༧གོང་ས་མཆོག་རྒྱ་གར་ལྷོ་ཕྱོགས་འབྲས་སྤུངས་ལ་ཞབས་སོར་བཀོད་དེ་གསུང་བཤད་གནང་ཡོད་པ་དང་། སང་ཉིན་ནས་བཟུང་གདན་ས་ཁག་གི་དགེ་འདུན་པ་ཁག་ཅིག་ལ་བསྙེན་རྫོགས་ཀྱི་སྡོམ་པ་འབོགས་རྒྱུ་དང་། དེའི་རྗེས་ལ་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་ལྷན་དུ་ཁོང་ཉིད་དགུང་གྲངས་ ༨༡ བཞེས་པའི་འཁྲུངས་སྐར་སྟེང་མཉམ་ཞུགས་གནང་རྒྱུ་ཡིན་འདུག
དེ་རིང་ཕྱི་ཟླ་ ༧ ཚེས་ ༡ ཉིན་གྱི་སྔོ་དྲོིའི་ཆུ་ཚོད་ ༩ དང་ཕྱེད་ཀ་ཙམ་ལ། ༧གོང་ས་སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོ་འདོད་དགུ་གླིང་དུ་ཞབས་སོར་བཀོད་སོང་། དེ་རིང་ཞོགས་པར་ཕྱོགས་བཞུགས་སྤྱི་འཐུས་རྣམ་པ་དང་དགེ་ལུགས་ཡོངས་ཀྱི་རྒྱལ་བའི་བཀའ་དྲིན་རྗེས་དྲན་གྱི་ཚོགས་གཙོ། དགོན་སྡེ་གྲྭ་ཚང་ཁག་གི་མཁན་པོ། ས་གནས་འཐུས་ཚོགས་དང་མཉམ་འབྲེལ་ཚོགས་གཙོ་བཅས་ཀར་ལྦར་རྫོང་དུ་ཕེབས་བསུར་བཅར་ཡོད།
མོན་གྷོ་བོད་མིའི་གཞིས་ཆགས་ནང་གི་ཕེབས་ལམ་དུ། ཕེབས་སྒོ་རིམ་པ་ཁ་ཤས་བཟོས་ཏེ། བཀྲ་ཤིས་པའི་ཚིག་བརྗོད་སྣ་ཚོགས་དང་འཕྲེད་དར་དཔྱང་ཡོད་པ་མ་ཟད། ལམ་གྱི་གཡས་གཡོན་གང་སར་སེར་སྐྱ་མི་མང་གིས་ལུས་ལ་གཟབ་མཆོར་སྤྲས་ཤིང་ལག་ཏུ་དཀར་གཙང་གི་མཇལ་དར་དང་། མེ་ཏོག་གདུག་སྤོས་སོགས་བསྣམས་ཏེ་དགའ་དད་སྤྲོ་གསུམ་གྱི་རྣམ་པའི་དབུས་ནས་༧གོང་ས་མཆོག་འབྲས་སྤུངས་བླ་སྤྱིར་ཞབས་སོར་འཁོར་སོང་།
འབྲས་སྤུངས་བླ་སྤྱིར་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེས་རྣམ་གཉིས། འབྲས་སྤུངས་ཁྲི་པ་རིན་པོ་ཆེ། དེ་བཞིན། གདན་ས་གྲྭ་ཚང་ཁག་གི་མཁན་ལས་ཟུར་དང་། བླ་སྤྲུལ་དགེ་བཤེས་རྣམས་ཀྱིས་ཕེབས་བསུ་དང་བཅས་མཛད་སྒོ་ཚོགས་སོང་།
