རྒྱ་བལ་འབྲུག་གསུམ་ནང་ཕྲུ་གུ་གསུམ་དང་གསུམ་ལས་མང་བའི་སློབ་ཕྲུག ༤༩༡ བྱུང་འདུག

ཕྱི་ལོ་ ༢༠༡༢ ལོར་དྷ་རམ་ས་ལར་སྐོང་ཚོགས་གནང་བའི་བོད་རྒྱལ་ཡོངས་དམིགས་བསལ་ཚོགས་ཆེན་ཐེངས་གཉིས་པའི་ཐོག བོད་མི་རིགས་ཀྱི་འཐབ་རྩོད་ལ་འཕྲལ་ཕུགས་གང་ཐད་ནས་མི་འབོར་ཉུང་བའི་དཀའ་ངལ་ཡོད་སྟབས། ཕྲུ་གུ་མང་པོ་སྐྱེད་གསོ་བྱེད་དགོས་པ་གལ་ཆེན་དུ་མཐོང་སྟེ་ཕྲུ་གུ་གསུམ་དང་ཡང་ན་གསུམ་ལས་མང་བ་ཡོད་པ་རྣམས་ལ་བོད་མིའི་སྒྲིག་འཛུགས་ནས་དམིགས་བསལ་ལྟ་སྐྱོང་གནང་དགོས་པའི་དགོངས་འཆར་ཕུལ་བ་ལྟར། ཕྱི་ལོ་ ༢༠༡༥ ཟླ་ ༤ ཚེས་ ༡ ནས་བཟུང་དམིགས་བསལ་ལྟ་སྐྱོང་འདི་དངོས་སུ་ལག་བསྟར་གནང་ཡོད་སྟབས། འདི་གའི་གསར་འགོད་པས་ཤེས་རིག་སློབ་ཡོན་ཚན་པ་དང་འཕྲོད་བསྟེན་ལས་ཁུངས་ཀྱི་སྨན་བཅོས་ལྟ་སྐྱོང་ལས་གཞིའི་འབྲེལ་ཡོད་ལས་བྱེད་ལ་བཅར་འདྲི་ཞུས་ཏེ་གནས་ཚུལ་རྒྱུས་ལོན་བྱས་ཡོད།

ཤེས་རིག་སློབ་ཡོན་ཚན་པའི་འགན་འཛིན་འཆི་མེད་ཚེ་དབྱངས་ལགས་ཀྱིས་འགྲེལ་བརྗོད་གནང་བ་ལྟར་ན། ད་ལྟའི་བར་རྒྱ་བལ་འབྲུག་གསུམ་གྱི་ས་གནས་ཁག་ ༢༦ ནས་བསྡོམས་པའི་སློབ་ཕྲུག་༤༩༡ གིས་སྙན་ཞུ་འབྱོར་ཏེ་ཚང་མ་ལྟ་སྐྱོང་གི་ཁོངས་སུ་ཡོད་པ་དང་། དེའི་ནང་ནས་སློབ་ཕྲུག་ ༩༦ འཛིན་གྲྭ་ལྔ་པ་ཐོན་ཏེ་བོད་ཁྱིམ་གཉིས་དང་སཾ་བྷོ་ཊ་བོད་སློབ་བཅས་སུ་སློབ་འཇུག་གི་རྒྱན་བརྒྱབ་ཚར་ཡོད་འདུག དམིགས་བསལ་ལྟ་སྐྱོང་ཐོབ་པའི་སློབ་ཕྲུག་ ༤༩༡ དེ་ཕྱི་ལོ་ ༢༠༡༤ ཟླ་ ༧ ཚེས་ ༡ སྔོན་ལ་སྐྱེས་པ་དང་། ཕྱི་ལོ་ ༢༠༡༤ ཟླ་ ༧ ཚེས་ ༡ རྗེས་སུ་སྐྱེས་པ་བཅས་རིགས་གཉིས་སུ་དབྱེ་ཡོད་པ་ལྟར། ཕྱི་ལོ་ ༢༠༡༤ ཟླ་ ༧ ཚེས་ ༡ སྔོན་ལ་སྐྱེས་པའི་སློབ་ཕྲུག་ཁྱོན་ ༣༥༢ ཡོད་པ་དང་། ཕྲུ་གུ་དེ་ཚོ་རང་ལོ་ ༣ ནས་འཛིན་རིམ་ ༥ པ་མ་ཐོན་བར་དུ་ཤེས་རིག་ལས་ཁུངས་ནས་ཟླ་རེར་སློབ་དོད་དང་བྱིས་གསོའི་དོད་ཧིན་སྒོར་ ༣༠༠ རེ་གནང་གི་ཡོད་པ་དང་། འཛིན་རིམ་ ༥ པ་ཐོན་མཚམས་བོད་ཁྱིམ་གཉིས་དང་སཾ་བྷོ་ཊ་བོད་སློབ་བཅས་སུ་སློབ་འཇུག་གི་རྒྱན་རྒྱག་དགོས་ལ།  སློབ་གྲྭ་གང་དུ་རྒྱན་ཐོབ་པ་ཡིན་ནའང་ཟས་གོས་གནས་མལ་ཐད་འགྲོ་གྲོན་གཅིག་ཀྱང་གཏོང་དགོས་ཀྱི་མེད་པ་རེད། དེ་ནས་མུ་མཐུད་ཉེ་བའི་གཙུག་ལག་རབ་འབྱམས་པ་བར་སློབ་སྦྱོང་བྱེད་འདོད་ཡོད་རིགས་ནས་འཛིན་རིམ་བཅུ་གཉིས་པའི་ཡིག་རྒྱུགས་ཁྲོད་བརྒྱ་ཆ་ ༦༠ ལོན་དགོས་པ་དང་། དེ་བཞིན་ལས་རིགས་ལག་རྩལ་སློབ་ཡོན་ཐོབ་པར་བརྒྱ་ཆ་ ༥༠ ལོན་དགོས་ཀྱི་ཡོད་ལ། བརྒྱ་ཆ་ལོན་པའི་སློབ་མ་རྣམས་ལ་དམིགས་བསལ་གནང་སྟེ་སློབ་ཁོངས་སོ་སོའི་གཏན་འབེབས་ཀྱི་སློབ་ཡོན་དེ་ཐོབ་ཀྱི་ཡོད་འདུག

