ཁ་སང་དབྱིན་ཇིའི་ནང་སྲིད་བློན་ཆེན་ཟུར་བ་ལྕམ་དྷིར་ས་མེ་ (Theresa May) ལགས་དབྱིན་ཇིའི་སྲིད་བློན་དུ་བདམས་ཐོན་བྱུང་བ་དང་འབྲེལ་ཏེ། འཇར་མན་སྲིད་བློན་ལྕམ་ཨན་གྷི་ལ་མིར་ཀིལ་ (Angela Merkel) ལགས་ཀྱིས་དབྱིན་ཇིའི་སྲིད་གཞུང་གསར་བས་ཡུ་རོབ་མཐུན་ཚོགས་དང་འབྲེལ་ལམ་རྒྱུན་འཁྱོངས་བྱ་དགོས་པའི་རེ་འདུན་བཏོན་འདུག
འཇར་མན་སྲིད་བློན་ལྕམ་ཨན་གྷི་ལ་མིར་ཀིལ་ལགས་ཀྱིས་དབྱིན་ཇིའི་སྲིད་གཞུང་གསར་བས་དབྱིན་ཇིའི་འབྱུང་འགྱུར་ལ་ཡུ་རོབ་མཐུན་ཚོགས་ཀྱི་འབྲེལ་ལམ་མེད་མི་རུང་བ་དང་། ཟླ་སྔོན་མར་དབྱིན་ཇི་ཡུ་རོབ་སྤྱི་མཐུན་ཚོགས་ཁོངས་ནས་ཕྱིར་བུད་རྗེས་ཀྱི་དོན་དག་ཚང་མ་ད་ལྟའི་དབྱིན་ཇིའི་སྲིད་གཞུང་གསར་བར་རག་ལས་ཡོད་སྟབས། སྐབས་དེར་དབྱིན་ཇི་དང་ཡུ་རོབ་མཐུན་ཚོགས་བར་གྱི་འབྲེལ་ལམ་ཐད་གྲོས་ཆིངས་ཤིག་འཇོག་སྲིད་པ་དང་། དབྱིན་ཇིའི་གཞུང་གིས་ཡུ་རོབ་གླིང་གི་དཔལ་འབྱོར་ལྟེ་བར་གྱུར་བའི་འཇར་མན་དང་དབྱིན་ཇི་གཉིས་བར་གྱི་འབྲེལ་ལམ་རྒྱུན་འཁྱོངས་དགོས་པ། ཡུ་རོབ་མཉམ་འབྲེལ་ཁྲོམ་ར་དེ་གཙོ་བོ་དཔལ་འབྱོར་འཁོར་རྒྱུག་གི་རང་དབང་དང་རྩ་འཛིན་ལ་རག་ལས་ཡོད་སྟབས། དབྱིན་ཇིའི་གཞུང་གིས་ཡུ་རོབ་མཐུན་ཚོགས་ལ་རྒྱབ་འགལ་བྱེད་པར་བློ་ཕམ་ཡོད་སྐོར་བརྗོད་འདུག
དབྱིན་ཇིའི་སྲིད་བློན་གསར་བ་ལྕམ་དྷིར་ས་མེ་ལགས་ཀྱིས། དབྱིན་ཇིའི་གཞུང་གིས་ཡུལ་གྱར་བ་བགོ་བཤའི་སྲིད་ཇུས་ལ་བཅོས་བསྒྱུར་བཏང་བའི་ནང་། དབྱིན་ཇི་ཡུ་རོབ་མཉམ་འབྲེལ་ཁྲོམ་རའི་ནང་འཛུལ་ཞུགས་སྲིད་ཇུས་ཀྱང་ཚུད་ཡོད་སྐོར་བརྗོད་འདུག
གནས་ཚུལ་ལྟར་ན། ཟླ་སྔོན་མའི་ཕྱི་ཚེས་ ༢༣ ཉིན་མང་མོས་ཐོག་དབྱིན་ཇིའི་ཡུ་རོབ་སྤྱི་མཐུན་ཚོགས་ལས་ཕྱིར་བུད་པའི་ཐད། དབྱིན་ཇིའི་མི་མང་ཁག་ཅིག་གིས་དབྱིན་ཇི་ཡུ་རོབ་སྤྱི་མཐུན་ཚོགས་ཁོངས་ནས་ཕྱིར་བུད་པ་དེ་གནས་སྐབས་སུ་དཔལ་འབྱོར་འཁོར་རྒྱུག་གི་དཀའ་ངལ་འཕྲད་སྲིད་ཀྱང་། འབྱུང་འགྱུར་དབྱིན་ཇི་བས་རྒྱལ་ནང་གི་དཔལ་འབྱོར་དང་ཡུལ་གྱར་བའི་གནད་དོན་ཐད་རང་གི་མངོན་འདོད་ལྟར་ལྟ་ཚུལ་བཏོན་ཆོག་སྐོར་བརྗོད་ཅིང་། ཡང་མི་མང་ཁག་ཅིག་གིས་ཡུ་རོབ་མཐུན་ཚོགས་ཀྱི་རྒྱབ་རྟེན་ཡོད་ན། དབྱིན་ཇིའི་དཔལ་འབྱོར་འཁོར་རྒྱུག་ཐད་རམ་འདེགས་ཆེན་པོ་འཐོབ་ངེས་ཡིན་སྐོར་ཡང་བརྗོད་ཡོད་པ་རེད།
