕམ་ཨང་སན་སུའུ་སྐྱིད་མཆོག་ནི་ནོ་བྷིལ་ཞི་བདེ་གཟེངས་རྟགས་བཞེས་མཁན་ཞིག་ཡིན་པའི་ཆ་ནས། བཟང་སྤྱོད་ཀྱི་ཐོག་ནས་ཁོང་མོས་འབར་མའི་རྒྱལ་ནང་གི་ནང་པའི་གྲངས་ཉུང་མི་རིགས་དང་ཁ་ཆེ་གྲངས་ཉུང་མི་རིགས་གཉིས་བར་གྱི་འཁྲུག་ཟིང་ཞི་འགྲིག་བཟོ་ཐབས་ལ་འབད་བརྩོན་གནང་དགོས་དང་། ལྕམ་ཨང་སན་སུའུ་སྐྱིད་མཆོག་ནས་ཁ་ཞེ་གཉིས་མེད་ཀྱི་ཐོག་ནས་སྐད་ཆ་བཤད་དགོས་པ་དང་། འབར་མའི་རྒྱལ་ནང་གི་ནང་པའི་གྲྭ་བ་ཁ་ཤས་ཀྱིས་ཁ་ཆེ་བ་ཚོར་ལྡོག་ཕྱོགས་ཀྱི་ལྟ་ཚུལ་འཛིན་གྱི་ཡོད་པ་དང་། དེ་ལྟའི་ལྟ་ཚུལ་འཛིན་མཁན་ནང་པའི་གྲྭ་བ་ཚོས་སངས་ཀྱི་ཞལ་ལ་གཟིགས་དགོས་པ་དང་། ལག་ཏེ་སངས་རྒྱས་མི་ཡུལ་འདིར་འབྱོན་པའི་དབང་དུ་བཏང་ན། ཁོང་གིས་ཁ་ཆེ་བའི་སྤུན་ཟླ་ཕོ་མོ་ཚོར་མགོན་སྐྱབས་གནང་ངེས་ཡིན། ཞེས་སོགས་གསུངས་འདུག
རྒྱལ་བའི་འབོད་སྐུལ་གྱི་ལན་དུ། ལྕམ་ཨང་སན་སུའུ་སྐྱིད་མཆོག་གིས་འབར་མིའི་རྒྱལ་ནང་དུ་འབྱུང་བཞིན་པའི་དཀའ་རྙོག་ཀྱི་གནས་སྟངས་དེ་ནི་མགོ་རྙོག་རྟོགས་དཀའ་བ་ཞིག་ཡིན་སྐོར་བརྗོད་ཡོད་པ་དང་། ཟླ་སྔོན་མར་ཨ་རིའི་རྒྱལ་སྲིད་དྲུང་ཆེ་རྗོན་ཀི་རེའི་སྐོར་སྐྱོད་སྐབས་སུ། ལྕམ་ཨང་སན་སུའུ་སྐྱིད་མཆོག་གིས་རའོ་ཧེན་གྷ་ (Rohingya) ཁ་ཆེ་གྲངས་ཉུང་མི་རིགས་ཀྱི་རྩོད་རྙོག་འདུམ་ཐབས་སུ་འབར་མའི་རྒྱལ་ཁབ་ནང་ཅུང་གུ་ཡངས་དགོས་པ་མ་ཟད། ཆོས་ལུགས་གྲུབ་མཐའི་ཕྱོགས་ལྷུང་གི་ཚིག་རྩུབ་ལ་བརྟེན་ནས་རྒྱལ་ནང་གི་རྩོད་རྙོག་ཆེ་རུ་གཏོང་གི་ཡོད་སྐོར་སོགས་བརྗོད་འདུག
གནས་ཚུལ་ལྟར་ན། འདས་པའི་ལོ་ངོ་འདི་དག་རིང་འབར་མའི་རྒྱལ་ནང་གི་ནང་པའི་གྲངས་ཉུང་མི་རིགས་ས་ཁུལ་དུ་འཚོ་ཞིང་སྡོད་མཁན་རའོ་ཧེན་གྷ་ཁ་ཆེ་གྲངས་ཉུང་མི་རིགས་ཐོག་འཛིན་པའི་ཞེ་འཁོན་ཤུགས་ཆེ་རུ་འགྲོན་བཞིན་ཡོད་པ་ལྟར། ཕྱི་ལོ་ ༢༠༡༢ ལོར་འབར་མའི་ནུབ་རྒྱུད་ར་ཀེ་ནི་ (Rakhine) མངའ་སྡེའི་ནང་བྱུང་བའི་འཁྲུག་ཟིང་ཁྲོད་ཡུལ་མི་ ༡༠༠ ལྷག་གི་ཚེ་སྲོག་ཤོར་བ་མ་ཟད། རའོ་ཧེན་གྷ་ཁ་ཆེ་མི་མང་ ༡༢༥༠༠༠ ལྷག་ཞི་ལྷིང་གི་ས་གནས་གཞན་དུ་སྐྱབས་བཅོལ་དུ་འཚོ་དགོས་བྱུང་ཡོད་པ་དང་། གྲངས་ཉུང་མི་རིགས་ཕན་ཚུན་བར་གྱི་ཆོས་ལུགས་གྲུབ་མཐའི་འཁྲུག་ཟིང་དང་འཚོ་གནས་ཀྱི་དབུལ་ཕོངས་ལ་བརྟེན་ནས། རའོ་ཧེན་གྷ་གྲངས་ཉུང་མི་རིགས་སྟོང་ཕྲག་མང་པོ་ལྷ་ཤར་ཨེ་ཤེ་ཡའི་རྒྱལ་ཁབ་ཁག་ནང་ཡུལ་བྱོལ་དུ་བསྐྱོད་དགོས་བྱུང་ཡོད་པ་རེད།
གསར་འགོད་པ། པདྨ་རྒྱལ།