སྐབས་དེར་༧གོང་ས་མཆོག་གིས་ཐོག་མར་བླ་སྤྱིར་གནས་གཟིགས་དང་དེའི་རྗེས་བཞུགས་ཁྲིར་འཁོད་མཚམས་དགའ་ལྡན་ཁྲི་རིན་པོ་ཆེ་མཆོག་ནས་མན་ཏྲལ་རྟེན་གསུམ་འདེགས་འབུལ་ཞུས་རྗེས། ༧གོང་ས་མཆོག་གིས་ཚང་མར་འཚམས་འདྲི་དང་འབྲེལ་ཏེ། ཐེངས་འདིར་ཁོང་ཉིད་འདིར་ཞབས་སོར་འཁོད་དགོས་དོན་སྐོར་དང་། དཔལ་ན་ལེན་ཏྲ་ནས་བརྒྱུད་པའི་སེམས་ཁམས་རིག་པ་དང་འབྲེལ་བའི་ཆོས་རྒྱུད་དེ་དག་ལོ་ངོ་སྟོང་ཕྲག་རིང་ང་ཚོ་བོད་པ་ཚོས་མི་རབས་ནས་མི་རབས་བར་རྒྱུད་འཛིན་བྱས་ཡོད་པ་དང་། ད་ཆར་འཛམ་གླིང་འདིར་ང་ཚོའི་ངོས་ནས་ཞབས་འདེགས་བསྒྲུབ་ཐུབ་པའི་དུས་སྐབས་ཤིག་ཆགས་ཡོད་སྐོར་གསུངས་སོང་།
གཞན་ཡང་༧གོང་ས་མཆོག་གིས། དེང་སྐབས་ཨ་རིའི་ནང་ལ་ཡང་བྱམས་བརྩེའི་ཉམས་ལེན་ཐོག་དོ་སྣང་ཆེན་པོ་བྱེད་བཞིན་ཡོད་པ་མ་ཟད། ལྷག་པར་དུ་ཨ་རིའི་གྲོང་ཁྱེར་གཉིས་ཙམ་གྱི་མིང་ཡང་སྙིང་རྗེའི་གྲོང་ཁྱེར་ཞེས་པའི་མིང་བཏགས་ཡོད་པ་དང་། དེ་འབྲེལ་གྲོང་ཁྱེར་དེ་དག་ནང་བྱམས་བརྩེ་དང་འབྲེལ་བའི་བགྲོ་གླེང་དང་དེ་དག་བརྒྱུད་འཁྲུག་རྩོད་རིགས་ཀྱང་ཇེ་ཉུང་དུ་འགྲོ་བར་ཕན་ཐོགས་འབྱུང་བཞིན་ཡོད་སྐོར་གསུངས་སོང།
ཉེ་ལམ་གོང་ས་མཆོག་ཨ་རིར་ཕེབས་སྐབས་གྲོང་ཁྱེར་སྤྱི་ཁྱབ་པ་ ༢༠༠ ཙམ་གྱི་ལྷན་འཛོམས་སྐབས་ཁོང་རྣམས་པས་ཀྱང་དེའི་ཐད་ཐུགས་སྣང་གནང་བཞིན་པ་སོགས་ངོ་སྤྲོད་གནང་སོང་ལ། དེ་དང་ཆབས་ཅིག་བྱམས་བརྩེ་དང་སེམས་ཁམས་རིག་པའི་ཤེས་ཡོན་སློབ་གསོ་ནི་གཞི་རིམ་བུ་བཅོལ་ཁང་ནས་མགོ་འཛུགས་བྱེད་དགོས་པ་དང་། དེའི་རྒྱབ་ལྗོངས་སུ་རིམ་བཞིན་སེམས་ཁམས་རིག་པའི་རྣམ་བཞག་རྒྱ་ཆེ་རུ་གཏོང་དགོས་པ་ཞིག་ཡིན་ཞིང་། དེའི་ཆེད་ཆོས་ལུགས་དང་མ་འབྲེལ་ཞིང་བཟང་སྤྱོད་གོང་འཕེལ་གྱི་སློབ་གསོའི་སློབ་དེབ་ཅིག་ཀྱང་རྩོམ་སྒྲིག་བྱེད་བཞིན་ཡོད་པ་དང་། དེ་ཟླ་ཤས་ནང་གཏན་འབེབས་བྱེད་ཐུབ་ཀྱི་ཡོད་སྐོར་སོགས་གསུངས་སོང་།