རིགས་གཉིས་པ་སྟེ་ཕྱི་ལོ་ ༢༠༡༤ ཟླ་ ༧ ཚེས་ ༡ རྗེས་ལ་སྐྱེས་པ་ཁྱོན་ཕྲུ་གུ་ ༤༣ ཡོད་པ་དང་། ཕྲུ་གུ་དེ་ཚོ་སྐྱེས་པ་ནས་ལོ་དྲུག་མ་ཟིན་བར་དུ་ཤེས་རིག་ནས་ཟླ་རེར་སློབ་དོད་དང་བྱིས་གསོའི་དོད་ཧིན་སྒོར་ ༥༠༠ རེ་གནང་གི་ཡོད་པ་དང་། རང་ལོ་ ༦ ཟིན་མཚམས་བོད་ཁྱིམ་གཉིས་དང་སཾ་བྷོ་ཊ་བོད་སློབ་བཅས་ཀྱི་སློབ་འཇུག་རྒྱན་རྒྱག་གི་ཡོད་འདུག སློབ་ཕྲུག་འདི་རིགས་འཛིན་རིམ་ལྔ་པ་བར་ས་གནས་ཉིན་སློབ་ཏུ་སྐྱོད་དགོས་པའི་རྩ་འཛིན་ལམ་སྟོན་ལ་བསྟུན་དགོས་ཀྱི་མེད་པ་དང་། ཕ་མའི་སར་ས་གནས་ཉིན་སློབ་ཏུ་སྐྱོད་འདོད་ཡོད་རིགས་ལའང་འཛིན་རིམ་ ༥ པ་མ་ཐོན་བར་དུ་སློབ་དོད་དང་བྱིས་གསོའི་དོད་ཧིན་སྒོར་ ༥༠༠ དེ་གནང་གི་ཡོད་པ་རེད། མུ་མཐུད་ཉེ་བའི་གཙུག་ལག་རབ་འབྱམས་པ་བར་སློབ་སྦྱོང་བྱེད་འདོད་ཡོད་རིགས་ལ་དམིགས་བསལ་མཐོ་སློབ་སློབ་ཡོན་ཐོབ་པར་འཛིན་རིན་བཅུ་གཉིས་པའི་ཡིག་རྒྱུགས་ལ་བརྒྱ་ཆ་ ༦༠ ལོན་དགོས་པ་དང་། ལས་རིགས་ལག་རྩལ་གྱི་སློབ་ཡོན་ཐོབ་པར་བརྒྱ་ཆ་ ༥༠ ལོན་དགོས་ཀྱི་ཡོད་ལ། བརྒྱ་ཆ་ལོན་པའི་སློབ་མ་རྣམས་ལ་སློབ་ཁོངས་སོ་སོ་ནས་གཏན་འབེབས་ཀྱི་སློབ་ཡོན་གནང་གི་ཡོད་པ་དེའི་ཐོག་ཤེས་རིག་ནས་ལོ་རེར་ཧིན་སྒོར་ ༡༠༠༠༠ རེ་འཕར་མ་གནང་རྒྱུ་ཡིན་འདུག

