ཀྲུའུ་ཡོང་ཁང་གི་བཟའ་ཟླ་རྒྱ་ནག་དབུས་བརྙན་འཕྲིན་ཁང་གི་གཙོ་སྐྱོང་བ་ཟུར་པ་ཅཱ་ཞོ་ཡེ་ལ་ལོ་ ༩ དང་ཀྲུའུ་ཡི་བུ་ཀྲུའུ་པེན་ལ་ལོ་ ༡༩ ཡི་ཁྲིམས་ཐག་བཅད་འདུག
ཁ་སང་ཧུའུ་པེ་ཞིང་ཆེན་ཡས་ཁྲང་གྲོང་ཁྱེར་འབྲིང་རིམ་ཁྲིམས་ཁང་ཟེར་བ་ཞིག་གིས། རྒྱ་ནག་དབུས་ཆབ་སྲིད་ལྷན་ཁང་གི་མགོ་ཁྲིད་ཟུར་པ་ཀྲུའུ་ཡོང་ཁང་གི་བུ་ཀྲུའུ་པེན་ལ་ཡོངས་བསྒྲགས་ཁྲིམས་ར་བསྡུས་ཏེ། ཕ་རྒན་གྱི་དབང་ཆ་ལོག་སྤྱོད་ཀྱིས་ལྐོག་རྔན་བླངས་བ་དང་སྤྱི་རྒྱུ་ཧམ་ཟ་བྱས་པ་སོགས་ཁྱོན་རྒྱ་སྒོར་དུང་ཕྱུར་ ༣.༥༠༢ བརྒལ་ཡོད་པའི་ནག་ཉེས་འོག ཁྲིམས་འགལ་གྱིས་བླངས་བའི་རྒྱ་སྒོར་དུང་ཕྱུར་ ༣.༥ ཡིས་ཉེས་ཆད་བཅད་ཡོད་པ་མ་ཟད། ལོ་ ༡༨ ཀྱི་བཙོན་འཇུག་ཁྲིམས་ཐག་བཅད་ཡོད་པ་དང་། ཁྲིམས་རའི་ནང་ཀྲུའུ་པེན་གྱིས་ཁྲིམས་ཁང་གི་ཐག་གཅོད་དང་ལེན་བྱས་ཏེ་བསྐྱར་ཞིབ་ཀྱི་ཁྲིམས་གཏུག་བྱ་རྒྱུ་མིན་སྐོར་བརྗོད་ཡོད་པ་བསྒྲགས་འདུག
ཡང་ཁྲིམས་ཁང་དེས་ཀྲུའུ་ཡོང་ཁང་གི་བཟའ་ཟླ་གཉིས་པ་དང་རྒྱ་ནག་དབུས་བརྙན་འཕྲིན་ཁང་གི་གཙོ་སྐྱོང་བ་ཟུར་པ་ཅཱ་ཞོ་ཡེས་ཀྱང་སྤྱི་ཚོགས་ཐོག་གི་ཤུགས་རྐྱེན་བེད་སྤྱད་དེ་ལྐོག་རྔན་བླངས་བའི་ནག་ཉེས་འོག་ལོ་ ༩ ཡི་བཙོན་འཇུག་ཁྲིམས་ཐག་བཅད་པ་དང་། རྒྱ་སྒོར་ས་ཡ་གཅིག་གི་ཉེས་ཆད་བཅད་ཡོད་སྐོར་ཕྱིར་བསྒྲགས་བྱས་འདུག
རྒྱ་གཞུང་གིས་བསྒྲགས་པའི་གནས་ཚུལ་ལྟར་ན། ཀྲུའུ་པེན་གྱིས་ཀྲུའུ་ཡོང་ཁང་གི་ཆབ་སྲིད་དབང་ཤུགས་ལ་བརྟེན་ནས་སྒེར་གྱི་ཁེ་བཟང་བླངས་ཏེ། རྒྱ་ནག་རྒྱལ་ཡོངས་ནང་དང་ལྷག་པར་དུ་སི་ཁྲོན་ཁུལ་དུ་ཆུ་གློག་དང་རྡོ་སྣུམ། ཡུལ་སྐོར་སྤྲོ་འཆམ་སོགས་ཀྱི་ཐོག་ནས་རྒྱ་སྒོར་ས་ཡ་བརྒྱ་ཡས་མས་ཀྱིས་ཁེ་ལས་གཉེར་ཡོད་པ་དང་། ཕ་བུ་གཉིས་ཀྱིས་དབང་ཆ་ལོག་སྤྱོད་ཀྱིས་ཁྱོན་རྒྱ་སྒོར་ས་ཡ་ ༩༨ ལྷག་(༩༨༠༤.༦༦) གི་ལྐོག་རྔན་བླངས་ཡོད་སྐོར་དང་། ཀྲུའུ་ཚང་གིས་རྒྱ་ནག་ནང་ལོགས་ཙམ་མ་ཟད། ཕྱི་རྒྱལ་དུའང་གསང་བའི་ཆབ་སྲིད་དང་དཔལ་འབྱོར་གྱི་ལྟེ་བ་བཙུགས་ཡོད་སྟབས། ཕྱི་ལོ་ ༢༠༡༣ ལོའི་ལོ་མཇུག་ཏུ་ཞི་ཅིན་ཕིན་གྱི་སྟག་དང་སྤྲང་མ་མཉམ་རྡུང་གི་རྒོལ་རྡུང་ཁྲོད་ཀྲུའུ་ཡོང་ཁང་གི་བཟའ་ཟླ་དང་བུ་སོགས་ཁྱིམ་མི་མང་པོ་འཛིན་བཟུང་བྱས་ཏེ་ཞིབ་བཤེར་བྱེད་མགོ་བརྩམས་ཡོད་པ་རེད།
ཆབ་སྲིད་དཔྱད་ཞིབ་པ་ཚོས་ཀྲུའུ་ཡོང་ཁང་དང་ཁོའི་ཁྱིམ་མི་འབྲེལ་ཡོད་ཚོར་ཞིབ་བཤེར་ཁྲིམས་ཐག་བཅད་པ་དེ་ཞི་ཅིན་ཕིན་དང་ཝང་ཅི་ཧྲན་གཉིས་ཀྱི་ལྐོག་ཟ་རུལ་སུངས་ལ་རྒོལ་རྡུང་གཏོང་བའི་སྲིད་བྱུས་ཀྱི་གྲུབ་འབྲས་ཤིག་ཡིན་པ་མ་ཟད། དམག་ཤོག་ཚོགས་པ་ནང་ཁུལ་གྱི་ཆབ་སྲིད་ཀྱི་དབང་ཆ་འཕྲོག་རྩོད་ལ་ཐོབ་པའི་རྒྱལ་ཁ་ཞིག་ཀྱང་ཡིན་སྟབས། ད་ལྟ་དམར་ཤོག་ཚོགས་པའི་ནང་ཞི་ཅིན་ཕིན་གྱི་སྲིད་དབང་ལ་མངོན་གསལ་དོད་པོས་འགྲན་རྩོད་བྱེད་མཁན་ཧ་ཅང་དཀོན་པོ་ཆགས་ཡོད་སྐོར་རྗོད་ཀྱི་འདུག
གསར་འགོད་པ། པདྨ་མཚོ།
