མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་དང་པོ་ནས་མཐར་ཕྱིན་པའི་སློབ་མ་རྡོ་རྗེ་སྐྱིད་ཀྱིས་བོད་ཡིག་གི་ལམ་ནས་རྩིས་རིག་དང་ཚན་རིག་ཁྱོན་སྐར་གྲངས་ ༥༣༥ ཐོབ་སྟེ། ད་ལོའི་མཚོ་སྔོན་ཞིང་ཆེན་ཡོངས་ཀྱི་མཐོ་རྒྱུགས་ཏེ་འཛིན་རིམ་ ༡༢ གྱི་རྒྱུགས་འབྲས་ཨང་དང་པོ་བླངས་ཡོད་འདུག
མཚོ་ཁུལ་མི་རིགས་མཐོ་རིམ་སློབ་འབྲིང་དང་པོ་ནས་མཐར་ཕྱིན་སློབ་མ་རྡོ་རྗེ་སྐྱིད་ནི་མཚོ་ལྷོ་ཁུལ་མང་རྫོང་ནས་ཡིན་ཞིང་། སློབ་མ་རྡོ་རྗེ་སྐྱིད་ཀྱི་ཨ་ཕའི་མིང་ལ་དཔའ་ལས་ཟེར་ཞིང་། ཁོས་གསར་འགོད་པའི་བཅར་འདྲིའི་སྐབས་སུ། “བོད་ཀྱི་གཏམ་དཔེ་ལ་ལོ་ཏོག་གཞན་གྱི་ལོ་ཏོག་ཡག བྱིས་པ་རང་གི་བྱིས་པ་བཟང་ཟེར་བ་ལྟར། ངའི་བུ་མོ་རྡོ་རྗེ་སྐྱིད་ལ་མཚོན་ན་སློབ་ལོ་མ་རན་པའི་སྔོན་ནས་སློབ་གྲྭར་བཅུག་པ་ཡིན། ང་རང་སྐབས་ཐོག་དེར་སློབ་གྲྭ་དེའི་དགེ་རྒན་ཡིན། དུས་ཐོག་དེར་དེང་སང་ནང་བཞིན་གཞི་རིམ་དུ་བྱིས་སྙོར་ཁང་མེད། བུ་མོ་སློབ་གྲྭར་འགྲོ་བའི་མགོ་དེ་ལྟར་བརྩམས་པ་ཡིན། དགེ་རྒན་ཚང་མས་ངའི་བུ་མོ་འདི་སློབ་སྦྱོང་གི་རྗེས་ཆོད་པར་བཤད་པས། བུ་མོར་མུ་མཐུད་དུ་སློབ་སྦྱོང་བྱེད་དུ་བཅུག་པ་ཡིན། རྡོ་རྗེ་སྐྱིད་ལ་མཚོན་ན་ཆུང་དུས་ནས་བྱ་བ་དང་སློབ་སྦྱོང་གང་ཅིའི་ཐད་ནས་ནན་ཏན་ཅན་ཞིག་ཡིན། དཔེར་ན། སློབ་གྲྭ་རུ་ཁྱིམ་སྦྱོང་ལས་བྱ་རེ་བཞག་ཚེ་རང་འགུལ་གྱིས་འབྲི་བ་ལས་གསལ་འདེབས་བྱ་མི་དགོས། གལ་ཏེ་མོས་མི་ཤེས་པ་འདྲ་ཡོད་ན་ང་ཡང་དགེ་རྒན་ཡིན་པས་ང་ལ་འདྲི་བ་རེད། དེ་ལྟར་ལོ་གསུམ་རྫོགས་རྗེས་ཐར་ཤུལ་དཀྱིལ་སྙིང་སློབ་གྲྭ་ནས་ལོ་རིམ་ལྔ་པའི་བར་དུ་སློབ་སྦྱོང་བྱས། དེ་ནས་ལོ་རིམ་དྲུག་པ་ནས་ཀོས་ནན་རྫོང་མཁར་གྲོང་སློབ་ཆུང་དུ་སློབ་གཉེར་བྱས། རང་གི་བུ་མོ་འདི་ཕ་མའི་ཁ་ལེན་པ་དང་དགེ་རྒན་གྱི་ཚིག་བརྩི་བ་ཞིག་ཡིན”ཞེས་བརྗོད་འདུག