“དབྱིན་ཇིའི་སྐྱབས་མགོན་དྷིར་ས་མེ”ཞེས་པའི་ནེའུ་ཡོག་དུས་བབ་གསར་ཁང་གི་དཔྱད་རྩོམ་ཞིག་གི་ནང་། དུས་སྐབས་མི་འདྲ་བ་ཞིག་དང་འབྲེལ་ཏེ། ཁ་སང་རེས་གཟའ་ལྷག་པའི་ཉིན་ལྕམ་དྷིར་ས་མེ་ལགས་དབྱིན་ཇིའི་སྲིད་བློན་དུ་བདམས་ཐོན་བྱུང་བའི་མཛད་སྒོ་ཚོགས་སོང་བ་དང་། ཁོ་མོ་དབྱིན་ཇི་བའི་སྐྱེད་མ་སྲིད་བློན་ཨང་གཉིས་པ་དེ་ཆགས་ཀྱི་ཡོད་ནའང་། དབྱིན་ཇིའི་ནང་སྲིད་བློན་ཆེན་ཟུར་བ་ལྕམ་དྷིར་ས་མེ་ལགས་དབྱིན་ཇི་ཡུ་རོབ་སྤྱི་མཐུན་ཚོགས་ཁོངས་ནས་ཕྱིར་བུད་པའི་རྗེས་ཀྱི་དབྱིན་ཇིའི་འབྱུང་འགྱུར་སྲིད་ཇུས་ཐད་གསལ་ཁ་ཅི་ཡང་མེད་པའི་དཀའ་ཁག་ལ་ཐུག་ཡོད་སྟབས། དབྱིན་ཇིའི་རྒྱལ་མང་གི་དམིགས་འདུན་མངོན་འགྱུར་ཡོང་མི་སྲིད་སྐོར་འཁོད་འདུག
ནེའུ་ཡོག་དུས་བབ་གསར་ཁང་གི་དཔྱད་རྩོམ་གཞན་ཞིག་གི་ནང་། དབྱིན་ཇི་ཡུ་རོབ་སྤྱི་མཐུན་ཚོགས་ཁོངས་ནས་ཕྱིར་བུད་པ་དེ་ཆབ་སྲིད་དཔལ་འབྱོར་གྱི་དུས་ཟིང་ཞིག་ཏུ་གྱུར་ཅིང་། དེ་ལ་བརྟེན་ནས་ཡུ་སྒོར་གྱི་འཛའ་ཐང་ཆགས་པ་དང་། དབྱིན་ཇིའི་རྒྱལ་ཡོངས་ཀྱི་དཔལ་འབྱོར་འཁོར་རྒྱུག་ལ་ངེས་བརྟན་མེད་པར་གྱུར་འདུག ཅེས་འཁོད་འདུག
ཡུ་རོབ་མཐུན་ཚོགས་ནི་ཕྱི་འབྲེལ་སྲིད་ཇུས་ཀྱི་འཁྲབ་ཚན་ཞིག་ཡིན་པ་མ་ཟད། དེ་ནི་ནུབ་གླིང་གི་དམག་དཔུང་དང་རྒྱལ་སྲུང་བཅས་ཀྱི་གྲུབ་ཆ་གཙོ་བོ་ཞིག་ཡིན་ཞིང་། དབྱིན་ཇི་ཕྱིར་བུད་རྗེས་ཡུ་རོབ་མཐུན་ཚོགས་ཀྱིས་རང་ཉིད་ཀྱི་སྟོབས་ཆེན་ཁོངས་མི་ཞིག་ཤོར་བཅུག་པའི་ཁར། ད་དུང་ཡུ་རོབ་གླིང་གི་རྡུལ་ཕྲན་མཚོན་ཆ་ཆེན་པོ་གཉིས་ཀྱི་གཅིག་དང་། དེ་བཞིན་མཉམ་འབྲེལ་རྒྱལ་ཚོགས་བདེ་འཇགས་ལྷན་ཁང་གི་རྐུབ་སྟེགས་གཉིས་བཅས་བརླག་པ་རེད། དབྱིན་ཇི་ཡུ་རོབ་སྤྱི་མཐུན་ཚོགས་ཁོངས་ནས་ཐོན་སྐབས། ཡུ་རོབ་སྤྱི་མཐུན་ཚོགས་པས་རང་ཉིད་ཀྱི་དམག་དོན་དང་རྒྱལ་སྲུང་བདེ་འཇགས་ཐད་ཀྱི་སྟོབས་ཆེན་རྒྱལ་ཁབ་ཅིག་ལ་གྱེས་ཕྱག་བཏང་བ་རེད། ཕྱོགས་མཐུན་རྒྱལ་ཁབ་ཁག་གིས་མུ་མཐུད་ཡུ་རོབ་གླིང་གི་རྒྱལ་སྲུང་བདེ་འཇགས་ལ་མཐུན་འགྱུར་གནང་སྲིད་ནའང་། དེང་སྐབས་བྷར་རྫིལ་དང་ཝ་ཞིན་ཊོན་གཉིས་དབར་གྱི་འབྲེལ་ལམ་ཆད་པ་དང་། ཨ་རིའི་གཞུང་གིས་ཡུ་རོབ་མཐུན་ཚོགས་ནང་འཛིན་པའི་ཡིད་རྟོན་དེའང་བརླག་པ་རེད། ཅེས་སོགས་འཁོད་འདུག
གསར་འགོད་པ། པདྨ་རྒྱལ།