འཆི་མེད་ཚེ་དབྱངས་ལགས་སུ་ཤེས་ཡོན་མཐུན་རྐྱེན་འདི་ཞུ་བར་ཆ་རྐྱེན་ཅི་དགོས་དྲིས་པར་ཁོང་མོས། ཤེས་ཡོན་མཐུན་རྐྱེན་འདི་ཐོབ་པའི་སློབ་ཕྲུག་རྣམས་འཛིན་རིམ་དང་པོ་ནས་བཅུ་པ་བར་བོད་སློབ་འགྲིམ་དགོས་པ་དང་། ཕ་མའི་དཔྱ་ཁྲལ་ལག་དེབ་དང་ཕྲུ་གུའི་ཁྲིམས་མཐུན་སྐྱེས་ཚེས་ལག་ཁྱེར་གཉིས་ངེས་པར་དུ་དགོས་པ་རེད། དཔེར་ན། ཕྲུ་གུ་དེར་ཤེས་རིག་དང་བོད་ཁྱིམ་ཁག་གཉིས། སཾ་བྷོ་ཊ་བོད་སློབ། དེ་བཞིན་སྤྱི་སྒེར་ཚོགས་པ་གང་རུང་ནས་སློབ་འཇུག་དང་སློབ་ཡོན་མཐུན་རྐྱེན་ཐོབ་བཞིན་ཡོད་ཚེ། མཐུན་རྐྱེན་ཉིས་ཟློས་ལེན་ཆོག་གི་མེད་ལ། ཤེས་ཡོན་མཐུན་རྐྱེན་འདི་ཞུ་མཁན་ཕ་མ་རྣམས་ཀྱིས་ལོ་རེའི་ཕྱི་ཟླ་༩ ཚེས་ ༡༠ འགྱངས་མེད་ཤེས་རིག་ལས་ཁུངས་སུ་སྙན་ཞུ་འབུལ་དགོས་ཀྱི་ཡོད་སྐོར་དང་། མ་འོངས་པར་རིམ་གྱིས་ལྟ་སྐྱོང་གི་མཐུན་རྐྱེན་ཇེ་ལེགས་སུ་འགྲོ་རྒྱུ་ཡིན་ལུགས་བརྗོད་བྱུང་།

འཕྲོད་བསྟེན་ལས་ཁུངས་ཀྱི་སྨན་བཅོས་ལྟ་སྐྱོང་ལས་གཞིའི་ལས་འཆར་དོ་དམ་པ་ཉི་མ་རྒྱལ་མཚན་ལགས་སུ། ད་ལྟའི་ཆར་ཕྲུ་གུ་གསུམ་དང་གསུམ་ལས་མང་བ་ཚོར་དམིགས་བསལ་འཕྲོད་བསྟེན་ལྟ་སྐྱོང་གི་ལས་གཞིའི་ནང་ཁྱིམ་ཚང་ག་ཚོད་ཡོད་པ་དང་། ཁོང་ཚོར་འཕྲོད་བསྟེན་ལྟ་སྐྱོང་ག་འདྲ་གནང་གི་ཡོད་སྐོར་དྲིས་པར། ཕྱི་ལོ་ ༢༠༡༦ དང་ ༢༠༡༧ ལོའི་སྨན་བཅོས་ལྟ་སྐྱོང་གི་ལས་གཞིའི་ནང་འཛུལ་ཞུགས་བྱས་ཡོད་པའི་ཕྲུ་གུ་གསུམ་དང་གསུམ་ལས་མང་བ་ཡོད་པའི་ཁྱིམ་ཚང་ ༤༦༡ ཡོད་པ་དང་། སྤྱིར་བཏང་ནང་མི་ ༢ ནས་ ༥ ཡོད་པའི་ཁྱིམ་ཚང་ནས་སྨན་བཅོས་ལྟ་སྐྱོང་གི་ཚོགས་དངུལ་ཁྱོན་ཧིན་སྒོར་ ༣༥༦༥ བསྡུ་དགོས་ཀྱི་ཡོད་ཀྱང་།  ད་ལྟའི་ཆར་ཨ་རིའི་རོགས་ཚོགས་ནས་བརྒྱ་ཆ་ ༧༠ གནང་གི་ཡོད་སྟབས། ནང་མི་ཆ་ཚང་བསྡོམས་ནས་ཚོགས་དངུལ་ ༡༠༧༠ མ་གཏོགས་བསྡུ་དགོས་ཀྱི་མེད་པ་དང་། སྤྱིར་མི་རེ་ནས་ཚོགས་དངུལ་ཧིན་སྒོར་ ༧༡༣ བསྡུ་དགོས་ཀྱི་ཡོད་ལ། མ་འོངས་པར་ཨ་རིའི་རོགས་དངུལ་ཆད་པ་ཡིན་ནའང་བཀའ་ཤག་གི་སྲིད་བྱུས་ནང་ཡོད་པ་ལྟར། འཕྲོད་བསྟེན་ལས་ཁུངས་ནས་སྐྱེད་མ་དང་། ཕྲུ་གུ་གསུམ་པ་དང་གསུམ་ལས་མང་བ་ཚོའི་སྨན་བཅོས་ལྟ་སྐྱོང་གི་ཚོགས་དངུལ་ཐད་བརྒྱ་ཆ་ ༡༠༠ ཡི་རོགས་རམ་མུ་མཐུད་དུ་གནང་རྒྱུ་ཡིན་སྐོར་བརྗོད་བྱུང་།

