སྡེ་དགེ་རྫོང་སྨན་ཤོད་མདའ་མའི་བོད་མི་ཚོས་རྒྱ་རིགས་ཚོང་པ་འགས་རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོབ་སྲོག་ཆགས་གླ་བ་ལྐོག་གསོད་བྱས་པའི་ཉེས་དོན་ས་གནས་སྲིད་གཞུང་ལ་ཡར་ཞུ་བྱས་ཡོད་ཀྱང་གནད་དོན་ཆེན་པོ་གང་ཡང་མིན་ལུགས་བརྗོད་དེ་སྣང་མེད་དུ་བཞག་ཡོད་འདུག
འདི་གར་སྡེ་དགེ་རྒྱལ་ཡོངས་ལྷན་ཚོགས་ཀྱི་ཚོགས་གཙོ་འཆམ་ར་དྲི་མེད་རྒྱལ་མཚན་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༢༢ ཉིན་སྡེ་དགེ་རྫོང་སྨན་ཤོད་མདའ་མ་ཡུལ་ཚོ། རྩེ་ཐང་གྲོང་རྡལ་དུ་གནས་སྡོད་བྱས་ཡོད་པའི་རྒྱ་མི་ཚོང་པ་འགའ་ཉེ་འཁྲིས་ཀྱི་ནགས་རི་ནས་མར་བབས་ཡོང་བ་ས་གནས་བོད་མི་ཁག་ཅིག་གིས་མཐོང་སྟེ། ཁོ་ཚོ་ནགས་རིའི་ནང་ག་རེ་བྱེད་དུ་སོང་བ་ཡིན་ནམ་སྙམ་ཏེ་རི་བཤེར་བྱེད་དུ་འགྲོ་སྐབས། རི་ངོས་ཆུང་ཆུང་ཞིག་ནས་ལྕགས་རྙིར་ཚུད་པའི་གླ་རོ་ ༡༣ ཙམ་དང་བྱ་གོ་བོ་གཅིག་གི་རོ་བཅས་རྙེད་ཡོད་པ་མ་ཟད། ནགས་རིའི་ནང་བཞག་པའི་ལྕགས་ཀྱི་རྙི་ཐག་མང་པོ་རྙེད་སོན་བྱུང་ཡོད་སྟབས། དེ་མ་ཐག་བོད་མི་ཚོས་ས་གནས་སྲིད་གཞུང་དང་ཉེན་རྟོག་པར་ཁྲིམས་མེད་ལུགས་མེད་ཀྱི་ཉེས་དོན་ཡར་ཞུ་བྱས་ཡོད་པ་མ་ཟད། ཉེས་ཅན་རྒྱ་མི་གཉིས་བྲོས་ཚར་ཡོད་ཀྱང་བཟའ་ཟླ་ས་གནས་སུ་ཡོད་པས་འཕྲལ་དུ་འཛིན་བཟུང་བྱེད་དགོས་པའི་རེ་སྐུལ་བྱེད་སྐབས། ཉེན་རྟོག་པ་ཞིག་གིས་གླ་བ་བསད་པ་དེ་ནག་ཉེས་ཆེན་པོ་གང་ཡང་མིན་སྐོར་དང་། ཉེས་ཅན་བྲོས་ཚར་ཡོད་ནའང་བཟའ་ཟླ་མི་འབྲོ་བར་ཁག་ཐེག་བྱས་ཏེ་རྒྱ་སྒོར་ ༥༠ གཏའ་མར་འཇོག་རྒྱུ་ཡིན་པས། བཟའ་ཟླ་འཛིན་བཟུང་དང་འདྲི་རྩད་བྱེད་མི་ཆོག་པའི་བཀའ་རྒྱ་བསྒྲགས་ཡོད་འདུག
ས་གནས་བོད་མི་ཞིག་གིས་ཐེངས་འདིའི་གནད་དོན་དང་འབྲེལ་ཏེ་ས་གནས་ཀྱི་མགོ་ཁྲིད་ཚོར་རེ་སྐུལ་ཡི་གེ་ཞིག་བྲིས་ཡོད་པའི་ནང་། ས་གནས་ཀྱི་མགོ་ཁྲིད་ཚོ་ཕྱོགས་གཅིག་ནས་སློབ་གྲྭ་དང་གཉིས་ནས་སྨན་ཁང་། གསུམ་ནས་ཁོར་ཡུག་སྲུང་སྐྱོབ་དང་། ཆུ་དང་ཟམ་པ། ལམ། གློག བརྡ་རྟགས་སོགས་ཀྱི་ཐད་མང་ཚོགས་ལ་དཀའ་ངལ་ག་རེ་ཡོད་མེད་གོང་རིམ་ལ་ཡར་ཞུ་བྱེད་མཁན་གྱི་མི་མང་གི་མགྲིན་ཚབ་པ་ཡིན་ནམ། ཡང་ན་གོང་རིམ་གྱི་བཀའ་ཁོ་ན་མི་མང་ནང་ཁྱབ་བསྒྲགས་བྱས་ཏེ་སྐྱིད་ཉལ་རྒྱག་མཁན་ཡིན་མིན་དང་། སྨན་ཤོད་མདའ་མ་ཡུལ་ཚོའི་ནང་ཕྱི་ལོ་ ༢༠༠༡ ནས་འདི་ལོའི་བར་སྲིད་གཞུང་གིས་གྲོང་གསེབ་འཛུགས་སྐྲུན་ཐད་ལོ་རེར་རྒྱ་སྒོར་ཁྲི་ག་ཚོད་སྤྲོད་ཀྱི་ཡོད་པ་དང་། རོགས་དངུལ་དེའི་ནང་ནས་ག་ཚོད་ཅིག་མི་མང་གི་ལག་ཏུ་འཕྲོད་ཀྱི་ཡོད་པ་དང་། ཡུལ་ཚོའི་འཛུགས་སྐྲུན་ཐད་ཡར་རྒྱས་ག་རེ་ཕྱིན་ཡོད་མེད་སོགས་དོགས་འདྲི་བྱས་འདུག