༧གོང་ས་མཆོག་གིས་མུ་མཐུད་དུ། རྒྱ་ནག་ནང་ནང་པའི་གྲངས་འབོར་ས་ཡ་ ༤༠ ཙམ་ཡོད་པ་དང་། དེང་སྐབས་བོད་རྒྱུད་ནང་བསྟན་ལ་ཡང་དོ་སྣང་ཇེ་ཆེར་འགྲོ་བཞིན་ཡོད་སྟབས། ང་ཚོས་ཕྱིའི་རང་དབང་ལུང་པར་བཟང་སྤྱོད་དང་འབྲེལ་བའི་ལས་འགུལ་ཏོག་ཙམ་ཞིག་སྤེལ་ཐུབ་ན། དེས་རྒྱ་ནག་ལའང་ཏན་ཏན་ཤུགས་རྐྱེན་ཐེབས་ངེས་ཡིན་ཞིང་། དེའིི་ཐོག་ནས་བོད་དོན་ཐོག་ལའང་ཕན་ཐོགས་རྒྱུ་ཡིན་སྐོར་གསུངས་སོང་།
དེའི་རྗེས་༧གོང་ས་མཆོག་གིས་གཞིས་ཆགས་ནང་སེར་སྐྱ་མི་མང་དང་སློབ་ཕྲུག་ག་ཚོད་ཡོད་མེད། གནམ་གཤིས་ག་འདྲ་ཡོད་མེད། ས་གནས་རྒན་གསོ་ཁང་དང་འཕྲོད་བསྟེན་སྨན་ཁང་གཉིས་ཀྱི་གནས་སྟངས་དང་འཕྲོད་བསྟེན་སྨན་ཁང་ལ་སྨན་པ་མེད་དོན་གང་ཡིན་པ། དེ་བཞིན། གཞིས་ཆགས་ནང་ཉལ་ཐ་འཐེན་མཁན་ཡོད་མེད་སོགས་གནད་དོན་མང་པོའི་ཐོག་བཀའ་འདྲི་གནང་བ་ཁག་ལ་ས་གནས་གཞིས་མགོས་བཀའ་ལན་ཕུལ་སོང་།
སང་ཉིན་ཕྱི་ཚེས་ ༢ ནས་མགོ་འཛུགས་ཀྱིས་ཕྱི་ཚེས་ ༥ ཉིན་བར། ༧གོང་མཆོག་གདན་ས་ཆེན་པོ་གསུམ་དང་། རྭ་སྟོད་གྲྭ་ཚང་། རྒྱུད་གྲྭ་སྟོད་སྨད་གཉིས། བཀྲ་ཤིས་ལྷུན་པོ་དགོན་པ་བཅས་ཀྱི་དགེ་འདུན་པ་ཁག་གཅིག་ལ་བསྙེན་རྫོགས་ཀྱི་སྡོམ་པ་འབོགས་ཆོག་མཛད་རྒྱུ་ཡིན་པ་དང་། ཕྱི་ཚེས་ ༦ ཉིན་༸སྐུའི་འཁྲུངས་སྐར་འཁེལ་ཡོད་སྟབ་དྲོར་དགེ་ལུགས་སྤྱི་དང་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་སེར་སྐྱ་མི་མང་ཡོངས་ནས་བརྟན་བཞུགས་བསྟར་འབུལ་ཞུ་རྒྱུ་དང་། དེ་རྗེས་༸སྐུའི་འཁུངས་སྐར་སྲུང་བརྩིའི་མཛད་སྒོར་དབུ་བཞུགས་མཛད་རྒྱུ་ཡིན་འདུག
ཐེངས་འདིའི་སྐུའི་འཁྲུངས་སྐར་མཛད་སྒོའི་སྟེང་བོད་མིའི་སྒྲིག་འཛུགས་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་བཅས་ཆེད་བཅར་ཞུ་རྒྱུ་ཡིན་འདུག ཕྱི་ཚེས་ ༧ ཉིན་འབྲས་སྤུངས་བློ་གསལ་གླིང་གི་ཆོས་རྭ་གསར་པ་ལེགས་གྲུབ་ཟིན་པ་དབུ་འབྱེད་མཛད་རྒྱུ་ཡིན་འདུག
རྒྱ་གར་ལྷོ་ཕྱོགས་ཀྱི་ས་གནས་གསར་འགོད་པ། དོན་གྲུབ་བཀྲ་ཤིས།
༸སྐུ་ཚེ་ཁྲི་ལོར་བརྟན་པ་ཤོག