དམིགས་བསལ་ལྟ་སྐྱོང་གི་ཆ་རྐྱེན་ནང་རང་ལོ་ ༡༨ མ་བརྒལ་བ་ཡིན་དགོས་པའི་རྒྱུ་མཚན་གང་ཡིན་དང་། རང་ལོ་ ༡༨ བརྒལ་ན་སྨན་བཅོས་ལྟ་སྐྱོང་གི་ལས་གཞིའི་ནང་ཞུགས་ཀྱང་དམིགས་བསལ་ལྟ་སྐྱོང་དེ་ཐོབ་ཀྱི་མེད་པ་ཡིན་མིན་དྲིས་པར་ཁོང་གིས། སྤྱིར་བཏང་རང་ལོ་ ༡༨ བརྒལ་རྗེས་རང་མགོ་ཐོན་པ་དང་མ་ཐོན་པ་གཉིས་ཀ་ཡོང་སྲིད་པ་རེད། ཡིན་ནའང་། སྤྱི་ཡོངས་ཀྱི་ཆ་ནས་རང་ལོ་ ༡༨ བརྒལ་བ་ཡིན་ན་ཁྱིམ་ཚང་གི་འཚོ་བའི་གནས་སྟངས་སོགས་ག་རེའི་སྒང་ལ་ཡིན་ནའང་འགན་ལེན་ཐུབ་པ་དང་རྒྱབ་སྐྱོར་བྱེད་ཐུབ་པ་ཞིག་ཏུ་ངོས་འཛིན་བྱས་ཏེ། རང་ལོ་ ༡༨ མ་བརྒལ་བ་ཡིན་དགོས་པའི་ཆ་རྐྱེན་འདི་བཏོན་པ་ཡིན་ལ། གལ་སྲིད་ཁྱིམ་ཚང་གཅིག་ལ་ཕྲུ་གུ་གསུམ་དང་གསུམ་ལས་མང་བ་ཡོད་པ། རང་ལོ་ ༡༨ བརྒལ་བ་ཡིན་ནའང་ཁྱིམ་གྱི་གནས་སྟངས་སྐྱོ་བོ་ཡིན་ན། སྨན་བཅོས་ལྟ་སྐྱོང་གི་ལས་གཞིའི་ནང་ཚོགས་དངུལ་བསྡུ་སྐབས། ཚོགས་དངུལ་གྱི་བརྒྱ་ཆ་གང་ལ་གང་འཚམ་ཞིག་ལ་འཕྲོད་བསྟེན་ལས་ཁུངས་ནས་རོགས་རམ་གནང་བའི་སྡེ་ཚན་ཞིག་ཡོད་པ་དང་། སྡེ་ཚན་དེའི་ནང་འཛུལ་ན་འགྲིག་གི་རེད་ལ། དེ་བཞིན་བོད་མི་སྤྱི་མཚུངས་ལྟར་མ་དང་བྱིས་པའི་འཕྲོད་བསྟེན་ལྟ་སྐྱོང་གི་མཐུན་རྐྱེན་བླངས་ནའང་འགྲིག་གི་ཡོད་སྐོར་བརྗོད་བྱུང་།

ཤེས་རིག་སློབ་ཡོན་ཚན་པའི་བསྡོམས་རྩིས་ལྟར་ན། རྒྱ་བལ་འབྲུག་གསུམ་གྱི་བཙན་བྱོལ་བོད་མིའི་འདུས་སྡོད་ཁུལ་གྱི་ནང་ཕྲུ་གུ་གསུམ་དང་གསུམ་ལས་མང་བ་སྐྱེས་མཁན་མང་ཤོས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་ཁུལ་དུ་ཕྲུ་གུ་ ༨༢ དང་། ཨ་རུ་ན་ཅལ་མེའོ་གཞིས་ཆགས་སུ་ཕྲུ་གུ་ ༤༤། ཀོ་ལི་གྷལ་དོན་ལྡན་གླིང་དུ་ཕྲུ་གུ་ ༣༧ འདུག

གསར་འགོད་པ། པདྨ་མཚོ།