ཡང་ཁོང་གི་རེ་སྐུལ་ཡི་གེ་དེའི་ནང་ཕྱི་ཚེས་ ༢༢ ཉིན་གྱི་ཕྱི་དྲོ་ནས་ཚེས་ ༢༣ ཉིན་བར་དུ་ཁྱོན་གླ་རོ་ཉི་ཤུ་ལྷག་དང་བྱ་གོ་བོ་ཞིག་གི་རོ་བཅས་རྙེད་ཡོད་པ་དང་། ས་གནས་གཞན་དུ་ད་དུང་ཞིབ་བཤེར་བྱེད་ཐུབ་མེད་ལ། གླ་བ་ནི་འཛམ་གླིང་ཐོག་སྲུང་སྐྱོབ་བྱེད་དགོས་པའི་རིམ་པ་དང་པོའི་རི་སྐྱེས་སྲོག་ཆགས་ཤིག་ཡིན་ལ། དེ་གསོན་མཁན་གྱི་ཉེས་ཅན་ལ་ཉུང་མཐར་ལོ་ ༥ ནས་ ༡༠ བར་གྱི་བཙོན་འཇུག་ཁྲིམས་ཐག་གཅོད་ཀྱི་ཡོད་པ་མ་ཡིན་ནམ། བྱ་གོ་བོ་ནི་རྒྱལ་ཁབ་ཀྱི་རྒྱུན་ཆད་ལ་ཉེ་བའི་སྲོག་ཆགས་ཏེ་སྲུང་སྐྱོབ་རིམ་པ་དང་པོའི་གྲལ་ནས་མ་ཡིན་ནམ་ཞེས་དང་། མཇུག་ཏུ་ཐེངས་འདིའི་ཉེས་དོན་དེར་རྒྱལ་ཁབ་ཀྱི་ཁྲིམས་ལུགས་ལྟར་གསལ་གསལ་རྗེན་རྗེན་གྱིས་ས་གནས་མང་ཚོགས་ཡོངས་ལ་ངོ་སྤྲོད་བྱེད་རོགས་ཞེས་ནན་སྐུལ་བྱས་འདུག
རྒྱ་གཞུང་གིས་བསྒྲགས་པའི་གནས་ཚུལ་ལྟར་ན། དུས་རབས་ ༢༠ པའི་ལོ་རབས་ ༦༠ པའི་ནང་དུ་མདོ་དབུས་མཐོ་སྒང་ན་གླ་བ་ཁྲི་ ༡༠༠ ཡས་མས་ཡོད་ཀྱང་། ད་ལྟ་གླ་བ་ཁྲི་ ༢༠ ཡས་མས་ལས་ལྷག་མེད་སྟབས། གླ་བ་ནི་རྒྱལ་ཁབ་ཀྱིས་གལ་གནད་དུ་བཟུང་སྟེ་སྲུང་སྐྱོབ་བྱེད་དགོས་པའི་རི་སྐྱེས་སྲོག་ཆགས་རིམ་པ་གཉིས་པ་དེ་ཆགས་ཡོད་འདུག
གླ་བ་ནི་རྒྱ་མཚོའི་ངོས་ལས་ས་བབ་མཐོ་ཚད་སྨིས་ ༣༣༠༠ བརྒལ་བའི་བོད་ཀྱི་མཐོ་སྒང་སྟེ། དེང་སང་རྒྱ་གཞུང་གིས་དབྱེ་བའི་རང་སྐྱོང་ལྗོངས་དང་ཞིང་ཆེན་ལྔའི་ནང་གི་ནགས་ལུང་ཁུལ་དུ་འཚོ་སྡོད་བྱེད་བཞིན་ཡོད་པའི་རི་སྐྱེས་སྲོག་ཆགས་ཤིག་ཡིན་ལ། གླ་བ་ཕོ་ཡི་གླ་རྩི་ནི་གསོ་བ་རིག་པའི་སྨན་སྣ་རྩ་ཆེན་ཞིག་ཡིན་པ་མ་ཟད། བཟོ་ལས་འཕེལ་རྒྱས་ཤུགས་ཆེན་ཕྱིན་པའི་དུས་འདིར་ཐོན་སྐྱེད་རྫས་རིགས་གལ་ཆེན་ཞིག་ཀྱང་ཆགས་ཡོད་སྟབས། ནག་ཚོང་བ་ཚོས་གླ་རྩིར་བསམ་ཏེ་གླ་བ་མང་པོ་ལྐོག་གསོད་བྱས་ནས་བོད་ནང་ལོགས་ཀྱི་གཙོས་རྒྱ་ནག་དང་བལ་ཡུལ། འབྲུག་སོགས་ཀྱི་ནང་ནག་ཚོང་རྒྱག་བཞིན་ཡོད་འདུག
གསར་འགོད་པ། པདྨ་མཚོ།
