རྒྱ་གཞུང་གིས་རང་ལུས་མེར་བསྲེགས་ཀྱི་གནས་ཚུལ་དང་འབྲེལ་བ་ཡོད་པའི་ཉེས་མིང་འོག་ལོ་༢དང་ཕྱེད་ཀྱི་བཙོན་འཇུག་ཁྲིམས་ཐག་བཅད་པའི་གྲྭ་བློ་བཟང་ཏིང་འཛིན་ལགས་ཀློད་གྲོལ་བཏང་ཡོད་འདུག
འདི་གར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༢༠ ཉིན་གྱི་སྔ་དྲོར་མཛོད་དགེ་སོག་ཚང་དགོན་པའི་དགེ་འདུན་པ་བློ་བཟང་ཏིང་འཛིན་ལགས་བཙོན་འཇུག་དུས་ཡུན་རྫོགས་ཏེ་ཀློད་གྲོལ་བཏང་ཡོད་པ་དང་། ཁ་སང་ཕྱི་ཚེས་ ༢༣ ཉིན་ཕ་ཡུལ་དུ་འབྱོར་ཏེ་ཁོང་གི་ཁྱིམ་མི་གཉེན་འབྲེལ་དང་ཡུལ་སྡེའི་མི་མང་གིས་མཇལ་དར་བསྒྲོན་ཏེ་ཕེབས་བསུ་ཞུས་ཡོད་འདུག
ཕྱི་ལོ་ ༢༠༡༣ ཟླ་ ༧ ཚེས་ ༢༠ ཉིན་གྱི་སྔ་དྲོར། མཛོད་དགེ་སོག་ཚང་དགོན་དུ་དགེ་འདུན་པ་དཀོན་མཆོག་བསོད་ནམས་ལགས་ཀྱིས་བོད་དོན་ཆེད་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་པ་དང་། ཕྱིས་སུ་རྒྱ་གཞུང་གིས་རང་ལུས་མེར་བསྲེགས་ཀྱི་གནས་ཚུལ་དེ་དང་འབྲེལ་བ་ཡོད་པའི་ཉེས་མིང་འོག སོག་ཚང་དགོན་པའི་དགེ་འདུན་པ་སངས་རྒྱས་དཔལ་ལྡན་ལགས་དང་བློ་བཟང་ཡོན་ཏན་ལགས། བློ་བཟང་ཏིང་འཛིན་ལགས་བཅས་འཛིན་བཟུང་བྱས་ཏེ་ཡུན་རིང་མཛོད་དགེ་རྫོང་ཐོག་ཏུ་བཀག་ཉར་འདྲི་རྩད་བྱས་རྗེས། མཛོད་དགེ་རྫོང་མི་མང་ཁྲིམས་ཁང་ཟེར་བས་སངས་རྒྱས་དཔལ་ལྡན་ལགས་ལ་ལོ་ ༥ དང་། བློ་བཟང་ཡོན་ཏན་ནམ་ཡོན་ཏན་བྱི་ཕྲུག་ལགས་ལ་ལོ་༣། བློ་བཟང་ཏིང་འཛིན་ལགས་ལ་ལོ་ ༢ དང་ཕྱེད་བཅས་ཀྱི་ཁྲིམས་ཐག་བཅད་དེ། སི་ཁྲོན་ཁྲིན་ཏུའུ་གྲོང་ཁྱེར་གྱི་ཉེ་འཁྲིས་སུ་ཡོད་པའི་ཏི་ཡཱང་བཙོན་ཁང་དུ་བཅུག་ཡོད་པ་དང་། བློ་བཟང་ཡོན་ཏན་ལགས་དང་སངས་རྒྱས་དཔལ་ལྡན་ལགས་གཉིས་ད་དུང་བཙོན་ཁང་དུ་ཡོད་འདུག
གསར་འགོད་པ། པདྨ་མཚོ།
༅༅། ཁྱེད་ལ་གདུང་སེམས་མཉམ་བསྐྱེད་དང་བཀྲིས་བདེ་ལེགས་ཡོད།
དྲང་མིན་སྐྱག་རྫུན་པ་རྒྱ་དམར་པོས་ཁྱེད་ལ་སྡུག་དཀའ་ལས་མང་པོ་བཏང་ཡོད་ས་རེད།
ཁྱེད་སེམས་མ་སྡུག་ ཁྱོད་རྒྱལ་ཞེན་པ་ཞིག་་རེད། བོད་གངས་པར་འདི་འདྲ་བའི་སྡུག་པོ་བཏང་པ་
ཅི་ཡིན། ལྷ་སྲུང་མ་གང་ན་བཞུགས་ཡོད། གཟིགས་ཀྱི་མི་འདུག་གམ།
བོད་གངས་ཅན་མི་རིགས་འདི་སྐྱོབས་པར་ཞུ།