སློབ་མ་རྡོ་རྗེ་སྐྱིད་ཀྱི་རྒྱུགས་འབྲས་ཐོས་མ་ཐག་དྲན་ཚུལ་ཅི་ཞིག་བྱུང་བའི་སྐོར་ལ། “དུས་རྒྱུན་གྱི་རྒྱུགས་འབྲས་ལ་བལྟས་ནའང་སྐར་མ་ཅུང་མཐོན་པོ་ཡིན་པས། རྒྱུགས་འཕྲོད་པའི་ཡིད་ཆེས་ཡོད། ཡིན་ཡང་ཞིང་ཆེན་ཡོངས་ནས་ཨང་དང་པོ་ལེན་ཐུབ་པ་ཡིད་ལའང་མ་དྲན་ཞེས་དང་། “རང་ལ་ཤེས་བྱ་ཡོན་ཏན་ཆེན་པོ་ཡོད་ཀྱང་བྱ་བ་སྤྱོད་པ་མ་ལེགས་ན་རང་གཞན་གཉིས་ཀར་རྔོ་མི་ཐོགས”ཟེར།
སློབ་མ་རྡོ་རྗེ་སྐྱིད་ཀྱིས་ཁོ་མོའི་སློབ་སྦྱོང་གི་བརྒྱུད་རིམ་དང་སློབ་སྦྱོང་བྱེད་ཕྱོགས་སྐོར་ལ། སློབ་སྦྱོང་བྱེད་ཐབས་སྐོར་གྱི་འདྲི་གཞི་འདི་དག་ཐེངས་མང་པོ་ཞིག་ལ་བདག་གི་སེམས་སུ་དྲན་མྱོང་། སློབ་བུ་གཞན་དག་གི་ལྷན་སྐྱེས་ཀྱི་ཤེས་རབ་དེ་དང་འབད་འབུངས་ཧུར་ཐག་མ་བྱས་པར་ཐོབ་པའི་གཡུར་ཟའི་འབྲས་བུ་ལ་ཡིད་སྨོན་ཡང་སྐྱེས་མྱོང་། དེ་བས་བདག་ལ་འབྲས་བུ་ཁྱད་མཚར་བ་དང་ཐུན་མོང་མ་ཡིན་པའི་ཐབས་ལམ་ཞིག་ག་ལ་ཡོད། འོན་ཀྱང་དེའི་སྐོར་ནས་ཅིས་ཀྱང་བསམ་ཚུལ་ཙམ་བཤད་དགོས་ཚེ། སློབ་སྦྱོང་གི་གོ་རིམ་ཁྲོད་ཕལ་ཆེར་སྦྱོར་དངོས་རྗེས་གསུམ་ལས་གལ་ཆེ་བ་ཞིག་མེད་པ་འདྲ། སྔོན་སྦྱོང་ནི་དཔེ་མཛོད་ཁང་གི་སྒོ་འབྱེད་པའི་ལྡེ་མིག་ལྟ་བུ་ཡིན་ཞིང་། གོ་རིམ་དེ་མེད་ཚེ། ཤེས་རིག་གི་ཐོག་མའི་འཇུག་སྒོ་བཅད་པ་ལྟ་བུ་རེད། དེ་ཡང་དཔེ་ཀློག་ཁོ་ན་ཙམ་མ་ཡིན་པར། རང་གིས་ཀྱང་དོགས་སློང་གི་སྙིང་སྟོབས་ཤིག་དང་རྟོགས་འདོད་ཀྱི་འདུན་པ་ཞིག་བསྣམས་ཏེ་བསླབ་བྱའི་གནས་ལ་ཞུགས་ན་ད་གཟོད་དྲི་བ་མང་པོ་ཞིག་ངང་ངམ་ཤུགས་ཀྱིས་སླེབས་འོང་། སློབ་ཁྲིད་དངོས་ནི་ཆེས་གལ་ཆེ་བའི་བརྒྱུད་རིམ་ཞིག་ཡིན་ཏེ། དེ་ནི་དཔེ་མཛོད་ཁང་དེའི་དཔེ་ཆའི་རིགས་ལ་སྤྱིའི་ཆ་ནས་དབྱེ་བ་ཕྱེས་པ་ལྟ་བུ་ཞིག་ཡིན་པས། དཔེ་ཆ་གང་དེར་ཐོག་མའི་རྒྱུས་ལོན་བྱ་ཐུབ།
