སྡེ་དགེ་རྫོང་ཁོངས་ནས་ཡིན་པའི་བོད་མི་གཡུ་འབྲུག་ཉི་མ་ཞུ་བ་ཞིག་ལ་རྒྱ་གཞུང་ཉེན་རྟོག་པས་གཅར་རྡུང་དྲག་པོ་བཏང་སྟེ་བསད་ཡོད་འདུག
འབྲེལ་ཡོད་ནས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༢༠ ཙམ་ལ་སྡེ་དགེ་རྫོང་རྫ་ཁོག་ཡུལ་ཚོ། ཟམ་ཁ་སྡེ་བའི་གཡུ་འབྲུག་ཉི་མ་ཞེས་པའི་བོད་མི་ཞིག་འབུ་བརྐོ་རུ་ཕྱིན་ཏེ། ར་ཁོག་ཡུལ་ཚོའི་ཕྱོགས་སུ་འབྱོར་དུས་རྫོང་ཉེན་རྟོག་པས་ཁོང་ལ་མེ་མདའ་ཡོད་པ་རེད་ཅེས་བསྙོན་འཛུགས་བྱས་ཏེ། ར་གོག་ཡུལ་ཚོའི་ནང་བཙན་འཁྲིད་ཀྱིས་གཅར་རྡུང་དྲག་པོ་བཏང་ཡོད་པ་དང་། དེ་ནས་སྡེ་དགེ་རྫོང་ཐོག་ཏུ་འཁྲིད་ཡོད་ཀྱང་། ཕྱིས་སུ་ཉེན་རྟོག་ཕྱོགས་ནས་ཁོང་ལམ་བར་ནས་འདས་གྲོངས་སུ་ཕྱིན་སྐོར་བརྗོད་ཡོད་འདུག
གཡུ་འབྲུག་ཉི་མ་ལགས་ཀྱི་ཕ་མིང་ལ་གཡང་དགའ་དང་མ་མིང་ལ་མགོ་གྲོད་ཟེར་གྱི་ཡོད་པ་དང་། ད་ལྟ་རང་ལོ་ ༤༠ ཙམ་ཡིན་འདུག
གསར་འགོད་པ། པདྨ་མཚོ།
ཧ་ཅང་བློ་ཕམ་བྱུང་བས་གནས་སྟངས་ཤིག་རེད་གང་ཡིན་ཟེར་ན་བོད་རང་གི་ས་ནས་དབྱར་རྩྭ་བརྐོ་རུ་འགྲོ་སྐབས་གནས་ཚུལ་བདེན་པ་མིན་པ་ལག་ཏུ་མེད་མདའ་ཡོད་ཚུལ་གླེང་ནས་གཅར་རྡུང་བཏང་ནས་དམར་གསོད་བཏང་བ་འདི་བོད་མི་ཚོས་བློ་ནས་བཟོད་མི་ཐུབ་པ་ཞིག་རེད་ད་དུང་རྒྱ་མས་འཆམ་མཐུན་ཟེར་བ་རེད་ནག་ཉེས་ཅི་ཡང་མེད་བོད་མི་ཚོ་ལ་གཅར་རྡུང་བཏང་ནས་གསོད་བཞིན་ད་དུང་འཆམ་མཐུན་ཟེར་ན་ཡོང་ཐུབ་ཞིག་ཡོད་དམ་ངེས་པར་འགྲོ་བ་མིའི་རིན་ཐང་གི་ཐོག་ནས་བལྟ་དགོས་པ་དང་གླེང་དགོས་པ་གལ་ཆེན་རེད། འདིའི་སྐོར་ད་དུང་འབྲེལ་བ་བྱས་ནས་གསལ་བོ་བཟོ་དགོས་པ་དང་གནས་སྟངས་ཅི་བཞིན་ཁྱབ་བསྒྲགས་གནང་དགོས་པ་སོགས་དོད་སྣང་བྱེད་དགོས་པ་རེད།