ལུ་པི་ན་མིས(Lupinamy)སྤེལ།
སྐལ་ལྡན་གྱིས་བསྒྱུར།
ལོ་ངོ་འགའ་ཞིག་སློབ་ཁྲིད་བྱས་པའི་བརྒྱུད་རིམ་ཁྲོད། སྐབས་རེར་སློབ་ཕྲུག་གིས་བྲིས་པའི་སྙན་རྩོམ་དང་སྒྲུང་རྩོམ་མཐའ་དག་ཁྱོད་ཀྱིས་སྔོན་ཚུད་ནས་བཀླགས་ཟིན་པའི་སྣང་བ་འཆར་ངེས་ཡིན། སྐབས་རེར་དུས་ཡུན་རིང་པོར་ལས་ཀ་བྱས་ཏེ་ཡི་ཐང་ཆད་པའི་སྐབས། ལོ་ཟླའི་ཁྲོད་གསོག་འཇོག་བྱས་པའི་སློབ་ཕྲུག་གི་སྒྲུང་ཐུང་དེ་རིགས་ཀྱིས་ཁྱོད་ཀྱི་ལས་དོན་ལ་སེམས་འགུལ་དང་སྤོབས་པ་མི་སྐྱེ་བའང་ཡོང་ངེས་ཡིན།
སློབ་ཕྲུག་རྣམས་རྩོམ་ཡིག་འབྲི་རྒྱུར་བྱང་ཆུབ་པ་ཤ་སྟག་མིན་ལ། ཁོ་ཚོས་རང་ཉིད་ཀྱི་རྩོམ་ཡིག་གི་ནང་དོན་དང་། མི་སྣ་བཀོད་འབྲི། རྩོམ་ཡིག་གི་འཕེལ་རིམ་སོགས་འབུར་དུ་ཐོན་པ་འབྲི་ཚུལ་ཤེས་ཀྱི་མེད། ཡིན་ན་ཡང་ཁྱོད་ཀྱིས་རྩོམ་ཡིག་དེ་དག་ལ་དོ་སྣང་དང་སྤྲོ་བ། དགའ་སྣང་ངམ་ངམ་ཤུགས་ཀྱིས་འཇུག་དགོས་པ་གལ་ཆེ།
གཤོག་རྩལ་གཞི་ནས་རྒྱས་བཞིན་པའི་རྩོམ་པ་པོ་དེ་དག་གི་རྩོམ་ཡིག་གི་ཁྱད་ཆོས་ཀྱིས། གཏན་འབེབས་བྱས་པའི་ཚད་གཞི་མ་ལོན་པའི་སྐྱོན་བརྗོད་བྱས་ན། རྩོམ་ཡིག་འབྲི་རྒྱུར་དང་ཞེན་ཆེ་བའི་འདུན་པ་སྐྲུན་མཁན་གྱི་དགེ་རྒན་དང་སློབ་ཕྲུག་གི་སྤྲོ་སྣང་ལྡན་པའི་འབྲེལ་ལམ་བཟང་པོར་དོ་ཕོག་འགྲོ་ཉེན་ཡོད།
ཁ་སང་ངས་འཛིན་གྲྭའི་ནང་སློབ་ཕྲུག་ཅིག་ལ་སྙན་རྩོམ་ཐུང་ངུ་ཞིག་གྱེར་འདོན་བྱེད་བཅུག་པ་ཡིན། སྙན་རྩོམ་གྱི་ནང་དོན་དང་སྤྲུས་ཚད་ཀྱི་ཆ་ནས་ཡིད་དབང་འཕྲོག་ཐུབ་པ་ཞིག་བྲིས་མི་འདུག ཐ་སྙད་བཀོལ་སྤྱོད་ཞན་པ་དང་། སྙིང་དོན་ཁ་གསལ་མེད་པ། སྙན་ངག་པས་བརྗོད་འདོད་ཀྱི་བསམ་པ་མཚོན་མི་ཐུབ་པ་སོགས་ཞན་ཆ་མང་།