གང་ལྟར་སློབ་ཁྲིད་ཀྱི་སྐབས་སུ་དགེ་རྒན་གྱི་གསུང་དོན་ཚང་མ་ཡིད་ལ་དམ་པོར་འཛིན་རྒྱུ་ནི་ཧ་ཅང་གལ་ཆེ་བར་སྙམ། བསྐྱར་སྦྱོང་ཡང་དེ་བཞིན་སློབ་སྦྱོང་གི་གོ་རིམ་ཁྲོད་མེད་དུ་མི་རུང་བ་ཞིག་ཡིན་ལ། དེ་ནི་སྔར་ཁྲིད་ཟིན་པའི་ནང་དོན་སྔར་ལས་སྲ་བརྟན་དང་རྨང་གཞི་འཛུགས་པའི་གོ་རིམ་ཞིག་ཡིན། བསྐྱར་སྦྱོང་ནི་གཙོ་བོ་རང་ཉིད་ལ་བརྟེན་དགོས། དེ་ནི་དཔེ་མཛོད་ཁང་གིས་རིགས་བགར་བའི་དཔེ་ཆ་རེ་རེར་གོ་བ་བསྐྱེད་པ་དང་མཚུངས་པས། ང་ཚོས་འདི་ལ་བརྟེན་ནས་རང་གི་ཤེས་བྱའི་ཁྱབ་རྒྱ་ཇེ་ཆེར་གཏོང་དགོས་ལ། གཏིང་ཟབ་པའི་སྒོ་ནས་ཤེས་བྱའི་གནས་ལ་ཞིབ་འཇུག་དང་སློབ་སྦྱོང་བྱེད་དགོས། ཕྱོགས་གཞན་ཞིག་ནས་བཤད་ན། ང་ཚོའི་དེ་རིང་གི་གྲུབ་འབྲས་དང་བརྩོན་པ་གཉིས་རྒྱུ་འབྲས་ཀྱི་འབྲེལ་བས་གྲུབ་པས། ང་ཚོས་ནམ་ཡང་ཁ་སང་གི་འབད་བརྩོན་གྱི་རྔུལ་ཆུ་དེ་དེ་རིང་གི་རྒྱལ་ཁའི་འཛུམ་མདངས་ཀྱི་རྒྱུ་རུ་བསྔོ་དགོས་སྐོར་བརྗོད་འདུག
གསར་འགོད་པ། པདྨ་རྒྱལ་གྱིས་བསྡུ་སྒྲིག་བྱས།
དངོས་གནས་ཨ་ཕ་དང་ཨ་མ་ཟུང་གིས་དཀའ་ལས་བརྒྱབ་པའི་བུ་མོ་རང་རེད་འདུག ཁྱེད་སྐུ་ཚེ་རིང་། ཁ་དྲོ། བཀྲ་ཤིས་བདེ་ལེགས་གྲངས་མེད་ཞུ།
ཚེ་རིང་རྒྱུ་མ་ངོ་མ་གཏམ་བཟང་རེད་འུ་ཅག་བོད་མི་རིགས་ཟེར་བ་འདི་ལས་ལ་བརྩོན་ཞིང་དཔའ་ངར་ལྡན་པ་ཞིག་ཡིན་གསུང་བ་དོན་ལ་གནས་པ་ཞིག་རེད་འདི་འདྲ་ཁྱབ་བསྒྲགས་གནང་པ་ཡིན་ན་ཧ་ཅང་ཡག་པོ་རེད་མ་ཟད་མ་འོངས་པར་མིག་ལྟོས་ཡག་པོ་འཇོག་པས་རེ་བ་བཅས།