དེ་ལྟར་ཁོས་སྙན་རྩོམ་གྱེར་འདོན་བྱེད་ཀྱིན་པའི་སྐབས། ངའི་བློ་ངོར་ཁོ་པའི་ཞན་ཆ་ཐེར་འདོན་དང་ལམ་སྟོན་བྱེད་དགོས་པའི་རྣམ་གྲངས་ཇེ་མང་ནས་ཇེ་མང་རེད། འོན་ཏེ། སྙན་རྩོམ་དེར་ཚང་དགོས་པའི་ཆ་རྐྱེན་ལེགས་གྲུབ་བྱུང་མེད་ཀྱང་། ངས་འཛུམ་མདངས་དང་དགོད་སྒྲས་ཁོ་པར་དགའ་བསུ་བྱེད་དགོས་པ་ཤེས་ཚོར་བྱུང་། གང་ལགས་ཤེ་ན། སློབ་ཕྲུག་དེས་ཕྱོགས་གཞན་ཞིག་ནས་བསྔགས་བརྗོད་འོས་པ་ཞིག་བྱས་ཡོད་པ་ནི། སྙན་རྩོམ་དེ་བཞིན་གསོན་ཉམ་དོད་པོས་གྱེར་འདོན་བྱ་ཐབས་དང་། རང་ངོས་ནས་སྙན་རྩོམ་གྱི་ཞན་ཆ་ངོས་འཛིན་ཐུབ་པའི་རྣམ་འགྱུར་སྟོན་ཐུབ་པ་བྱུང་ཡོད་པ་དེ་ཡིན།
ཁོས་སྙན་རྩོམ་གྱེར་འདོན་གྲུབ་མཚམས་གཡས་གཡོན་དུ་འཛུམ་མདངས་ཀྱིས་ཁེངས་བའི་དགེ་སློབ་དག་ལ་མིག་ལྟ་བཞིན། ཁོ་པའི་གདོང་ལ་ཡང་བཅོས་མིན་གྱི་འཛུམ་མདངས་རྒྱས། སྐབས་དེར་ཁོ་པ་ནི་བཞད་གད་སློང་མཁན་ཞིག་ཏུ་གྱུར། དེ་ནི་ཅི་འདྲའི་དགའ་བ་སྐྱེ་བའི་གནད་དོན་ཞིག་མ་ཡིན་ནམ། སློབ་ཕྲུག་ཚང་མ་ཁོ་པ་ལྟར་རང་བཞིན་གྱི་རིག་རྩལ་ལྡན་པ་མིན།
གཤམ་དུ་ང་ཚོས་སློབ་ཕྲུག་གི་ལས་བྱར་དཔྱད་ཞིབ་དང་ཞུ་དག་སྤུས་ཚད་ལྡན་པ་བྱེད་པའི་བསམ་ཚུལ་འགའ་བརྗོད་ན།
དགེ་རྒན་ལ་ཚོར་བ་ཇི་ལྟར་བསྐྲུན་ཚུལ་བརྗོད་པ། “སྒོ་ཡི་དྲིལ་བརྡ་དཀྲོལ་སྐབས་འཇིགས་སྣང་ཆེ་བ་ལ་ཨང་།”ལྟ་བུ་དང་། “ཁྱོད་ཀྱིས་པཱ་ལགས་ཀྱི་སྣང་བརྙན་སིད་སྒྲ་སྒྲོག་པའི་ཞི་མི་གཏུམ་པོར་དཔེ་བཀོད་པ་ཅི་འདྲའི་སྙིང་རྗེ་བ་ལ་ཨང་།”ལྟ་བུ་འགྲེལ་བརྗོད་བྱེད་དགོས།
སྒྲོ་འདོགས་དང་འུད་བསྟོད་བྱེད་དགོས་པ། ང་ཚོས་སློབ་ཕྲུག་གི་རྩོམ་ཡིག་གི་སྤུས་ཚད་དེ་ཙམ་ལེགས་རྒྱུ་མེད་པ་ཤེས་ཀྱང་། སློབ་ཕྲུག་རྣམས་ལས་དང་པོ་བ་ཡིན་པ་ཤེས་དགོས། ཁོ་ཚོས་རེ་བ་བྱེད་པ་ནི། རང་ཉིད་ཀྱི་རྩོམ་ཡིག་ལ་ཡིད་སྨོན་གྱི་དགོད་སྒྲ་དང་། ངོ་མཚར་གྱི་མགོ་བོ་གཡུག་པ། སྤྲོ་སྣང་གི་འཛུམ་མདངས་སྟོན་པ་སོགས་ཡིན། སློབ་ཕྲུག་དེ་དག་མུ་འཐུད་རྩོམ་ཡིག་འབྲི་རྒྱུར་དགའ་ཞེན་ཇེ་ཆེར་འགྲོ་བར་དེ་ལྟར་བསྔགས་བརྗོད་བྱེད་དགོས་པ་གལ་ཆེ།
སྤྲོ་སྣང་གི་ཕྱིར་རྩོམ་འབྲིར་རོལ་འཇུག་དགོས་པ། སྤྱིར་གཏན་འབེབས་བྱས་པའི་རྩོམ་ཡིག་གི་སྒྲིག་གཞི་མང་དག་ཅིག་ལ་བརྩི་སྲུང་བྱེད་དགོས་ཀྱི་ཡོད། འོན་ཀྱང་། སྐབས་རེར་སློབ་ཕྲུག་རང་ཉིད་ཀྱི་འབྲི་རྩལ་གོང་མཐོར་གཏོང་ཕྱིར། རྣམ་ཀུན་ལས་རང་དབང་ཆེ་ཙམ་སྤྲོད་དགོས་པ་གལ་ཆེ། དེ་འབྲེལ་གྱི་ལམ་སྟོན་དགོས་ཀྱང་། གཙོ་ཆེར་ཁོ་ཚོར་དགོས་པ་ནི་དགེ་རྒན་གྱི་དོ་སྣང་ཡིན། དེས་ན་དགེ་རྒན་གྱིས་ངང་རྒྱུད་རིང་པོས་བཅོས་སྒྲིག་བྱེད་པ་དང་ལྷན་ཨང་ཐོབ་སྤྲོད་སྐབས་གཏོང་ཕོད་ཆེ་ཙམ་བྱེད་དགོས།
འདམ་ག་སྤྲོད་དགོས་པ། སློབ་ཕྲུག་འགའ་ཞིག་སྒྲུང་རྩོམ་འབྲི་རྒྱུར་དགའ་བ་དང་། འགའ་ཞིག་སྙན་རྩོམ་འབྲི་རྒྱུར་དགའ་བ། འགའ་ཞིག་དངོས་བྱུང་ལོ་རྒྱུས་དང་ཆབ་སྲིད་ཀྱི་གནད་དོན་འབྲི་རྒྱུར་དགའ་པོ་ཡོད། འགའ་ཞིག་ལ་དགེ་རྒན་གྱིས་ཟུར་ཟའི་སྐྱོན་བརྗོད་རེ་མ་བྱས་བར་རྩོམ་ཡིག་འབྲི་རྒྱུར་དགའ་པོ་མེད། དེས་ན་སློབ་ཕྲུག་ཚོར་རྩོམ་ཡིག་འབྲི་སྟངས་མི་འདྲ་བ་འགའ་ངོ་སྤྲོད་བྱས་ཏེ། ནང་སྦྱོང་གི་སྐབས་རང་ཉིད་ཀྱི་དཔེ་མཚོན་བསམ་གཞིགས་བྱེད་འཇུག་པ་དང་། དེ་རྗེས་སློབ་ཕྲུག་རང་ཉིད་ཀྱི་གང་དྲན་འབྲི་བཅུག་ན་ཇི་འདྲ་འདུག་གམ།
ཁྱོད་ཀྱིས་ཐེངས་གཅིག་རིང་གལ་ཆེ་བའི་ཆ་རྐྱེན་གཅིག་ཁོ་ན་ལས་མ་སྤྲད་པར། སློབ་ཕྲུག་གིས་ཀློག་འདོན་བྱེད་འདོད་པའི་རྩོམ་ཡིག་ཅིག་འབྲི་བཅུག་སྟེ། ཁྱོད་ལ་ཚོར་བ་མི་འདྲ་བ་ཞིག་སྦྱིན་པར་སྐུལ་དང་། གྲུབ་འབྲས་མི་འདྲ་བ་ཞིག་ཐོན་པའི་རེ་བ་ཡོད།
